Funda KuJesu UMphristi OPhakemeko Onesirhawu

1-2. (a) Kubayini uJehova athumela iNdodanakhe ephasini? (b) Sizokucoca ngani esihlokwenesi? (Hebheru 5:​7-9)

EMINYAKENI engaba zii-2 000 eyadlulako, uJehova wathumela iNdodanakhe eligugu ephasini. Kubayini? Elinye lamabanga bekukutjhaphulula abantu esonweni nekufeni nokususa woke umonakalo obangelwe nguSathana. (Jwa. 3:16; 1 Jwa. 3:8) UJehova bekazi ukuthi izinto uJesu azokuqalana nazo njengomuntu bezizomlungiselela ukuba Mphristi oPhakemeko onesirhawu nezwela. UJesu waba Mphristi oPhakemeko ngemva kokubhajadiswa ngo-29 C.E.a

² Esihlokwenesi sizokucoca ngokuthi ukuphila njengomuntu kwamsiza njani uJesu wakufanelekela ngokungeziweko ukuba Mphristi oPhakemeko onesirhawu. Nasiragela phambili sizwisisa ukuthi uJesu ‘wenziwa waphelela’ njani, sizokufumana kulula ukuthandaza kuJehova ngitjho nanyana isono nokubogaboga kusiqeda amandla.—Funda amaHebheru 5:​7-9.

INDODANA KAZIMU ETHANDEKAKO IZA EPHASINI

3-4. Ngimaphi amatjhuguluko amakhulu uJesu aqalana nawo nakeza ephasini?

³ Inengi lethu khelaqalana namatjhuguluko ekuphileni, kungenzeka kwatlhogeka sifuduke ekhaya ebesilithanda namkha saba kude nomndeni nabangani. Kungaba budisi ukwenza amatjhuguluko afana na la. Akekho umuntu okhe owaqalana namatjhuguluko njengalawa uJesu aqalana nawo. Bekayingilozi yokuthoma begodu eqakatheke ukuzidlula zoke. Bekathandwa nguJehova begodu bekahlala athabile nakasebenza ‘ngesandleni sokudla’ sakaZimu. (Rhu. 16:11; IzA. 8:30) Nanyana kunjalo, yebeFilipi 2:7 ithi uJesu “wazehlisa,” ngokuthi adele isikhundla sakhe esiphakemeko ezulwini eze ephasini azokuphila nabantu abanesono.

⁴ Cabanga godu ngobujamo uJesu ebekakibo nakabelethwako nalokha nakakhulako. UJesu wabelethelwa emndenini odobha phasi, lokho sikwazi ngebanga lomhlatjelo ababelethi bakhe abawunikelako nakabelethwako. (Lev. 12:8; Luk. 2:24) Ngesikhathi iKosi ekhohlakeleko uHerode izwa ngokubelethwa kwakaJesu, yafuna ukumbulala. UJesu bona avikeleke emanweni kaHerode, ababelethi bakhe bayokuhlala emakampeni wababaleki eGibhide. (Mat. 2:1, 3, 15) Ipilo kaJesu nakasephasini beyihluke ngokupheleleko kunalokha nakasezulwini.

5. Khuyini uJesu ayibonako nakasephasini begodu izinto aqalana nazo zamlungiselela njani ukuba Mphristi oPhakemeko? (Qala nesithombe.)

⁵ Ngesikhathi asephasini, uJesu wabona abantu abanengi batlhaga. Kungokwemvelo bona wabuzwa ubuhlungu bokuhlongakalelwa babantu abathandako kuhlanganise nosingayise uJosefa. Hlangana nekonzwakhe, uJesu bekabona abantu abanobulepheru, abaphopheleko, abarholopheleko nababelethi abahlongakalelwe bentwana begodu wabarhawukela abantwaba. (Mat. 9:​2, 6; 15:30; 20:34; Mar. 1:​40, 41; Luk. 7:13) Liqiniso bona uJesu nakasezulwini bekababona abantu batlhaga kodwana nasele asephasini njengomuntu wayizwisisa ngcono indlela abantu abazizwa ngayo nabaqalene nokutlhaga. (Isa. 53:4) Lokho uJesu akubonako nakasephasini kwamsiza wazwisisa imizwa, ukusilingeka nobuhlungu abantu abaqalana nakho. Njengawo woke umuntu, uJesu naye bekadinwa, agandeleleke bekadane.

