Isaya
27 Oko kiro ekyo, Yehova omo muyali wiwe owakalire kandi omunene n’owasikirre,
Akendisyabindukira e Leviatani,* enzoka eyikanyururuka,
Akendisyabindukira e Leviatani, enzoka eyikayinyola-nyola,
Kandi akendisyita enyama nene y’omo ngetse.
2 Oko kiro ekyo, musyimbira omukali* oyo muti:
“Eririma ry’emizabibu ry’edivai eyikabimba!
3 Ingye, Yehova ninemumuteya.
Oko buli ndambi ngamutangirira amaghetse.
Ngamuteghaya omo kiro n’omo musibo,
Sihabye oyukamukola nabi.
4 Sindimo obuhitane.
Nindi yukendyasa erilwa naghe inyane n’ebiti n’ehiti hy’amahwa?
Ngendilyatangirirabyo n’erihisya ebyosi omo muliro.
5 Bite bitya, uleke amakirire ahakongotere haghe.
Akole obuholo naghe;
Obuholo bo anakole naghe.”
6 Omo biro ebikasa, Yakobo akendisyalasya emirihi,
Israeli akendisyasako omusanga n’erisasa,
Kandi bakendisyusulya omo kihugho mw’ebighuma.
7 Linatolere iniahunzwa ebihunze by’oyukamuhunza?
Kutse linatolere inyitwa ng’omw’ikerwa ry’abandu biwe abalyakerawa?
8 Omo mulenge w’erisisirya, ukendisyalwa naye ukamuhigha.
Ukendisyamuhigha omo muhayo wiwe owakalire oko kiro ky’erihunga ry’eyo eryuba rikasira.
9 Neryo omo nzira eyi erilolo rya Yakobo rikendisyahanulirwa,
N’eki kyo kikendisyaluiramo omughulu erilolo liwe rikendisyalusibwa:
Akendisyayira amabwe wosi w’ekiherero
Eribya ng’amabwe w’embemba awabiritundulwa,
Sihali enduyi eyibuyirire* kutse emitaghala y’obukwa eyikendisyasighala.
10 Kusangwa omuyi owakongotere akendisyasighanibwa;
Ebilisiryo bikendisyasighanibwa n’erilekeranibwa ng’embwarara.
Ekyana ky’ende kikendisyalira eyo n’eribundamayo
N’erirya emitahi yiwe.
11 Ehisali-sali hiwe hikendisyabya hyabyuma,
Abakali bakendisyasa, ibasenyahyo,
Ibakya muhyo mw’omuliro.
Kusangwa abandu aba sibawite bwenge.
Kyo kikaleka Omuhangyiki wabo iniatakanganiabo obughanyiri bwosi-bwosi,
N’oyo wahangyikabo syendisyakanganiabo olukogho.
12 Oko kiro ekyo, Yehova akendisyahunza amatunda erilua oko Lusi* lunene olukasenda erihika oko Musya Owakumamo Amaghetse owe Misri, nenyu mukendisyahindanibwa mo mughuma-mughuma, inywe bandu ba Israeli. 13 Oko kiro ekyo, engubi nene ikendisyabuhwa, n’abakahera omo kihugho kye Asiria n’abapanzikene omo kihugho kye Misri bakendisyasa n’eryunama embere sya Yehova oko kitwa kibuyirire e Yerusalema.