Igama LakaJehova Liqakatheke Kangangani Kuwe?

1-2. Sazi njani ukuthi igama lakaJehova liqakathekile kuJesu?

IGAMA lakaJehova liqakatheke khulu kuJesu. Akekho owenza izinto ezinengi bona igama lakaJehova laziwe ukudlula yena. Esihlokweni esidlulileko sifunde ngokuthi uJesu bekazimisele ukuhlongakala ukutjengisa ukuthi uJehova ucwengile begodu ulungile. (Mar. 14:36; Heb. 10:​7-9) Ngemva kwemiNyaka eyiKulungwana yokuBusa, uJesu uzokunikela uYise loke ilawulo ngombana ufuna uJehova afumane iphazimulo. (1 Kor. 15:​26-28) Ithando uJesu analo ngegama lakaZimu litjengisa itjhebiswano analo noYise. Koke uJesu akwenzako kubufakazi bokuthi umthanda khulu uJehova.

² UJesu weza ephasini bona azokukhuluma ngoJehova. (Jwa. 5:43; 12:13) Wazisa abalandeli bakhe igama lakaYise. (Jwa. 17:​6, 26) Nakafundisako nalokha nakenza imikarisomraro bekakwenza kukhanye bona ukuhlakanipha namandla wokwenza izintwezo ukufumana kuJehova. (Jwa. 10:25) Ngesikhathi athandaza kuJehova bona abe nabafundi bakhe, wambawa ukuthi enze lokhu ‘ngebanga legama lakhe.’ (Jwa. 17:11) Yeke, nange igama lakaJehova liqakatheke kangaka kuJesu, umuntu angasifumanaphi isibindi sokuthi umlandeli kaKrestu othembekileko nange angalazi namkha angalisebenzisi igama lakaYise?

3. Khuyini esizokucoca ngayo esihlokwenesi?

³ Ngebanga lokuthi simaKrestu weqiniso silingisa isibonelo sakaJesu ngokuthanda nokuhlonipha igama lakaJehova. (1 Pit. 2:21) Esihlokwenesi sizokucoca ngokuthi, kubayini abantu abatjhumayela ‘iindaba ezimnandi zomBuso’ babizwa ngegama lakhe? (Mat. 24:14) Sizokucoca nangendlela igama lakaJehova eliqakatheke ngayo kithi.

“ABANTU BEGAMA LAKHE”

4. (a) Khuyini uJesu ayitjela abafundi bakhe ngaphambi kokukhuphukela ezulwini? (b) Ngimuphi umbuzo esizokukhuluma ngawo?

⁴ Ngaphambi kobana akhuphukele ezulwini, uJesu watjela abafundi bakhe wathi: “Nizokufumana amandla lokha umoya ocwengileko nawufika kini, nizokuba bofakazi bami eJerusalema, kiyo yoke iJudiya neSamariya, neendaweni ezikude khulu zephasi.” (IzE. 1:8) Abafundi bebazokutjhumayela iindaba ezimnandi kiyo yoke indawo ingasi kwa-Israyeli kwaphela. Ngokukhamba kwesikhathi, abantu ephasini loke bebazokufumana ithuba lokuba balandeli bakaJesu. (Mat. 28:​19, 20) Kodwana uJesu wathi: “Nizokuba bofakazi bami.” Kghani abafundi abatjha bebazokutlhoga ukwazi igama lakaJehova namkha bebazokuba bofakazi bakaJesu kwaphela? Izinto okukhulunywa ngazo encwadini yezEnzo isahluko 15, zizosisiza siphendule umbuzo loyo.

5. Abapostoli nabadala beJerusalema batjengisa njani ukuthi boke abantu kufuze bazi igama lakaJehova? (Qala nesithombe.)

⁵ Ngo-49 C.E., abapostoli nabadala beJerusalema bahlangana bona bakhulumisane ngokuthi abantu abangasimaJuda kufuze basokwe na nange bafuna ukuba maKrestu. UJakopo umfowabo kaJesu nakaphetha ikulumiswano wathi: “[UPitrosi] usicocele ngokunabileko ngendlela uZimu akhumbule ngayo abantu bezinye iintjhaba nokuthi uthome ukukhetha kibo abantu begama lakhe.” Ligama lakabani uJakopo ebekakhuluma ngalo? Adzubhula okwatlolwa mphorofidi u-Amosi wangezelela wathi: “Bona abantu abasalako bafune uJehova ngeenhliziyo zabo zoke kunye nabantu bazo zoke iintjhaba, abantu ababizwa ngegama lami, kutjho uJehova.” (IzE. 15:​14-18) Abafundi abatjha bebangekhe bafunde ngoJehova kwaphela kodwana bebazokubizwa ‘nangegama lakhe.’ Lokhu kutjho ukuthi bebazokwazisa abanye igama lakaZimu begodu bebazokwaziwa ngalo.

