Esomo 13

Wangaminya ghuthi edini y’ekwenene?

OMungu anatsemere esyodini syosi, kutse enguma nyisa? (1)

Busanaki hali esodini nyingi esikayahula mo sy’ekikristu? (2)

Wangaminya edini y’ekwenene yo wuthi? (3-7)

1. Yesu mw’atsuka edini nguma y’ekikristu ey’ekwenene. Kuthya na lino litholere ihabya endeko nguma nyisa, kutse edini, ey’abakaramaya Yehova Mungu oko kwenene. (Yoane 4:23, 24; Abanya Efeso 4:4, 5) EBiblia yikakangiriraya yithi hali bandu bake basa abali omo nzira nge ey’engebe.​—Matayo 7:13, 14.

2. EBiblia yabia iyabirikangirirya yithi enyuma w’oluholo lw’abakwenda, amakangirirya w’amabehi n’emikolere eyithe y’ekikristu ikasingira bolobolo omo ndeko y’ekikristu. Hakasyabya abalume abakasyaheraya abikirirya babakwame omwanya w’erikwama Yesu. (Matayo 7:15, 21-23; Emibírí 20:29, 30) Kyo kyalekire ihabya esyodini nyingi esisighene esikayahula mo sy’ekikristu. Thwangaminyerera thuthi edini y’ekikristu y’ekwenene?

3. Ekiminyisyo kikulu eky’abakristu b’ekwenene ly’Eryanzana. (Yoane 13:34, 35) Sibalikangiriribawa eriyilangira nga balengire abandi bandu ab’eyindi rangi y’omubiri. Kutse sibalikangiriribawa eribeherwa abandu b’ebindi bithunga. (Emibiri 10:34, 35) Aho, sibaliyingiraya omo malwa. Abakristu b’ekwenene banzene ng’abana bw’omonda nguma.​—1 Yoane 4:20, 21.

4. Ekindi kiminyisyo ky’edini y’ekwenene, abandu abali muyo basikirye eBiblia yo kutsibu. Bikirirye kundu ko kiri Kinywa ky’oMungu n’akandi bikirirye ebyosi ebyo yikabugha. (Yoane 17:17; 2 Timoteo 3:16, 17) Balangire eKinywa ky’oMungu mo ky’omughaso munene kulenga amalengakania n’amakinga w’abandu. (Matayo 15:1-3, 7-9) Bakahirika erikwama eBiblia omw’ibyaho lyabo ly’ebiro byosi. Bakayitsinga kutsibu erikola ebyo bakakangiriraya.​—Tito 1:15, 16.

5. N’akandi edini y’ekwenene yihere erina ly’oMungu ly’olukengerwa. (Matayo 6:9) Yesu mw’aminyisya erina ly’oMungu, Yehova, ly’oko bandi bandu. Abakristu b’ekwenene litholere ibamwegherererya. (Yoane 17:6, 26; Abanya Roma 10:13, 14) Eyo wikere, ni bahi abakaminyisaya abandi b’erina ly’oMungu?

6. Abakristu b’ekwenene litholere ibathulughania engulu y’obwami bw’oMungu. Ekyo, kyo Yesu abya akakola. Ebiro byosi iniakathula engulu y’obwami. (Luka 8:1) Mwathuma abigha biwe erithulughania engulu ngumerera eyo y’omo kihugho kyosi ohokinikya. (Matayo 24:14; 28:19, 20) Abakristu b’ekwenene bikirirye kw’obwami bw’oMungu busa bobukasyaletha obuholo bw’ekwenene n’obuthekane omo kihugho.​—Esyonyimbo 146:3-5.

7. Abigha ba Yesu b’ekwenene sibangayingirya omo myatsi y’ekihugho kibi kino. (Yoane 17:16) Sibaliyingiraya omo myatsi y’epolitike y’ekihugho n’omo yindi myatsi eyikaghaba abandu. Bakayihighula oko mighendere eyikahuthalaya, emikolere, n’emilolere ey’abandu bangi b’omo kihugho. (Yakobo 1:27; 4:4) Neryo, wanganaminyerera oho wikere h’edini eyiri kw’ebiminyisyo ebi eby’edini ey’ekikristu y’ekwenene?

[Esyofoto oko bukurasa 26, 27]

Abakristu b’ekwenene banzene, basikirye eBiblia, kandi bakakangiriraya engulu y’obwami bw’oMungu