Eritsomana abandi likaleta emiyisa y’erikota

Baba waghe abya musyakulu w’omo kisomo ekikahulawamo Église unie du Canada, neryo obuli yenga omo tututu baba iniakatutuma oko kisomo ky’abana, ingye na mwali wetu. Itukabya twabilua oko kisomo ekyo, neryo itwakwama baba oko kisomo ekye Saa Tano (11:00). N’omwitungyi, itukakwama Mama oko Kisenge ky’Obwami. Itukalw’itwalangira ngoko ebisomo bibiri ebi sibisosene.

Mama abya inyawite abira biwe ba kera ye Bob na Marion Hutcheson. Neryo mwatsuka eribya akaniryabo oko myatsi eyo ak’igha omo Biblia. Mubaligha ekwenene, nabo bamabya Bimiri ba Yehova. Omo mwaka we 1958 munaya oko muhindano munene w’ekimataifa w’ebiro munani haghuma na Bob Hutcheson n’omukali wiwe n’abaghala biwe basatu. Omuhindano munene oyo ow’akolerawa omo New York City abya n’omutwe “La Volonté Divine.” Lino, nabiriminya ngoko mubayikasa kutsibu erighenda haghuma naghe oko muhindano munene oyo, aliwe ni sinangabirirwa n’ahake omuhindano oyo.

ABAGHALA N’ABALI BETU MUBANIWATIKYA ERIKOLA BINGYI OMO MUBÍRÍ WA YEHOVA

Omo bulwana bwaghe, twabyatwikera emulongo neryo itutungire esyonde, esyongulube, esyombuli, n’esyongoko. Neryo nabya nanzire erilisya. Munalengekania n’okwisoma nitoke erisyabya muveterinere. Mama mwakanirya omusyakulu mughuma w’endeko oko omwatsi oyo. Omo bolo, omusyakulu oyo mwan’ibukya ngoko tuli omo “biro by’enyuma-nyuma” kandi ngoko eriya oko iniversite omo myaka mingyi kyanganatsandya obwira bwaghe na Yehova. (2 Tim. 3:1) Neryo, munayisogha eritendiya oko iniversite.

Aliwe nabya ngayibulya nga ngendisyakolaki nabibugha akalasi. Nomo nanabya ngatulira omo buli kiro ky’eposo n’eky’eyenga, sininyanzire omubírí w’eritulira kandi nabya isindinatalengekania okw’ibya mupainia. Oko mughulu oyo, baba waghe baba-mulere, abatabya Bimiri, babya bakanihatikana eriyakola omubírí omo kampuni kanene omo Toronto. Baba waghe mulere abya mundu mukulu omo kampuni ako, neryo munaligha omubírí oyo.

Omo Toronto, munabya ngalabya endambi nene ngakola omubírí n’erilendera n’abandu abate Bimiri ba Yehova. Ekyo mukyaleka inabya ngabula endambi y’eriya oko mihindano n’eritulira. Nabya inikere na sokulu oyubutire baba oyutabya Mwimiri wa Yehova. Neryo abere abihola, munaronda ahandi ah’eribya.

Hutcheson na mukali wiwe, abanitwala oko muhindano munene w’ekimataifa oko 1958, mubabya ng’ababuti baghe. Mubanikokya eka wabo n’eriniwatikya erikula bunya-kirimu. Ingye na mughala wabo ye John mutwabatisibwa oko 1960. John mwatsuka obupainia, n’ekyo mukyaleka naghe inabya n’omuhwa munene w’eritulira. Abaghala betu omo ndeko babera balangirangoko ninemukula bunya-kirimu, bamamba omubírí w’erimanira Akalasi k’oMubírí w’Ekiteokrasi (Shule ya Huduma Ya Kiteokrasi).a

NAMASUNGA OMUKALI N’ERIBYA MUPAINIA

Oko 1966, munatahya Randi Berge. Abya mupainia w’omuhwa kandi inyanzire eriyakolera eyiri obwagha bw’abatuliri. Omulebya wetu w’omutimbo mwatutsemera, amatuhiramo muhwa w’eriyawatikya endeko ye Orillia, omo Ontario. Neryo mutwalw’itwasenga ebindu byetu n’erighenda.

