Ebyo twangigha omo syobaruha ibiri sya Petero

1. Mughulu mulebe embere omukwenda Petero ahole, ekirimu kibuyirire mukyamusondala erikolaki?

OMUKWENDA Petero mwakolera Yehova butaleghula omo myaka mingyi. Mwakwama Yesu omo mubiri w’eritulira, mwakolya engulu mbuya omo biharo bihya-bihya, kandi mwakolera omo Kyaghanda ekikasondola. Aliwe omubiri wiwe mwatatwiryaho. Oko mwiso w’engebe yiwe, abiminya ngoko akisiya inyahola, ekirimu kibuyirire mukyamusondola erihandika esyobaruha ibiri. Ekitabu ky’eBiblia ekya 1 Petero na 2 Petero. Petero mwaminya ngoko esyobaruha esyo syangawatikirye Abakristo enyuma sy’oluholo lwiwe.​—2 Pet. 1:12-15.

2. Busanaki esyobaruha sya Petero musyahika oko ndambi eyitolere?

² Petero mwahandika esyobaruha siwe abaramya balikyabo ibali “omwʼirengwako misindo-misindo.” (1 Pet. 1:6) Abandu babi babya bakasonda eringirya amakangirirya w’amabehi n’emighendere mibi omo ndeko y’eKikristo. (2 Pet. 2:1, 2, 14) “Enduli yʼemyatsi yosi” n’ibughambu omughulu w’abasuda be Roma eritoghotya e Yerusalema n’eribughaho emighulu y’Abayahudi, yabya iyikisiya iyahikira Abakristo be Yerusalema. (1 Pet. 4:7) Ahate eritika-tika esyobaruha sya Petero musyaleka Abakristo ibaminya eky’erikola batoke eriyiyinia oko maligho awabyaho, n’eriyiteghekania oko maligho awabya embere.b

3. Busanaki litolere itwatsopolya esyobaruha sya Petero?

³ Nomo Petero anahandikira esyobaruha siwe sy’Abakristo b’oko karne y’erimbere, Yehova mwahirasyo omo Kinywa kiwe. Neryo na lino, twanganabana endundi omo syobaruha esyo. (Rom. 15:4) Netu tunemuhikirwa n’amaligho awangaleka ikyatukalako erikolera Yehova kundi tuli omo kihugho ekikakanyiriraya emighendere mibi. Eritomeka okw’ekyo, hakisiya hake itwahikirwa n’obulighe bunene obukalire kulenga obwabya oko nduli y’emighulu y’Abayahudi. Omo syobaruha ibiri sya Petero, muli amahano w’omughaso busana netu. Amahano ayo akendituwatikya eribya itunibukire ekiro kya Yehova, erikinda obuba bw’abandu, n’eryanzana kutsibu. Kandi anganawatikya abasyakulu b’endeko erilangira nga bangawatikya bati abaghala n’abali betu erisighala ibanasikire.

ISIWALUHA ERILINDIRIRA

4. Ngoko kiri omo 2 Petero 3:3, 4, niki kyo kyanganolobererya obwikirirya bwetu?

⁴ Abandu abatutimbireko sibikirirye amaminyereri w’eBiblia. Abakaghana omwatsi ogho tukatula banganatusekererya kundi hamabilabya emyaka mingyi itunemubugha tuti enduli inemwasa. Abandu balebe bakabugha bati enduli siyendisyahika n’ahake. (Soma 2 Petero 3:3, 4.) Omundu oyo tukatulira, kutse oyo tukakola naye omubiri, kutse omutunga wetu, amabya akatubwira emyatsi eyiri ng’eyo, ekyo kyanganolobererya obwikirirya bwetu. Petero mwakangania ekyangatuwatikya nga niki.

