Yenza UJehova IDwala Lakho

1. UDavida ufanisa uJehova nani emtlolweni weRhubo 18:46?

SIPHILA ephasini lapho iintjhijilo ezingakalindeleki zingaphazamisa namkha zitjhugulule ukuphila kwethu ngokupheleleko. Kuyasithabisa ukwazi ukuthi uJehova uZimu angasisiza. Esihlokweni esidlulileko, sifundile ukuthi unguZimu ophilako nokuthi uhlala akulungele ukusisiza. Nakasisekelako, siyaqiniseka ukuthi “uJehova uyaphila!” (Funda iRhubo 18:46.) Ngemva kokutjho njalo, uDavida wabiza uZimu ngokuthi ‘uliDwala lakhe.’ Kubayini uDavida afanisa uJehova, uZimu ophilako nedwala?

2. Kubayini kufuze sibe nendaba nokuthi uDavida ubiza uJehova ngokuthi “uliDwala lami”?

² Esihlokwenesi, sizokubona bona kubayini uJehova abizwa ngokuthi lidwala nokuthi lokho kusifundisani ngaye. Sizokufunda nokuthi thina singambona njani njengeDwala lethu. Emaswapheleni, sizokucoca ngokuthi singamlingisa njani uJehova.

KUBAYINI UJEHOVA ABIZWA NGEDWALA

3. Esikhathini esinengi iBhayibheli lilisebenzisa njani ibizo elithi, ‘Dwala’? (Qala esingaphandle.)

³ IBhayibheli lisebenzisa ibizo elithi, ‘idwala’ ukwenza isithombe ukusisiza sizwisise ubuntu bakaJehova. Amavesi amanengi eBhayibhelini ambuka ngokuthi unguZimu ongeze amadaniswa nalitho. KuDuteronomi 32:4 kukokuthoma lapha uJehova abizwa ngokuthi “uliDwala.” Emthandazwenakhe, uHana wathi “alikho idwala elinjengoZimethu.” (1 Sam. 2:2) URhabakhukhu wabiza uJehova ngokuthi “Dwala lami.” (Rhab. 1:12) Umtloli weRhubo 73 wabiza uZimu ngokuthi, ‘ulidwala lehliziywakhe.’ (Rhu. 73:26) NoJehova ngokwakhe wazibiza ngedwala. (Isa. 44:8) Akhesicoce ngobuntu obuthathu bakaJehova obufana nedwala besifunde nokuthi singamenza njani ‘iDwala lethu.’—Dut. 32:31.

4. UJehova usiphephelo sethu njani? (IRhubo 94:22)

⁴ UJehova usiphephelo. Njengombana idwala elikhulu lingaba siphephelo esiwuruwurwini esikhulu, uJehova uyasivikela nasiqalene nobujamo obungabeka ukuphila kwethu engozini. (Funda iRhubo 94:22.) Uyasivikela bekasikhandele bona singalimali umtjhawutjhile. Uthembisa nokungeziweko: Uzokuqeda nanyana yini eyenza singabi nokuthula begodu singavikeleki.—Hez. 34:​25, 26.

5. UJehova angaba njani siphephelo sethu esinjengedwala?

⁵ Enye indlela esenza ngayo uJehova abe siphephelo esifana nedwala kukuthi sithandaze kuye. Nasithandaza kuye, usinikela “ukuthula kwakaZimu” okuvikela ihliziyo nomkhumbulwethu. (Flp. 4:​6, 7) Cabanga ngalokho okwenzeke ku-Artem, umfowethu owabotjhelwa ukukholwa kwakhe. Umphenyisisi onesihluku wamtjhuka ngemibuzo bewamhlazisa. Wathi, “Bengihlala ngitshwenyekile qobe umphenyisisi nakangibizako. . . . Bengihlala ngithandaza kuJehova. Ngabawa ukuthula ehliziywenami nokuhlakanipha. Iindlela zakamphenyisisi akhenge zisebenze kimi. . . . Ngesizo lakaJehova, bekufana nokuthi ngijame ngemva komthangala.”