Twabere twahika e Orillia, naghe namalw’inabya mupainia nga Randi. Naghe munabya n’obutseme bunene ng’iye. Nabere nabiyikasa eribya mupainia oyuwene, munatsuka eritsema kutsingu ngalangira ngoko erikolesya eBiblia yo ndeke linemuwatikya abandu eriminya ekwenene. Omo kiharo ky’e Orilia, mutwatsema kutsibu eriwatikya omulume mughuma na mukali wiwe erikola esombinduka omo ngebe yabo n’eribya baghombe ba Yehova.

TWAMIGHA OGHUNDI OMUBUGHE N’ERIBINDULA AMALENGEKANIA

Twabere tukalendera e Toronto, munasungana na Arnold MacNamara. Abya mughuma w’oko baghala betu ababya bakimanira omubírí oko Beteli. Mwatubulya nga twangananza eribya bapainia b’embeghane. Munalw’inasubirya niti: “Inga! Twanzire erikolera ahosi-hosi aliwe butsira omo Québec!” Nabya inabirihambwa n’amalengekania awatuwene ogho abandu be Kanada abakabugha eKingeresa babya nagho oko bandu b’omo kiharo kye Québec abakabugha eKifaranza. Oko mughulu oyo, abandu babya bakayisamambula oko butabali bye Kanada bati kumbe ekiharo kye Québec kiyitabale.

Arnold mwasubirya ati, “Lino, Ebeteli yikamutuma abapainia b’embaghane omo kiharo kye Québec kisa.” Munalw’inaligha erighenda. Nabya inabiriminya ngoko Randi abya anzire eriyakolerayo. Enyuma w’aho, mutwalangira ngoko mutwayisogha ndeke!

Twabere twigha ekifaranza oko mayenga atanu, ingye na Randi haghuma n’oghundi mughala wetu na mukali wiwe, mutwaya e Rimouski, olughendo lw’ebilometere hakuhi 540 oko luhande lw’endata lwe Montréal. Twabya isitulitwaminya ndeke ekifaranza. Ekyo mukyalangirika ngasoma emilaghe milebe oko muhindano. Omo mwanya w’eribugha niti oko muhindano wetu munene owakasa tukendisyabya n’abagheni bangyi erilua omo kihugho kye Autriche munakolesa ekindi kinywa ekikasobolawa ng’ekyo, aliwe ikamaanisaya ebinyunyu binene-binene; neryo abandu bamowa nga namabugha niti abagheni abakendyasa ni binyunyu binene-binene.

Twabere twahika e Rimouski, mubatutumira bali betu basimbi ab’omuhya munene kughuma na mughala wetu Huberdeau na mukali wiwe n’abali biwe babiri. Huberdeau na mukali wiwe mubabana enyumba nene neryo itwe bapainia bosi ngoko twabyamo itukawatikaya erilihayo. Mutwahulayo mo Maison Blanche [Enyumba y’Omusohe] kundi n’esyonduyi syayo n’oluhande lwayo lw’embere byabya by’omusohe. Twabya itubeghere eribyamo bandu 12 kutse 14. Kundi twabya bapainia b’embeghane, ingye na Randi, itukatulira omo tututu, omwitungyi, n’omwigholo. Busana n’ekyo, itukatsema eribana omundu w’eriyatulira netu. Nibya itukatulira omwighologholo oko mughulu w’embeho nene.

Mutwabya bira kutsibu n’abapainia bataleghula abo. Mutwabya ng’abasubeneko. Ihakanabya endambi itwikala haghuma tukota oko muliro kutse itwayahuka akalyo ko haghuma. Omughuma w’oko baghala betu inyasi omuziki, neryo omo magholo-gholo w’obuli kiro kye poso itukabya tuk’imba n’erisata.

Mutwabana ebighuma ebyuwene omo kiharo kye Rimouski. Omo myaka itano, mutwabana obutseme bw’erilangira amafunzo mangyi w’eBiblia akalola embere erihika okw’ibatisibwa. Endeko muyabya nene erihika okwibyamo abatuliri hakuhi 35.

Omo Québec mutwigha emyatsi mingyi ng’abatuliri. Mutwayilangirira ngoko Yehova anemutuwatikya omo mubírí w’eritulira n’eritugha ebyo tulaghireko kinya-mubiri. Kandi, mutwigha erianza eKifaranza, abandu abakabughakyo, n’emibere yabo. Ekyo mukyaleka itwanza n’emibere y’abandi bandu.​—2 Kor. 6:13.

