ESOMO 2

Eribugha ng’ukakanaya n’owundi

2 Abanya Korinto 2:17

OMO KIKUHI: Ukanaye ngoko ubeghere eribugha, ubughe ebikalua oko mutima omo nzira eyikakanganaya ngoko ukayowa busana n’omwatsi kandi busana n’abahulikiriri baghu.

NGOKO WANGAKOLA:

Uyiteghekanaye ndeke n’erisaba. Usabe Yehova akuwatikaye eritendihira amalengekania okw’iwe musa, aliwe uhire amalengekania w’oko mwatsi owo ukendikaniako. Uyikase eriminya ndeke esyonzumwa ngulu-ngulu esyo wanzire erikaniryako. Ubughe esyonzumwa esyo omo binywa byaghu; isiwasubirira omo binywa ngoko bihandikire omo kitsapo.

Wamabya iwukendisoma erisako omo Biblia kutse omwatsi mulebe w’omo kitsapo, uyikase eriminya ndeke ebinywa by’erisako eryo kutse omwatsi oyo, kikuwatikaye eritenditwikala ukasoma. Wamabya iwukasoma ebyabughawa n’oghundi mundu, usome ebinywa ebyo n’omuhwa, isiwasomabyo ng’omundu oyukakola ebitsange.
Ubughe ebikalua oko mutima. Lengekanaya oko ebikaleka iwanza uti abahulikiriri baghu bowe omwatsi oyo. Uhirebo omo malengekania waghu. Neryo, ngoko uk’imana kutse erikala, ebiminyikalo by’omubiri n’eby’omo busu, ibikendikangania ko ukabakaniraya erilua oko mutima kandi ko utsanga-tsangire.

Erikania ngoko ubeghere eribugha sikikanganirye kiti siwukengire abahulikiriri baghu. Uhe omwatsi waghu w’olukengerwa omwikolesya ebinywa ebyowikire ndeke n’erisikya esarufi, ni bughambu ebyalaghiro by’omubughe.
Usamalire abahulikiriri baghu. Samalira abahulikiriri baghu kyamabya isi kibi erikola utya eyo w’ikere. Omughulu ukalabaya omukania, uhire ameso w’oko mundu mughuma, n’enyuma syaho lebaya owundi, omo mwanya w’erisamalira abandu bosi b’oko ngendo nguma.