Isaya
3 Kusangwa lebaya! Yehova w’emilondo, Omukama w’ekwenene,
Anemulusya omo Yerusalema ne Yuda omuhanda wosi w’obuwatikya, n’obuli muhanda w’ahakalua eky’erirya,
Ahosi ahakalua akalyo* n’amaghetse,
2 Omulume w’amaka n’embangyi,
Omutsweri n’omuminyereri, omulaghuli n’omusyakulu,
3 Omukulu wa 50, omundu w’olukengerwa, n’omuhani,
Omukumu oyukalire n’omusaki oyukalire.
4 Ngendisyayira abalwana mo banya-mwami babo,
N’oyutawite ekyo aliko* akendisyatabala kubo.
5 Abandu bakendisyanubania,
Obuli mundu akendisyanubya omulikyabo.
Omulwana akendisyayikya oko musyakulu,
N’omundu oyughonerwe akendisyapokya omundu oyusikibwe.
6 Obuli mundu akendisyahamba mughala wabo omo nyumba ya baba wiwe n’eribugha ati:
“Iwe uwite erikoti—ubye musondoli wetu.
Uhanganire ekilundo ky’ebisambukalirya eki.”
7 Aliwe oko kiro ekyo akendisyahanda n’eribugha ati:
“Sinendibya munganga* w’ebironda byenyu;
Omo nyumba yaghe singwitemo akalyo kutse esyongyimba.
Isimwaniyira mo musondoli w’abandu.”
8 Kusangwa Yerusalema abiritwikala,
Na Yuda abiriwa,
Kusangwa bakalwa na Yehova omo binywa n’omo mikolere;
Bakayighendaya omo pono embere sy’olukengerwa lwiwe.*
9 Erisosa ly’obusu bwabo likatsongerabo,
Kandi bakatulaghanaya erilolo nge Sodomo;
Sibalipima n’eribisalyo.
Obulighe okw’ibo* kusangwa bakayiletera obuhanya!
10 Mubwire abatunganene ngoko emyatsi ikendibaghendera ndeke;
Ngoko bakendihembwa busana n’ebyo bakakola.*
11 Obulighe oko mubi!
Obuhanya bukendimuhikira,
Kusangwa akendikolerwa ebyo ebyala biwe byakola!
12 Nikwa abandu baghe, abaherebo emibiiri bakanubayabo,
N’abakali bakatabala kubo.
Bandu baghe, abasondoli benyu bakaleka imwaghanga-ghanga,
Kandi bakaliba-libanaya esyonzira syenyu.
13 Yehova abirihangana busana n’eritsongera;
Ahangene busana n’eritswera ebitunga by’abandu.
14 Yehova akendisyatswera abasyakulu b’abandu biwe n’abanya-mwami babo.
“Mwabiritimya eririma ly’emizabibu,
N’ebyo mwiba oko bera, bine omo manyumba wenyu.
15 Mukatoka muti erihinolera abandu baghe
N’erighogha* amusu w’abera omo lututu? Omukama Mukulu Oko Bosi, Yehova w’emilondo atya.
16 Yehova ati: “Kusangwa abali be Sioni bakayihaghata,
Bakaghenda ibanasumbire emitwe,*
Bakabonga-bonga omo meso wabo, bakaghenda bakayidahangula,
N’eribuya-buya ehibangila* hy’oko bisando byabo,
17 Yehova akendisyaghusa oko mitwe y’abambesa be Sioni kw’obukoni bw’ebikokyo,
Kandi Yehova akendisyasukula esyombumo syabo.
18 Ekiro ekyo Yehova akendisyalusyaho erikangabasania n’ehibangila* hyabo,
Ebilemba by’oko mutwe n’amapambo awasosire omughenda muhya,
19 Amaningita,* ehibangila, n’ebitambara,
20 Ebilemba by’oko mutwe, emiseghe y’oko bukungulu,* n’ebilemba by’oko kikuba,*
Ebindu by’amanukato n’esyongisa,*
21 Esyombuka sy’oko minwe n’esy’oko nindo,
22 Esyokanzu sy’eryambala oko makinga, ehikoti hy’ebigoi, amakoti, n’ehighunza hy’eriheka omo byala,
23 Ebiyo by’omo byala n’esyongyimba sy’ekitani,*
Ebilemba n’ebitambara.
24 Omo mwanya w’amaghuta w’ezeri, hakendisyabya ekikumbo ky’ebindu ebihondire;
Omo mwanya w’omukaba, omuliki;
Omo mwanya w’esyonzwiri esikokotibwe ndeke, oluhala;
Omo mwanya w’olukimba lw’obughuli bunene, olukimba lw’esaki;
N’esyongolu omo mwanya w’erighamba.
25 Abalume baghu, bakendisyawa omo muyali,
N’abalume baghu b’amaka omo malwa.
26 Obwingiriro bwe Sioni, bukendisyalira n’eribya omo bulighe,
Nayo ikendisyikala oko kitaka iyabirisighanibwa.”