Kansi Zina Ya Mulungu Ni Ŵani?

Mukafuna kuti muziŵe munthu muyakine, kanyinji-kanyinji muyamba nomukonsha kuti, “Kansi zina yanu nimwe ŵani?” Lomba kuti mukonshe Mulungu konsho yamene iyi, kansi muganiza kuti angayankheni kuti tyani?

“Newo nine Yehova. Zina yangu niyamene iyi.”—Yesaya 42:8.

Kansi zina yamene iyi niyachilwendo kuli mwewo? Payakine niyachilwendo chendi, chifukwa ŵanthu anyinji amene emasulila Mabaibolo, eichosamo zina ya Mulungu m’malo anyinji, ndipo ayakine aliyenoiikemo na patontho kumo. Mmalo anyinji mweyenzepezeka zina yamene iyi, eikapo zina yaudindo monga yakuti “AMBUYE.” Koma olo n’tetyo, m’mipukutu yoyambilila ya Baibolo zina ya Mulungu yenzepezekamo kwamaulwendo pafupi-fupi 7.000. Zina yamene iyi ili na mabi okwanila 4 achiheberi, amene ni olingana na YHWH ndipo m’Chinsenga tankhala tuimasulila kuti “Yehova.”

Zina ya Mulungu yupezeka maulwendo anyinji ngako mu volemba vachiheberi komasoti m’Mabaibolo anyinji

NDAŴA YANJI ZINA YA MULUNGU NIYOFUNIKA

Munecho Mulungu owona kuti zina yamene iyi niyofunika. Paliye munthu emuteya zia Mulungu kuti ankhale Yehova. Mulungu elipasa yeka zina yamene iyi. Yehova enena kuti: “Zina yangu niyamene iyi mpaka kale-kale, ndipo midwo yonse ya ŵanthu ikokumbukila zina yamene iyi.” (Eks. 3:15) M’Baibolo zina ya Mulungu yupezeka maulwendo anyinji kupambana mazina ŵake ayakine audindo, Monga yakuti Wamphamvu zonse, Atata, Ambuye, olo yakuti Mulungu. Yupezekasoti maulwendo anyinji ngako kupambana mazina a ŵanthu monga yakuti Abulahamu, Mose, Davide, olo yakuti Yesu. Komasoti Yehova ofuna kuti ŵanthu aziŵe zina yake yamene iyi. Baibolo yunena kuti: “Ŵanthu aziŵe kuti mwewo, amene zina yanu nimwe Yehova, mwewo mweka nimwe wapalulu ngako, muwamila kutonga chalo chonse.”—Sal. 83:18.

Yesu owona kuti zina ya Mulungu niyofunika. M’pemphelo yakunena ŵanthu anyinji kuti pemphelo ya Atata ŵasu olo pemphelo ya Ambuye, Yesu ephunzisa ophunzila ŵake kuti akosenga Mulungu kuti: “Zina yanu ituŵishiwe.” (Mat. 6:9) Komasoti popemphela kwa Mulungu, Yesu enena kuti: “Atata, lemekezani zina yanu.” (Yoh. 12:28) Yesu enzewona kuti kulemekezewa kwa zina ya Mulungu ni nkhani yofunika ngako. N’chifukwa chake yove enze na ufulu wonena kuti: “Newo nachitisha kuti ove aziŵe zina yanu, ndipo nizapitilije kuŵaziŵisha za zina yamene iyo.”—Yoh. 17:26.

