Erigha eBiblia n’Abimiri ba Yehova likakolawa liti?
Abimiri ba Yehova bakakanganaya abandu enzira eyuwene ey’erighira mw’emyatsi eyo eBiblia ikakangiriraya. Wamabiligha erigha eBiblia haghuma netu:
Ighukendibya n’obutseme omo ngebe yaghu
Ighukendibya n’obwira haghuma n’oMungu
Ighukendiminya ebyo eBiblia yikalagha oko biro ebikasa
Omo mwatsi ono, ukendiminya bino:
Embere sy’eriligha erigha nenyu, nanganapima erilebya nga bikabya biti?
Namabiligha erigha eBiblia, nanganakaswa eribya Mwimiri wa Yehova?
Namabya imunanigha eBiblia yo kera n’Abimiri ba Yehova, nanganatasyatsuka?
Tukigha eBiblia n’abandu tuti?
Omughalimu waghu akendikuwatikya eriminya ndeke eBiblia mukigha emyatsi ngoko yikwamene. Mukalola embere erigha eBiblia omo nzira y’erikanirania erilabira ekitabu Tsemera engebe kera na kera! ukendiminya lyolo lyolo ebyo Biblia ikakangiriraya kandi ngoko byangakuwatikya. Eriminya bingyi, kwama evideo eno.
Tukanalihisaya abandu erigha eBiblia?
Iyehe. Abimiri ba Yehova bakakwama obusondoli obo Yesu asighira abigha biwe: “Mwabiryangirira butsira eririha, muhe abandi butsira eririhisya.” (Matayo 10:8) Kandi situlilihisaya ebyo tukakolesaya tukigha n’omundu, ng’eBiblia n’ekitabu Tsemera engebe kera na kera!
Erigha eBiblia likabugha biro bingahi?
Eprograme yosi ni y’esyosomo 60. Kiri okw’iwe erisombola nga mukendibya mukigha muti. Abigha bangyi bakasombola erigha esomo nguma kutse esyosomo nyingyi oko buli yenga.
Nangayihandikisya niti okwigha eBiblia?
1. Sulaya efomu eno. Ebyo ukendihandika okwiwe tukendikolesyabo lisa omwikuwatikya eribana Omwimiri wa Yehova ow’erigha naye eBiblia.
2. Omughalimu akendikania naghu. Akendikukangania ngoko tukigha eBiblia n’abandu omo nzira y’erikanirania kandi akendisubirya oko mabulyo waghu.
3. Iwe n’omughalimu waghu mukendipanga. Mwanganabya mukigha kibiribiri kutse oko telefone, eribirikirana oko video, kutse erilabira ebaruha. Kangyi-kangyi erigha likabugha saa nguma. Aliwe lyanganabugha ndambi nge kutse nene oko saa nguma erikwamana n’eprograme yaghu.
Embere sy’eriligha erigha nenyu, nanganapima erilebya nga bikabya biti?
Ingaa. Erikola ekyo, sulaya efomu eno. Omughulu omughalimu akendikania naghu, umubwire ngoko wanzire eripima erigha eBiblia ukalebya nga unemwenditsemera erigha. Akendikolesya akatabu Tsemera engebe kera na kera! akali mw’esyosomo isatu esy’eritsukirako. Sikendikuwatikya erilangira nga wanamatsemera erigha eBiblia.
Namabiligha erigha eBiblia, nanganakaswa eribya Mwimiri wa Yehova?
Iyehe. Abimiri ba Yehova banzire erikangirirya abandi b’eBiblia, aliwe sibalikasa omundu eribya Mwimiri wa Yehova. Ekyo bakakola ry’erikangania omundu ebyo Biblia yikabugha, ibanasi ngoko obuli mundu anawite obwiranda bw’erisombola ebyo akendikirirya.—1 Petero 3:15.
Ninemwendibya ngakolesya eBiblia yaghe?
Ingaa. Wanganakolesya eBiblia yosi eyo wanzire. Abimiri ba Yehova banzire erikolesya e Biblia—Tafsiri ya Ulimwengu Mupya kundi yikowika kandi ibindulirwe ndeke. Aliwe banasi ngoko abandi bandu bakatsemera erikolesya eBiblia eyo babeghere.
Nanganakokya abandi bandu okw’igha lyetu?
Ingaa. Wanganakokya ekihanda kyaghu kyosi kutse omwira waghu mulebe oyo wanzire.
Namabya imunanigha eBiblia yo kera n’Abimiri ba Yehova, nanganatasyatsuka?
Ingaa. Oko kwenene, ukenditsemera eprograme yetu nyihya kundi lino tukigha n’abandu omo nzira eyo banzire. Tukakolesaya esyopitsa n’esyovideo kandi kukigha omo nzira y’erikanirania.
Hane ebyo nangakola namabyanza erigha eBiblia ingyuwene?
Ingaa. Nomo abandu bangyi bakigha ndeke ihane omughalimu, abandi bakanza eritsuka erigha ibibene. Omo kitsweka Eby’erikolesya erigha eBiblia muli ebyombo ebyangakuwatikya omughulu ukigha eBiblia. Ebighuma bya kubyo bya bino:
Esyosomo sy’eriyighisya eBiblia oko Enternete. Esyosomo esi siri omo nzira y’erikanirania. Sikasubiraya oko mabulyo malebe agho abandu babeghere eriyibulya omo ngebe, ng’ano: oMungu nindi? Eryaghalawa n’ekibi byasira hayi? oMungu anemwendisyabughaho eryaghalwa?
Esyovideo sy’eBiblia. Esyovideo nguhi-nguhi esi sikasubiraya oko mabulyo malebe awalebirye amakangirirya makulu-makulu w’eBiblia.
Amabulyo w’eBiblia awo babirisubiryako. Emyatsi eyikabanika omo kitsweka kino ikasubiraya oko mabulyo mangyi w’eBiblia.
Amasako w’eBiblia agho twabirikaniako. Minya amaana w’emilondo n’ebinywa by’eBiblia ebiminyikere kutsibu.