Mwakuyankhila mapemphelo ŵasu Yehova

1-2. Kansi tingalikonshe chinji vokhuza mapemphelo ŵasu?

KANSI mwewo mwelikonshapo kale keno Yehova oyankha mapemphelo ŵanu? Keno n’tetyo, ni mwewo mwekalini. Abale na alongo anyinji elaŵilapo kale mawu monga ni amene aŵa makamaka pa nthawe yenzekumana na mavuto. Keno tukumana na mavuto, nase vingativute kuziŵa mwakuyankhila mapemphelo ŵasu Yehova.

² Tiyeni tiwone chifukwa chatingankhalile osimikijila kuti Yehova oyankha mapemphelo ŵa atumiki ŵake. (1 Yoh. 5:15) Tikambilanesoti makonsho aŵa: Ndaŵa yanji nthawe ziyakine vingawoneke monga kuti Yehova oyankhalini mapemphelo ŵasu? Kansi Yehova okatishila ntchito njila zotyani poyankha mapemphelo ŵasu masiku ŵano?

YEHOVA PAYAKINE ANGATIYANKHELINI MU NJILA YETENZEYEMBEKEZELA

3. Ndaŵa yanji Yehova ofuna kuti tikopemphela kuli yove?

³ Malemba otisimikijila kuti Yehova otikonda ngako komasoti kuti nise antengo wapatali kuli yove. (Hag. 2:7; 1 Yoh. 4:10) N’chifukwa chake yove otiuja kuti tikosenga thandizo kuli yove m’pemphelo. (1 Pet. 5:6, 7) Yove ofuna kutiyavya kuti tipitilije kunkhala naye paushamwali komasoti kuti tipilile mavuto ŵatukumana nawo.

4. Kansi tuziŵa tyani kuti Yehova oyankha mapemphelo ŵa atumiki ŵake? (Onanisoti chithunzi.)

⁴ M’Baibolo, nthawe zinyinji tuŵelenga kuti Yehova eyankha mapemphelo ŵa atumiki ŵake okhulupilika. Kansi mungaganizileko chisanzo chimozi? Chimozi mwa visanzo vamene ivi ni Mfumu Davide. Yove ekumana na adani anyinji oyofya pa moyo wake, ndipo nthawe zinyinji enzepemphela kwa Yehova kuti amuyavye. Pa nthawe iyakine, yove epapatila Yehova kuti: “Mwewo Yehova, mvwani pemphelo yangu. Teyani kwatu yanu panupapatila. Niyankheni mokatijana na kukhulupilika kwanu komasoti chilungamo chanu.” (Sal. 143:1) Yehova eyankha mapemphelo a Davide osenga kupulumushiwa. (1 Sam. 19:10, 18-20; 2 Sam. 5:17-25) Davide elaŵila motang’a ntima kuti: “Yehova alipafupi na onse oita pali yove.” Sewo nase tingankhale osimikijila za vamene ivi.—Sal. 145:18.

5. Kansi atumiki a Yehova akale nthawe zonse enzeyankhiwa mapemphelo ŵawo munjila yenzeyembekezela? Pelekani chisanzo. (Onanisoti chithunzi.)

⁵ Yehova payakine angayankhelini mapemphelo ŵasu mu njila yetenzeyembekezela. Vamene ivi niye vichitikila ntumwi Paulo. Yove esenga Mulungu kuti amuchosele “munga m’muŵili.” Katatu konse Paulo epemphela mosapita mmbali za vuto ikulu yamene iyi. Kansi Yehova eyankha mapemphelo amene awo? Eye, koma osati mwenzeyembekezela Paulo. M’malo mochosa vuto yamene iyo, Yehova emupasa mphamvu zenzefunikila kuti apitilije kumutumikila mokhulupilika.—2 Akor. 12:7-10.

6. Ndaŵa yanji nthawe ziyakine, vingawoneke monga kuti Yehova oyankhalini mapemphelo ŵasu?

⁶ Nase nthawe ziyakine mapemphelo ŵasu angayankhiwe mu njila yetenzeleka yembekezela. Tingankhale osimikijila kuti Yehova oziŵa luweme mwangatiyavyile. Yove angakwanishe “kuchita vikulu ngako kupambana vonse vatumusenga olo kuganiza.” (Aef. 3:20) Pa chifukwa chamene ichi, yankho yake pa mapemphelo ŵasu ingawele pa nthawe olo mu njila yetenzeleka yembekezela.