Ŵanthu amene oziŵa Mulungu owona kuti zina yake niyofunika. Kale, ŵanthu a Mulungu enzeziŵa kuti zina ya Mulungu niye yamene yenzechitisha kuti Mulungu akoŵateteza komasoti kuŵapulumusha. “Zina ya Yehova ni ng’anda yotang’a ya mmululu. Wolungama othaŵila mwamene umo ndipo otetezewa.” (Miy. 18:10) Komasoti “Aliyense wamene oita pa zina ya Yehova, azapulumuke.” (Yow. 2:32) Baibolo yuwoneshasoti kuti zina ya Mulungu yutiyavya kusiyanisha pakati pa ŵanthu amene otumikilalini Mulungu na amene omutumikila. Yove yunena kuti “Ŵanthu antundu uliwonse azayende m’zina ya mulungu wawo. Koma sewo tizayende m’zina ya Yehova Mulungu wasu mpaka kale-kale.”—Mik. 4:5; Mach. 15:14.

KANSI ZINA YA MULUNGU YUTIYAVYA KUZIŴA VINTHU VOTYANI?

Zina ya Mulungu yutiyavya kuziŵa kuti yove niwosiya na milungu iyakine. Ponena za tanthauzo ya zina ya Yehova, akaswili anyinji amaphunzilo onena kuti “Ochitisha kuti vinthu vichitike.” Yehova etiyavya kumvwisha tanthauzo ya zina yake pechiuja Mose kuti yove ni: “Nizankhale wanufuna kuti ninkhale.” (Eks. 3:14) Tetyo, zina ya Mulungu yutiyavyalini tyala kuziŵa zaudindo wali nawo monga Nyamalenga wamene echitisha kuti vinthu vonse vinkhaleko. Zina yamene iyi yutanthauza soti kuti Mulungu angakwanishe kulipanga yeka, olo kuchitisha vinthu vam’chilengedwe kuti vinkhale chinthu chakufuna yove, na cholinga chakuti akwanilishe vofuna vake. Mazina ŵake audindo otiuja tyala za udindo wake, ulamulilo, komasoti mphamvu zake. Koma ni zina yake tyala yakuti Yehova yamene yulaŵila vonse vokhuza yove komasoti vinthu vangakwanishe kuchita.

Zina ya Mulungu yutiyavya kuziŵa kuti yove otikonda. Tanthauzo ya zina ya Mulungu yutiyavya kuziŵa kuti yove okonda vinthu vechilenga kupamikijapo sewo taŵanthu. Komasoti mfundo yakuti Yehova wachitisha kuti zina yake iziŵike, yutanthauza kuti yove ofuna kuti timuziŵe. Ndipo ziŵanisoti kuti yove niye wamene eyamba kutiuja za zina yake, sewo tikaliye noziŵa kuti pali mwayi wakuti tingamukonshe zina. Pamene apa n’voziŵikilatu kuti Yehova ofunalini kuti tikoganiza kuti yove ni Mulungu wosamvwishishika kapena kuti ali kutali ngako mwakuti tingakwanishelina kunkhala naye paushamwali. Koma yove ofuna kuti tikomuwona kuti ni Mulungu ngaye-ngaye komasoti tingakwanishe kunkhala naye pa ushamwali.—Sal. 73:28.

Keno tukatishila ntchito zina ya Mulungu tuwonesha kuti tumukonda. Tiyelekezele kuti mwauja munthu wamufuna kuti ankhale muyanu kuti akafuna kukuitani akotomola zina yanu ngayo-ngayo. Kansi mwewo mungamvwe tyani keno yove akafuna kukuitani nthawe zonse ofunalini kutomola zina yanu? Payakine mungakaikile kuti yove ofuna chendi kuti mwewo munkhale nshamwali wake. N’chimozi-mozi soti na Mulungu. Yehova etiuja zina yake ndipo otilimbikisa kuti tikoitomola. Baibolo yuwonesha kuti Yehova oziŵa olo ‘patuganizila za zina yake’ mmitima yasu.’—Mal. 3:16.

Kuziŵa zina ya Mulungu n’kofunika ngako, komasoti ni poyambila paweme keno tufuna kuti timuziŵe. Koma tufunikasoti kuchita vinyinji. Tuwamila kuziŵa vinyinji vokhuza Munecho wa zina yamene iyi. Mwachisanzo, tufunika kuziŵa kuti yove ni wotyani ngako-ngako.