Malifalensi a Utumiki komasoti Moyo wasu wachikhilisitu kabuku kamisonkhano
© 2024 Watch Tower Bible and Tract Society of Pennsylvania
DJULAYI 1-7
CHUMA CHUPEZEKA M’MAWU A MULUNGU MASALIMO 57-59
Yehova okhumudwa ŵanthu ayakine akoshusha atumiki ŵake
Kuchitila umboni pedji 220–221 ndim. 14–15
“Kumasilililo kwa chalo”
Sitefano elalikila motang’a ntima akaliye paiwa na adani ŵake. (Mac 6:5; 7:54–60) Akhilisitu pechiyamba “kunzunziwa” emwajikana n’chigawo chonse cha Yudeya na Samariya. Koma vamene ivi viliye panamike ntchito yolalikila. Filipo eluta ku Samariya “noyamba kulalikila za Khilisitu” ndipo vokonkhapo vake venze viweme ngako. (Mac 8:1–8, 14, 15, 25) Komasoti Baibolo yutiuja kuti: “Ŵanthu amene emwajikana chifukwa cha mavuto amene eyamba chifukwa cha vechitikila Sitefano efwika mpaka ku Foinike, ku Kupuro, na ku Antiokeya. Ndipo enzelalikila kuli Ayuda ŵeka. Komasoti ayakine mwa ŵanthu amene aŵa aku Kupuro na aku Kurene. Amene aŵa pechifwika ku Antiokeya eyamba kulalikila za uthenga uweme wokhuza Ambuye Yesu kwa ŵanthu olaŵila chigiliki.” (Mac 11:19, 20) Pa nthawe yamene iyo kunzunziwa kwa Akhilisitu kwechitisha kuti uthenga wa Ufumu ufalikile.
Mu nthawe yasu ino vinthu monga ni vamene ivi vuchitika soti m’maiko amene kale enzeziŵika kuti Soviet Union. Ŵanthu anyinji Amboni za Yehova eŵapitikisha ku Siberia m’vyaka vam’ma 1950. Chifukwa cha kupitikishiwa kwamene uku Amboni za Yehova anyinji enkhala madela akutali ngako na kwawo ndipo emwajikana m’minzi yosiyana-siyana m’chalo chonse chamene icho. Vamene ivi veyavya kuti uthenga uweme ufalikile m’chalo chonse cha Siberia chamene ni chikulu ngako. Tetyo Amboni za Yehova anyinji ekwanisha kulalikila uthenga uweme kumadela akutali ngako mpaka nsenga wamakilomita 10,000 kufumila kwawo. Ove sembe aliye kwanishe kufwana ndalama zakuyafwikila kumadela amene aŵa kuti akalalikile. Koma vamene ivi vikwanishika chifukwa boma iŵatumija yeka kwamene uko. Mkwasu muyakine enena kuti: “Vechichita akulu-akulu aboma vamene ivi veyavya kuti ŵanthu anyinji oleza ntima aku Siberia aziŵe chonadi.”
Kusakila-sakila Mfundo zingatiyavye
Nsanja ya Mulonda 07/2023 pedji 18–19 ndim. 16–17
“Nkhalani otang’a, osanyang’anyika”
Tang’ishani ntima wanu. Mfumu Davide, elengeza kuti azalekelini kukonda Yehova, pechilemba kuti: “Ntima wangu wankhazikika, Mwewo Mulungu.” (Sl 57:7) Nase tingankhale na ntima wonkhazikika keno tumudalila ngako Yehova. (Ŵelengani Salimo 112:7.) Ganizilani mwamene kuchita vamene ivi mwekuyavyila Bob watatomola poyamba. Yove pechiujiwa kuti milopa izankhale pafupi kuti azaikatishile ntchito pakazafunikila, yove mokulumija eyankha kuti keno angapezeke na vuto yamene ingafune kuti aikiwe milopa, yove mokulumija angafumemo mu chipatala chamene icho. Pavuli pake Bob enena kuti, “Newo nenzekaikila lini vokhuza chosankha changu chokana kuikiwa milopa, ndipo nenzedelalini nkhaŵa za vamene vingachitike pavuli pake.”
Bob ekwanisha kunkhala wotang’a chifukwa yove enze epangilatu chosankha kuti apitilije kunkhala wotang’a akaliye waluta ku chipatala. Choyamba, yove enzefunishisha kukondwelesha Yehova. Chachiŵili, yove enzephunzila mosamala vayunena Baibolo komasoti vakunena mabuku ŵasu ofotokoza Baibolo pa nkhani yokhuza kupatulika kwa moyo komasoti milopa. Chachitatu, yove enzekhulupilila kuti kukonkheja malangizo a Yehova kungalete madaliso osasila. Sewo nase tingankhale na ntima wotang’a mosasamala kanthu za mavuto ŵatingakumane nawo.
DJULAYI 8-14
CHUMA CHUMA CHUPEZEKA M’MAWU A MULUNGU MASALIMO 60-62
Yehova otipasa malo otetezeka, otiteteza komasoti otiyavya kunkhala otang’a
Insight–2 pedji 1118 ndim. 7
Nsanja
Kukatishila ntchito mophiphilisila. Ŵanthu amene ololeshesha mwachikhulupililo nomvwela Yehova onkhala otetezeka ngako monga ni mwechiimbila Davide kuti: “Mwewo [Yehova] mwankhala pothaŵilapo pangu malo otang’a pamenso pa adani.” (Sl 61:3) Amene ozindikila chayupanamila zina yake, ndipo amene okhulupilila chayupanamila zina yamene iyo aliye chochitila wowa, pakuti: “Zina ya Yehova ni ng’anda yotang’a ngako. Olungama amene othaŵila mwamene umo otetezewa.”—Miy 18:10; yelekezelani na 1Sa 17:45–47.
Insight–2 pedji 1084 ndim. 8
Chitenti
“Chitenti” chenzekata soti ntchito mu njila iyakine yophiphilisila pa vochitika viyakine. Chitenti cha munthu aliyense chenze na malo opumulilamo komasoti otetezeka ku mphepo. (Ge 18:1) Poganizila za miyambo yokhuza kutandaja alwendo, alwendo enze nachifukwa chokhulupilila kuti asamaliliwe notandajiwa akalondelewa kuchitenti cha munthu muyakine. Tetyo, pa Chivumbuluso 7:15 yunena za gulu ikulu kuti Mulungu “azaŵachinjilije kuti aŵateteze” vuwonesha chisamalilo na chitetezo. (Sl 61:3, 4) Yesaya olaŵila za makonzedwe onena za mwanakazi wa Mulungu, Ziyoni vati azachite na ŵana ŵati azavyale. Yove oujiwa kuti “akulishe malo a tenti yake.” (Yes 54:2) Tetyo yove okulisha malo otetezela ŵana ŵake.
