ISIFUNDO 24
Liyini Iqiniso Ngeengilozi?
UJehova ufuna sifunde ngomndenakhe wezulwini. Umndenakhe loyo uhlanganisa neengilozi ezibizwa bona ‘madodana kaZimu.’ (Jobho 38:7) Lithini iBhayibheli ngeengilozi? Zinamuphi umthelela ebantwini? Inga-kghani zoke iingilozi zimalunga womndeni kaZimu?
1. Zibobani iingilozi?
UJehova wadala iingilozi ngaphambi kokudala iphasi. Njengaye, zimmoya begodu zihlala ezulwini. (Hebheru 1:14) Kuneengidi zeengilozi, zoke zinobuntu obungafaniko. (IsAmbulo 5:11) ‘Zilalela imiyalo [kaJehova] nelizwi lakhe.’ (IRhubo 103:20) Ekadeni, uJehova bekathumela iingilozi zakhe bona zise umlayezo ebantwini bakhe, zibasekele bezibasindise. Namhlanjesi, iingilozi zinqophisa amaKrestu bona afumane abantu abafuna ukufunda ngoZimu.
2. Ngubani uSathana namadimonakhe?
Ezinye iingilozi akhenge zihlale zithembekile kuJehova. Ingilozi yokuthoma eyavukelako “ibizwa ngokuthi nguDeveli noSathana, edurhisa iphasi loke.” (IsAmbulo 12:9) USathana bekafuna ukubusa abantu boke, nje-ke wabangela ukuthi u-Adamu no-Eva bangalaleli uJehova, ngemva kwesikhathi wenza nezinye iingilozi zangalaleli. Iingilozi ezahlubukakwezo zibizwa ngokuthi madimoni. UJehova wenza ukuthi ziqothwe ezulwini, ziphoselwe ephasini begodu ngokukhamba kwesikhathi zizokutjhatjalaliswa.—Funda IsAmbulo 12:9, 12.
3. USathana namadimonakhe balinga njani ukusidurhisa?
USathana namadimonakhe badurhisa abantu abanengi ngokusebenzelana nemimoya, okutjho ukulinga ukukhuluma nemimoya. Ngokwesibonelo, abanye abantu balinga ukufumana isizo ebantwini ababhula ngeenkwekwezi, ebantwini ababikezela ngekusasa neenyangeni. Abanye bafuna iindlela zokulatjhwa ezikhambelana nemimoya. Abanye bayakhohliswa ukwenzela bona bakholelwe ukuthi bangakghona ukukhuluma nabahlongakeleko. UJehova uyasiyelelisa uthi: “Ningabuzi ezangomeni nebantwini ababikezela ngekusasa.” (Levitikusi 19:31) Usinikele isiyeleliswesi bona asivikele kuSathana nemadimoninakhe. Bamanaba kaZimu begodu bafuna nokusilimaza.
FUNDA NGOKUNGENELELEKO
Funda ngezinto ezihle ezenziwa ziingilozi, nangobungozi bokusebenzelana nemimoya nokuthi singazivikela njani kuSathana nemadimonini.
4. Iingilozi zisiza abantu bona bafunde ngoJehova
Iingilozi zakaZimu azitjhumayezi abantu ngokunqophileko. Kunalokho, zinganqophisa abantu abalotjha uZimu kilabo abafuna ukufunda ngaye. Funda IsAmbulo 14:6, 7 bese nicoca ngemibuzo le:
Kubayini sitlhoga isizo leengilozi nasitjhumayelako?
Kghani kuyakukhuthaza na ukwazi ukuthi iingilozi zingakunqophisa ebantwini abafuna ukwazi ngeBhayibheli? Kubayini?
5. Ungasebenzelani nemimoya
USathana namadimoni bamanaba kaJehova newethu. Funda uLukasi 9:38-42, bese nicoca ngombuzo lo:
Amadimoni abaphatha njani abantu?
Asifuni ukuzibizela amadimoni. Funda uDuteronomi 18:10-12, bese nicoca ngemibuzo le:
Ngiziphi iindlela amadimoni azisebenzisako bona asibambe bekakhulume nathi? Ngiziphi izinto ezenziwako endaweni yangekhenu ezikhambisana nobudimoni?
Ucabanga ukuthi kulungile na uJehova nakala ukuthi sisebenzelane namadimoni? Kubayini?
Dlala IVIDIYO, bese nicoca ngemibuzo elandelako.
Kghani ucabanga ukuthi isikhumba esifakwe mntwana kaPalesa siyingozi? Kubayini?
UPalesa bekufuze enzeni nakazakuvikeleka emadimonini?
AmaKrestu weqiniso bewasolo alwisana namadimoni. Funda IzEnzo 19:19 neyoku-1 kwebeKorinte 10:21, bese nicoca ngombuzo lo:
Kubayini kuqakathekile ukutjhabalalisa nanyana yini ekhambisana nemimoya?
6. Hlula uSathana namadimonakhe
Amadimoni abuswa nguSathana kodwana iingilozi ezithembekileko zinqotjhiswa nguMikhayeli ingilozi ekulu, okungelinye igama lakaJesu. Unamandla kangangani uMikhayeli? Funda IsAmbulo 12:7-9, bese nicoca ngemibuzo le:
Ngubani onamandla khulu? NguMikhayeli neengilozi zakhe namkha nguSathana namadimonakhe?
Ucabanga ukuthi abalandeli bakaJesu kufuze bamsabe uSathana namadimonakhe?
Ungamhlula uSathana namadimonakhe. Funda uJakopo 4:7, bese nicoca ngombuzo lo:
Ungazivikela njani kuSathana nemadimonini?
ABANYE ABANTU BATHI: “Akusikumbi ukudlala amagemu namkha ukubukela amamuvi akhuluma ngemimoya. Kuzithabisa kwaphela.”
Kubayini umbono loyo uyingozi?
ISIRHUNYEZO
Iingilozi ezithembekileko ziyasisiza. USathana namadimonakhe bamanaba kaJehova begodu basebenzisa imimoya ukudurhisa abantu.
Buyekeza
Iingilozi zakaJehova zibasiza njani abantu bafunde ngaye?
Ngubani uSathana namadimonakhe?
Kubayini ungafuni litho elikuhlanganisa nokusebenzelana nemimoya?
HLOLA OKUNGENZASI
Qala ubufakazi obutjengisa ukuthi uJesu nguMikhayeli ingilozi ekulu.
“Ngubani Ingilozi Ekulu UMikhayeli?” (Isihloko esiku-jw.org)
Qala ukuthi omunye umma waphunyurha njani emadimonini.
“Wafumana Umnqopho Wokuphila” (IsiThala, sakaJulayi 1, 1993)
Funda bona uSathana ukusebenzisa njani ukusebenzelana nemimoya ukuze akhohlise abantu.
“Iqiniso Ngemilingo, Nobuloyi” (Indlela Eya Ekuphileni Okungapheliko, ingcenye 5)