UJESU BEKANEMIZWA EFANA NEYABANTU

6. Isiphorofido saka-Isaya sisifundisani malungana nesirhawu sakaJesu ngabantu? (Isaya 42:3)

⁶ Phakathi nekonzwakhe uJesu wabatjengisa izwela abantu ababogabogako nebebaphathwa kumbi. Ngokwenza njalo, wazalisa isiphorofido. EmiTlolweni yesiHebheru, abantu abanokukholwa okuqinileko kuJehova bafaniswa njengesimu ethelelelwe kuhle namkha umuthi omkhulu noqinileko. (Rhu. 92:12; Isa. 61:3; Jor. 31:12) Kodwana abatlhagako nabaphathwa ngokunganabulungiswa bafaniswa nomhlanga ophukileko kunye nesibani esififiyelako esizokucima, zombili iintwezi azisilisizo. (Funda u-Isaya 42:3; Mat. 12:20) UJehova wasebenzisa iimbonelwezi ukubikezela ithando nesirhawu uJesu ebekazolitjengisa abantu ebebaqalwa njengabangakaqakatheki.

7-8. UJesu wasizalisa njani isiphorofido saka-Isaya?

⁷ UMatewu waveza bona uJesu wasizalisa isiphorofido saka-Isaya nakatlola athi: “Akunamhlanga ophukileko azowuphula, nesibani esififiyelako azosicima.” Eminye imikarisomraro kaJesu beyizuzisa abantu ebebaqalelwa phasi ekungenzeka bebazizwa njengomhlanga ophukileko namkha ebebanganathemba ekungenzeka bebazizwa njengesibani esififiyelako esizokucima ingasikade. Omunye wabantwabo, bekuyindoda ebeyinobulepheru. Kungenzeka beyingasenalo ithemba lokuthi izokuphola beyikghone ukuba nomndenayo nabangani bayo godu. (Luk. 5:​12, 13) UJesu godu wahlangana nendoda engezwako nengakghoni ukukhuluma kuhle. Cabanga indlela ebeyizizwa ngayo nayibona abantu bakhuluma kodwana ingazwisisi lokho abakutjhoko. (Mar. 7:​32, 33) Akupheleli lapho.

⁸ Ngesikhathi sakaJesu, amaJuda amanengi bekakholelwa ukuthi abantu abagulako namkha abarholopheleko bekusijeziso abasifumeneko ngebanga lezono zabo namkha zababelethi babo. (Jwa. 9:2) Ngebanga lokukholelwa amala la, abantu ebebaqalene nezintwezi bebaphathwa njengabantu abangakaqakatheki. Bona kuzaliseke isiphorofido saka-Isaya, uJesu wabalapha abantwaba begodu wabasiza bazi ukuthi uZimu unendaba nabo. Kusiqinisekisa ngani lokhu?