Nsanja ya Olonda 15/04/2002 pedji 16 ndim. 14
Malamulo a Mulungu niwopindulisha
Chilamulo cha Mulungu ni chosasinthika. Masiku ŵano ovuta ŵatunkhalamo Yehova niye malo ŵasu achitetezo, wamene enzepo kuyambila kale-kale ndipo azankhalepo mpaka kale-kale. (Sl 90:2) Yove elinena yeka kuti: “Newo nine Yehova; ndipo nuchinja lini.” (Mki 3:6) Malangizo a Mulungu amene ali m’Baibolo niwodalilika ngako osati malangizo a ŵanthu amene ochinja-chinja monga ni chimfule. (Yak 1:17) Mwachisanzo, kwa vyaka vinyinji a zaumoyo enzelolela kukonza ŵana, ewona kuti venzeganiza venze vophoniyeka. Malamulo komasoti malangizo a m’vyalo pa nkhani yamene iyi vinthu vechinja mosayembekezeleka monga ni kutoleka-toleka na mphepo. Koma mawu a Mulungu ochinja lini. Kwa vyaka vinyinji Baibolo yankhala yupeleka malangizo a mwatingalele ŵana mwachikondi. Mtumwi Paulo elemba kuti: “Makolo, osati mukokalifya ŵana ŵanu, koma pitilijani kuŵalela poŵapasa malangizo mokatijana na vakunena Yehova.” (Aif 6:4) N’vokondwelesha kuziŵa kuti tikadalila malangizo ofumila kwa Yehova tingachinje lini!
Kusakila-sakila Mfundo zingatiyavye
Nsanja ya Olonda 1/06/ 2006 pedji 11 ndim. 6
Mfundo zikulu-zikulu za m’buku yachiŵili ya Masalimo
62:11. Mulungu odalila lini mphamvu zofumila kuyakine. Yove niye munecho wa mphamvu. ‘Mphamvu ni zofumila kuli yove.’
DJULAYI 15-21
CHUMA CHUPEZEKA M’MAWU A MULUNGU MASALIMO 63-65
“Chikondi chanu chokhulupilika n’chiweme kupambana moyo”
Nsanja ya Olonda 15/10/2001 pedji 15–16 ndim. 17–18
Kansi niŵani angatilekanishe na chikondi cha Mulungu?
Kansi chikondi cha Mulungu nichofunika tyani kuli sewo? Kansi muwona monga ni mwechiwonela Davide wamene elemba kuti: “Chifukwa chakuti chikondi chanu ni chiweme kupambana moyo, milomo yangu izakulemekezeni. Tetyo nizakutamandeni moyo wangu wonse, nizapemphele mu zina yanu nili imye manja ŵangu”? (Sl 63:3, 4) N’chendi, kansi pali chinthu chilichinse chatingafwane muli ichi chalo, chiweme kupambana kuti Mulungu atikonde nonkhala naye paushamwali wotang’a? Mwachisanzo, kansi kusakila-sakila ntchito yapalulu ni kuweme kupambana kunkhala na ntendele wamuntima na chimwemwe vamene vuwela chifukwa chonkhala pa ushamwali wotang’a na Mulungu? (Lu 12:15) Akhilisitu ayakine eujiwa kusankha kumvwila Yehova, olo kupaiwa. Vamene ivi vechitikila Amboni za Yehova anyinji mu ulamulilo wachipani cha Nazi mu nthawe ya nkhondo yachiŵli ya pachalo chonse. Koma Akhilisitu anyinji esankha kunkhala mphela okhulupilika kwa Yehova, ndipo enze okonzeka kupaiwa keno pangafunikile. Ŵanthu amene onkhala mphela okhulupilika kwa Yehova onkhala osimikija kuti azaŵapase sogolo iweme vamene chalo ichi chingakwanishe lini kutipasa. (Mk 8:34–36) Koma pali vinthu vinyinji viweme kupamikijapo moyo wosasila.
Olo kuti n’vosakwanishika kunkhala na moyo wosasila chosayavyiwa na Yehova, yejani kuganizila mwaungankhalile moyo utali ngako paliye Nyamalenga wasu. N’voziŵikilatu kuti ungankhale wosakondwelesha komasoti uliye cholinga ngacho-ngacho. Yehova wapasa ntchito ŵanthu ŵake yokhutilisha kuti aikate masiku ŵano osilijila. Tetyo tukhulupilila kuti Yehova ninkulu ndipo azakwanilishe cholinga chake potipasa moyo wosasila, komasoti pazankhale vinthu vinyinji vochitisha chidwi vati tizaphunzile a kuchita. (Mla 3:11) Keno tizaphunzile vinthu vinyinji tyani m’vyaka masauzande vikuza, tizakwanishe lini kumvwisha vinthu vonse “nzelu zake ni n’zikulu ndipo yove oziŵavinthu vinyinji.”—Alo 11:33.
Nsanja ya Olonda 12/2019 pedji 28 ndim. 4
“Mukotembeja pa chilichonse”
Tufunika kutembeja ngako Mulungu kupambana aliyense. Nivosachita kukonsha kuti mwaganizilapo moweleja-weleja za vinthu vinyinji vakupeleka Mulungu. (De 8:17, 18; Mac 14:17) Koma m’malo moganizila tyala patontho zavinthu vamene ivi mungachite luweme kuganizila za madaliso yonse yawakupasani Mulungu komasoti ŵanthu ayakine. Kungakuyavyeni kuti mukomutembeja. Kungakuyavyeni soti kuziŵa kuti okukondani komasoti okutembejani.—1Yo 4:9.
Nsanja ya Olonda 15/10/2015 pedji 24 ndim. 7
Tikoganizila ngako za Yehova
Tufunika kuchita khama kuti tikoganizila ngako vatuŵelenga. Tulaŵila tetyo ndaŵa yakuti tonfwe wasu uchelwa lini kusokonezewa na vinthu viyakine. Tetyo, tingachite luweme kuŵelenga noganizila vatuŵelanga pa nthawe yatiliye ŵeŵe komasoti pa malo paliye vinthu votisokoneza. Wamasalimo muyakine enena kuti enzekonda kuganizila za Yehova usiku. (Sl 63:6) Olo kuti Yesu enze waungwilo, enzekonda kuluta ku malo ya chelele kuti akoganizila za vinthu vofunika komasoti kupemphela.—Lu 6:12.