6. Kubayini singahlala simthemba uJehova? (Isaya 26:​3, 4)

⁶ UJehova uthembekile. Njengedwala elingasikinyekiko, uJehova uhlala akhona ukusisiza. Singamthemba ngombana “uliDwala ngokungapheliko.” (Funda u-Isaya 26:​3, 4.) Uzokuhlala akhona bona azalise iinthembiso zakhe, alalele imithandazwethu bekasisekele nasitlhoga isizo. Singamthemba uJehova ngombana uthembekile kilabo abamlotjhako. (2 Sam. 22:26) Angekhe akhohlwe esimenzela khona begodu uzokuhlala asivuza ngalokho.—Heb. 6:10; 11:6.

7. Sizokubona ini nasithembela kuJehova? (Qala nesithombe.)

⁷ Senza uJehova iDwala lethu nasithembela kuye ngokungapheliko. Siyazi ukuthi nasimlalelako ngeenkhathi ezibudisi, siyazuza. (Isa. 48:​17, 18) Njengombana simbona asisekela, sizomthemba ngehliziywethu yoke. Sizabe sikulungele ukuqalana neentjhijilo sazi kuhle ukuthi uJehova uzosisiza. Kuneenkhathi ezinengi lapha kunganamuntu ongasisiza khona, kulapho sibona khona ukuthi uJehova uthembeke kangangani. U-Vladimir uthi, “Nangisejele, ngaba nesikhathi esimnandi khulu noJehova. Ngafunda ukumthemba khulu ngebanga lokuthi bengingedwa begodu ngingakghoni ukwenza litho ngobujamo bami.”

8. (a) Kubayini singathi uJehova akasikinyeki? (b) Sizuza njani ngokwenza uZimu iDwala lethu? (IRhubo 62:​6, 7)

⁸ UJehova akasikinyeki. Ngokufanako nedwala elikhulu, uJehova akasikinyeki begodu udzimelele. Ubuntu bakhe abutjhuguluki nentandwakhe ayisikinyeki. (Mal. 3:6) U-Adamu no-Eva nabavukela uJehova, akhenge atjhugulule umnqophakhe ngabantu. Kunjengombana umpostoli uPowula atjho, uJehova “angekhe aziphika.” (2 Thim. 2:13) Lokhu kutjho ukuthi nanyana kungenzekani namkha abanye benzeni, uJehova angekhe atjhugulule ubuntu bakhe, umnqophakhe namkha imithethokambiswakhe. Nasithemba uZimethu ongasikinyekiko, singathemba ukuthi uzosisindisa bekasisize siqalane ngokuphumelelako neenkhathi ezibudisi.—Funda iRhubo 62:​6, 7.

9. Ufundani kilokhu okwenzeke ku-Tatyana?

⁹ Senza uJehova iDwala lethu ngokuthi sihlale sikhumbula ukuthi umuMuntu onjani nokuthi sihlale sicabanga ngomnqophakhe. Ukwenza njalo kuzosisiza sihlale sinomkhumbulo ofaneleko nasikghodlhelelela iintjhijilo. (Rhu. 16:8) Bekunjalo kudadwethu u-Tatyana owabotjhelwa ngendlini ngebanga lokukholwa kwakhe. Uthi, “Ngazifumana ngingedwa. Bekubudisi ekuthomeni. Bengihlala ngidanile.” Nanyana kunjalo, nakabona ukuthi isitjhijilo sakhe sihlobana njani nomnqopho kaJehova, lokho kwamsiza wehlisa umoya begodu kwamupha amandla wokuhlala athembekile. Uthi: “Ukuzwisisa bona kubayini lokhu kwenzeka kimi kwangisiza ngakhumbula ukuthi ngenzela uJehova. Lokhu kwangisiza ngalisa ukucabanga ngami.”