5. Ekyangatuwatikya eribya n’amalengekania awatolere oko nduli y’ekihugho kibi kino niki? (2 Petero 3:8, 9)

⁵ Abandu bangyi bakalangira Yehova ng’abiritselewa eribughaho ekihugho kibi kino. Ebinywa bya Petero byanganatuwatikya eribya n’amalengekania awatolere, kundi bikatwibukaya ngoko enzira ya Yehova y’erilangira endambi yisighene kutsibu n’ey’abandu. (Soma 2 Petero 3:8, 9.) Yehova akalangira emyaka elfu nguma ng’ekiro kighuma. Yehova anemulindirira, syanzire omundu n’omughuma akaheribwa. Ekiro kiwe kikendisyabya kyahika, ekihugho kibi kino kikendisyahwaho. Ni lusunzo lunene okw’itwe erikolesya endambi eyikisighaho eritulira abandu b’omo kihugho kyosi b’engulu mbuya.

6. Twangakolaki tutoke ‘erilindirira nʼerihatania’ erihika ly’ekiro kya Yehova? (2 Petero 3:11, 12)

⁶ Petero akatuhana ati, “mubye mukalindirira nʼerihatania erihika” lyʼekiro kya Yehova. (Soma 2 Petero 3:11, 12.) Twangakola ekyo kyo tuti? Obuli kiro twanganayikasa eribya tukalengekania oko miyisa eyikendisyabya omo kihugho kihya. Terilengekania ighunemuhumula oko muka ow’erire ow’omo kihugho kihya, ighunemulya oko kalyo akuwene, ighunemukokya abatunga n’abira baghu babilubuka, kandi ighunemukangirirya abandu ababyaho kera oko maminyereri w’eBiblia. Erilengekania oko myatsi ng’eyo, lyanganakuwatikya erilola embere erilindirira n’eribya ighunasi ngoko enduli yira hakuhi-kuhi. Kusangwa ‘twabiriminya emyatsi eyi,’ oko biro ebikasa sitwendisyahekwa n’abakangirirya b’amabehi.​—2 Pet. 3:17.

UKINDE OBUBA BW’ABANDU

7. Eryubaha abandu lyanganaleka itwakolaki?

⁷ Kundi tunasi ngoko ekiro kya Yehova kiri hakuhi-kuhi, tukayikasa erikola ekyosi ekyo twangatoka erikanirya abandi oko ngulu mbuya. Aliwe, hanganabya endambi itwasagha erikola tutya. Busanaki? Oko sindi ndambi twanganubaha abandu. Ekyo mukyahikira Petero. Omo kiro ekyo Yesu aghalawamo, Petero mwakwa obuba bw’eriyiminyikalya mo mwigha wa Yesu, kandi mwaghana ngendo nyingyi ati syamwasi nibya. (Mat. 26:69-75) Aliwe Petero mwakinda obuba obo, mwahika n’okw’ibugha ati: “Simubahe eriubahya lyabo, kandi simuhahukaye emitima.” (1 Pet. 3:14) Ebinywa bya Petero ebi bikatukanganaya ngoko netu twanganakinda obuba bw’abandu.

8. Ekyangatuwatikya erikinda obuba bw’abandu niki? (1 Petero 3:15)

⁸ Ekyangatuwatikya eritendibya tukubaha abandu niki? Petero akatubwira ati: “Nikwa omo mitima yenyu mukenge Kristo ngʼomukama wenyu.” (Soma 1 Petero 3:15.) Ekyo kihiriremo eribya tukalengekania oko lukengerwa olo Omukama wetu Yesu Kristo awite, ngoko ni Mwami kandi awite akaghala kanene kutsibu. Wamabibya ng’ukahanga-hangaya kutse ng’ukubaha omughulu ukabana akanya k’eritulira abandi oko ngulu mbuya, iwibuka Omwami wetu. Umulangire omo malengekania inyanemutabala omo lubula kandi inyanatimbirweko n’amamiliyoni w’abamaika. Wibuke ngoko awite “ehamuli yosi . . . omo lubula nʼomo kihugo” kandi ngoko akendisyabya “haguma nenyu ebiro byosi erihika okwʼihwererera lyʼemigulu.” (Mat. 28:18-20) Petero akatubwira ati “endambi yosi” tubye itunayiteghekire erikania oko ebyo twikirirye. Unanzire erikanirya omundu mulebe oko ngulu mbuya, oko mubiri, ekalasi, kutse omo yindi mibere y’eritsumbukania? Ulengekanaye embere nga wangakola utya mughulu wahi, neryo uteghekanaye ebyo wangabugha. Usabe Yehova y’obutubaha, ighunikirirye ngoko akendikuwatikya erikinda obuba bw’abandu.​—Emib. 4:29.

