Isaya
37 Omwami Hezekia abere abinowa ebinywa ebi, mwatulanga esyongyimba siwe, amambala olukimba lw’esaki* n’eringira omo nyumba ya Yehova. 2 Neryo, mwatuma Eliakimu omwimaniri w’enyumba, Shebna omuhandiki, n’abasyakulu b’abahereri eyiri omuminyereri Isaya mughala wa Amozi. Abosi babya ibanambite esyongyimba sy’esaki.* 3 Mubabwira Isaya bati: “Hezekia ati, ‘Munabwire ni kiro ky’obulighe, ekiro ky’erihayirwa,* n’ekiro ky’erihemuka; kusangwa abana babiribya b’eributwa,* nikwa sihali akaghala k’eributabo. 4 Kwa muhwa Yehova oMungu waghu anemwendyowa ebinywa by’Omurabshake, oyo omukama wiwe, omwami we Asiria alyatuma erisyasekererya oMungu oyuliho, kandi kwa muhwa akendimutswera busana n’ebinywa ebyo Yehova oMungu waghu alyowa. Neryo usabire emisighalira y’abandu abalyasaka.’”
5 Neryo abaghombe abo Omwami Hezekia atuma mubahika eyiri Isaya. 6 Isaya mwabwirabo ati: “Muyabwire omukama wenyu muti, “Yehova ati: “Isighubaha busana n’ebinywa ebyo ulyowa, ebitsumi ebyo abaghombe b’omwami we Asiria balyanibughako. 7 Ngamuhiramo amalengekania malebe. Akendyowa omwatsi mulebe owakendileka inyasuba omo kihugho kiwe; kandi ngendileka iniakwa omo muyali omo kihugho kiwe.”’”
8 Omurabshake mwabya abyowa ngoko omwami we Asiria abirilusya abasuda biwe be Lakishi, mwasubula, amaya eyo ali. Mweya inianemulwa n’omuyi we Libna. 9 Neryo omwami we Asiria mwowa bakabugha oko Mwami Tiraka we Etiopia ambu: “Abiryasa, erisyalwa naghu.” Mwabya abyowa eki, mwasyatuma abandu ati bayabwire Hezekia bati: 10 “Mubwire Hezekia, omwami we Yuda, muti, ‘OMungu waghu, oyo wabiriyiketera, isyakuteba omw’ibugha ati: “Omwami we Asiria syendihamba omuyi we Yerusalema.” 11 Si wabiryowa ebyo abami be Asiria bakolera ebihugho byosi ebyo batoghotaya. Ukalengekanaya uti n’iwe ukendibala? 12 Emiungu y’ebihanda ebyo abotata-kulu waghe batoghotaya muyanatoka erilamyabyo kwehi? Gozani, Harani, Rezefu, n’abandu be Edeni ababya e Tel-asari, bali hayi? 13 Omwami we Hamati, omwami we Arpadi, n’omwami w’omuyi we Sefarvaimu, n’owe Hena, n’owe Iva, bali hayi?’”
14 Hezekia mwimya esyobaruha esyo abatumwa bamuletera, amasomasyo. Neryo mwaya eyiri enyumba ya Yehova, amasanzasyo* embere sya Yehova. 15 Neryo Hezekia mwasaba Yehova ati: 16 “Kisi, Yehova w’emilondo, oMungu wa Israeli, iwe wikere oko kitumbi ky’obwami endata* oko bakerubi, iwe musa iwe Mungu w’ekwenene omo mami wosi w’oko kihugho. Iwe wahangyika olubula n’ekihugho. 17 Yehova, uteghe amatwi n’erihulikira. Yehova, utungerere, ulangire. Hulikirira ebinywa ebyo Senakeribu alyabugha erikupuma,* iwe Mungu oyuliho. 18 Yehova, ni kwenene abami be Asiria babiritoghotya ebihugho byosi kutya n’ekihugho kyabo. 19 Kandi babirighusa emiungu y’ebihanda ebyo omo muliro, kundi si yabya miungu, aliwe ni bindu ebyo abandu bakokotaya omo miti n’amabwe. Ekyo kyo kyaleka ibatoka eritoghotyayo. 20 Neryo lino Yehova, Mungu wetu, utulamaye oko byala by’omwami we Asiria, neryo amami wosi w’oko kihugho akendiminya ngoko iwe musa, Yehova, n’iwe Mungu.”