10. UJehova angaba njani liDwala lethu?

¹⁰ Emalangeni azako, sizokuqalana nobujamo obuzokutlhoga sithembele khulu kuJehova kunanini. Nje, sikhathi sokuqinisa ukuthembela kwethu kuJehova bona uzosisiza sikghodlhelele ngokuthembeka. Singakwenza njani lokho? Funda iindaba eziseBhayibhelini nalokho okwenzeke kiboFakazi besikhathini sethu. Cabanga ukuthi uJehova ubutjengise njani ubuntu obufana nedwala ukusiza abantu bakhe abathembekileko. Cabangisisa kuhle ngeendabezo. Ukwenza njalo, kuzokusiza wenze uJehova iDwala lakho.

LINGISA UBUNTU BAKAJEHOVA OBUFANA NEDWALA

11. Kubayini sifuna ukulingisa ubuntu bakaJehova obunjengedwala? (Qala nebhoksi elithi, “Umnqopho Abafowethu Abasese Batjha Abangazibekela Wona.”)

¹¹ Sele sibonile ukuthi uJehova utjengise njani ukuba lidwala. Yeke, cabanga ukuthi ungabulingisa njani ubuntu bakhe obufana nedwala. Nasilokho senza njalo, sizokulungela khudlwana ukukhuthaza ibandla. Ngokwesibonelo, uJesu wanikela uSimoni igama elithi Khefasi (elitjhugululwa ngokuthi “Pitrosi”), elitjho ukuthi “Isiqetjhana SeDwala.” (Jwa. 1:42) Lokhu bekutjengisa bona bekazokuba mthombo wenduduzo bekaqinise nebandla. Abadala bebandla bahlathululwa “njengomthunzi wedwala elikhulu.” Lokhu kutjengisa bona babavikela njani labo abasebandleni. (Isa. 32:2) Kuliqiniso ukuthi ibandla liyazuza lokha boke abafowethu nabodadwethu balingisa ubuntu bakaJehova obufana nedwala.—Efe. 5:1.

12. Hlathulula iindlela esingaba ngazo siphephelo kabanye.

¹² Yiba siphephelo. Ngezinye iinkhathi, singaba siphephelo kubafowethu nabodadwethu nakuneenhlekelele zemvelo, umtjhagalo namkha ipi. Njengombana ubujamo buya buba bumbi khulu “emihleni yokuphela” le, sizokuba namathuba amanengi wokusizana. (2 Thim. 3:1) Singasiza abafowethu nabodadwethu ngokwamazizo netjhebiswaneni labo noJehova. Enye indlela esingakwenza ngakho lokhu kubenza bazizwe bamukelekile eWolweni lomBuso, sibe nengcenye ekwenzeni ibandla lifuthumale. Siphila ephasini elimbi, okubudisi ukuphila kilo neligandelelako. Yeke, abafowethu nabodadwethu nabeza esifundweni, sifuna ukwenza okusemandlenethu ukubenza bazizwe bathandwa, bavuselelekile begodu bavikelekile.

13. Abadala bangaba njani siphephelo kabanye? (Qala nesithombe.)

¹³ Abadala bangaba siphephelo kilabo abasebandleni abaqalene neenwuruwuru zamambala namkha ezingokomfanekiso. Nakuvele iinhlekelele namkha ubujamo oburhabako bezepilo, abadala bathatha amagadango wokusiza. Basiza abafowethu nabodadwethu batjhidelane noJehova khudlwana. Abafowethu nabodadwethu bazokufumana kubulula ukukhuluma nomdala webandla nange anesineke, azwelana begodu azimisele ukulalela. Ubuntu obunjalo benza abanye bazizwe batlhogonyelwa begodu lokho kwenza kube bulula ukusebenzisa nanyana ngisiphi iseluleko umdala webandla angasinikela.—1 Thes. 2:​7, 8, 11.

