MUTU 48
Mukosankha mwanzelu ŵanthu otandala nawo
Ayasu apantima otiyavya kuti tikosangalala komasoti otitang’isha tikakumana na mavuto. Koma Baibolo yutichenjeja kuti tikosamala patusankha ŵanthu otandala nawo. Lomba kansi mungasankhe tyani ŵanthu aweme ŵati mukotandala nawo? Mungachite luweme kuganizila makonsho aŵa ali mnyansi.
1. Kansi vochita va ŵanthu ŵamungasankhe kutandala nawo vingakukhuzeni tyani?
Sewo teŵanthu tutolela vochita va ŵanthu ŵatutandala nawo. Vamene ivi vutanthauza kuti tingakwanishe kutolela minkhalidwe iweme olo iipa—ya ŵanthu ŵatutandala nawo pamenso na menso olo pa intaneti. N’chifukwa chake Baibolo yunena kuti: “Munthu oyenda na ŵanthu anzelu onkhala wanzelu, koma wochita vinthu na ŵanthu opusa [ŵanthu asakonda Yehova] azafwane mavuto.” (Miyambo 13:20) Keno mutandala na ŵanthu amene okonda Yehova komasoti kumulambila, angakuyavyeni kuti namwesoti munkhale pa ushamwali na Yehova komasoti kuti mukosankha vinthu mwanzelu. Koma kutandala ngako na ŵanthu asakonda Yehova kungachitishe kuti tileke kumukonda. N’chifukwa chake Baibolo yutilimbikisa kuti tikosankha mwanzelu ŵanthu ŵatutandala nawo! Keno tutandala na ŵanthu okonda Mulungu, tutolela vochita vawo viweme ndipo nawosoti otolela vochita vasu viweme. Tetyo, ‘tupitilija kutonthojana komasoti kutang’ishana.’—1 Atesalonika 5:11.
2. Kansi Yehova angamvwe tyani keno mungasankhe kutandala na ŵanthu aipa?
Yehova osamala posankha ŵanthu ŵakufuna kuti ankhale ayake. Baibolo yunena kuti yove “okonda ŵanthu aweme ntima.” (Miyambo 3:32) Kansi Yehova angamvwe tyani keno tingasankhe kutandala na ŵanthu asamukonda? Yove angakalipe ngako. (Ŵelengani Yakobo 4:4.) Koma Yehova, angasangalale ngako ndipo angatisankhe kuti tinkhale ayake tikopewa kutandala na ŵanthu aminkhalidwe iipa notandala na ŵanthu amene omukonda.—Salimo 15:1-4.
VATI TIPHUNZILE
Tiwone chifukwa chake mufunika kusankha ayanu mwanzelu, komasoti vamungachite kuti mukotandala na ŵanthu amene angakulimbikiseni kuchita vinthu viweme.
3. Mukopewa kutandala na ŵanthu aminkhalidwe iipa
Ŵanthu aminkhalidwe iipa niŵala asakonda Mulungu komasoti okonkhejalini mfundo zake pa moyo wawo. Lolelani VIDIYO, ndipo pavuli pake mukambilane konsho iyi.
Kansi tingayambe tyani kutandala na ŵanthu aminkhalidwe iipa mosaziŵa?
Ŵelengani 1 Akorinto 15:33, ndipo pavuli pake mukambilane makonsho aŵa:
Kansi ni munthu waminkhalidwe yotyani wamene angankhalelini muyanu muweme? Ndaŵa yanji mwayankha tetyo?
Ŵelengani Salimo 119:63, ndipo pavuli pake mukambilane konsho iyi:
Kansi mufunika kusankha ŵanthu otyani kuti ankhale ayanu?
Keno m’mbale muli chitwazi chimozi chowola chingachitishe kuti vitwazi viyakinesoti m’mbale mwamene umo viwole. Lomba kansi munthu m’mozi waminkhalidwe iipa angawononge tyani nkhalidwe yanu?
