Isaya
21 Omulaghe w’eritswera owalebirye embwarara y’engetse:*
Obuhanya bunemwasa ng’ekihunga ky’embula ekikabiraya omo luhande lw’eyikwa,
Erilua omo mbwarara, erilua omo kihugho ekikubahaya.
2 Nabiribwirwa esyonzoli esikalire:
Ow’amatebo anemukola omo matebo,
N’oyukaheraya anemuherya.
Uhetuke, iwe Elamu! Ubambire, iwe Media!
Ngendibughaho erisimba ryosi eryo aleta.
3 Kikaleka inabya omo bulumi bunene.*
Ngasukasukana ng’omukali oyukabuta,
Nikwire obulighe bunene busana n’eryowakyo;
Ngahandabuka busana n’erilangirakyo.
4 Omutima waghe akapuka-puka; ngasukana busana n’obuba.
Otwirimya tw’erigholo-gholo oto nabya ngakandira tukaleka inatitimana.
5 Muteghekanaye emesa n’eritonda ebitumbi!
Mulye n’erinywa!
Inywe banya-mwami, muhangane muhire oko ngabo kw’amaghuta!*
6 Kusangwa Yehova abirimbwira ati:
“Ughende, uhireho omulebya naye abughe ebyo akalangira.”
7 Naye mwalangira engurubani y’amalwa* n’ekihyo ky’esyosabayiri,
Engurubani y’amalwa y’esyopunda,
Engurabani y’amalwa y’esyongamia.
Mwatungerera ndeke-ndeke, n’obulengekania bwiwe bwosi.
8 Neryo mwabirikira ng’endale ati:
“Yehova, omo musibo ngabya inyinimene oko kaleberyo butsira eryumbya,
N’obuli kiro omo kiro ngabya inyinimene aho ngakolera obuteya.
9 Mulebaye ekikasa:
Abalume b’amalwa haghuma n’ekihyo ky’esyosabayiri!”
Neryo mwabugha omo mulenge munene ati:
“Yabiritera! E Babiloni yabiritera!
Abiritsutsangira esyosanamu syosi sy’emiungu yiwe sy’ahisi!”
10 Inywe bandu baghe, inywe mwabirihumbwa,
Inywe mulyahumbirawa* omo kihumbiro kyaghe,
Nabiribabwira ebyo nabiryowa erilua oko Yehova w’emilondo, oMungu wa Israeli.
11 Omulaghe w’eritswera owalebirye e Duma:*
Omundu anemunibirikirako erilua e Seiri ati:
“Muteya, biri biti busana n’ekiro?
Muteya, biri biti busana n’ekiro?”
12 Omuteya mwabugha ati:
“Etututu inemwasa, n’ekiro kutya.
Mwamabya mwanzire eribulya, mubulaye.
Mutasyasa!”
13 Omulaghe w’eritswera owalebirye eribanda ry’embwarara:
Mukendighotsera omo musitu, omo ribanda ry’embwarara,
Inywe mikololo ye Dedani.
14 Mulete amaghetse eriyahindana n’oyukwire enyota,
Inywe bikalani b’ekihugho kye Tema,
Mulete n’akalyo* busana n’omundu oyukatibita.
15 Kusangwa babiritibita bakasagha emiyali, bakasagha omuyali owabirilusibwa omo lubo,
Bakasagha obuta obwabirikakibwa, na busana n’erisagha obukatsu bw’amalwa.
16 Kusangwa bino byo Yehova abirinibwira: “Omo mwaka mughuma, ng’emyaka y’omuhingyi oyukalihawa, olukengerwa lwosi lwe Kedari lukendihwa.* 17 Abalasi b’emisoha abasaka oko syombangyi sye Kedari bakendisyakeha, kusangwa Yehova oMungu wa Israeli abiribugha.