Isaya
26 Oko kiro ekyo, olwimbo luno lukendisyimbwa omo kihugho kye Yuda:
“Tuwite omuyi owasikire.
Akayira* omulamo mo mbimbo syagho n’ahakongotere hagho.
2 Mukingule esyongyo ekihanda ky’eritunganene kyingire,
Ekihanda ekikayighendaya omo butaleghula.
3 Ukendisyateya abakakughemera* ndeke-ndeke;*
Ukendisyahabo obuholo obutehwa,
Kundi n’iwe bakayiketera.
4 Muyiketere Yehova kera na kera,
Kusangwa Yah,* Yehova ni Lukuka lwa kera na kera.
5 Kusangwa abikere endata, omuyi owali endata, abirikimiryabo ahisi.
Akakimayagho,
Akakimirayagho oko kitaka;
Akaghusagho omo lututu.
6 Ekisando kikendisyalyatangiriragho,
Ebisando by’abakanuba, ebisando by’abandu b’ahisi.
7 Enzira y’omutunganene ilungukere.*
Kusangwa ulungukere,
Ukendikomererya enzira y’omutunganene.
8 Yehova, omughulu tukakwama enzira y’eritswera lyaghu,
N’iwe tukahirako amaha.
Tukayitsutsa* erina ryaghu n’eryibukwa lyaghu.*
9 Omo kiro ngakukandira ingye wosi,*
Inga, ekirimu kyaghe kikabera erikusonda-sonda;
Kusangwa omughulu hali eritswera erikalua okw’iwe busana n’ekihugho,
Abikalani b’oko kihugho bakigha oko ritunganene.
10 Omubi nomo angakanganibwa olukogho,
Syangigha eritunganene.
Nibya n’omo kihugho ekilungukere,* iniakendikola ebibi,
Kandi syangalangira obukuluu bwa Yehova.
11 Yehova, ebyala byaghu binasumbire, nikwa sibelangirabyo.
Bakendilangira omuhwa ogho uwite busana n’abandu baghu, neryo ibahemuka.
Inga, omuhwa busana n’esyonzighu syaghu akendisyabughabo.
12 Yehova, ukendituha obuholo,
Kusangwa ebyosi ebyo twabirikola
N’iwe wabiritukolerabyo.
13 Yehova, abandi bakama, butsira we, babiritutabalako,
Nikwa erina lyaghu lisa lyo tukahula.
14 Baholire; sibendibyaho.
Ni bandu abatawite amaka kundi babirihola, sibendibuka.
Kusangwa wabirihira kubo kw’obulengekania bwaghu.
Eritoghotyabo n’eriherya erina ryabo ryosi.
15 Yehova, wabirikanyia ekihanda,
Wabirikanyia ekihanda;
Wabiriyiha olukengerwa.
Wabirikanyirirya kutsibu emipaka yosi y’ekihugho.
16 Yehova, omo bulighe bwabo mubakusonda-sonda;
Mubakutulira omusabe wabo omo bihwehwe omughulu wakungabo.
17 Ngoko omukali oyukisiya iniabuta
Akanabya n’obulumi n’eriyilakira busana n’amaghali,
Netu ko twabiribya tutya busana naghu, Yehova.
18 Mutwabya bakule, mutwabya n’obulumi bw’eributa,
Aliwe mukyabya nga twabiributa erihunga lisa,
Sitwetaleta omo kihugho mw’omulamo,
Kandi sihali oyo wabiributwa eriikala omo kihugho.
19 Abaholi baghu bakendisyabyaho.
Ebinda byaghe* bikendisyahangana.
Mubuke, mute obwogho bw’obutseme,
Inywe mwikere omo lututu!
Kusangwa ekimi kyaghu kiri ng’ekimi ky’engyakya-ngyakya,*
N’ekitaka kikendisyaleka ababiribula amaka omo luholo ibasuba oko ngebe.*
20 Bandu baghe, mwingire omo byumba byenyu by’emwisi,
Muyikingire.
Muyibise omo katambi kake
Erihika aho erihitana* likendilabira.
21 Kusangwa lebaya! Yehova anemwasa erilua aho wiwe
Erisyabirikira abikalani b’ekihugho base batonde busana n’erilolo lyabo,
N’ekihugho kikendisyabisula omusasi owutawa kukyo
Kandi sikyendisyasyaswika abandu bakyo abitawa.”