Ezekieli
5 “Naghu, mughala w’omundu, wimaye omuyali owatwire. Ukolesayegho ng’olughembe* lw’oyukasisa. Usise omutwe waghu n’eritwa esyonderu syaghu. Neryo wimaye ekilo, ulenge esyonzwiri esyo n’erighabasyo. 2 Ekitswe kighuma ky’oko bisatu ukendisyahisiryakyo omo muyi omo muliro ebiro by’eribambira byabihwa. Neryo ukendisyimya ekindi kitswe ky’oko bisatu iwaswiryakyo omo muyali eritimba oko muyi,* n’ekitswe kyakasatu ukendisyatsatsangakyo omo rihunga. Naghe ngendisyimya omuyali inakwamirirakyo.
3 “Ukendisyimya oko syonzwiri esyo ko hike, iwalingirahyo omo mikunyo* y’olukimba lwaghu. 4 Ukendisyimya n’esindi iwaghusasyo omo muliro n’erihisyasyo. Omo syonzwiri esyo mukendisyalua omuliro inyalandira oko kihanda kyosi kya Israeli.
5 “Yehova Omukama Mukulu oko Bosi ati: ‘Eyi ni Yerusalema. Nabirihirayo omo kati-kati k’ebihanda. N’ebihugho bitimbire kuyo. 6 Nikwa yabiriyisamambula okw’ihamula lyaghe n’oko mighambo yaghe. Yabirikola ebibi bingyi kwilaba ebihanda n’ebihugho ebitimbire kuyo. Kusangwa abandu be Yerusalema babirighana erihamula lyaghe, kandi sibetakwama emighambo yaghe.’
7 “Busana n’ekyo, Yehova Omukama Mukulu oko Bosi ati: ‘Kusangwa mwabya batsibu kwilaba ebihanda ebibatimbireko kandi mumutakwama emighambo yaghe kutse erikola erihamula lyaghe, aliwe omo mwanya w’ekyo mumwakwama erihamula ly’ebihanda ebibatimbireko, 8 Yehova Omukama Mukulu oko Bosi ati: “Hano, ngalwa naghu iwe muyi. Kandi ingyuwene-wene ngendileta erisuyira omo kati-kati kaghu, ebihanda ebyo ibinalangire. 9 Busana n’emikolere yaghu yosi eyikita nye, ngendikukolera ekyo nite natakola, kandi sinendisyasyakola ekiri ng’ekyo.
10 “‘“Neryo ewaghu abobaba bakendisyalya abana babo, n’abana bakendisyalya abobaba wabo, kandi ngendisyabasuyira, n’inywe bandi bosi inabapanza-panzira oko mbande syosi.”’*
11 “‘Yehova Omukama Mukulu oko Bosi ati, ‘Oko kwenene-kwenene ngoko niriho, kusangwa ahabuyirire haghe ho watsandaya omo syosanamu syaghu esikita nye n’omo mikolere yaghu eyikita nye, naghe ngendisyakughana;* eriso lyaghe siryendisyakukwira obulighe, kandi sinesyakughanyira. 12 Ekighuma ky’oko bisatu ky’abandu baghu bakendisyahola omo kihunzo* kutse ibaholera ewaghu omo nzala, n’ekindi kighuma ky’oko bisatu bakendisyahola omo muyali eritimba oko mbande syaghu syosi.* N’ekighuma ky’oko bisatu eky’omwiso ngendisyapanza-panzirakyo oko mbande syosi. Kandi ngendisyimya omuyali inakwamirirakyo. 13 Neryo eryaghalirwa lyaghe likendisyahika oko nduli, n’eribahitanako lyaghe likendisyatulera. Naghe ngendisyatulera. Ngendisyabya nabibugha eributulirako erihitana lyaghe, bakendisyaminya ngoko ingye Yehova nabiribugha omw’ihatikana niti abandu ibaniramya ingye musa.
14 “Ngendisyakuyira mo mwanya owabiritsandibwa n’ekindu ky’erisekereribwa omo kati-kati k’ebihanda ebikutimbireko n’omo meso w’obuli mundu oyukalabaho. 15 Ukendisyabya kindu ky’erisekereribwa n’ekighonerwe, ekindu ekikita obuba n’eky’erilangirirako ekikakunga busana n’ebihanda ebikutimbireko, omughulu ngendisyaleta eritswera okw’iwe omw’ihitana n’eryaghalirwa n’erisuyira ry’erikarama. Ingye Yehova, nabiribughakyo.
16 “Ngendisyatuma kubo kw’emisoha* eyikalire ey’enzala, iyitabo. Emisoha eyo ngendisyatuma ikendisyabaherya. Ngendisyaherya aho mukalusaya akalyo* neryo enzala eyo iyakala kutsibu. 17 Ngendisyabatumako enzala n’esyonyama sy’omoli esikalire, nabyo bikendisyita abana benyu. Ekihunzo n’omusasi eryutika bikendisyakubundamirya. Kandi ngendisyaleta omuyali erilwa naghu. Ingye Yehova, nabiribugha.’”