21 Neryo Isaya mughala wa Amozi mwalayira oko Hezekia ati: “Yehova, oMungu wa Israeli, ati, ‘Kundi wabirinisaba busana n’Omwami Senakeribu we Asiria, 22 Yehova abiribugha oko mwami oyo ati:
“Omubikira, omwali we Sioni, akakukwa esyonye, kandi akakuseka.
Omwali we Yerusalema akakutsingiraya omutwe.
23 Nindi yo ulyapuma* n’eritsuma?
Nindi yo ulyasumbira omulenge waghu?
Nindi yo ulyasumbira ameso waghu w’obutakenga?
Omubuyirire wa Israeli yo ulyakolera utya!
24 Wabiripuma* Yehova erilabira abaghombe baghu, n’eribugha uti,
‘Ngendihetukira oko syosingyi sy’ebitwa
N’esyongurubani* syaghe nyingyi kutsibu esy’amalwa,
Ngendiya omo biharo by’ehali-hali bye Lebanoni.
Ngendikonda emiti yayo miri-miri* ey’emierezi, ekilaghu kyayo ekyuwene.
Ngendingira omo myanya y’eribisamamo ye Lebanoni eyiri endata yo hali-hali.
Ngendingira omo misitu yayo eyisoka-sokene.
25 Ngenditakula amabulu n’erinywa amaghetse;
Ngendyumya esyonyusi sye Misri omo bulyatiro bw’ebisando byaghe.’
26 Siwewatowa? Kyabirisohwa* erilua kera.
Nabiriteghekania* omwatsi oyo erilua kera.
Neryo lino, ngendikolagho.
Emiyi eyikongotere, ukendiyirayo mo bilundo by’ebisambukalirya.
27 Abandu b’omo miyi eyo, sibendisyabya n’akaghala.
Bakendisyatitimana n’erihemuka.
Bakendisyabya ng’ebiti by’omwirima, bakendisyabya ng’ebiti bibisi,
Bakendisyabya ng’ebiti ebiri oko lutwe, ebikuma busana n’ekihunga ekikaluira oko luhande lw’eyo eryuba rikasira.
28 Aliwe ninasi ndeke omughulu ukikala, omughulu ukahuluka, omughulu ukingira,
N’omughulu ukanihitanako kutsibu,
29 Kusangwa nabiryowa ngoko wabirinihitanako kutsibu kandi ngoko wabirinirurumira.
Neryo ngendihira oburobo bwaghe omo nindo yaghu, n’erihira oko minywa yaghu kw’akuma kaghe k’erisondolamo esabayiri,
Kandi ngendikusubulya omo nzira eyo ulyasiramo.”
30 “‘Na kino kyo kikendikukangania ngoko emyatsi eyo ikendibya: Oko mwaka ono, mukendirya ebiryayilasira; n’oko mwaka owakasa, mukendisyalya ebikendisyera oko syombuto esiryayitoghongera oko mwaka ono; aliwe oko mwaka w’akasatu, mukendisyahera embuto n’erighesa, kandi mukendisyahera amalima w’emizabibu n’erirya amatunda wagho. 31 Abandu b’enyumba ya Yuda abakendisyabala, ni bugha ambu, abakendisyasaka, bakendisyahanda emirihi yabo omo kitaka mw’emwisi n’erihetya amatunda. 32 Kusangwa abakendisyasaka bakendisyalua e Yerusalema n’abakendisyabala bakendisyalua oko kitwa kye Sioni. Omuhwa wa Yehova w’emilondo akendisyakola eki.
33 “‘Neryo bino byo Yehova akabugha oko mwami we Asiria:
“Syendingira omo muyi ono
Syendighusamo omusoha* n’omughuma
Syendilwa nagho omo ngabo
Kutse syenditimbya kugho kw’oluba lw’eribambiragho.
34 ‘Akendisubula omo nzira eyo alyasiramo;
Syendingira omo muyi ono,’ Yehova atya.
35 ‘Ngendilwira oko muyi ono n’erilamyagho busana n’erina lyaghe
Na busana n’omughombe waghe Daudi.’”
36 Neryo omumalaika wa Yehova mwasa omo kambi y’Abaasiria, amitamo abasuda 185 000. Abandu babere babuka omo tututu, mubalangira ebinda byosi. 37 Neryo Senakeribu, omwami we Asiria, mwasubula. Mwaya e Ninawi, amikalayo. 38 Kiro kighuma, inianemunama omo hekalu* ya Nisroki omungu wiwe, abaghala biwe ye Adrameleki na Sharezeri mubamwita omo muyali, neryo bamatibita omo kihugho kye Ararati. Enyuma sy’aho, mughala wiwe ye Esar-hadoni mwabya mwami omo mwanya wiwe.