Kansi Mulungu Azachite vinthu Votyani?

Nthawe zinyinji tikakumana na vuto, tuyembekezela kuti muyasu achitepo kanthu kuti atiyavye. Anyinji akaganizila mfundo yamene iyi, owona kuti Mulungu ni muyawo lini chifukwa paliye chakuchitapo kuti aŵayavye pa mavuto ŵakukumana nawo. Koma kulaŵila chendi, Mulungu wa watichitila vinthu vinyinji, komasoti pali vinthu viyakine vakuti azachite kusogolo kuti azafumyepo mavuto onse. Kansi Mulungu azachite chinji?

AZAFUMYEPO VINTHU VONSE VIIPA

Mulungu azafumyepo vinthu vonse viipa pochosa ŵanthu amene oyambisha vinthu vamene ivo. Baibolo yutiuja za wamene eyambisha viipa. Yove yunena kuti: “Chalo chonse chili m’manja mwa muipa.” (1 Yoh. 5:19) “Muipa” wamene otomolewa pamene apa, paliye muyakine yayi, koma ni Satana Mdyerekezi, ndipo Yesu emutomola kuti ni “wolamulila wa chino chalo.” (Yoh. 12:31) Satana niye ochitisha kuti ŵanthu akochita vinthu viipa vamene vachitisha kuti pano pachalo pankhale mavuto anyinji. Kansi Mulungu azachite chinji?

Kwalombapano Yehova Mulungu azakatishile ntchito Mwana wake kuti “awononge Mdyelekezi wamene ali na njila yoletela imfwa.” (Ahe. 2:14; 1 Yoh. 3:8) Ndipo Baibolo yuwonesha kuti olo munecho Mdyelekezi oziŵa kuti “wangosala tyala na kanthawe katontho” kuti awonongewe. (Chiv. 12:12) Mulungu azafumyepo vinthu vonse viipa komasoti ŵanthu amene ochita vinthu viipa.—Sal. 37:9; Miy. 2:22.

AZAWAMYE CHINO CHALO KUTI CHINKHALE PALADAISO

Mulungu akezesilija kuchosa vinthu vonse viipa pano pachalo, azachite vinthu vamene vikuti vizayavye kuti cholinga chake chokhuza ŵanthu komasoti ichi chalo chikwanilishiwe. Kansi tuyembekezele vinthu votyani?

Ntendele wosasila na chitetezo. “Ŵanthu ofasa azalondele chalo, ndipo azasangalale na ntendele unyinji.”—Sal. 37:11.

Chakulya cha mwana alilenji komasoti chopasa thanzi. “Pano pa chalo pazankhale tiligu munyinji; Palulu pa malupili pazankhale vakulya vinyinji.”—Sal. 72:16.

Ng’anda ziweme komasoti ntchito zokhutilisa. “Ove azamange ng’anda nonkhalamo, ndipo azakomole minda ya mpesa nakulya vitwanzi vake. . . . Ŵanthu ŵangu osankhiwa mwapadela azasangalale mokwanila na ntchito ya manja ŵawo.”—Yes. 65:21, 22.

Kansi mwewo mufunishisha kuzankhalapo panthawe yamene iyi? Kwalombapano ŵanthu onse azasangalale na madaliso amene aŵa ŵatatomola.

AZAFUMYEPO MATENDA NA IMFWA

Palipano ŵanthu olwala komasoti akufwa. Koma vinthu vamene ivi visile kwalombapano. Mulungu azakatishile ntchito dipo ya Yesu “kuti aliyense womukhulupilila osati awonongeke, koma ankhale na moyo wosasila.” (Yoh. 3:16) Kansi vokonkhapo vake vizankhale votyani?

Kuzankhale kuliye matenda. “Paliye munthu wonkhala m’chalo chamene icho wamene akuti azanene kuti: “Newo nulwala.” Ŵanthu onkhala m’chalo chamene icho azakhululukiliwe machimo ŵawo.”—Yes. 33:24.

Kuzankhale kuliye imfwa. “Yove azamelele imfwa mpaka kale-kale ndipo Yehova Ambuye nkulu ngako, azapukuse misonzi pavinso vonse va ŵanthu.”—Yes. 25:8.

Ŵanthu azankhale na moyo kosasila. “Mphaso yakupeleka Mulungu ni moyo wosasila kupitila muli Yesu Khilisitu Ambuye ŵasu.”—Alo. 6:23.

Ŵanthu amene emwalila azauke. “Mulungu azaushe ŵanthu olungama na osalungama kumo.” (Mach. 24:15) Tetyo, dipo izayavye soti kuti ŵanthu amene emwalila azaukishiwe.

Kansi Mulungu azachite tyani vinthu vamene ivi?

MULUNGU AZANKHAZIKISHE BOMA IWEME NGAKO

Kuti akwanilishe cholinga chake chokhuza ŵanthu komasoti chalo, Mulungu azakatishile ntchito boma yakululu yamene wolamulila wake ni Yesu Khilisitu. (Sal. 110:1, 2) Yamene iyi ni boma olo kuti Ufumu wamene Yesu euja ophunzila ŵake kuti akoupemphelela ponena kuti: “Atata ŵasu akululu . . . Ufumu wanu uwele.”—Mat. 6:9, 10.

Ufumu wa Mulungu uzalamulile chino chalo ndipo uzafumyepo mavuto onse. Boma yamene iyi niweme ngako ndipo ŵanthu angankhale lini na boma iweme ngako kupambana yamene iyi! Chifukwa cha vamene ivi, Yesu penze pano pachalo, elipeleka ngako pantchito yolalikila za “uthenga uweme wa Ufumu” wamene uyu, ndipo euja ophunzila ŵake kuti nawo akochitasoti chimozi-mozi.—Mat. 4:23; 24:14.

Chifukwa chakuti okonda ngako ŵanthu, Yehova Mulungu watilonjeza kuti azatichitile vinthu vonse vamene ivi. Kansi vamene ivi vukuchitishani lini kufunishisha kuti mumuziŵe luweme nonkhala naye paushamwali? Nkhani yokonkhapo, ifotokoze za madaliso ŵamungafwane mukasankha kuti muchite vamene ivi.