7. Ndaŵa yanji tufunika kuchinja vatupemphelela? Pelekani chisanzo.

⁷ Tingafunike kuchinja vatupemphelela tikaziŵa luweme vakufuna Yehova. Ganizilani chisanzo cha Martin Poetzinger. Papita tyala nthawe itontho pechilungulana na mwanakazi wake, m’bale Poetzinger eikiwa mudjeli m’misasa ya Nazi. Poyamba esenga Yehova kuti amufumye mudjeli mwamene umo kuti asamalile mwanakazi wake noyambasoti ntchito yake yolalikila. Koma olo n’tetyo, pavuli pa masondo aŵili aliyewone chizindikilo chowonesha kuti Yehova amuyavye kuti afume. Tetyo, yove eyamba kupemphela kuti: “Yehova, pulizi niwonesheni vamufuna kuti nichite.” Pavuli pake yove eyamba kuganizila venzekumana navo abale ayakine munsasa wamene uyo. Anyinji a ove enzedela nkhaŵa vokhuza anakazi komasoti ŵana ŵawo. Pavuli pake m’bale Poetzinger epemphela kuti: “Yehova, zikomo ngako chifukwa cha utumiki wangu walombapano. Niyavyeni kutonthoja nolimbikisa abale ŵangu.” Yove esila vyaka 9 m’misasa yamene iyo ochita vamene ivo!

8. Kansi ni mfundo yotyani yatufunikila kukumbukila tikopemphela?

⁸ Tufunika kukumbukila kuti Yehova ali na cholinga, ndipo azachikwanilishe pa nthawe yechisankha. Cholinga chamene icho chupamikijapo kusilijilatu mavuto onse amene ochitisha kuti ŵanthu akotamana ngako masiku ŵano, monga masoka a m’chilengedwe, matenda komasoti imfwa. Yehova azakwanilishe cholinga chake kupitila mu Ufumu wake. (Dan. 2:44; Chiv. 21:3, 4) Koma olo n’tetyo, mpaka nthawe yamene iyo izafwike, Yehova akolola kuti Satana akotonga chino chalo.b (Yoh. 12:31; Chiv. 12:9) Keno Yehova angasilije mavuto onse a ŵanthu palipano vingawoneke monga kuti Satana otonga luweme chalo. Tetyo, olo kuti tufunika kuyembekezela kuti Yehova akwanilishe malonjezo ayakine, pali vinthu viyakine vakuchita Yehova kuti akotiyavya. Tiyeni tiwone njila ziyakine zakutiyavyila Yehova.

NJILA ZAKUKATISHILA NTCHITO YEHOVA POYANKHA MAPEMPHELO ŴASU MASIKU ŴANO

9. Kansi Yehova angatiyavye tyani keno tufuna kupanga chosankha? Pelekani chisanzo.

⁹ Yove otipasa nzelu. Yehova olonjeza kutipasa nzelu zatufunikila kuti tikopanga vosankha viweme. Tufunikila ngako nzelu yofumila kuli Mulungu popanga vosankha vamene vizakhuze moyo wasu wonse, monga kunkhala mbeta olo kuloŵa m’banja. (Yak. 1:5) Ganizilani chisanzo cha mulongo muyakine wosalunguliwa zina yake Maria.c Yove enze wosangalala penzetumikila monga mpainiya wonkhazikika pechiziŵana na m’bale muyakine. Yove enena kuti: “Ushamwali wasu pewiyamba kukula maganizo ŵasu eyambasoti kukula. Neziŵa kuti nenzefunika kusankha vochita. Nipemphela kwa nthawe itali za nkhani yamene iyi. Nenzefunikila chisogozo cha Yehova, koma nenzeziŵasoti kuti Yehova anganipangilelini chosankha.” Yove owona kuti Yehova eyankha mapemphelo ŵake osenga nzelu. Motyani? Penzefufuza m’mabuku ŵasu, efwana nkhani zamene zimuyavya kufwana mayankho a makonsho ŵake. Ekonkhejasoti malangizo anzelu ofumila kuli amayi ŵake okhulupilika. Malangizo amene awo emuyavya Maria kufufuza maganizo ŵake. Pamapeto pake ekwanisha kusankha mwanzelu.

10. Mokatijana na Afilipi 4:13, kansi Yehova azachite tyani kuti ayavye atumiki ŵake? Pelekani chisanzo. (Onanisoti chithunzi.)