Nsanja ya Olonda 15/07/2009 pedji 16 ndim. 6
Mukophunzisa mwachikondo monga ni Yesu
Sewo taŵanthu tikumvwa bwino tikolaŵila za vinthu vatukonda. Tulaŵila mwamphamvu komasoti mosangalala mwakuti ŵanthu okwanisha kuona kuti vutikondwelesha. Vamene ivi vuchitika maka-maka tikolaŵila za munthu watukonda. Nthawe zinyinji tufunishisha kuujako ayakine zokhuza munthu wamene uyo vatuziŵa sewo. Tulaŵila viweme vokhuza yove komasoti tumuikila kuvuli. Tuchita vamene ivi kuti ŵanthu ayakine akopeke na yove komasoti minkhalidwe yake monga nimwatuchitila sewo.
Kusakila-sakila Mfundo zingatiyavye
Nsanja ya Olonda 15/11/2007 pedji 15 ndim. 6
Kansi musisimula ayakine?
Kumanga ng’anda nikovuta ngako, koma kuipasula nkosavuta. Mfundo yamene iyi yukatishiliwa soti ntchito pa vinthu vatulaŵila. Tonse tiliye ungwilo ndipo tuphoniyesha vinthu viyakine. Mfumu Solomo ilemba kuti: “Chifukwa pachalo paliye munthu wolunga wamene ochita viwemme nthawe zonse ndipo ochimwa lini.” (Mla 7:20) N’vosavuta kuti tiwone kulakwa kwa munthu muyakine nolaŵila mawu aiipa ngako. (Sl 64:2–4) Koma nivosakwanishika kuti nthawe zonse mawu ŵasu akonkhala olimbikisa.
DJULAYI 22-28
CHUMA CHUPEZEKA M’MAWU A MULUNGU MASALIMO 66-68
Yehova onyamula katundu wasu nsiku iliyonse
Nsanja ya Mulonda 05/2023 pedji 12 ndim. 15
Mwakuyankhila mapemphelo ŵasu Yehova
Nthawe zinyinji mapemphelo ŵasu oyankhiwalini mu njila yodabwisa. Koma mayankho ŵatulondela niye ŵatufunikila kuti tipitilije kunkhala okhulupilika kuli Atata ŵasu akululu. Tetyo, tufunikila kunkhala tchelu kuti tiwone mwakuyankhila mapemphelo ŵasu Yehova. Mulongo muyakine zina yake Yoko enzewona kuti Yehova oyankhalini mapemphelo ŵake, koma pavuli pake eyamba kulemba venzesenga kwa Yehova. Papita nthawe, yove ewona m’kabuku kake ndipo eziŵa kuti Yehova eyankha mapemphelo ŵake anyinji kupamikijapo soti ayakine amene yove oŵakumbukilalini. Nthawe zonse tufunika kupanama noganizila mwakuyankhila mapemphelo ŵasu Yehova.—Sl 66:19, 20.
Nsanja ya Olonda 1/12/2010 pedji 23 ndim. 6
Mukoganizila makolo amene ali lini pa banja
Yehova eujila ŵanthu ayakine kulemba nyimbo zapadela, olo kuti masalimo ndipo Aisiraeli enzeimba polambila. Lomba ganizilani mwamene amayi amasiye na ŵana amasiye mwenzetang’ishiliwa poimba nyimbo zoujiliwa na Mulungu zamene izi. Nyimbo zamene izi zenzeŵakumbusha kuti Yehova ni “tata” na “woweluza wawo” ndipo venzeŵasimikijila kuti yove niwokonzeka kuŵayavya. (Sl 68:5; 146:9) Nase soti tingatang’ishe makolo amene olela ŵeka ŵana palaŵila mawu yolimbikisa yamene angoyakumbukila olo pangapite nthawe itali. Olo kuti papita vyaka 20 Ruth olela yeka ŵana, okumbukila mphela mawu yechiujiwa na mwanalume muyakine yakuti: “Mukata ntchito yotamandika ngako yolela ŵana ŵanu aŵili. Pitilijani muchita luweme ngako.” Ruth enena kuti: “Mawu amene aŵa enitang’isha ngako.” Nichendi kuti “mawu aweme ni mankhwala” ndipo angalimbikise makolo ameme olela ŵeka ŵana kupambana mwatuyembekezela. (Miy 15:4, Contemporary English Version) Kansi mungaganizile za vinthu viyakine viweme vakuchita makolo ameme olela ŵeka ŵana vamungatembeje?
Nsanja ya Olonda 1/04/2009 pedji 31 ndim. 1
Vwendelani Mulungu wamene ni Tata wa ŵana amasiye
“TATA wa ŵana amasiye . . . ni Mulungu wamene onkhala pa malo ŵake atuŵa.” (Sl 68:5) Mawu oujiliwa amene aŵa otiphunzisa Mfundo yofunika ngako yokhuza Yehova Mulungu, yakuti yove niwofunishisha kuyavya ŵanthu amene niwosoŵa. Chilamulo chechipeleka Yehova kuli Aisiraeli, chuwonesha kuti yove omvwila chisoni ŵana amene makolo ŵawo emwalila. Tiyeni tiwone lemba yoyamba m’Baibolo yamene ili na mawu aŵa akuti “mwana wa masiye,” yamene ni Ekisodo 22:22–24.
Nsanja ya Mulonda 01/2023 pedji 19 ndim. 17
Yehova okuyavya kuti vinthu vikokuyendelani luweme
Ŵelengani Salimo 40:5. Cholinga cha ŵanthu okwela malupili ni kufwika palulu ngapo-ngapo pa lupili. Olo ntetyo, akafwika pamalo ayakine opanama nosangalala na vinthu vakuwona. Molingana na vamene ivi, nthawe zonse mukopatula nthawe yopanama noganizila mwawakuyavyilani Yehova kuti vinthu vikokuyendelani luweme olo pa nthawe yamulimbana na mavuto. Kumapeto kwa nsiku iliyonse mukolikonsha kuti: ‘Kansi Yehova wanidalisa tyani lelo? Olo kuti nikalilimbana na mayeselo, kansi Yehova oniyavya tyani kuti nikwanishe kupilila?’ Mukoyeja kuganizila olo chinthu chimozi tyala chawakuchitilani Yehova pokuyavyani.
Kusakila-sakila Mfundo zingatiyavye
Nsanja ya Olonda 1/06/2006 pedji 10 ndim. 5
Mfundo zikulu-zikulu za chigawo chaŵili cha buku ya Salimo
68:18—Kansi niŵani wamene enze na “ufulu woziŵa za malonjezo okhuza ŵanthu?” Amene aŵa enze analume amene etolewa kufumila pa gulu ya ŵanthu amene enze akaidi, pechilonda chalo cholonjezewa. Pavuli pake analume amene awo epasiwa ntchito yoyavya Alevi pa ntchito yawo.—Eza 8:20.