“MUKWE OMUHWA W’ERYANZANA KUTSIBU”

9. Kiro kighuma, Petero mwataluka ati erikangania olwanzo? (Ulebaye n’epitsa.)

⁹ Petero mwigha omundu ng’angatoka ati erikangania olwanzo. Abya inyaneho omughulu Yesu abugha ati: “Ngabaha ekihano kihya-kihya nyiti, Mwanzane. Ngoko nabiribanza, nenyu mwanzane mutya.” (Yoa. 13:34) Nomo bine bitya, muhanabya endambi Petero amaleka erirya n’abaghala n’abali babo abate Bayahudi busana n’eryubaha Abakristo Bayahudi. Ekyo Petero akola, omukwenda Paulo mwahulakyo mo “eriyitendererya,” kutse obutebya. (Gal. 2:11-14) Petero mwaligha erikungwa eryo, kandi mwighira kulyo. Omo syobaruha siwe ibiri syosi, mwahiraho omuwato ati isitwakwa lisa omuhwa w’eryanzana, aliwe litolere itwakangania olwanzo olo.

10. Niki kyo kikatuwatikaya erikangania “olwanzo olute nʼeriteba busana nʼabalikyetu”? (1 Petero 1:22)

¹⁰ Petero ati litolere itwabya “nʼolwanzo olute nʼeriteba busana nʼabalikyetu” omo ndeko. (Soma 1 Petero 1:22.) “Eriowa omwatsi wʼekwenene” kyo kikendituwatikya eribya n’olwanzo oluli ng’olo. Omo kwenene eyo, muli erikangirirya lino “[oMungu] syawite ebitaga” kutse akasololo. (Emib. 10:34, 35) Twamabya tukakangania olwanzo oko bandu balebe omo ndeko aliwe itwaleka abandi, aho isitwetakwama ekyalayiro kya Yesu. Oko kwenene, ngoko Yesu anakola, hanganabya abandu abo tubeghereko kulenga abandi. (Yoa. 13:23; 20:2) Aliwe Petero akatwibukaya ati tuyikase ‘twanze abalikyetu Abakristo’ kundi ni b’omo kihanda kyetu.​—1 Pet. 2:17.

11. Eryanzana n’emitima yetu yosi nʼomuhwa n’ibughambuki?

¹¹ Petero mwatuhana ati “imwanzana nʼemitima yenyu yosi nʼomuhwa.” Hano, eryanzana “n’omuhwa” kikamanisaya eryanza omundu nibya n’omughulu kikalire. Ng’eky’erileberyako, byangabya biti mughala wetu kutse mwali wetu amabitukosera kutse erituhutalya omo nzira nyilebe? Omo mwanya w’erimukangania olwanzo, twanganalw’itwanza erituhulya. Aliwe Yesu mwakangirirya Petero ngoko erituhulya sikiritsemesaya oMungu. (Yoa. 18:10, 11) Petero mwahandika ati: “simutuhulaye ekibi busana nʼekibi, kutse eritsuma busana nʼeritsuma, nikwa kumbe mutsumulebo.” (1 Pet. 3:9) Ngambe eryanzana n’omuhwa iryakukuna eribya mundu mubuya n’oyutsomene abandi, nibya n’abanganabya ibabirikukosera.