¹⁰ Yove otipasa mphamvu kuti tikwanishe kupilila. Monga mwechichitila na ntumwi Paulo, Yehova azatipase mphamvu zatufunikila kuti tipilile mayeselo ŵasu. (Ŵelengani Afilipi 4:13.) Onani mwamene Yehova mwechiyavyila m’bale muyakine zina yake Benjamin kuti apilile mavuto. Ali mulumbwana, Benjamin pamozi na a banja ŵake enzenkhala m’misasa ya ŵanthu othaŵa kwawo ku Africa. Benjamin enena kuti: “Nenzepemphela kwa Yehova nthawe zonse kumusenga kuti anipase mphamvu zochitila vinthu vakufuna yove. Yehova eyankha mapemphelo ŵangu ponipasa ntendele wa m’maganizo noniyavya kunkhala wotang’a ntima kuti nipitilije kulalikila komasoti kunipasa mabuku kuti ninkhale mphela wotang’a mwauzimu.” Yove epitilija kufotokoza kuti: “Kuŵelenga mbili zokhuza vokumana navo va abale na alongo nophunzila mwechiŵayavyila Yehova kuti akwanishe kupilila, kwenilimbikisa kusimikijila ntima wangu kuti ninkhale mphela wokhulupilika.”

11-12. Kansi Yehova angakatishile ntchito tyani banja yasu yauzimu poyankha mapemphelo ŵasu? (Onanisoti chithunzi.)

¹¹ Yove okatishila ntchito banja yasu yauzimu. Usiku wakuti apeleke moyo wake monga nsembe, Yesu epemphela mofumila pansi pantima. Yove esenga Yehova kuti osati alole kuti ŵanthu ayakine aganize kuti yove oimbiwa mulandu chifukwa chonyoza Mulungu. M’malo mochita vamene ivo Yehova eyavya Yesu potumija mngelo monga nkwake kuti akamulimbikise. (Lk. 22:42, 43) Yehova angatiyavye soti pokatishila ntchito abale na alongo kuti atiyendele notilimbikisa. Sewo tonse tingoyeja-yeja kufwana mipata yolaŵila “mawu aweme” kuli okhulupilila ayasu.—Miy. 12:25.

¹² Ganizilani chisanzo cha mulongo muyakine zina yake Miriam. Pavuli pa masondo atontho kufumila pechimwalila mwanalume wake, Miriam enzenkhala yeka-yeka ku ng’anda, enze esila nzelu komasoti wosokonezeka maganizo. Yove enzelekalini kulila ndipo enzefunika kuuja munthu muyakine va muntima mwake. Yove enena kuti: “Nenzeve mphamvu zotumila foni munthu aliyense, tetyo nipemphela kwa Yehova. Nili nkati molila nopemphela, foni yangu ilila. Enze nkulu wa mumpingo mwasu, wamene enzesoti shamwali wangu wapantima.” Miriam etonthojewa na nkulu wamene uyo komasoti mwanakazi wake. Yove ekhulupilila kuti Yehova niye echitisha m’bale wamene uyo kuti amutumile.

13. Fotokozani chisanzo chuwonesha mwamene Yehova mwangakatishile ntchito ŵanthu amene omulambilalini poyankha mapemphelo ŵasu.

¹³ Yove angakatishile ntchito ŵanthu amene omutumikilalini. (Miy. 21:1) Nthawe ziyakine, yove oyankha mapemphelo ŵa atumiki ŵake mwa kuchitisha ŵanthu amene omulambilalini kuti aŵayavye. Mwachisanzo, yove echitisha Mfumu Aritasasita kuvomekeja pempho ya Nehemiya yakuti ajokele ku Yerusalemu kuti akayavye pa ntchito yomanga soti tauni yamene iyo. (Neh. 2:3–6) Masiku ŵano soti Yehova angachitishe olo ŵanthu amene omulambilalini kuti atiyavye pakafunikila kuchita tetyo.

14. Kansi n’chinji chukuchitishani chidwi na nkhani yokhuza vechikumana navo Soo Hing? (Onanisoti chithunzi.)

¹⁴ Mulongo muyakine zina yake Soo Hing ewona kuti Yehova emuyavya kupitila muli dokota wake. Mwana wake mwanalume enzelwala matenda akulu ngako ovutika maganizo. Pechichita ngozi ikulu, yove pamozi na mwanalume wake eleka ntchito yawo kuti akamusamalile. Chifukwa cha vamene ivi, ove enze na mavuto azachuma. Soo Hing enena kuti enzewona kuti angakwanishelini soti kupilila mavuto amene awo. Yove epemphela kwa Yehova mofumila pansi pantima kuti amuyavye. Dokota wamene uyo eganiza zofwana njila kuti amuyavye pamozi na banja yake. Chifukwa cha vamene ivi ove elondela thandizo ya boma komasoti enkhala na mwayi wolipila ndalama zitontho pa ng’anda yenzenkhala. Pavuli pake, Soo Hing enena kuti: “Tiwona kwanja ya Yehova pa nthawe yamene iyo. Kulaŵila chendi yove ni ‘Wakumvwa pemphelo.’”—Sal. 65:2.