6-7. (a) Kubayini uJesu eza ephasini? (b) Ngiliphi elinye ibanga eliqakatheke khulu elenza uJesu weza ephasini?

⁶ Ihlathululo yegama lakaJesu itjho ukuthi, “UJehova Uyisindiso” begodu uJehova wasebenzisa uJesu ukusindisa boke abantu abakholelwa kuye neNdodanenakhe. UJesu weza ephasini bona azokunikela ngokuphila kwakhe. (Mat. 20:28) Ngokubhadela isihlengo wakghona ukusindisa abantu esonweni begodu bafumana ithuba lokuphila ngokungapheliko.—Jwa. 3:16.

⁷ Kubayini abantu bebatlhoga isihlengo? Kungebanga lalokho okwenzeka esimini ye-Edeni. Njengombana kuveziwe esihlokweni esidlulileko, ababelethi bethu bokuthoma u-Adamu no-Eva, bahlubuka kuJehova balahlekelwa kuphila okungapheliko. (Gen. 3:​6, 24) Kodwana uJesu weza ephasini bona azokwenza okhunye, okuqakatheke ukudlula ukusindisa abantu. Igama lakaJehova belihlanjalaziwe. (Gen. 3:​4, 5) Ukusindisa iinzukulwana zaka-Adamu no-Eva bekuhlobene nendaba yokucwengiswa kwegama lakaJehova. Ngebanga lokuthi uJesu bekamjameli kaJehova, wenza koke uJehova ebekafuna akwenze begodu wadlala indima eqakathekileko ekucwengiseni igama lakaJehova.

8. Khuyini abalandeli bakaJesu ebekufuze bayamukele?

⁸ Boke abalandeli bakaJesu okumaJuda nabangasimaJuda bekufuze bamukele uMthombo wesindiswabo okunguBaba kaJesu, uJehova uZimu. (Jwa. 17:3) Ukungezelela kilokho, njengoJesu bebazokubizwa ngegama lakaJehova. Bekufuze balemuke ukuqakatheka kokucwengisa igama lakaJehova. Bekutlhogeka benze lokho nabazakwamukelwa nguJehova bebafumane ukuphila okungapheliko. (IzE. 2:​21, 22) Yeke boke abalandeli abathembekileko bakaJesu bekufuze bafunde ngoJehova nangoJesu. Kuyazwisiseka ukuthi kubayini uJesu aphetha umthandazwakhe okuJwanisi 17 ngamezwi athi: “Ngibazisile igama lakho begodu ngizolenza laziwe ukwenzela bona ithando ongithande ngalo libe kibo nokuthi ngimunye nabo.”—Jwa. 17:26.

“NIBOFAKAZI BAMI”

9. Singatjengisa njani ukuthi igama lakaJehova liqakathekile kithi?

⁹ Boke abalandeli bakaJesu abathembekileko kufuze bazimisele ukucwengisa igama lakaJehova. (Mat. 6:​9, 10) Igama lakaJehova kufuze baliqale njengeliqakatheke ukuwadlula woke. Lokhu kufuze bakutjengise ngezenzo. Alo-ke singenzani ukucwengisa igama lakaJehova besitjengise ukuthi uSathana umleyimala?

10. Khuyini esifunda ngayo ezahlukweni 42 ukuya ku-44 zencwadi ka-Isaya? (Isa. 43:9; 44:​7-9) (Qala nesithombe.)

¹⁰ Indima eqakathekileko esinayo ekucwengiseni igama lakaJehova ivezwe ngokukhanyako ezahlukweni 42 ukuya ku-44 encwadini ka-Isaya. Izahlukwezo zihlathulula umlandu ongokomfanekiso lapho ilungelo lakaJehova lokubusa likhulunywa ekhotho. UJehova ubiza boke abazibiza ngokuthi bozimu bona batjengise ukuthi babozimu bamambala na. Njengomlandu odenjwa ekhotho, uJehova ubuza ukuthi bakhona abofakazi abangakufakazela lokho na. Kodwana akhenge abe khona ufakazi.—Funda u-Isaya 43:9; 44:​7-9.