DJULAYI 29–OGASITE 4
CHUMA CHUPEZEKA M’MAWU A MULUNGU SALIMO 69
Vinthu vechitikila Yesu pa moyo wake, venze viloselewa pa Salimo 69
Nsanja ya Olonda 15/08/2011 pedji 11 ndim. 17
Ŵanthu enzeyembekezela Mesiya
Mesiya azazondewe paliye chifukwa. (Sl 69:4) Yesu enena kuti: “Kuti nenze niliye kate ntchito pakati pa ŵanthu zamene aliyense aliye chitepo, sembe ankhala aliiye tchimo, koma lomba aona ndipo azondana nane, ndipo azondana soti na Atata ŵangu. Vili tetyo chifukwa chakuti mawu olembewa n’chilamulo akwanilishiwe. Mawu ŵake ni akuti ‘Azazondane nane paliye chifukwa.’” (Yoh 15:24, 25) Mawu akuti “chilamulo” nthawe zinyinji otanthauza kuti Malemba yonse. (Yoh 10:34; 12:34) Mabuku a uthenga uweme osimikijila kuti Yesu enzezondewa na ŵanthu anyinji, maka-maka na asogoleli achipembedzo Achiyuda. Ndipo Yesu Khilisitu enena kuti: “Chalo chiliye chifukwa chokuzondelani, koma chuzondana na newo, chifukwa nuchitila umboni chalo ichi ntchito zake niziipa.”—Yoh 7:7.
Nsanja ya Olonda 15/12/2010 pdji 8 ndim. 7–8
Nkhalani olipeleka pa kulambila kwa chendi
Vechichita Yesu nthawe ziyakine viwonesha kuti enze wolipeleka ngako. Echita vamene ivi chakumayambililo kwa utumiki wake mu nthawe ya Pasika wamu 30 C.E. yesu na ophunzila ŵake pechifwika ku kachisi ku Yerulemu “epeza ogulisa ng’ombe, mbelele, nkhunda, komasoti ochinja ndalama m’kachisi alinkhale pa mipando yawo.” Kansi Yesu echita tyani pechiwona vamene ivi, ndipo ophunzila ŵake echimvwa tyani na vechichita Yesu?—Ŵelengani Yohani 2:13–17.
Vechichita Yesu komasoti kulaŵila pa nthawe yamene iyi vechitisha kuti ophunzila ŵake akumbuke mawu amu Salimo ya Davide enena kuti: “Kulipeleka kwangu pa ng’anda yanu kuli monga ni mulilo wamene uyaka muntima mwangu.” (Sal 69:9) Ndaŵa yanji venze teti? Chifukwa chakuti vechichita Yesu sembe veika moyo wake pa ngozi. Ndipo akulu-akulu a pakachisi pamene apo monga Ansembe, Alembi na ŵanthu soti ayakine niye enzelimbikisa ŵanthu kuchita malonda amene awo pa kachisi. Tetyo vechichita Yesu pouja ŵanthu patuŵa za chinyengo cha asogoleli achipembezo komasoti kusokoneza mapulani ŵawo, sembe kwechitisha kuti azondane ngako. Ophunzila ŵake ezindikila kuti yove echita vamene ivi chifukwa chakuti enze ‘wolipeleka ngako pa ng’anda ya Mulungu,’ olo kuti pa kulambila kutuŵa. Koma kansi mawu akuti kulipeka ngako otanthauza chinji? Kansi niwosiyana na mawu akuti changu?
Galamukani! 22/10/1995 pedji 31 ndim. 4
Kansi mungafwe chifukwa cha kukhumudwa?
Ayakine enzelaŵila kuti mavuto ayakine ŵechikumana nawo Yesu echitisha kuti yove afwe, Yesu poyamba enenelatu kuti: “Vinthu ngavo-ngavo vamene ving’amba ntima wake ni vilonda vosapola.” (Sl 69:20) Kansi mawu amene aŵa niwomvweka komasoti achendi? Payakine soti pa nthawe yanze akaliye kufwa Yesu enze nachisoni ngako osati mwakuthupi tyala komasoti m’maganizo. (Mt 27:46; Lu 22:44; Ahe 5:7) Komasoti chendi chakuti “milopa na manzi” efuma pa chilonda pechilasiwa na nkondo, Yesu echimvwa kuŵaŵa ngako chifukwa chakuti penzefuma milopa na manzi ndipo echifwa. Kuphulika kwantima olo nzipe wa ntima kungachitishe kutaya milopa inyinji chifukwa cha kanthu kamene konkhala nkati mwantima kamene ni kanzipe katontho kozenguluka ntima, kubowoka kwa mizipe iŵili kungayambishe “kufuma mipola yowoneka monga ni manzi.”—Yoh 19:34.
Insight–2 pedji 650
Vomela va poizoni
Ponene za Mesiya, kweloselewa kuti “azapasiwe vinthu vapoizoni” kuti chinkhale chakulya chake. (Sl 69:21) Pevechitika vamene ivi Yesu Khilisitu enze akaliye pasiwa vinyu woyavija na ndulu, koma pechimupasa Yesu pechilaŵa ekana kumwa komasoti chenze chinthu chiyakine chamene sembe chechitisha kuti achefye mavuto ŵake. Polemba za kukwanilishiwa kwa ulosi wamene uyu, pa Mateyo (27:34) ekatishila ntchito mawu Achigiliki akuti kho·leʹ kutanthauza (ndulu), mawu amozi-mozi amene awo Baibolo ya Septuagint yachigiliki pa Salimo 69:21. Koma olo ntetyo nkhani zamene zili m’buku ya uthenga uweme yutomola za mule (Mk 15:23), ndipo vamene ivi vachitisha kuti ŵanthu akoganiza kuti “chimuti cha poizoni” olo “ndulu” chenze “mule.” Chinthu chiyakine soti nchakuti vinyu wamene uyo wenze woyavikija na ndulu komasoti mule.
