Jehovah’s Witnesses—Faith in Action, Part 1: Out of Darkness
EBhayibhilini, ukukhanya kuhlotjaniswa neqiniso, kukulapho ubumnyama buhlobene namala. (Rha. 43:3; Isa. 5:20) USathana waletha ubumnyama ephasini nekakhohlisa u-Efa, begodu ekugcineni wadlulisela ubumnyama esintwini soke. (ISam. 12:9) Ividiyo ethi Jehovah’s Witnesses—Faith in Action, Part 1: Out of Darkness ilandisa ngendlela ukukhanya okungokomoya okwathoma ngayo ukuvela ebumnyameni. (Isa. 60:1, 2) Ngemva kokubukela ividiyo le, ungakghona ukuphendula iimbuzo le?
(1) Ubumnyama obukhulu bathoma njani ngemva kokuhlongakala kwabapostoli? (2) Ekuthomeni kwabo-1100, ngiziphi izenzakalo ezenza abantu balemuka bona amasondo awasafundisi iqiniso? (3) UHenry Grew noGeorge Storrs bekubobani? (4) Ngiziphi izenzakalo ezaba nomphumela omkhulu ekuphileni kwakaCharles Russell? (5) UMnakwethu uRussell, uyise nabangani abambalwa bebaliraga njani iklasi lokutaditjha iBhayibhili begodu ngiziphi iimphetho ezingokoMtlolo abazifikelela? (6) Kwenzeka njani bona isiqhema sokutaditjha iBhayibhili sizitjhideze nesiqhema sakaNelson Barbour, kodwana khuyini eyenza bona uMnakweth’ uRussell azikhuphe? (7) Yini eyenzeka ngo-Julayi 1879 eyathomisa isikhathi esitjha sokukhanya okungokomoya? (8) Ngemva kwalokho, inani elandako labaFundi BeBhayibhili lenzani bona lirhatjhe iindaba ezimnandi? (9) Kusasele iimnyaka eemnengi ngaphambili, yini abaFundi BeBhayibhili egade bayilindele bona izokwenzeka ngo-1914? (10) Ngiziphi iintjhijilo abaFundi BeBhayibhili abaqalana nazo ngemva kokuhlongakala kwakaMnakweth’ uRussell? (11) Khuyini abaFundi BeBhayibhili abayenza ngemva kobana uMnakweth’ uRutherford nabangani bakhe batjhatjhululwe ejele? (12) Ukubukela ividiyo le kukudephise njani ukuthokoza kwakho ngehlangano kaJehova? (13) Ividiyo le ikuqinise njani ukuzimisela kwakho ukuragela phambili utjhumayela ngetjiseko naphezu kobudisi? (14) Singayisebenzisa njani ividiyo le ukusiza iinhlobo zethu, esifunda nabo iBhayibhili nabanye?
Qala bona lilifa elingokomoya eliyigugu kangangani abaFundi BeBhayibhili abasitjhiyela lona! Ephasini elisebumnyameni obungokomoya, bebabaphathi bokukhanya abanesibindi nabatjhisekako. Kwanga singalingisa isibonelo sabo begodu ‘siphile njengabantwana bokukhanya.’—Efe. 5:8.