11. UJehova uthini ebantwini bakhe ku-Isaya 43:​10-12?

¹¹ Funda u-Isaya 43:​10-12. UJehova uthi ebantwini bakhe: “Nibofakazi bami, . . . begodu nginguZimenu.” UJehova ubabawa bona baphendule umbuzo othi: “Ukhona na omunye uZimu ngaphandle kwami?” (Isa. 44:8) Thina sinelungelo lokuphendula umbuzo loyo. Ngamezwi nangezenzo zethu sitjengisa ukuthi nguJehova kwaphela uZimu weqiniso. Igama lakhe liqakatheke ukudlula amanye amagama. Ngendlela esiphila ngayo sitjengisa ukuthi simthanda kwamambala uJehova begodu sithembekile kuye, kunganandaba bona uSathana usigandelela kangangani. Ngokwenza ngendlela le, siba nethuba lokusiza ekucwengiseni igama lakaJehova.

12. Isiphorofido esiku-Isaya 40:​3, 5 sazaliseka njani?

¹² Nasisekela igama lakaJehova silingisa uJesu Krestu. U-Isaya wabikezela ukuthi umuntu orhuwelelako uzokuthi “lungisani indlela kaJehova!” (Isa. 40:3) Kwazaliseka njani lokho? UJwanisi uMbhabhadisi walungiselela uJesu indlela, kodwana ‘bekuyindlela kaJehova’ ngombana uJesu bekakhuluma ngegama lakaJehova. (Mat. 3:3; Mar. 1:​2-4; Luk. 3:​3-6) Isiphorofidweso sathi: “Iphazimulo kaJehova izokwambulwa.” (Isa. 40:5) Kwenzeka njani lokho? Lokha uJesu nakeza ephasini, wamjamela kuhle khulu uJehova kwaba ngasuthi uJehova uzizele ngokwakhe ephasini.—Jwa. 12:45.

13. Singamlingisa njani uJesu?

¹³ NjengoJesu, siboFakazi bakaJehova. Siphethe igama lakaJehova begodu sitjela boke abantu esihlangana nabo ngezenzo zakhe ezikarisako. Nasizakwenza lokho ngokuphumelelako, kufuze sibatjele ngendima kaJesu eqakathekileko ayidlalako ekucwengiseni igama lakaJehova. (IzE. 1:8) UJesu nguFakazi kaJehova omkhulu, thina silandela isibonelo sakhe. (IsAm. 1:5) Ngamunye wethu angatjengisa njani ukuthi igama lakaJehova liqakathekile kuye?

IGAMA LAKAJEHOVA LIQAKATHEKILE KITHI

14. Njengombana kuvezwe kuRhubo 105:​3, sizizwa njani ngegama lakaJehova?

¹⁴ Siyazikhakhazisa ngegama lakaJehova. (Funda iRhubo 105:3.) Kumthabisa khulu uJehova nasizikhakhazisa ngegama lakhe. (Jor. 9:​23, 24; 1 Kor. 1:31; 2 Kor. 10:17) ‘Ukuzikhakhazisa ngoJehova’ kutjho ukungabi neenhloni ngokuthi uJehova nguZimethu. Kuyasithokozisa ukutjela abanye ukuthi uJehova ucwengile nokobana koke akwenzako kulungile. Akukafuzi sibe neenhloni ukutjela abantu esisebenza nabo, esifunda nabo, abomakhelwana nabanye ukuthi siboFakazi bakaJehova. UDeveli ufuna silise ukutjela abanye ngegama lakaJehova. (Jor. 11:21; IsAm. 12:17) Kuhlekuhle, uSathana nabaphorofidi bamala bafuna ukwenza abantu bakhohlwe igama lakaJehova. (Jor. 23:​26, 27) Kodwana ithando esinalo ngegama lakaJehova lenza siragele phambili sithabe ngalo “ilanga loke.”—Rhu. 5:11; 89:16.