14. Singatjengisa njani ukuthi sithembekile?

¹⁴ Thembeka. Sifuna abanye bakghone ukusithemba, khulukhulu ngeenkhathi ezibudisi. (IzA. 17:17) Singenzani bona saziwe njengabantu abathembekileko? Singalwela ukuhlala sinobuntu bakaZimu obufana nokwenza esikuthembisileko nokwenza koke okusemandlenethu ukungatshwilisi izinto. (Mat. 5:37) Singanikela nesizo nakutlhogekako. Ukungezelela kilokho, siyaqinisekisa ukuthi senza izabelo zethu ngokukhambisana neenqophiso esizifumanako.

15. Ibandla lizuza njani nalinabadala abathembekileko?

¹⁵ Abadala abathembekileko bazuzisa ibandla. Njani? Abarhuweleli bazizwa basekelwa nababona ukuthi abadala bahlala bakulungele ukubasiza, njengombonisabo wesimu. Abarhuweleli bazizwa bathandwa nabaziko ukuthi abadala bazimisele ukubasiza. Njengombana abadala bathatha iseluleko sabo eBhayibhelini neencwadini zehlangano kunokuthi baluleke ngemibonwabo, abafowethu nabodadwethu bayabathemba. Abafowethu nabodadwethu banamabanga angeziweko wokuthemba umdala webandla ongarhatjhi iindaba eziyifihlo nowenza lokho akuthembisileko.

16. Singazuza njani besizuzise nabanye nasingasikinyekiko?

¹⁶ Ungasikinyeki. Singaba nomthelela omuhle kabanye nasijamela okulungileko besenze iinqunto ezisekelwe eenkambiswenilawulo zeBhayibheli. Njengombana sikhula ekukholweni nelwazini elinembileko, siyaqina eqinisweni. Angekhe sibe babantu abangekhe bazi ukuthi bathatha siphi isiqunto, sibogaboge namkha siphazanyiswe ziimfundiso ezimamala nokucabanga kwephasi. (Efe. 4:14; Jak. 1:​6-8) Ukukholwa kwethu kuJehova neenthembisweni zakhe kusenza sihlale sinombono omuhle nasifumana iindaba ezimbi. (Rhu. 112:​7, 8) Siyakghona nokusiza abaqalene neentjhijilo.—1 Thes. 3:​2, 3.

17. Khuyini esiza abadala baqinise ibandla?

¹⁷ Abadala kufuze balinganisele emikghwenabo, babe nomkhumbulo oqaqulukileko, bahleleke bebazwisise. Amadoda la aziinsika kabanye begodu aqinisa nebandla ngokuthi “akakarele elizwini elithembekileko.” (Tit. 1:9; 1 Thim. 3:​1-3) Ngesibonelo sabo nokukhambela kokwelusa, abadala basiza abarhuweleli bona bahlale bakhona esifundweni, esimini begodu babe nesifundo somuntu mathupha. Abafowethu nabodadwethu nabaqalana nobujamo obubudisi, abadala bangenza okunengi ngokuthi babakhuthaze bona badzimelele kuJehova neenthembisweni zakhe.

18. Kubayini sifuna ukudumisa uJehova besitjhidele nakuye? (Qala nebhoksi elithi, “Indlela Yokutjhidela Eduze NoJehova.”)

¹⁸ Ngemva kokuhlola ubuntu bakaJehova obukarisako, singatjho lokhu okwatjhiwo yiKosi uDavida nayithi: “Kwanga uJehova, iDwala lami angadunyiswa.” (Rhu. 144:1) UJehova angeze ahluleka ukuba nguZimu esingamthemba. Ekuphileni kwethu koke, ngitjho nanyana sele sibadala, sinebanga lokuthi uJehova: “UliDwala lami,” besiqiniseke ukuthi uzosisiza siphumelele etjhebiswaneni lethu naye.—Rhu. 92:​14, 15.