MUTU 14
Kansi tufunika kuchita tyani kuti kulambila kwasu kukokondwelesha Mulungu?
Monga ni mwetiphunzilila m’mutu 13, ni vipembezolini vonse vamene vukondwelesha Mulungu. Komalomba, tingakwanishe kulambila Nyamalenga wasu munjila yumukondwelesha. Lomba kansi “Mulungu osangalala na chipembezo chotyani [kapena kuti, kulambila]” kotyani? (Yakobo 1:27) Lomba tiyeni tiwone vayuphunzisa Baibolo pa nkhani yamene iyi.
1. Kansi tufunika kukatishila ntchito chinji polambila?
Tufunika kukatishila ntchito Baibolo patulambila Mulungu. Popemphela kwa Mulungu Yesu enena kuti: “Mawu ŵanu niye chendi.” (Yohane 17:17) Vipembezo viyakine vunyalanyazilalona mfundo za chendi zamene zili m’Baibolo, yamene ni Mawu owujiliwa a Mulungu. Mmalomwake vuphunzisa maganizo na miyambo ya ŵanthu. Komalomba, Yehova okondwelalini na ŵanthu amene okankhijila “kumbali malamulo a Mulungu.” (Ŵelengani Maliko 7:9.) Mosiyana na ŵanthu amene aŵa, sewo tukondwelesha Mulungu chifukwa tukatishila ntchito Baibolo polambila komasoti tukonkheja malangizo ŵake.
2. Kansi tufunika kuchita tyani kuti Yehova akovomekeja kulambila kwasu?
Yehova, ofuna kuti tikolambila yove yeka chifukwa niye Nyamalenga wasu. (Chivumbulutso 4:11) Vamene ivi vutanthauza kuti tufunika kukonda na kulambila yove yeka mphela, paliye kukatishila ntchito mafano, vithunzi olo chifanizilo chilichonse.—Ŵelengani Yesaya 42:8.
Yehova ofuna kuti tikomulambila munjila “ituŵa komasoti yovomelejeka.” (Aroma 12:1) Vamene ivi vutanthauza kuti tufunika kumvwila malamulo ŵake pa moyo wasu. Mwachisanzo, ŵanthu amene okonda Yehova omvwila na kukonkheja malamulo pa nkhani yokhuza ukwati. Ove oyeja-yejasoti kupewa minkhalidwe yamene ingaike moyo wawo pangozi monga kupepa fwaka, kukatishila ntchito mankhwala mu njila yolakwika olo kumwa walwa mwauchakolwa.a
3. Ndaŵa yanji tufunika kulambila Yehova pamozi na akhilisitu ayasu?
Misonkhano yatunkhala nayo sondo iliyonse yutipasa mwayi “wotamanda Yehova mu . . . mpingo.” (Salimo 111:1, 2) Njila imozi yatuchitila vamene ivi ni kumuimbila nyimbo zomutamanda Mulungu. (Ŵelengani Salimo 104:33.) Yehova ofuna kuti tikosonkhana chifukwa chakuti otikonda komasoti oziŵa kuti misonkhano ikotiyavya kunkhala na moyo wosangalala mpaka kale-kale. Tikaluta kumisonkhano tutang’isha ŵanthu ayakine ndipo nawo otitang’ishasoti.
VATI TIPHUNZILE
Tiphunzile kuti tiziŵe chifukwa chake Yehova ofunalini kuti tikokatishila nchito mafano polambila. Tiwonesoti njila ziyakine zofunika zatingakatishile ntchito potamanda Mulungu.
4. Osati tikokatishila ntchito mafano polambila
Kansi tuziŵa tyani kuti Mulungu osangalala keno tupewa kukatishila ntchito mafano? Lolelani VIDIYO, ndipo pavuli pake mukambilane konsho iyi.
Kansi n’chinji chichitikila atumiki a Mulungu ayakine amene eyejapo kukatishila ntchito mafano polambila?