12. (a) Erikwa omuhwa w’eryanzana kutsibu lyanganatasyatukuna erikolaki? (b) Ngoko kikanganibwe omo video Tulinde Umoja Wetu​​—Ni Zawadi ya Muzuri Sana ukendiyikasa erikolaki?

¹² Omo baruha yiwe y’erimbere, Petero mwakolesya ekinywa “erikwa omuhwa w’eryanzana kutsibu.” Olwanzo oluli ng’olo, silulikuningira amakosa make masa, aliwe “lukakuningira ebibi bingi.” (1 Pet. 4:8) Alinga Petero mwibuka omwatsi w’eribya mughanyiri ogho Yesu amukangiriraya emyaka mingyi embere. Oko mughulu oyo, kitokekene Petero abya ikirirye ngoko omw’ibugha ati anganaghanyira mulikyabo “esyongendo sirinda,” aho inyamabya mundu mubuya kutsibu. Aliwe Yesu mwakangirirya Petero netu kutya ati litolere itwaghanyira “esyongendo makumi alinda ngendo sirinda,” n’ibughambu butsir’ighanza. (Mat. 18:21, 22) Kyamabya ikikanakukalako erikwama erihano rino, isiwabunika mutima! Ndambi silebe, erighanyira likanakala oko baghombe bosi ba Yehova abatahika-hikene. Eky’omughaso munene lino, ry’erikola ekyosi-kyosi ekyo wangatoka utoke erighanyira mulikyenyu n’erikola obuholo haghuma naye.c

BASYAKULU B’ENDEKO, MULISAYE EKIHYO

13. Busanaki kyanganakala oko basyakulu b’endeko eribana endambi y’erisikya abaghala n’abali babo bo mutima?

¹³ Eribugha ekwenene, Petero mwatibirirwa n’ahake ebinywa ebyo Yesu amubwira abilubuka. Mwamubira ati: “Utegaye esyombuli syage.” (Yoa. 21:16) Wamabya ighuli musyakulu w’endeko, naghu unasi ngoko obusondoli obu bukuleberirye. Aliwe kyanganakala oko musyakulu w’endeko eribana endambi y’erikola omubiri w’omughaso oyu. Eky’erimbere ekyo abasyakulu batolere erikola, ry’eriyikasa kutsibu eriha ab’omo bihanda byabo ebyo balaghireko kinya-mubiri, na bunya-kirimu, n’eriyikasa eritsomana obuli mundu omo kihanda. Kandi bakatulira kutsibu, bakateghekanaya n’erilabya ebihindi oko mihindano y’endeko n’oko mihindano minene. Abandi bawite eyindi mibiri. Bakakola omo Katunga akakakola omo bughuma n’olupitali kutse ibakola omo by’obuhimbe (LDC). Kwenene abasyakulu bawite bingyi by’erikola!

14. Ekyangahira omo basyakulu mo muhwa w’eriteya abaghala n’abali babo niki? (1 Petero 5:1-4)

¹⁴ Petero mwahana abasyakulu balikyabo ati “mulisaye esyombuli sy’oMungu.” (Soma 1 Petero 5:1-4.) Wamabya ighuli musyakulu w’endeko, tunasi ngoko wanzire abaghala n’abali benyu kandi wanzire eribateya. Aliwe hanganabya endambi iwataluka erikola omubiri oyo busana n’erilangira nga uwite bingyi by’erikola kutse eriyowa nga uluhire kutsibu. Ekyangakuwatikya niki? Ubwire Yehova y’ebyosi ebiri oko mutima. Petero mwahandika ati: “Oyukakola omubiri, akolego omo maka ago [oMungu] akamuha.” (1 Pet. 4:11) Abaghala n’abali benyu banganabya ibanemulaba omo maligho awate angahwaho omo kihugho kibi kino. Aliwe isiwibirirawa ngoko “Omulisya mukulu,” Yesu Kristo, anganabawatikya ndeke kutsibu kukulenga. Anganakola atya lino n’omo kihugho kihya-kihya ekikasa. Ekyo oMungu akasaba lisa oko basyakulu, ry’eryanza abaghala n’abali babo, eribateya, n’eribya “bisosekanio [by’erileberyako] busana nʼekihangulo.”

