Mulungu ekhululuka machimo dipo ikaliye pelekewa

Njila imozi yakukatishila ntchito Mulungu pokhululuka machimo ŵasu ni kupitila tyala mu nsembe ya dipo yechilipila Yesu pokatishila ntchito milopa yake ngayo-ngayo. (Aife. 1:7) Koma olo n’tetyo, Baibolo yunena kuti: “Mulungu . . . , ewonesha kuti ni wosakalipa kamangu pechikhululuka machimo amene echitika kale”, kutanthauza machimo ŵechichita ŵanthu Yesu akaliye wapeleka dipo. (Alo. 3:25) Kansi Yehova ekwanisha tyani kukhululukila machimo dipo ikaliye pelekewa nopitilija kukonkheja mfundo zake zolungama zangwilo panthawe imo na imo?

Yehova enze elonjeza kale kuti kuzawele “mbewu” yamene ikuti izapulumushe ŵanthu amene okhulupilila Mulungu na malonjezo ŵake. Kwa Yehova, lonjeza yamene iyi yenze monga kuti yakwanilishiwa kale olo kuti dipo yenze ikaliye pelekewa. (Gen. 3:15; 22:18) Mulungu enzekaikilalini kuti panthawe yake yoikika, mwana wake azalipeleke kuti awele pano pachalo nopeleka moyo wake monga dipo. (Agal. 4:4; Ahe. 10:7-10) Yesu penze pano pa chalo, Yehova emupasa mphamvu kuti akokwanisha kukhululukila machimo olo kuti dipo yenze ikaliye pelekewa. Yesu echita vamene ivo chifukwa enzeziŵa kuti dipo yakuti azapeleke izaziŵilije machimo aŵanthu achikhulupililo.—Mat. 9:2-6.