Indlela Yokwenza Ukufunda IBhayibheli Kuzuzise Begodu Kuthabise

UJotjhuwa ufunda umThetho kaZimu; amaboda weJerikho ayawa, kodwana umuzi kaRarhabu wona akhenge ugirike, uJotjhuwa uphakamisela izandla zakhe ezulwini uyathandaza

UJOTJHUWA uqalene nobujamo obuthusako. Kazi kufuze arhole isitjhaba sakwa-Israyeli ayosingenisa eNarheni yesiThembiso ngitjho nanyana aqalene nobujamo obubudisi. UJehova umqinisekisa ngokuthi uzokuphumelela begodu umkhuthaza ngokuthi athi kuye: ‘Qina amandla ube nesibindi. Uyelele umThethwami. Zindla ububule ngawo ubusuku nemini, ukuze uyelele ukwenza ukuya ngakho koke okutlolwe kiyo. Ngalokho uzakwenza iindlela zakho zibe mhlophe bese uba nepumelelo.’—Jotj. 1:7, 8.

Njengombana siphila ‘eenkhathi ezibudisi,’ nathi siqalana nobujamo obugandelelako. (2 Thim. 3:1) Nasizakuphumelela kufuze silandele isiyeleliso uJehova asinikela uJotjhuwa. Lokho singakwenza ngokuthi sifunde iBhayibheli qobe begodu sisebenzise esikufundako nasiqalene nobudisi.

Nanyana kunjalo inengi lethu alikuthandi ukufunda. Kodwana njengombana kuqakathekile ukufunda iBhayibheli, akhuhlole ibhoksi elithi “Linga Naku” bona uthole iindlela ezilula zokwenza ukufunda iBhayibheli kuzuzise begodu kuthabise.

Umrhubi wathi: “Ngihlahle emizileni yemiyalwakho ngombana ngiyathaba ngayo.” (Rhu. 119:35) Ukufunda iliZwi lakaZimu kungakuthabisa, njengombana kukunengi ongakufumana ngokulifunda.

Ngitjho nanyana ungakaqalani nobujamo obufana nobakaJotjhuwa, kukhona nawe oqalene nakho. Yeke njengoJotjhuwa funda begodu ukusebenzise ekuphileni kwakho lokho okutjhiwo liBhayibheli. Nawenza njalo, uzokuphumelela.

LINGA NAKU

Thandaza ngaphambi kobana ufunde. IBhayibheli linemicabango kaMninimandlawoke ayitlolele thina. Yeke, nawufunda iBhayibheli mbawe akusize, usebenzise okufundako ekuphileni kwakho.—Ezr. 7:10.
Zibuze imibuzo nawufunda iBhayibheli namkha iincwadi zehlangano. Imibuzo enjengethi: ‘Engikufundakokhu kungitjelani ngoJehova? Kukhambisana njani neBhayibheli iyoke? Ngingabasiza njani abanye ngengikufunde eBhayibhelini?’
Zindla ngokufundako. Ngemva kokufunda cabanga ngokufundileko. ‘Ngizizwa njani ngengikufundakokhu? Kubayini ngizizwa ngaleyo ndlela? Ngingakuhlobanisa njani nobujamo engiqalene nabo sikhuluma nje, ngobujamo obudlulileko nobusezako? Ngingakusebenzisa njani engikufundako?’ (Job. 23:5; Rhu. 49:3) Linga ukuhlathululela abantu ukuthi kubayini uJehova athi kunezinto okufuze sizibalekele nokuthi imiphumela izokuba yini nasingalaleliko.—Dut. 32:28, 29.
Kubone lokho okufundako. Akhesithi ufunda ngendaba kaJosefa. Kubone engqondwenakho okwenzekako ngesikhathi abafowabo bamthengisela bakwa-Itjhimayeli. (Gen. 37:18-28) Akube kwanga uyakubona, uyakuzwa ukghona nokukunukelela okwenzekako. Zifake emanyathelweni wabantu ofunda ngabo. Bacabangani, bazizwa njani? Nawenza njalo okufundako kuzokukhanya khudlwana.
USebenzisa amathulusi wokurhubhulula. Jayelana namathulusi afumaneka ngelimi lakho akunzinzolwazi namkha aziincwadi. Bawa abanye bakufundise bona asetjenziswa njani. I-Watch Tower Publications Index neThulusi lokuRhubhulula laboFakazi bakaJehova zizokusiza ufumane iinhloko ezihlukahlukeneko nendlela okuhlathululwe ngayo amavesi weBhayibheli. Sebenzisa isithasiselo se-New World Translation of the Holy Scriptures esitholakala ngelimi lakho. Amathulusi la azokuvezela indlela iinarha eziseBhayibheli ezijame ngayo, indlela izenzakalo ezilandelana ngayo, iinlinganiso njalonjalo.
Rhunyeza okufundileko khona uzokukhumbula. Kucocele abanye. Kukhona na ofisa ukukusebenzisa esimini? Nawenza izintwezi zoke nje uzokukhumbula okufundileko begodu uzokusiza abanye ngakho.