Kusakila-sakila Mfundo zingatiyavye
Nsanja ya Olonda 15/01/1999 pedji 18 ndim. 11
Okhulupilika mukoimya manja popemphela
Ŵanthu anyinji opemphela tyala akafuna chinthu chiyakine, koma kukonda kwasu Yehova Mulungu kufunika kutitang’isha m’mapemphelo ŵasu paseka olo pagulu. Paulo enena kuti: “Osati mukodela nkhaŵa na chinthu chilichonse, koma pa chilichonse mwapemphelo na kupapatila pamozi na kutembeja vosenga vanu viziŵike kwa Mulungu. Mukachita tetyo ntendele wa Mulungu wamene upambana kuganiza ngako kulikonse uzateteze mitima yanu na maganizo yanu mwa Khilisitu Yesu.” (Afi 4:6, 7) Eye, kuyangijila pa kupapatila na kupemphela tufunika kutembeja Yehova ndaŵa ya madaliso yawatipasa yonkhala na moyo. (Miy 10:22) Wamasalimo eimba kuti: “Ndipo pelekani kwa Mulungu wamwamba-mwamba vamwalonjeza.” (Sl 50:14) Ndipo nyimbo yechiimba Davide mpemphelo yake yukatanijapo mawu ayakine okhuza ntima monga ni aŵa: “Nizaimbe nyimbo zotamanda zina ya Mulungu ndipo nizamulemekeze komasoti kumutembeja.” (Sl 69:30) Kansi sewo tufunika lini kuchita vamene ivi popemphela paseka olo pagulu?
OGASITE 5-11
CHUMA CHUPEZEKA M’MAWU A MULUNGU MASALIMO 70-72
‘Ujani m’badwo wokonkhapo’ za mphamvu za Mulungu
Nsanja ya Olonda 1/09/1999 pedji 18 ndim. 17
Achilumbwana—kulishani luso yanu yozindikila vinthu!
Kupewa ukuka wa Satana kufunika kunkhala tchelu nthawe zonse ndipo nthawe ziyakine kufuna soti kutang’a ntima. Nthawe ziyakine mungowona kuti musiyana na ayanu komasoti chalo chonse. Salimo ya Davide yulaŵila za pemphelo yakuti: “Chifukwa chiyembekezo changu chili muli mwewo Yehova Ambuye nkulu ngako. Nankhala nukudalilani mwewo kuyambila nili mulumbwana.” (Sl 71:5, 17) Davide oziŵika chifukwa cha kutang’a ntima kwake. Koma kansi kutang’a ntima kwamene uko enkhala nako nthawe itali tyani? Penze mulumbwana! Olo penze akaliye gonjesa Goliati, vochitika viyakine vakuziŵika navo Davide eviwoneshapo kale pa nthawe yenzeteteza mbelele za Atata ŵake pechipaya mphondolo komasoti chimbalangondo. (1Sa 17:34–37) Koma olo ntetyo Davide elipeleka kwa Yehova pa kutang’a ntima kulikonse kwechiwonesha ndipo emuuja kuti “mwaniwonesha kukhulupilika kwanu kufumila nili mulumbwana.” Kudalila kwake Yehova Davide kwemuyavya kugonjesa chiyeso chilichonse chechikumana nacho. Namwe soti keno mudalila Yehova ‘azakuyavyeni kuti munkhale otang’a ntima, komasoti azakupaseni mphamvu zolalikila pa chalo chonse.’—1Yo 5:4.
Galamukani! 8/10/2004 pedji 23 ndim. 3
Kansi tufunika kuchita nawo chinji ŵanthu okalamba?
Wolemba masalimo muyakine epemphela kuti: “Osanitaya pa nthawe yanakalamba. Osanisiya pa nthawe yamene mphamvu zangu zasila.” (Sl 71:9) Mulungu ‘oleka lini kuyavya’ atumiki ŵake okhulupilika olo ove pakuliwona kuti asila ntchito. Wamasalimo aliye one kuti Yehova wamutaya koma yove eziŵa kuti ofunika kudalila Nyamalenga wake maka-maka penzekalamba. Oyavya munthu wamene niwokhulupilika komasoti wachifundo pa moyo wake wonse. (Sl 18:25) Nthawe zinyinji tuyavyiwa kupitila muli Akhilisitu ayasu.
Nsanja ya Olonda 15/01/2014 pedji 23 ndim. 4–5
Tumikilani Yehova masiku ayipa akaliye fwika
Keno nimwe wachikulile ndipo mwachita vinyinji pa moyo wanu mungachite luweme kulikonsha kuti: ‘kansi ningachite chinji panikali na mphamvu?’ Olo kuti nimwe Mkhilisitu wachikulile, muli namwayi waliye ŵanthu ayakine. Mungaphunzise achilumbwana vamwaphunzila pa moyo wanu komasoti kufumila kwa Yehova. Mungatang’ishe ŵanthu ayakine poŵauja vinthu vosangalasa vamwakumana navo potumikila Mulungu. Mfumu Davide epemphela kuti ankhale na mwayi wochita vamene ivi. Yove elemba kuti: “Mwewo Mulungu, mwaniphunzisa kufumila pa ulumbwana wangu . . . olo kuti nakalamba nomela imvwi mwewo Mulungu osanisiya. Kufwika mpaka nilaŵile za kwanja yanu ku m’badwo wokonkhapo.”—Sl 71:17, 18.
Kansi mungaphunzise tyani ayakine vinthu vamwaphunzila pa vyaka vonse vamwankhala na moyo? Mungaite Akhilisitu achilumbwana kung’anda kwanu kuzetandala, payakine mungaŵasenge kuti alute namwe muutumiki kuti awone mwamusangalalila potumikila Yehova. Munthawe ya Yobu, Elihu enena kuti: “Masiku yalaŵile , vyaka vinyinji niye vufunika kuziŵisha ŵanthu nzelu.” (Yob 32:7) Mtumwi Paulo etang’isha Akhilisitu achikulile kuti akolimbikisa ayakine na mawu ŵawo komasoti chisanzo chawo. Yove elemba kuti: “Anakazi achikulile . . . Aŵe aphunzisi a vinthu viweme.”—Tit 2:3.
Kusakila-sakila Mfundo zingatiyaye
Insight–1 pedji 768
Filate
Malile a Filate achigawo chechipasiwa Aisiraeli. Mulungu elonjeza Abulahamu kuti azapase mbewu yake chalo chamene icho “kufumila ku m’mana wa Iguputo mpaka kuyafwika kum’mana ukulu wa Filate.” (Ge 15:18) Lonjezo yamene iyi yewelejelewa soti ku mtundu wa Isiraeli. (Eks 23:31; De 1:7, 8; 11:24; Yos 1:4) Lemba ya 1Mbiri 5:9 yulaŵila kuti mbadwa ziyakine za Rubeni Davide akaliye yamba kulamulila, enze elaŵila kale za kunkhalapo kwawo “Mpaka kuyafwika pakuti akaloŵe m’chipululu cha m’mana wa Filate.” Koma olo ntetyo m’mana wa Filate uli kutali pansenga wamakilomita 800 kuyafika “kum’mawa kwa Giliyadi” (1Mb 5:10),vamene ivi vingatanthauze tyala kuti a Rubeni elondela gawo yawo yoyamba ku Giliyadi mpaka kuyafwika kumasilililo kwa chipululu cha Suriya chipululu chamene ichi chupitilila mpaka ku m’mana wa Filate. (Mukaŵelenga RS yulaŵila kuti, “Kuyafwika pamuliyango wachipululu cha silya iyakine ya Filate”; JB, “kuyambila m’chipululu chamene chikuyasilijila ku m’mana wa Filate.”) Tetyo, vuwoneka kuti lonjezo ya Yehova yekwanilishiwa koyamba mu ulamulilo wa Davide komasoti Solomo pamene ulamulilo wa Isiraeli wefwika ku Ufumu wa a Arama waku Zoba mpaka kuyafwika mnyansi mwa m’mana wa Filate nivowonekelatu kuti chigawo chamene ichi, chepitila ku mpoto kwa Siliya. (2Sa 8:3; 1Mf 4:21; 1Mb 18:3–8; 2Mb 9:26) Ndaŵa ya kuziŵika kwake, kaŵili-kaŵili wenzengoitiwa tyala kuti “m’mana.”—Yos 24:2, 15; Sl 72:8.