4. Ŵanthu ŵatusiyana nawo vinthu viyakine vingakwanishike kuti ankhale ayasu aweme
Baibolo yufotokoza za Davide na Yonatani, amene enze pa ushamwali wapantima. Ove enzekatijanangako olo kuti Yonatani enze nkulu kwa Davide komasoti enze mwana wa mfumu. Ŵelengani 1 Samueli 18:1, ndipo pavuli pake mukambilane konsho iyi:
Ndaŵa yanji ayasu ofunikalini kunkhala ŵanthu ŵeka ŵatulingana nawo msinkhu olo vinthu viyakine?
Ŵelengani Aroma 1:11, 12, ndipo pavuli pake mukambilane konsho iyi:
Kansi ŵanthu okonda Yehova otang’ishana tyani?
Mu vidiyo yamene iyi, onani mwamene wachilumbwana muyakine mwechifwanila ayake kudela kwechifulukila. Lolelani VIDIYO, ndipo pavuli pake mukambilane makonsho aŵa.
Ndaŵa yanji makolo a Akil enzedela nkhaŵa za ŵanthu enzetandala na yove ku sikulu?
N’chinji chichitisha kuti Akil ayambe kukatijana na ŵanthu amene aŵa?
Kansi n’chinji chimuyavya kuti afwane ayake?
5. Chingakuyavyeni kuti mufwane azishamwali aweme
Onani vamungachite kuti mufwane ayanu aweme—komasoti vamungachite kuti munkhale munthu wamene ŵanthu ayakine angakonde kutandala naye. Lolelani VIDIYO.
Ŵelengani Miyambo 18:24 na 27:17, ndipo pavuli pake mukambilane makonsho aŵa:
Kansi azishamwali ngawo-ngawo oyavyana mu njila zotyani?
Kansi mwewo muli na azishamwali ngati ni amene awo? Keno muliye ayanu otetyo, kansi mungachite tyani kuti muŵafwane?
Ŵelengani Afilipi 2:4, ndipo pavuli pake mukambilane konsho iyi:
Kuti mufwane ayanu aweme, namwesoti mufunika kunkhala munthu muweme wamene ŵanthu angakonde kutandala naye. Kansi mungachite tyani vamene ivi?
Kuti mufwane ayanu aweme, mufunikilasoti kunkhala na minkhalidwe iweme
ŴANTHU AYAKINE ONENA KUTI: “Paliye vuto kutandala na aliyense, kusiyana na kungonkhala uliye muyako.”
Kansi mwewo mungamuyankhe kuti tyani?
MFUNDO ZACHIDULE
Tikosankha luweme ŵanthu otandala nawo, tusangalasa Yehova komasoti nase tunkhala osangalala.
Makonsho oweleja
Kansi Yehova angamvwe tyani keno tingasankhe kutandala na ŵanthu aipa?
Kansi tufunika kupewa kutandala na ŵanthu otyani?
Mungachite tyani kuti mufwane ŵanthu otandala nawo?
PHUNZILANI VINYINJI
Onani mwangatiyavyile ayasu aweme tikakumana na mavuto.
“Fwanani ayanu apantima mapeto akaliye fwika” (Nsanja ya Olonda, November 2019)
Onani vamungachite kuti mufwane ayanu aweme.
“Kansi ningafwane tyani ayangu aweme?” (Mayankho a Zimene Achinyamata Amafunsa—Buku Loyamba, mutu 8)
Kansi mufunikila kuziŵa votyani pa nkhani yotandala na ŵanthu pa intaneti?
Mukochita vinthu mosamala pamutandala na ayanu pa Intaneti (4:12)
Munkhani yakuti, “Nenzefunishisha kuti nifwane atata,” onani chifukwa chake tata muyakine eganiza zochinja ŵanthu otandala nawo.
“Baibolo yuchinja moyo wa ŵanthu” (Nsanja ya Olonda, 1 April, 2012)