Ŵanthu ayakine okatishila ntchito mafano polambila Mulungu, chifukwa choganiza kuti mafano amene awo angaŵayavye kuti amuvwendele pafupi. Kansi kuchita vamene ivi kungaŵayavye chendi kuti amuvwendele pafupi? Ŵelengani Ekisodo 20:4-6 na Salimo 106:35, 36, ndipo pavuli pake mukambilane makonsho aŵa:
Kansi mwewo mwawonapo ŵanthu okatishila ntchito mafano olo vifanizilo votyani polambila?
Kansi Yehova akumvwa tyani akawona ŵanthu okatishila ntchito mafano polambila?
Kansi muwona kuti kukatishila ntchito mafano polambila n’kuweme?
5. Tikolambila Yehova yeka tunkhala omasuka ku viphunziso vawenye
Onani mwamene kulambila Yehova mu njila yovomelejeka mwakungatiyavyile kuti timasuke ku viphunziso vawenye. Lolelani VIDIYO.
Ŵelengani Salimo 91:14, ndipo pavuli pake mukambilane konsho iyi:
Kansi Yehova otilonjeza kuti azatichitile chinji keno tuwonesha kuti tumukonda polambila yove yeka?
6. Tulambila Mulungu ku misonkhano ya mpingo
Tikopeleka ndemanga komasoti kuimba nyimbo pa misonkhano ya mpingo tutamanda Yehova komasoti tutang’ishana. Ŵelengani Salimo 22:22, ndipo pavuli pake mukambilane makonsho aŵa:
Kansi mwewo mwisangalala kumvwishila ndemanga pamisonkhano?
Kansi mungakonde kukonzekela kuti mukayankhe?
7. Yehova osangalala keno tuuja ŵanthu ayakine vatuphunzila
Pali njila zinyinji zatingakatishile ntchito pouja ayakine chendi cha m’Baibolo. Ŵelengani Salimo 9:1 na 34:1, ndipo pavuli pake mukambilane konsho iyi:
Kansi ni mfundo yotyani yamwaphunzila m’Baibolo yamufuna kuujako munthu muyakine?
ŴANTHU AYAKINE ONENA KUTI: “Nise ochimwa ngako tingakwanishelini kukondwelesha Mulungu.”
Kansi mwewo muganiza tyani?
MFUNDO ZACHIDULE
Tukondwelesha Nyamalenga wasu keno tulambila yove yeka, tikomutamanda pa misonkhano ya mpingo komasoti tikouja ŵanthu ayakine vatuphunzila.
Makonsho oweleja
Kansi tingachite chinji kuti tiziŵe njila yovomelejeka yolambilila Mulungu?
Ndaŵa yanji tufunika kulambila Yehova yeka?
Ndaŵa yanji tufunika kulambila Mulungu pamozi na ŵanthu ayakine amene ofuna kumukondwelesha?
PHUNZILANI VINYINJI
Mu nkhani yakuti “Nileka kulambila mafano” ŵelengani kuti muwone mwechimasukila mayi muyakine pa kulambila mafano.
“Baibolo yuchinja moyo wa ŵanthu” (Nsanja ya Olonda, 1 July, 2011)
Onani vinthu vingakuyavyeni kuti mukoyankha pa misonkhano ya mpingo.
“Tikotamanda Yehova mu mpingo” (Nsanja ya Olonda, January 2019)
Onani mweyiyavyila misonkhano ya mpingo mulumbwana muyakine olo kuti enzeluta kumisonkhano movutikila.
Ŵanthu anyinji okhulupilila kuti mtanda ni chizindikilo Chachikhilisitu. Koma kansi tufunika kuukatishila ntchito polambila?
“Ndaŵa yanji mukatishilalini ntchito mtanda polambila?” (Nkhani yapa webisaiti)
a Nkhani zamene izi tizakambilane kusogolo.