Ezekieli
6 Kandi ekinywa kya Yehova mukyanihikako kiti: 2 “Mughala w’omundu, ulolaye obusu bwaghu eyiri ebitwa bya Israeli kandi ubughe omo buminyereri ebikendisyahikirabyo. 3 Ukendibugha uti, ‘Inywe bitwa bya Israeli, muhulikirire ekinywa kya Yehova Omukama Mukulu oko Bosi: Yehova Omukama Mukulu oko Bosi akabwira ebitwa, ehitwa, ehyusi, n’emisya ati: “Mulebaye! Ngendileta omuyali erilwa nenyu n’eriherya emyanya yenyu y’endata. 4 Ebiherero byenyu bikendisambulwa, ebindu byenyu eby’erihirako esyotala bikenditsutsangwa, kandi ngendighusa ebinda by’abandu benyu abitawa, embere w’esyosanamu syenyu esikita nye.* 5 Ngendisyaghusa ebinda by’abana ba Israeli embere w’esy’osanamu syabo esikita nye, kandi ngandisyapanza-panza amakuha wenyu eritimba oko biherero byenyu. 6 Ehosi eyo mwikere, emiyi ikendisyatsandibwa, n’ah’endata hakendisyasambulwa n’eribya matongo, ebiherero byenyu bikendisyasambulwa n’eribunangwa, esyosanamu syenyu esikita nye sikendisyahera, n’ebindu byenyu eby’erihisiryako obukwa bikendisyakonderwa ahisi, n’emibiiri yenyu yikendisyasambulwa. 7 N’abakendisyitwa bakendisyawa omo kati-kati kenyu, nenyu mukendisyaminya ngoko indi Yehova.
8 Nikwa ngendisyasigha emisighalira, kusangwa abaghuma b’okw’inywe bakendisyabala oko muyali omo kati-kati k’ebihanda omughulu mukendisyapanza-panzirwa omo bihugho. 9 N’abakendisyabala bakendisyanyibuka omo bihanda ebyo batwalawamo mo banyewa. Bakendisyalangira ngoko munabunika mutima busana n’omutima wabo owakaleghula* owaleka ibayihighula okw’ingye na busana n’ameso wabo awakakandira kutsibu* esyosanamu syabo esikita nye. Bakendisyahemuka kandi bakendisyakwa esyonye busana n’emyatsi mibi kandi eyikita nye eyo bakola. 10 Bakendisyaminya ngoko indi Yehova, kandi ngoko si byabya binywa buyira omughulu nahaya ngoko ngendisyabaletako obuhanya obu.”’
11 “Yehova Omukama Mukulu oko Busi ati: ‘Ubande oko byala uhinde ebikindo, ubughe ukalira emyatsi mibi n’eyikita nye eyo enyumba ya Israeli yabirikola. Kusangwa abandu b’enyumba ya Israeli bakendisyawa omo muyali, omo nzala n’omo kihunzo. 12 Oyuli hali akendisyahola omo kihunzo, oyuli hakuhi akendisyawa omo muyali, n’owosi-wosi oyukendisyabala okw’ebi n’erisighala, akendisyahola omo nzala; naghe ngendisyutulira kubo ndeke-ndeke erihitana lyaghe. 13 Nenyu mukendisyaminya ngoko indi Yehova, omughulu abandu babo abalyitawa bakendisyaghala-ghala omo kati-kati k’esyosanamu syabo esikita nye, eritimba oko biherero byabo, oko buli katwa, oko singyi syosi sy’ebitwa, omo ndina y’obuli muti owahutire,* n’omwisi w’emitahi y’emiti minene-minene aho babirikolera amahere w’ekikumbo ekikakumba ndeke* eritsemesya esyosanamu syabo esikita nye. 14 Ngendisyasumba ebyala byaghe erilwa nabo n’eriyira ekihugho mo matongo. Emyanya yabo yosi y’eriikalamo ikendisyabya matongo kwilaba embwarara eyiri hakuhi ne Dibla. Nabo bakendisyaminya ngoko indi Yehova.’”