TUFUNIKILA CHIKHULUPILILO KUTI TILONDELE KOMASOTI KUTI YEHOVA AYANKHE MAPEMPHELO ŴASU

15. Kansi n’chinji chiyavya mulongo muyakine kuziŵa kuti mapemphelo ŵake oyankhiwa?

¹⁵ Nthawe zinyinji mapemphelo ŵasu oyankhiwalini mu njila yodabwisa. Koma mayankho ŵatulondela niye ŵatufunikila kuti tipitilije kunkhala okhulupilika kuli Atata ŵasu akululu. Tetyo, tufunikila kunkhala tchelu kuti tiwone mwakuyankhila mapemphelo ŵasu Yehova. Mulongo muyakine zina yake Yoko enzewona kuti Yehova oyankhalini mapemphelo ŵake, koma pavuli pake eyamba kulemba venzesenga kwa Yehova. Papita nthawe, yove ewona m’kabuku kake ndipo eziŵa kuti Yehova eyankha mapemphelo ŵake anyinji kupamikijapo soti ayakine amene yove oŵakumbukilalini. Nthawe zonse tufunika kupanama noganizila mwakuyankhila mapemphelo ŵasu Yehova.—Sal. 66:19, 20.

16. Kansi tingawoneshe tyani chikhulupililo pa nkhani ya pemphelo? (Aheberi 11:6)

¹⁶ Tuwonesha kuti tili na chikhulupililo osati tyala mwa kupemphela kwa Yehova komasoti mwa kuvomeleja kuti yove oyankha mapemphelo ŵasu mu njila iliyonse. (Ŵelengani Aheberi 11:6.) Ganizilani chisanzo cha Mike na nkazi wake, Chrissy. Ove enze na cholinga chotumikila pa Beteli. Mike enena kuti: “Tilemba mafomu osenga utumiki wapa Beteli kwa vyaka vinyinji monga banja ndipo tipemphela kwa Yehova moweleja-weleja za cholinga chamene ichi, koma tiliye itiwe.” Mike na Chrissy enzekhulupilila mphela kuti Yehova oziŵa mwangaŵakatishilile ntchito pomutumikila. Ove epitilija kuchita vonse vangakwanishe potumikila monga apainiya onkhazikika kumalo kwamene kwenzefunika ofalisa anyinji komasoti kuyavya pa ntchito yazomanga-manga. Palipano otumikila monga opanamila dela. Mike enena kuti: “Ni nthawe zonselini Yehova pakuyankha mapemphelo ŵasu mu njila yetenzeyembekezela, koma yove oyankha mu njila ziweme ngako kupambana zetenzeyembekezela.”

17-18. Mokatijana na Salimo 86:6, 7, kansi tingankhale osimikijila za chinji?

¹⁷ Ŵelengani Salimo 86:6, 7. Wamasalimo Davide enze wosimikijila kuti Yehova akumvwa noyankha mapemphelo ŵake. Mwewo namwe mungankhale na chidalilo cholingana na chamene icho. Visanzo vatakambilana mu nkhani ino vutisimikijila kuti Yehova angatipase nzelu komasoti mphamvu zatufunikila kuti tikwanishe kupilila. Yove angakatishile ntchito banja yasu yauzimu olo ŵanthu amene palipano omulambila lini kuti atiyavye mwanjila iyakine.

¹⁸ Olo kuti nthawe ziyakine Yehova angayankhelini mapemphelo ŵasu mu njila yetenzeyembekezela, sewo tuziŵa kuti yove azaŵayankhe. Yove azatipase vatufunikila komasoti pa nthawe ngayo-ngayo yatufunikila vinthu vamene ivo. Tetyo pitilijani kupemphela na chikhulupililo muli osimikijila kuti Yehova azakusamalileni palipano komasoti kuti ‘azakhutilishe vokumbwa va chamoyo chili chonse’ mu chalo chanyowani chikuza kusogolo.—Sal. 145:16.