Ebeteli moyatusaba eriya omo muyi we Tracadie, owali ematanga-lyuba we Nouveau Brunswick. Twabya isituyilindirire eky’ekyo. Mukyatukalako kundi itwabiriliha enyumba kandi inabiribana omubírí w’esyondambi nge w’obughalima oko kalasi kaghuma. Kutya, abigha betu balebe b’eBiblia babya ibabiribya batuliri kandi twabya tukahimba Ekisenge ky’Obwami, itwamabikolya omubírí w’omo kati-kati.

Mutwasaba Yehova oko biro bibiri busana n’olughendo olo, neryo mutwalenderera e Tracadie. Omuyi oyo abya asighene hake n’owe Rimouski. Aliwe, mutwayisogha erihumirayo kundi Yehova abya anzire itwayayo. Mutwalenga oko Yehova n’eriyilangirira ngoko mwalusya embere syetu obuli mwatsi owangatukakirye. (Mal. 3:10) Randi abya anzire Yehova yo kutsibu, abya mwenge kandi inyatsangatsangire. Ebyo mubyaleka erihuma iryatabya lubanza.

Omo ndeko yetu nyihya eyo imuli omusyakulu mughuma musa. Inyakahulawa mo Robert Ross. Iye na mukali wiwe ye Linda babya bapainia kera neryo babere babuta omwana wabo w’erimbere mubayisogha erisighala omo muyi oyo. Nomo banabya ibanemulembera akalwana kalere, mubatukokya ndeke kandi ibakatulira n’omuhwa. Mukyaleka ingye na Randi itwasika.

TWAMABANA EMIYISA BUSANA N’ERIKOLERA EYIRI OBWAGHA

Twabere twabibugha emyaka ibiri itunemuka obupainia omo muyi we Tracadie, kandi twamabana omwatsi ogho sitwabya tuyindilirireko, mubatusaba eriya omo mutimbo. Mutwakolera omo mitimbo w’esyondeko sy’eKingeresa oko myaka irinda; n’enyuma w’aho twamayakolera omo mutimbo w’eKifaranza omo Québec. Mughala wetu Léonce Crépeault, omulebya wetu w’ekihaharo kye Québec, inyabeghere erinisima oko mikania yaghe. Aliwe enyuma w’aho iniabeghere erinibulya ati: “Wanganatasyuwaniryeyo wuti?”b Erinitsomana liwe eryo mulyaniwatikya erihwerya amalengekania waghe okw’ilebya nga nanguwania niti enzira yaghe y’erikangiriryamo, emikania yaghe itoke eribya ikowika bweghu-bweghu.

Omughuma w’oko mibírí eyo ng’ibuka kutsibu, w’omubírí ogho nahabawa oko muhindano munene w’ekimataifa e Montréal oko 1978, owabya n’omutwe “La foi victorieuse.” Munakola oko myatsi y’akalyo (Kafteria). Twabya tulindirire abandu 80 000 kandi endegheka y’eriha abandu b’akalyo yabya nyihya. Obuli mwatsi abya muhya. Eby’erikolesya, ebikendihukwa, n’emihukire. Twabya n’esyofrigo nene-nene hakuhi 20, aliwe esindi isisirikola ndeke. Ekiro ky’erimbere kite kyatsuka, mutwasala tway’ingira omo kibugha oko saa sita sy’ekiro tukaya teghekania emyatsi kundi omo kibugha ekyo mwabya ebitsange. Kandi mukyatusaba eriakya omuliro omo mwitsange tukateghekania akalyo k’omo asubuyi! Twabya itwabiriluha, aliwe omubírí owakalire oyo mwatwighisya myatsi mingyi; abandi abo twakola nabo tukayiherera babya bakulire kandi babya ibatsangatsangire. Erihika na munabwire tukine bira. Lwabya lusunzo lunene eriyilangirira omuhindano munene ng’oyo. Isihali hatakoleka omuhindano mungana n’oyo ngabiro ye Québec omo Abimiri ba Yehova bendereribawa kutsibu omo myaka ye 1940 erihika 1960!

