Isaya
38 Oko biro ebyo, Hezekia mwalwala; abya okw’ihola. Omuminyereri Isaya, mughala wa Amozi, mwayamubana. Mwamubwira ati, “Yehova ati: ‘Uhe ekihanda kyaghu ky’obusondoli, kundi siwendilama, ukendihola.’” 2 Hezekia mwabya abyowa ekyo, mwabindukirya obusu bwiwe oko luhimbo, amasaba Yehova ati: 3 “Yehova, ngakulemba-lemba, kisi wibuke ngoko nabiribya mutaleghula okw’iwe, kandi ngoko nabirikukolera n’omutima wosi. Kandi wibuke ngoko nabirikola ebyuwene omo meso waghu.” Neryo Hezekia mwalira kutsibu.
4 Neryo ekinywa kya Yehova mukyahika oko Isaya kiti: 5 “Usube eyiri Hezekia umubwire uti, ‘Yehova oMungu wa tata-kulu waghu ye Daudi ati: Nabiryowa omusabe waghu. Nabirilangira emisonia yaghu. Ngatasyongera oko ngebe* yaghu kw’emyaka 15, 6 kandi ngendikulamya oko byala by’omwami we Asiria iwe n’omuyi ono. N’ekindi, ngendilwira oko muyi ono. 7 “Ekiminyikalo ekikalua ewa Yehova ekikendikangania ngoko Yehova akendiberererya ebyo alyabugha kya kino: 8 Lino ngendileka ekitsutsu ekiri oko bisambiro* bya Ahazi ikyasuba enyuma ebika 10.””” Neryo ekitsutsu ky’eryuba mukyasuba bunyuma-nyuma ebika 10 oko mimbari* eyo kyabya ikyabirindaghalako.
9 Bino bye binywa* ebyo Hezekia omwami we Yuda ahandika omughulu alwala n’erilama oko ndwala yiwe.
10 Munabugha niti: “Omo kati-kati k’engebe yaghe
Ngendingira omo syongyo sy’Eyisinda.*
Ngendiimwa engebe yaghe eyikisighalire.”
11 Munabugha niti: “Sinendilangira Yah,* sinendilangira Yah omo kihugho ky’abaliho.
Sinendisyasyalangira abandu
Omughulu ngendisyabya n’abikalani b’eyo obuli mwatsi akumbaya.
12 Ng’ehema y’omulisya, obwikalo bwaghe bwabirikulwa n’erilusibwa okw’ingye
Nabirilinga engebe yaghe ng’omuluki w’esyongyimba;
Akanitwa ng’esyo uzi esitambukire omo lukimba.
Eritsuka oko kyakakala ky’engyakya-ngyakya erihika omughulu omwirimya akawa ahisi, ukabera erinileta oko nduli.
13 Ngayibombeka erihika omo tututu.
Ng’endale,* akabera eribunanga amakuha waghe;
Eritsuka oko kyakakala ky’engyakya-ngyakya erihika omughulu omwirimya akawa ahisi, ukabera erinileta oko nduli.
14 Ng’endambira kutse ng’eduwe-duwe,* ngahuma-huma;
Ngabera eribelekuma ng’akalikuku.
Ameso waghe akaluha ngatungerera endata:
‘Yehova niri omo bulighe bunene;
Uniwatikaye!’*
15 Nangabugha nitiki?
Abiribugha naghe n’erikolakyo.
16 ‘Yehova, obuli mundu akabyaho busana n’emyatsi eyi,*
N’ekirimu kyaghe kiriho busana nayo.
Ukendinilamya n’eriteya engebe yaghe.
17 Lebaya! Omo mwanya w’obuholo, nabya n’obulighe bunene;
Aliwe busana n’erinyanza,*
Muwaniteya siningire omo kyuna eky’eriherya.
Wabirighusa ebibi byaghe byosi enyuma sy’omughongo waghu.
18 Kusangwa Eyisinda* siyangakuhalamba,
Oluholo silwangakupipa.
Abakandaghalira omo kyuna sibangatoka erihira amaha omo butaleghula bwaghu.
19 Oyuliho, oyuliho yo wangakupipa,
Ngoko ninemukola munabwire.
Tata anganakangirirya abana biwe oko butaleghula bwaghu.
20 Yehova, nilamaye,
Neryo tukendiwatira esyonyimbo syaghe oko byombo by’omuzike eby’esyosinga
Ebiro byosi by’eribyaho ryetu omo nyumba ya Yehova.’”
21 Neryo Isaya mwabugha ati: “Mulete ekitumbura* ekihimatire eky’emitini eyumire, muhakekyo oko kihute, alame.” 22 Hezekia abya iniabiribulya ati: “Ekikendikangania ngoko ngendihetukira oko nyumba ya Yehova niki?”