OGASITE 12-18
CHUMA CHUPEZEKA M’MAWU A MULUNGU MASALIMO 73-74
Lomba tyani keno tukumbwila vochita vaŵanthu amene otumikila lini Yehova?
Nsanja ya Olonda 12/2020 pedji 19 ndim. 14
“Yehova opulumusa ŵanthu ali na ntima wofwaika”
Munthu wamene elemba Salimo 73 enze Mlevi. Tetyo enze na mwayi wapadela wotumikila pamalo olambilila Yehova. Koma olo venze tetyo, yove efoka. Kansi nchinji chemuchitisha kuti afoke? Yove eyamba kukumbwila ŵanthu aiipa na olitumba, osati chifukwa chakuti enzefuna kuchita vinthu viipa koma enzewona monga kuti ŵanthu amene awo vinthu vuŵayendela luweme. (Sl 73:2–9, 11–14) Enzewoneka monga ali na chilichonse, chuma, moyo uweme komasoti enzeve nkhaŵa. Mlevi wamene uyo pechiwona vamene ivi ekhumudwa ngako mwakuti enena kuti: “Nchendi natuŵisha ntima wangu patyala, ndipo nasamba m’manja mwangu patyala poonesha kuti niliye cholakwa.” Vamene ivi sembe vechitisha kuti aleke kutumikila Yehova.
Nsanja ya Olonda 12/2020 pedji 19–20 ndim. 15–16
“Yehova opulumusha ŵanthu amene ali na ntima wofwaika”
Ŵelengani Salimo 73:16–19, 22–25. Mlevi wamene “eloŵa m’malo opatulika a ulemelelo a Mulungu.” Mwamene umo ali pakati pa okhulupilila ayake, eyamba kuganizila mofasa mwevenzele vinthu pa moyo wake komasoti kupemphela. Vamene ivi vemuyavya kuti aziŵe maganizo ŵake kuti enze lini anzelu ndipo sembe vemuchitisha soti kuti osati ankhale soti pa ushamwali na Yehova. Yove ezindikila kuti ŵanthu aiipa enze “pamalo otelela” komasoti kuti “afwike pamepeto ŵawo ndipo asile chifukwa cha masoka oŵaponela mozizimusha.” Mlevi wamene uyu enzefunika kuwona vinthu monga ni mwakuviwonela Yehova kuti osati afoke, komasoti aleke kukumbwila ŵanthu aiipa. Pechichita vamene ivi enkhala na ntendele ndipo enzesangalala. Yove enena kuti: “paliye muyakine wamene onikondwelesha pa chalo, koma mwewo mweka [Yehova].”
Vatuphunzilapo. Osati tikokumbwila ŵanthu aiipa amene owoneka monga kuti vinthu vuŵayendela luweme. Chisangalalo chawo nichakanthawe ndipo azankhale lini na moyo wosasila. (Mla 8:12, 13) Tikaŵakumbwila tingankhale ofoka komasoti tingawononge ushamwali wasu na Yehova. Tetyo mukayamba kuwona kuti mwayamba kukumbwila ŵanthu aiipa, mukochita monga ni vechichita Mlevi wamene uyu. Mukomvwila malamulo a Mulungu komasoti mukonkhala pakati pa ŵanthu amene ochita vinthu vakufuna Yehova. Ndipo mungankhale osangalala ngako keno mukonda Yehova kupambana chinthu chilichonse. Komasoti mungapitilije mphela kuyenda pa njila ya “ku moyo ngawo-ngawo.”—1Ti 6:19.
Nsanja ya Olonda 15/04/2014 pedji 4 ndim. 5
Mukokonkheja kukhulupilika kwa Mose
Kansi mungachite tyani kuti “mukane vinthu vosangalasa komasoti vosankhalisha vamene vili muli ichi chalo?” Osaluŵa kuti vosangalasa vili muli ichi chalo nivakanthawe. Chikhulupililo chanu chingakuyavyeni kuwona kuti “chalo ichi chikuya komasoti chilichonse chamuli ichi chalo, chakufunishisha ŵanthu chikuya.” (1 Yoh 2:15–17) Mukoganizila vinthu vamene vikuti vizachitikile ŵanthu osalapa. Ove “mwaŵaika pamalo otelela . . . kuti awonongewe!” (Sl 73:18, 19) Patuyesewa kuti tichite vinthu viipa, tufunika kulikonsha kuti, ‘Kansi nufuna kuti sogolo yangu izankhale yotyani?’
Nsanja ya Olonda 15/02/2013 pedji 25–26 ndim. 3–5
Osati mulole kuti chilichonse chikukangisheni kufwana ulemelelo
Wamasalimo enzekhulupilila kuti Yehova azamukate kwanja yake ngayo nomusogolela ku ulemelelo wake. (Ŵelengani Salimo 73:23, 24.) Kansi Yehova oŵapasa tyani ŵanthu ŵake ulemelelo? Yove osogolela ŵanthu ŵake amene ni olichefya ku ulemelelo noŵadalisa munjila zosiyana-siyana. Mwachisanzo, Yove oŵayavya kumvwisha cholinga chake. (1Ak 2:7) Yove ololasoti kunkhala paushamwali wotang’a na ŵanthu amene omumvwila.—Yak 4:8.
Yehova olemekezasoti atumiki ŵake poŵapasa mwayi wolalikila uthenga uweme. (2Ak 4:1, 7) Utumiki wamene uyu utipasa ulemelelo. Ŵanthu amene ochita utumiki wamene uyu nacholinga chakuti alemekeze Yehova komasoti kuyavya ŵanthu ayakine, olonjezewa kuti: “Amene onilemekeza, nane nizaŵalemekeze.” (1Sa 2:30) Ŵanthu otetyo, onkhala paushamwali uweme na Yehova, ndipo nthawe zinyinji olemekezewa na atumiki ayawo.—Miy 11:16; 22:1.