15. Omusyakulu mughuma akakolaki eriteya esyombuli? (Ulebaye n’epitsa.)

¹⁵ William, ayo wamabibugha emyaka mingyi ini musyakulu w’endeko, abiriyilangirira endundi y’eriteya esyombuli. Omughulu ekihunzo kye Korona kyatsuka, iye haghuma n’abasyakulu balikyabo mubalangira ngoko ni ky’omughaso obuli musyakulu abye akabirikira obuli mundu w’omo kikuto kiwe obuli yenga. Busanaki kyabya ky’omughaso erikola batya? William akabugha ati: “Abangyi b’oko baghala betu babya eka wabo y’ibobene, n’ekyo ky’endileka ibabya n’amalengekania awatuwene.” Omughulu Omukristo mulikyabo ali omo maligho, William akamuhulikirira ndeke atoke eriminya ebikaleka iniayowa atya n’eriminya ebyo alaghireko. Neryo akayikasa erisondya ebitsapo bilebe n’esyovideo oko site yetu atoke eriwatikya Omukristo mulikyabo oyo. Akabugha ati: omubiri w’eriteya esyombuli sy’oMungu ni w’erikola kutsibu lino kulenga embere. Tukakola kutsibu eriwatikya abandu abatasi oMungu batoke erimuminya; kutya litolere itwayikasa eriteya ekihyo tutoke eriwatikya esyombuli sya Yehova erisighala omo kwenene.”

ULEKE YEHOVA ABUYIRIRE ERIKUBEGHERYA

16. Twangakolesya tuti esyosomo esyo twamabigha omo syabaruha sya Petero?

¹⁶ Twamabigha esyosomo silebe sisa sy’omo syobaruha ibiri sya Petero esyasondolawa n’ekirimu kibuyirire. Kwamuhwa wamabiminya aho utolere iwakokotya. Eky’erileberyako, wanganabya ukalengekania buli oko miyisa eyikendisyabya omo kihugho kihya-kihya. Wanganayikasa eribya ukahubirya eyo ukakolera omubiri, ekalasi, kutse eritulira kitsumbukirania. Kutse kandi wanganasondekania ehyanya hingyi hy’erikanganiryamo ngoko wanzire abaghala n’abali benyu bo kutsibu. Basyakulu b’endeko munayisoghire kandi munayiteghekire eriteya esyombuli sya Yehova omwanza lyenyu? Omw’iyitsopolya ndeke, wanganafumbula ngoko unawite obulema bulebe, aliwe isiwabunika mutima. Kundi ‘Omukama ni mubuya,’ akendikuwatikya erikola esyombinduka. (1 Pet. 2:3) Petero akatukanganaya ngoko; oMungu akendisyabughirira eritubegherya ‘asyakusikya, asyakuha akaghala, n’erikuhangania ndeke.’​—1 Pet. 5:10.

17. Twamatendiluha, n’erileka Yehova abughirire eritubegherya, itukendisyabanaki?

¹⁷ Oko nzuko Petero mwalangira nga syatolere eribya ahali Yesu. (Luka 5:8) Aliwe erilabira obuwatikya bwa Yehova na Yesu, Petero mwatoka erikwama Yesu butaleghula. Ekyo mukyaleka Yehova iniamuwatikya “eriingira omo Bwami bwʼerikota bwʼomukama nʼomulamya wetu Yesu Kristo.” (2 Pet. 1:11) Olo ni lusunzo lunene! Wamatendiluha, ngoko Petero akola, n’erileka Yehova erikubegherya, naghu ighukendisyabana ekihembo ky’engebe y’erikota. Ighukendisyabana ‘enduli yʼerikirirya lyaghu, omulamo wʼomutima waghu.’​—1 Pet. 1:9.