9. AmaHebheru 4:​15, 16 akuveza njani ukuthi uMphristi oPhakemeko uzwelana nabantu abangakapheleli?

⁹ Funda amaHebheru 4:​15, 16. Singaqiniseka bona uJesu uzokuhlala asitjengisa isirhawu. Kutjho ukuthini lokho? Igama lesiGirigi ngesiNdebele elitjhugululwe ngokuthi “isirhawu” lingatjho imizwa umuntu aba nayo ngebanga lokubona abanye badanile begodu bezwa ubuhlungu. Kuyakarisa bona uPowula wasebenzisa igama elifanako lesiGirigi kumaHebheru 10:34 ukutjengisa ukuthi siyabarhawukela labo abasemajele. Nasifunda ngendlela uJesu asiza ngayo abantu, sikghona ukubona indlela ebekanesirhawu ngayo. Akhenge alaphe abantu ngombana bekufuze enze njalo. Bekanendaba khulu nabo begodu afuna ukubasiza. Ngokwesibonelo, ngesikhathi alapha indoda enobulepheru bekangayilapha akude ngokuyikarisomraro kodwana wakubona kukuhle bona ayikghwathe begodu kungenzeka bekukokuthoma indoda le ikghwathwa mumuntu. UJesu wayicabangela indoda engezwako ngokuthi ayisuse hlangana nesiqubuthu, ayilaphe ngemsitheleni. Akhe ucabange godu ngesikhathi umfazi obesele atjhugulukile ekwenzeni izinto ezimbi, lokha nakahlambisa uJesu iinyawo ngeenyembezi zakhe. UmFarisi akhenge abe nomusa emfazini loyo kodwana uJesu wamvikela begodu walungisa nendlela yokucabanga yomFarisi lo. (Mat. 8:3; Mar. 7:33; Luk. 7:44) Kuyakhanya ukuthi uJesu akhenge ababethise ngommoya abantu ebebagula namkha abenze izono ezikulu. Ngokuhlukileko, bekafuna beze kuye begodu bekabatjengisa indlela abathanda ngayo. Singaqiniseka bona uzositjengisa isirhawu ngendlela efanako.

LINGISA UMPHRISTI OPHAKEMEKO

10. Khuyini esingayisebenzisa ukusiza abantu abangezwako nabangaboniko? (Qala neenthombe.)

¹⁰ Njengabalandeli bakaJesu abathembekileko silwela ukumlingisa ngokuthi sibe nethando, sizwele besibe nesirhawu ebantwini. (1 Pit. 2:21; 3:8) Angekhe sikghone ukulapha abantu abangezwako namkha abangaboniko kodwana singabasiza bafunde ngoZimu bebatjhidele kuye. Ngokwesibonelo, iincwadi zeBhayibheli nje sezifumaneka ngamalimi wezandla angaphezu kwali-100. Ukwenzela ukuthi nabangaboniko bazuze, iincwadi ze-Braille sezifumaneka ngamalimi angaphezu kwama-60 begodu kunelungiselelo lephimbo elihlathulula lokho okwenzeka evidiyweni ngamalimi angaphezu kwali-100. Zoke izintwezi zenzelwe ukusiza abantu abangaboniko nabangezwako bona batjhidele kuJehova neNdodanenakhe.

11. Ihlangano kaJehova isitjengisa njani isirhawu uJesu anaso ngawo woke umuntu? (IzEnzo 2:​5-7, 33) (Qala neenthombe.)

¹¹ Ihlangano kaJehova yenza koke okusemandlenayo ukusiza abantu bayo yoke imihlobo. Khumbula ukuthi ngemva kokuvuswa, uJesu wathululela umoya ocwengileko bona boke ebebasemnyanyeni wePentekoste bakghone ukuzwa iindaba ezimnandi omunye nomunye “ngelimi lakhe.” (Funda izEnzo 2:​5-7, 33.) Ihlangano ilandela isibonelo sakaJesu ngokuthi igandangise iincwadi ezisekelwe eBhayibhelini ngamalimi angaphezu kwee-1 000, amanye wawo akhulunywa babantu abambalwa. Ngokwesibonelo, ilimu lesi-Amerindian likhulunywa babantu abambalwa abahlala eTlhagwini neSewula Amerika. Kodwana ihlangano yenze iincwadi ezingaphezu kwamalimi ali-160, ukusiza abantu abakhuluma ilimelo bafumane ithuba lokufunda ngeendaba ezimnandi. Iincwadi zethu zifumaneka nangamalimi ama-20 ngesi-Romany. Iinkulungwana ezinengi zabantu abakhuluma amalimi anjengala sezithome ukulotjha uJehova.

12. Khuyini okhunye ihlangano kaJehova eyenzela abantu namhlanjesi?

¹² Ngaphezu kokusiza abantu bafunde ngeendaba ezimnandi, ihlangano kaJehova isiza nalabo abathintwe ziinhlekelele zemvelo. Ngebangelo, iinkulungwana zabafowethu nabodadwethu zihlala zikulungele ukufaka isandla nakutlhogekako. Ihlangano kaJehova godu yakhe iindawo ezihloniphekileko zokulotjha lapho abantu bahlangana khona ukuthi bafunde okungeziweko ngethando uZimu analo ngabo.

