Isaya
22 Ebinywa by’eritswera ebilebirye omusya w’esyonzoli* biti:
Ukwireki kyo kikaleka abandu baghu bosi ibirukira oko syonyutwe sy’amanyumba?
2 Wabya woswiremo eribulungana,
Iwe muyi w’olukanda, iwe muyi owalimo eritsanga-tsanga.
Abandu baghu abitawa sibiitawa omo muyali,
Kutse sibakwira omo malwa.
3 Abatabali baghu abakatsu babiritibita haghuma.
Mubayirwa mo bandu b’omuliki butsir’ikolesya obuta.
Abandu bosi abeyibawa mubayirwa mo bandu b’omuliki,
Nomo banabya ibabiritibita hali.
4 Kyo kyaleka inabugha niti: “Munilusayeko ameso,
Ngandilira kutsibu.
Isimwahatikana erinikirania busana n’eriheribwa ry’abali* b’abandu baghe.
5 Kusangwa ni kiro ky’eribulungana eky’erikindwa n’ekyeribya omw’ihandabuka,
Erikalua oko Mukama Mukulu, Yehova w’emilondo,
Omo Musya w’esyonzoli.
Oluhimbo lunemuhimbulwa
N’oko kitwa kuli ekiriro.
6 Elamu amimya olubo
Haghuma n’esyongurubani* esirimo abandu n’esyosabayiri,*
Na Kiri amahulukya* engabo.
7 Emisya* yaghu eyuwene kutsibu
Yikendisyusulamo esyongurubani sy’amalwa,*
N’esyosabayiri* sikendisyimana oko lukyo,
8 N’ekindu ekikabisa Yuda kikendisyalusibwaho.
“Oko kiro ekyo, mukendisyalangira ekibikiro* ky’ebindu by’amalwa eby’Enyumba y’Omusitu, 9 Kandi mukendisyalangira ebyuna omo muyi wa Daudi. Kandi ukendisyateha amaghetse w’ekiriba ky’eyikwa. 10 Mukendisyaghanza amanyumba we Yerusalema, kandi mukendisyaterya amanyumba busana n’eritasyawatya oluhimbo. 11 Kandi mukendsyakokotya ekibeseni omo kati-kati k’esyombimbo ibiri busana namaghetse w’ekiriba kya kera, nikwa simwendisyatungerera Omukoli wakyo Mukulu, kandi simwendisyalangira Oyo wakokotayakyo kera-kera.
12 Ekiro ekyo, Omukama Mukulu oko Bosi, Yehova w’emilondo,
Akendisyabirikira habye ekiriro n’erisusumana,
Habye erisisa emitwe n’eryambala esyongyimba esy’esaki.*
13 Nikwa omo mwanya w’ekyo hakendisyabya ekisendebele n’eritsema,
Erikera esyonde n’esyombuli,
Erirya esyonyama n’erinywa edivai.
‘Muleke tulye n’erinywa, kusangwa omungya itwahola.’
14 Neryo Yehova w’emilondo mwayibisula okw’ingye omo matwi waghe ati: “‘Simwangahanulira erilolo eri erihika aho mukendisyaholera,’ Yehova w’emilondo Omukama Mukulu oko bosi atya.”
15 Yehova w’emilondo Omukama Mukulu oko Bosi ati: “Ughende eyiri omuhanganiri w’enyumba ye Shebna, oyukimanira enyumba,* umubwire uti, 16 ‘Uwite hano hoki, kandi uwite hano ho ndi kyo kikaleka iwayibatsira ah’eritabwa? Anemuyibatsira ah’eritabwa omo mwanya owayisumbire; anemuyibatsira ah’eriluhukira* omo lukuka. 17 Lebaya! Iwe mulume, Yehova akendikutuda* ahisi ho kutsibu, n’erikutswirira. 18 Kwenene akendisyakusenga kutsibu n’erikusina ng’omupira omo kihugho ekihalire, ukendisyaholera eyo, n’eyo, olukengerwa lw’esyongurubani* syaghu lukendisyabya sisoni busana n’enyumba y’omukama waghu. 19 Kandi ngendisyakulusya aho uli n’erikulusya oko kasi.
20 Ekiro ekyo ngendisyabirikira omughombe waghe ye Eliakimu mughala wa Hilkia. 21 Ngendisyamwambalya ekanzu yaghu, nerimubohako ndeke-ndeke omukaba waghu w’omo kanzu. Kandi ngendisyamuha ehamuli* yaghu. Naye akendisyabya tata busana n’abikalani be Yerusalema n’ow’enyumba ya Yuda. 22 Ngendisyahira olufungura lw’enyumba ya Daudi oko kitigho kiwe. Akendisyakingula isihali oyuwangakinga, kandi akendisyakinga isihali oyo wangakingula. 23 Ngendisyamukongomerera ng’engondo* omo mwanya ow’erikota, kandi akendisyabya kitumbi ky’obwami ky’olukengerwa busana n’enyumba ya baba wiwe. 24 Kandi bakendisyamuhanikako olukengerwa* lwosi lw’enyumba ya baba wiwe, abana,* n’olubuto, ebibakuli byosi ebike-bike, ebibakuli ebiri nga bibindi, kutya n’amalegha wosi manene-manene.
25 Oko kiro ekyo, Yehova w’emilondo ati,’ engondo eyabirikongomererwa omo mwanya w’erikota, ikendisyalusibwaho, kandi kikendisyatwibwa n’eritera, n’omuheke owabya kuyo akendisyawa n’eritsanda, kusangwa Yehova iyuwene-wene abiribugha.”’