Mun’igha bingyi oko bandi balebya oko mihindano yetu minene-minene eyakolerawa e Montréal. Mughala wetu David Splane, oyukakolera lino omo Kyaghanda Ekikasondola, mwimanira omuhindano munene muhuma. Oko muhindano munene owaswabya enyuma syaho, monasabwa erimaniragho. David mwaniwatikya kutsibu.

Oko 2011, ingye na Randi itwamabibugha emyaka 36 itunemukolera omo mutimbo, munabana olusunzo lw’eriyakangirirya oko Kalasi k’abasyakulu b’endeko. Omo myaka ibiri mutwaghotsera omo syongyingo mbiriri-mbiriri 75, aliwe mutwabana emiyisa mingyi. Oko buli mwiso w’eyenga, abasyakulu ibasima kutsibu kundi ibakalangira ngoko Ekyaghanda Ekikasondola kyanzire ibabya n’obwira obuwene na Yehova.

Enyuma w’aho, munayakangirirya Akalasi k’abatuliri b’Obwami. Kangyi-kangyi, abakolo ibakayowa ibabiriluha n’erihangya-hangya busana n’eribya n’ebingyi by’erikola: eribugha esyosaha hakuhi irinda obuli kiro ibanikere omo kalasi, n’eriteghekania emigawo itano obuli yenga. Ingye n’oghundi mughalima mutwabwirabo ngoko sibangatoka hate obuwatikya bwa Yehova. Sinendisyibirirwa ngoko abakolo mubasweka kutsibu bakalangira ngoko busana n’eriyiketera Yehova mubatoka erikola emyatsi eyo babya bakalengekania nga sibangatoka.

ERITSOMANA BANDI LIKALETA EMIYISA Y’ERIKOTA

Busana n’eritsomana abandi mama waghe mwawatikya abigha b’eBiblia erilola embere bunya-kirimu n’eriwatikya baba waghe eribya n’amalengekania awuwene oko kwenene. Ebiro bisatu enyuma sy’oluholo lwa mama, abandu mubasweka bakalangira baba akasyakama omukania w’abandu bosi oko Kisenge ky’Obwami, n’omo myaka 26 eyakwama, mwalola embere erihika oko mihindano. Nomo anabya isyalyabatisibwa, abasyakulu mubanibwira bati iniye yukabya w’erimbere erihika oko mihindano y’obuli yenga.

Mama waghe abya ky’erileberyako ekyuwene okw’itwe bana biwe. Bali betu basatu bosi haghuma n’abiba babo banemukolera Yehova yo butaleghula. Bali betu babiri banemukolera oko beteli. Omughuma oko beteli y’e Portugal n’oghundi oko ye Haiti.

Ingye na Randi tunemukola ng’abapainia b’embaghane omo muyi we Hamilton, e Ontario. Omughulu twabya omo mubírí w’omutimbo, itukatsemera erikwama bandi bakasubira abandu n’erisondola amafunzo w’eBiblia. Aliwe lino, tunemutsema tukalangira abo tukigha nabo eBiblia bakalola embere bunya-kirimu. Kandi kundi tuli n’obwira obuwene haghuma n’abaghala n’abali betu omo ndeko yetu nyihya, tukasikibawa mutima tukalangira ngoko Yehova anemubawatikya omo mighulu eyuwene n’eyikalire.

Tukatsema kutsibu tukyibuka ngoko abandu bangyi mubatukangania ngoko batusomene. Netu, twabiriyikasa erikangania eritsomana abandi bo kutsibu n’eribahira m’omuhwa w’erikolera Yehova ngoko bangatoka. (2 Kor. 7:6, 7) Ng’eky’erileberyako, omo kihanda kighuma, mama na mughala na mwali; abosi babya omo mubírí w’omughulu wosi. Munabulya baba w’omo kihanda ekyo ng’ane atalengekania okw’ibya mupainia. Mwanisubirya ati anemusighika abapainia basatu. Neryo munabulya niti: “Ukalengekanaya uti wanganasighikabo ndeke kulenga Yehova?” Neryo munamuhiramo omuhwa w’eribana oko butseme obo bakabana. Habere halaba emisi 6 naye amabya mupainia.

Ingye na Randi tukendisyalola embere eritulira “oko syondengo syosi esikendyasa,” “emibírí [ya Yehova] y’eriswekera,” kandi tuli n’amaha ngoko bakendisyalola embere erikolera Yehova ngoko bangatoka.​—Esy. 71:17, 18.