Ukubhajadiswa Kuzokulethela Ingomuso Elihle!

UJesu wathi amaKrestu kufuze abhajadiswe. (Funda uMatewu 28:19, 20.) Khuyini ukubhajadiswa? Khuyini umuntu okufuze ayenze bona abhajadiswe?

1. Khuyini ukubhajadiswa?

Igama elithi “ukubhabhadisa” livela egameni lesiGirigi elitjho “ukucwilisa” ngemanzini. Lokha uJesu nakabhajadiswako, wacwiliswa ngemanzini eMlanjeni iJordani, ngemva kwalokho ‘waphuma ngemanzini.’ (Markosi 1:9, 10) NjengoJesu, amaKrestu weqiniso nawabhajadiswako acwiliswa ngemanzini.

2. Ukubhajadiswa kutjengisani?

Umuntu nakabhajadiswako utjengisa ukuthi uzinikele kuJehova uZimu. Umuntu uzinikela njani? Ngaphambi kokubhajadiswa, uthandaza ayedwa, atjele uJehova ukuthi ufuna ukumlotjha ngokungapheliko. Uthembisa uJehova ukuthi uzokulotjha yena yedwa begodu ukwenza intandwakhe kuzokuba yinto eqakatheke khulu kuye. Uqunta ‘ukuzidela . . . alandele’ iimfundiso zakaJesu bekalingise nesibonelo sakhe. (Matewu 16:24) Ukuzinikela nokubhajadiswa kwakhe kumenza akghone ukuba mngani kaJehova bekakhe ubungani nalabo alotjha nabo.

3. Umuntu angathuthukela njani ekubhajadisweni?

Ungalungiselela ukubhajadiswa ngokuthi ufunde ngoJehova bewuqinise nokukholwa kwakho. (Funda amaHebheru 11:6.) Njengombana ilwazi nokukholwa kwakho kukhula, kuzokuba njalo nangethando lakho ngoJehova. Lokho kuzokwenza ufune ukutjhumayela ngaye bewuphile ngeenkambiso zakhe. (2 Thimothi 4:2; 1 Jwanisi 5:3) Umuntu nasele aphila ‘ngokufaneleko kuJehova bona amthabise ngokupheleleko,’ uzokufuna ukunikela ukuphila kwakhe kuZimu bekabhajadiswe.—Kolose 1:9, 10.a

FUNDA NGOKUNGENELELEKO

4. Singafunda ekubhajadisweni kwakaJesu

Funda uMatewu 3:13-17 ubone imininingwana emalungana nokubhajadiswa kwakaJesu. Ngemva kwalokho nicoce ngemibuzo nasi:

• Inga-kghani uJesu bekalisana nakabhajadiswako?

• Wabhajadiswa njani? Inga-kghani wafafazwa ngamanzi?

UJesu wathoma umsebenzakhe okhethekileko awunikelwa nguZimu ngemva kokubhajadiswa. Funda uLukasi 3:21-23 noJwanisi 6:38, bese nicoca ngombuzo lo:

• Ngemva kokuthi uJesu abhajadiswe, ngimuphi umsebenzi ebewuza qangi ekuphileni kwakhe?

5. Ukubhajadiswa mgomo ongakghona ukuwufikelela

Indaba yokuzinikela nokubhajadiswa ingakuthusa ekuthomeni. Nanyana kunjalo, ungathuthuka bekube kulapho sele unesibindi sokuthatha isiqunto esiqakathekilekwesi. Ukuze ubone ukuthi abanye bakwenze njani lokho, dlala IVIDIYO.

IVIDIYO: Ukwakha Ubungani NoJehova (1:11)

Funda uJwanisi 17:3 noJakopo 1:5, bese nicoca ngombuzo olandelako:

• Yini engasiza umuntu alungele ukubhajadiswa?

1. Sizinikela kuJehova ngokuthi simtjele ukuthi sifuna ukumlotjha ngokungapheliko

2. Nasibhajadiswako, sitjengisa phambi kwabanengi bona sizinikele kuZimu

6. Ukubhajadiswa kutjho ukuba lilunga lomndeni kaJehova

Nawubhajadiswako, uba lilunga lomndeni obumbeneko wephasi loke. Nanyana sivela eendaweni neenzindeni ezingafaniko, sikholelwa into yinye begodu siphila ngeenkambiso zokuziphatha ezifanako. Funda IRhubo 25:14 neyoku-1 kaPitrosi 2:17, bese nicoca ngombuzo olandelako:

• Ukubhajadiswa kulithinta njani itjhebiswano lakho noJehova nelalabo olotjha nabo?

ISIRHUNYEZO

UJesu wafundisa ukuthi amaKrestu kufuze abhajadiswe. Ngaphambi kokuthi umuntu abhajadiswe, kufuze abe nokukholwa okuqinileko, aphile ngeenkambiso zakaJehova bekazinikele kuye.

Buyekeza

• Khuyini ukubhajadiswa begodu kubayini kuqakathekile?

• Ukuzinikela nokubhajadiswa kuhlobana njani?

• Khuyini umuntu ekufuze ayenze ngaphambi kokuthi azinikele bekabhajadiswe?

HLOLA OKUNGENZASI

Funda ukuthi khuyini ukubhajadiswa.

“Khuyini Ukubhajadiswa?” (Isihloko esiku-jw.org)

Buyekeza iindlela ezingasiza umuntu bona abhajadiswe.

“Ukuthanda UJehova Kuzosenza Sifune Ukubhajadiswa” (IsiThala, Matjhi 2020)

Funda ngesiqunto sokubhajadiswa esathathwa ngenye indoda, ubone ukuthi besisekelwe kuphi.

“Bebafuna Ngizifumanele Mina Bona IBhayibhili Ithini Kwamambala” (IsiThala, Febherbari 1, 2013)