MUTU 01
Kansi Baibolo ingakuyavyeni tyani mwewo?
Pafupi-fupi tonse tili na makonsho anyinji okhuza moyo, kuvutika, imfwa, komasoti okhuza sogolo. Tudelasoti nkhaŵa vinthu va nsiku na nsiku, monga kunkhala na moyo olo mwatingankhalile osangalala m’banja. Ŵanthu anyinji oziŵa kuti Baibolo yuyavyalini tyala kuyankha makonsho ofunika ngako okhuza moyo, koma yupelekasoti malangizo othandiza pa moyo wasu wa nsiku na nsiku. Kansi muganiza kuti Baibolo ingayavye munthu aliyense wamuziŵa?
1. Kansi ni makonsho ayakine otyani ŵayuyankha Baibolo?
Baibolo yuyankha makonsho aŵa ofunika ngako: Kansi moyo wiyamba tyani? Kansi cholinga cha moyo ni chinji? Kansi ndaŵa yanji ŵanthu osaphoniya ovutika? Kansi n’chinji chuchitika munthu akamwalila? Keno tonse tufuna ntendele, ndaŵa yanji pochitika nkhondo? Kansi n’chinji chikuti chizachitikile chalo kusogolo? Baibolo yutilimbikisa kuti tifwane mayankho amakonsho amene aŵa, ndipo ŵanthu mamiliyoni anyinji owona kuti mayankho opezeka m’Baibolo niwokhutilisha ngako.
2. Kansi Baibolo ingatiyavye tyani kuti tikosangalala na moyo wasu wa nsiku na nsiku?
Baibolo yutipasa malangizo aweme. Mwachisanzo, yuphunzisa mabanja mwangankhalile na chisangalalo ngacho-ngacho. Yupelekasoti malangizo okhuza mwatingachitile tikakhumudwisiwa komasoti mwatingankhalile osangalala na ntchito yasu. Mwewo muphunzile vayuphunzisa Baibolo pa mitu yamene iyi komasoti tikambilane vinthu vinyinji mu nkhani yamene iyi. Mwewo mufwike povomekeja kuti “Malemba onse, [vonse vili m’Baibolo] ni . . . vopindulisa.”—2 Timoteyo 3:16.
Ino buku yuloŵalini m’malo mwa Baibolo. M’malo mwake, yukulimbikisani mwewo kuti muimvwishishe luweme Baibolo pa mwewo mweka. Tetyo, tukulimbikisani kuti muŵelenge malemba onse ali m’mutu uliwonse na kuŵayelekezela na vinthu vamuphunzila.
VATI TIPHUNZILE
Tiphunzile mwamene Baibolo mwayuyavyila ŵanthu, na mwamungankhalile osangalala mukoiŵelenga komasoti chifukwa chake mufunika kuyeja-yeja kuti muimvwishe luweme.
3. Baibolo ingakusogoleleni mwewo
Baibolo ili monga ni laiti yamphamvu ngako. Tingakatishile ntchito Baibolo kuti itiyavye kuwona mwatingapangile vosankha viweme komasoti kutiyavya kuziŵa vikuti vichitike kusogolo.
Ŵelengani Salimo 119:105, ndipo pavuli pake mukambilane makonsho aŵa:
Kansi munthu elemba salimo yamene iyi enzeiwona tyani Baibolo?
Kansi mwewo muiwona tyani Baibolo?
4. Baibolo ingayankhe makonsho ŵasu
Mwanakazi muyakine eziŵa kuti Baibolo yuyankha makonsho ŵake amene enzemuvutisha kwa vyaka vinyinji. Lolelani VIDIYO, ndipo pavuli pake mukambilane makonsho aŵa okonkhapo.
Mu vidiyo yamene iyi, kansi ni makonsho otyani ŵenzenawo mwanakazi wamene uyu?
Kansi kuphunzila Baibolo kwamuyavya tyani?
Baibolo yutilimbikisa kuti tikokonsha makonsho. Ŵelengani Mateyu 7:7, ndipo pavuli pake mukambilane konsho iyi:
Kansi mwewo muli na makonsho otyani ŵaingayankhe Baibolo?
5. Mungankhale osangalala mukoŵelenga Baibolo
Ŵanthu anyinji osangalala akoŵelenga Baibolo ndipo opindula ngako. Lolelani VIDIYO, ndipo pavuli pake mukambilane makonsho aŵa okonkhapo.
Mu vidiyo yamene iyi, kansi alumbwana echimvwa tyani pa nkhani yokhuza kuŵelenga?
Olo kuti ove okondalini kuŵelenga, ndaŵa yanji okonda kuŵelenga Baibolo?
Baibolo yunena kuti ingatipase malangizo amene angatitonthoje komasoti kutipasa chiyembekezo. Ŵelengani Aroma 15:4, ndipo pavuli pake mukambilane konsho iyi:
Kansi lonjezo ya m’Baibolo ya chitonthozo na chiyembekezo yukuchitishani chidwi mwewo?
6. Ayakine angatiyavye kuimwisha luweme Baibolo
Kuyangijila pa kuŵelenga Baibolo paseka, anyinji afwana kuti kukambilana na ŵanthu ayakine n’kofunika. Ŵelengani Machitidwe 8:26-31, ndipo pavuli pake mukambilane konsho iyi:
Kansi tingaimvwishe tyani Baibolo?—Onani mavesi 30, na 31.
Mwanalume muyakine waku Itiyopiya enzefunika kuyavyiwa kuti amvwishe luweme Malemba. Ŵanthu anyinji masiku ŵano owona kuti kukambilana mfundo za m’Baibolo na ŵanthu ayakine nkothandiza ngako
ŴANTHU AYAKINE ONENA KUTI: “Kuphunzila Baibolo nikutaya nthawe.”
Kansi mwewo mungalaŵile chinji? Ndipo ndaŵa yanji?
MFUNDO ZACHIDULE
Baibolo yupeleka malangizo okhuza moyo wa nsiku na nsiku, yuyankha makonsho ofunika ngako, yulimbikisa ŵanthu komasoti yuŵapasa chiyembekezo.
Makonsho oweleja
Kansi tingafwane malangizo otyani m’Baibolo?
Kansi ni makonsho ayakine otyani ŵayuyankha Baibolo?
Kansi mwewo mungakonde kuphunzila chinji m’Baibolo?
PHUNZILANI VINYINJI
Phunzilani mwamene malangizo a m’Baibolo mwakukatila ntchito masiku ŵano.
“Vayuphunzisa Baibolo—Ni nzelu zosasila” (Nsanja ya Olonda N.° 1 2018)
Onani mwamene Baibolo mwiyiyavyila mwanalume muyakine wamene enzelimbana na vuto ya nkhaŵa kufumila ali mwana.
Phunzilani malangizo othandiza a m’Baibolo okhuza moyo wa banja.
“Mfundo 12 zingayavye kuti banja ikoyenda luweme” (Ukani! N.° 2 2018)
Phunzilani Baibolo kuti muwone mwayusiyanishila maganizo olakwika ŵali nawo ŵanthu anyinji okhuza ngaye-ngaye otonga chino chalo.
Ndaŵa yanji tufunika ku phunzila Baibolo?—Vidiyo yonse (3:14)