15. Kutjho ukuthini ukubiza igama lakaJehova?

¹⁵ Siraga nokubiza igama lakaJehova. (Juw. 2:32; Rom. 10:​13, 14) Ukubiza igama lakaJehova kuhlanganisa okungaphezu kokulazi nje kwaphela nokulisebenzisa. Kuhlanganisa ukwazi uZimu njengoMuntu, ukuthembela kuye, ukubawa isizo lakhe nesinqophiso sakhe. (Rhu. 20:7; 99:6; 116:4; 145:18) Ukubiza igama lakaJehova, godu kutjho ukuthi sifundisa abanye igama nobuntu bakhe obukarisako, sibakhuthaze ukuthi batjhugulule indlela abaphila ngayo bona bathabise uJehova bebasinde. —Isa. 12:4; IzE. 2:​21, 38.

16. Singatjengisa njani ukuthi uSathana umleyimala?

¹⁶ Sizimisele ukuhlunguphazelwa igama lakaJehova. (Jak. 5:​10, 11) Nasihlala sithembekile kuJehova nanyana siqalene nokuhlunguphazwa sitjengisa ubufakazi bokuthi uSathana umleyimala. Ngesikhathi sakaJobho, uSathana wamangalela abantu abalotjha uJehova wathi: “Umuntu angenza nanyana yini bona asindise ukuphila kwakhe.” (Job. 2:4) USathana wathi abantu bazokulotjha uJehova kwaphela izinto nazibakhambela kuhle. Kodwana nabangaqalana neentjhijilo bangalisa ukulotjha uJehova. UJobho watjengisa ukuthi lokho akusiliqiniso. Ngendlela efanako, nathi sinelungelo lokutjengisa ukuthi nanyana uSathana angasilinga ngani angekhe salisa ukulotjha uJehova. Singaqiniseka ngokupheleleko ukuthi uJehova uzosivikela ngebanga legama lakhe.—Jwa. 17:11.

17. Ngiyiphi enye indlela esingaphazimulisa ngayo igama lakaJehova njengombana kuvezwe kweyoku-1 kaPitrosi 2:12?

¹⁷ Sihlonipha igama lakaJehova. (IzA. 30:9; Jor. 7:​8-11) Ngebanga lokuthi saziwa njengaboFakazi bakaJehova, esikwenzako kungadumisa namkha kuhlazise igama lakaJehova. (Funda yoku-1 kaPitrosi 2:12.) Yeke, kungebangelo sifuna ukwenza koke okusemandlenethu ukudumisa uJehova ngamezwethu nangokuziphatha kwethu. Nasenza njalo, sizokuphazimulisa igama lakhe nanyana sibabantu abanesono.

18. Ngiyiphi enye indlela esingatjengisa ngayo ukuthi igama lakaJehova liqakathekile kithi? (Funda nomtlolo waphasi.)

¹⁸ Sitshwenyeka ngegama lakaJehova ukudlula indlela abantu abasiqala ngayo. (Rhu. 138:2) Kubayini lokhu kuqakathekile? Kungombana ithando esinalo ngegama lakaJehova lingenza abantu esitjhidelene nabo basikhulume kumbi.a UJesu bekazimisele ukuhlongakala kabuhlungu njengesilelesi bona aphazimulise igama lakaJehova. “Azange abe nendaba nokuhlaziswa” kangangobana akhenge atshwenyeke khulu ngokuthi abanye abantu bazomqala njani. (Heb. 12:​2-4) Bekadzimelele ekwenzeni intando kaZimu.—Mat. 26:39.

19. Uzizwa njani ngegama lakaJehova begodu kubayini?

¹⁹ Siyazikhakhazisa ngegama lakaJehova begodu kulilungelo ukubizwa ngaboFakazi bakaJehova. Ngebanga lokuthi igama lakaJehova liqakatheke khulu kithi sizokuragela phambili simdumisa nanyana abanye basiqalela phasi. Igama lakaJehova liqakatheke ukudlula lokho abantu abakucabangako ngathi. Nje-ke, asizimiseleni ukuragela phambili sidumisa igama lakaJehova nanyana uSathana alinga ukusivimba. Nasenza njalo sizabe sitjengisa bona igama lakaJehova liqakatheke ukudlula nanyana yini kithi njengombana bekunjalo kuJesu Krestu.