Kansi sogolo ya munthu wamene “oyembekezela Yehova nosunga malamulo ŵake” niyotyani? Baibolo yulonjeza kuti: “[Yehova] azakulemekeze kuti ulondele chalo. Panthawe yakuti akapaiwe ŵanthu aiipa, wewo uzawone.” (Sl 37:34) Ove oyembekezela kuti Mulungu azaŵapase moyo kosasila.—Sl 37:29.
Kusakila-sakila Mfundo zingatiyavye
Insight–2 pedji 240
Leviyatani
Buku ya Masalimo 74 yufotokoza mbiri ya kupulumushiwa kwa ŵanthu a Mulungu, ndipo vesi 13 na 14 yufotokoza mophiphilisila kulondeshewa kwa ŵana ŵa Aisiraeli ku Iguputo. Vuwoneka kuti mawu akuti “volengewa vam’nyanja [Heb., than·ni·nimʹ, Kukula kwa mathaniʹ]” okatishiliwa ntchito monga mawu olingana na “Leviyatani,” Ndipo kufwaiwa kwa mitu ya Leviyatani, kungapambane kugonjesewa kwechichita Falao pamozi na gulu yake ya nkhondo paulwendo wawo wanchipululu. Mawu a Chiaramu akuti “masodja ankhondo a Falao” niye opanamila “mitu ya Leviyatani.” (Yelekezelani na Ezekieli 29:3–5, pechilinganijiwa Falao na “cholengewa chikulu cha mmanzi” chamene chili pakati pa mmana wa Nailo; onanisoti Ezekieli 32:2.) Pa Yesaya 27:1 nivowonekelatu kuti okatishila ntchito Leviyatani (LXX, “chinjoka”) monga chizindikilo cha ulamulilo , bungwe yamene ili pachalo chonse, yulolelewa na munthu wamene nimunecho oitiwa kuti “njoka” na “chinjoka.” (Chiv 12:9) Ulosi wamene uyu niwonena za kuwejeleshewa kwa Aisiraeli, tetyo ‘kuwonongewa’ kwa Leviyatani kwati azachite Yehova kupamikijapo Babulo mkulu. Koma olo n’tetyo, mavesi 12 na 13 yofotokoza za Asuri na Aiguputo. Tetyo, Leviyatani wamene uyu palipano n’vowonekelatu kuti ololesha kumitundu yonse ya ŵanthu yamene yoshushana na Yehova komasoti ulamulilo wake.
OGASITE 19-25
CHUMA CHUPEZEKA M’MAWU A MULUNGU MASALIMO 75-77
Ndaŵa yanji tufunikila kupewa ntima—woliwoneshela?
Nsanja ya Olonda 01/2018 pedji 28 ndim. 4–5
Tikonkhala osiyana na ŵanthu amuli ichi chalo
Paulo pechifotokoza kuti ŵanthu anyinji azankhale olikonda komasoti okonda ndalama, elembasoti kuti ŵanthu azankhale olimvwa, olikuja, olitumba komasoti omeka. Munthu owonesha mankhalidwe amene aŵa chifukwa choganiza kuti niwapalulu kupambana ayakine potolela luso yalinayo, maonekedwe ŵake, chuma chali nacho komasoti udindo wake. Ŵanthu aminkhalidwe monga ni amene aŵa, ofunishisha kuti ŵanthu ayakine akoŵapasa ulemu olo kuŵakumbwila. Kaswili muyakine elemba kuti munthu womeka ngako, tinganene kuti olilambila yeka. Ŵanthu ayakine onena kuti nkhalidwe yomeke niipa ngako mwakuti ŵanthu amene ni omeka nawo osangalala lini na ŵanthu amene ali na nkhalidwe yamene iyi.
Yehova ozondana na nkhalidwe ya kumeka. Baibolo yunena kuti yove osangalala lini na “menso olikuja.” (Miy 6:16, 17) Munthu womeka, angankhalelini paushamwali na Mulungu. (Sl 10:4) Satana niwomeka. (1Ti 3:6) Koma nivomvwisha chisoni kuti atumiki ayakine a Yehova eyamba kuwonesha nkhalidwe yamene iyi. Mwachisanzo, Uziya wamene enze mfumu yaku Yuda enkhala wokhulupilika kwa vyaka vinyinji koma Baibolo yunena kuti: “Pechinkhala wamphamvu, ntima wake weyamba kulikuja mpaka wefwika pomuwonongesha. Tetyo, echita vinthu vosakhulupilika kwa Yehova Mulungu wake, ndipo eloŵa mukachisi wa Yehova kuyapeleka nsembe zoputija.” Panthawe iyakine nayesoti mfumu Hezekiya eyamba ntima womeka, koma pavuli pake eleka.—2Mb 26:16; 32:25, 26
Nsanja ya Olonda 15/07/2006 pedji 11 ndim. 2
Mfundo zikulu-zikulu za nchigawo cha 3 na 4 cha m’buku ya Masalimo
75:4, 5, 10—Kansi mawu akuti “nsengo” opanamila chinji? Nsengo ya nyama ni chida champhamvu. Tetyo mawu akuti “nsengo” mophiphilisila opanamila mphamvu. Yehova onyamula nsengo za ŵanthu ŵake noŵaika palulu koma ‘otenda nsengo zonse za ŵanthu aiipa.’ Tuchenjejewa kuti ‘osati tikopachika nsengo yasu kuti tinkhale omeka olo kulikuja.’ Pakuti Yehova niye okwejeka ŵanthu tufunika kuwona udindo wasu mumpingo kuti ufumila kuli yove.—Sl 75:7.
Kusakila-sakila Mfundo zingatiyavye
Nsanja ya Olonda 15/07/2006 pedji 11 ndim. 3
Mfundo zikulu-zikulu za nchigawo cha 3 na 4 cha m’buku ya Masalimo
76:10—Kansi kukalipa kwa munthu kungalemekeze tyani Yehova? Mulungu akalola kuti ŵanthu akotikalipila ndaŵa yakuti nise atumiki ŵake, pangankhale vokonkhapo viweme. Vuto iliyonse yatingakumane nayo, tingaphunzilepo chinthu chiyakine. Yehova olola kuti tikovutika nacholinga chakuti tikophunzilapo kanthu kayakine. (1Pe 5:10) ‘Vokonkhapo va kukalipa kwa munthu Mulungu azavileshe.’ Lomba tyani keno tivutike mpaka kumwalila kwasu? Vamene ivi vingalemekeze Yehova ndaŵa yakuti ŵanthu amene otiwona sewo tupilila mokhulupilika nawosoti angayambe kulambila Mulungu.