UMPHRISTETHU OPHAKEMEKO ANGAKUSIZA

13. Ngiziphi ezinye iindlela uJesu asisiza ngazo?

¹³ Njengomelusi omuhle, uJesu wenza isiqinisekiso sokobana sinakho koke esikutlhogako ukuhlala sitjhidele kuJehova. (Jwa. 10:14; Efe. 4:7) Ngezinye iinkhathi, ubujamo esiqalana nabo epilweni bungasenza sizizwe njengesibani esififiyelako esizokucima namkha njengomhlanga ophukileko. Ngebanga lokugula, imitjhapho esiyenzileko namkha ukungaboni ngelihlo linye nomuntu esilotjha naye singazizwa siphelelwa mamandla. Kungaba budisi ukudzimelela ethembeni lengomuso kunokungadzimeleli emirarweni esinayo. Khumbula ukuthi uJesu uyazibona izinto oqalana nazo begodu uyayizwisisa nendlela ozizwa ngayo. Isirhawu sakhe simenza afune ukukusiza. Ngokwesibonelo, angasebenzisa umoya ocwengileko ukukuqinisa nawuphelelwa mamandla. (Jwa. 16:7; Tit. 3:6) Ukungezelela kilokho, uJesu angasebenzisa abadala nabafowenu nabodadwenu bebandleni bona akukhuthaze bekakusize.—Efe. 4:8.

14. Khuyini esingayenza nasizizwa sidanile?

¹⁴ Nange udanile, khumbula ukuthi uJesu, mPhristethu oPhakemeko begodu uzindle nangokuthi kutjho ukuthini lokho kuwe. Khumbula nokuthi uJehova wamthumela ephasini ingasi bona azokunikela ngokuphila kwakhe kube sihlengo kwaphela kodwana nokuthi amsize azwisise ngcono imiraro abantu abaqalana nayo. Nange sidanile ngebanga lezinto ezimbi esizenzileko namkha ngokubogaboga kwethu, uJesu ukulungele begodu uzimisele ukusisiza “ngesikhathi esifaneleko.”—Heb. 4:​15, 16.

15. Hlathulula ukuthi umuntu otjhiye umhlambi kaJehova angasizwa njani ukubuyela ebandleni.

¹⁵ UJesu ubuye anqophise abantu bakhe bona basize labo abatjhiye uJehova bona babuye. (Mat. 18:​12, 13) Tjheja okwenzeke ku-Stefano.b Waqunta ukuya esifundweni ngemva kobana esuswe ekuhlanganyeleni iminyaka eli-12. Uthi, “Bekungasilula kodwana bengifuna ukulotjha uJehova nabafowethu nabodadwethu godu. Abadala engahlangana nabo bangenza ngazizwa ngamukelekile. Ngezinye iinkhathi bengizizwa ngingasi lilitho begodu ngifuna ukulahla itewu. Kodwana abafowethu bebangikhumbuza bona uJehova noJesu bafuna ngikghodlhelele. Nangibuyiselwako ekuhlanganyeleni, ibandla loke lasamukela nomndenami. Ngokukhamba kwesikhathi umkami wamukela isifundo seBhayibheli, sikhuluma nje silotjha uJehova simndeni.” Kumthabisa khulu umPhristi oPhakemeko ukubona abantu abaphendukileko bafumana isizo abalitlhogako begodu babuyela ebandleni.

16. Kubayini sithokoza ngokuba nomPhristi oPhakemeko osizwelako?

¹⁶ Ngesikhathi uJesu asephasini, wasiza abantu abanengi ngesikhathi esifaneleko. Namhlanjesi singaqiniseka bona uzosisiza nanyana kunini nasitlhoga isizo. Begodu ephasini elitjha uzokusiza abantu abalaleleko bona bangasaba nesono. Simthokoza khulu uZimethu uJehova, ngokuthi ithando limenze wakhetha iNdodanakhe bona ibe mPhristethu oPhakemeko osizwelako.