OGASITE 26–SEKUTEMBA 1
CHUMA CHUPEZEKA M’MAWU A MULUNGU SALIMO 78
Aisiraeli amene enze osakhulupilika—nivisanzo votichenjeja
Nsanja ya Olonda 1/12/1996 pedji 29–30
“Mukokumbukila masiku apavuli”—Ndaŵa yanji?
Mwachisoni Aisiraeli nthawe zinyinji, enzechimwila lona noluŵa Mulungu. Kansi vokonkhapo vake venze votyani? “Ejokela kuvuli noyesa Mulungu komasoti kuifya ntundu wa Aisiraeli. Aliye kumbukile za mavuto ŵechikumana nawo komasoti za Mulungu wamene eŵafumya ku mavuto ŵawo.” (Sl 78:41, 42) Koma mukupita kwa nthawe kuluŵa kwawo malangizo a Yehova kwechitisha kuti aŵakane.—Mt 21:42, 43.
Wamasalimo epeleka chisanzo chiweme ndipo elemba kuti: “Nizakumbukile ntchito ya Ya; Nizakumbukile vochita vanu vodabwisa vakale. Nizaganizile za ntchito zanu zonse zikulu-zikulu, ndipo nizaganizile vochita vanu vikulu-vikulu.” (Sl 77:11, 12) Kuganizila ngako atumiki ŵake okhulupilika akale za vochita va Yehova vachikondi, kuzatitang’ishe kuchita vinthu vofunikila komasoti kumutembeja. Komasoti, “kukumbukila masiku akale” kungakwanishe kutitang’isha ndipo kungatilimbikise kuchita vonse vatingakwanishe kuti tipilile mokhulupilika.
Nsanja ya Olonda 15/07/2006 pedji 17 ndim. 16
‘Mukopewa kudandaula’
Munthu akong’ung’uzika pochita chinthu chiyakine, oganizila tyala za yove yeka komasoti mavuto ŵake ndipo nthawe zinyinji owaya-waya maudindo ŵalinawo monga Mboni za Yehova. Keno tili na chiyoloŵezi chodandaula tufunika kuchisilisha, m’malo mwake tufunika kukumbukila za madaliso amene aŵa. Mwachisanzo, aliyense wa sewo ali na mwayi wosangalala chifukwa choziŵika na zina ya Yehova. (Yes 43:10) Tikankhala paushamwali wotang’a na yove, tukwanisha kulaŵila na “Wakumvwa pemphelo” nthawe iliyonse. (Sl 65:2; Yak 4:8) Moyo wasu uli na cholinga chifukwa chakuti tukwanisha kumvwisha nkhani ya Ulamulilo wa chilengedwe chonse ndipo tukumbukila kuti ni mwayi wasu kunkhala wokhulupilika kwa Mulungu. (Miy 27:11) Tingatole nawo mbali pa kulalikila uthenga uweme waufumu nthawe zonse. (Mt 24:14) Kunkhulupilila nsembe ya dipo ya Yesu Khilisitu, kutiyavya kunkhala na chikumbuntima chituŵa. (Yoh 3:16) Amene aŵa nimadaliso ŵatunkhala nawo keno tufunika kupilila vinthu votyani.
Nsanja ya Olonda 1/07/2011 pedji 10 ndim. 3–4
Kansi Yehova osangalala kapena kukhumudwa na vochita vasu?
Wamasalimo enena kuti: “Ove enzemupandukila pafupi-pafupi nchipululu!” (Vesi 40) Vesi yokonkhapo yunena kuti: “Moweleja-weleja, ove enzemuyesa Mulungu.” (Vesi 41) Kansi mwawona kuti salimo yamene iyi yuwonesha kuti vamene ivi venzechitika moweleja-weleja? Aisiraeli eyamba kusalemekeza Mulungu—komasoti kumupandukila ali nchipululu pakaliye pita nthawe itali kufumila pechiŵapulumusa Mulungu ku Iguputo. Ove eyamba kung’ung’uzika komasoti kukayikila keno Mulungu angakwanishe kuŵasamalila komasoti keno enzefuna chendi kuŵasamalila. (Nu 14:1–4) Buku iyakine yoyavya ŵanthu omasulila Baibolo, inena kuti mawu akuti “enzemupandukila” “angamasuliliwesoti kuti ‘eyumisha mitima yawo kuti osati amvwile Mulungu’ olo ‘kuti “euja Mulungu kuti” tufunalini kuti munkhale Mulungu wasu.’” Koma olo ntetyo, pakuti Yehova ni Mulungu wachifundo yove enzekhululukila ŵanthu ŵake amene aŵa akalapa. Vikankhala tetyo, ove enzeyambasoti kuchita vinthu viipa ndipo enzemupandukilasoti, akalapa Yehova enzeŵakhululukilasoti ndipo vamene ivi venzechitika moweleja-weleja.—Sl 78:10–19, 38.
Kansi Yehova enzekumvwa tyani Aisiraeli osamvwila amene aŵa akamupandukila? Vesi 40 yunena kuti “enzemukhumudwisa.” Baibolo iyakine imasulila mawu amene aŵa kuti “enzechitisha Mulungu kuti amvwe chisoni.” Buku iyakine yofotokoza nkhani za m’Baibolo, yunena kuti: “Mawu amene aŵa otanthauza kuti vechichita Ayuda,—venzemuŵaŵisha ntima Yehova, monga nimwakumvwila makolo mwana wawo akowachitila mwano komasoti akaŵapandukila.” Molingana na mwana wosamvwila wamene oŵaŵisha ntima makolo ŵake, Aisiraeli “enzemvwisha vichisoni ntuŵa wa Isiraeli.”—Vesi 41
Kusakila-sakila Mfundo zingatiyavye
Nsanja ya Olonda 15/07/2006 pedji 11 ndim. 4
Mfundo zikulu-zikulu za nchigawo cha 3 na 4 cha m’buku ya Masalimo
78:24, 25; mawu amnyansi—Ndaŵa yanji mana oitiŵa kuti “tiligu wakululu” komasoti “chakulya cha amphamvu” kapena kuti Angelo? Mawu onse amene aŵa otanthauzalini kuti mana chenze chakulya cha Angelo. Mana wenze “tiligu wakululu” chifukwa chakuti wenzefumila kululu. (Sl 105:40) Pakuti Angelo olo kuti “amphamvu,” onkhala kululu, mawu akuti “chakulya cha amphamvu” angatanthuze kuti mana enzepelekewa na Mulungu wamene onkhala kululu. (Sl 11:4) Payakine Yehova enzekatishilasoti ntchito Angelo popeleka mana kwa Aisiraeli.