NKHANI YOPHUNZILA N.° 26
NYIMBO N.° 123 Tikogonjela Mulungu mokhulupilika
Mukowonesha kuti nimwe olichefya keno muziŵalini vinthu viyakine
“Wamphamvu zonse tingakwanishelini kumumvwisha.”—YOBU 37:23.
CHOLINGA CHA NKHANI INO
Tingakwashe kupilila mavuto keno tuvomekeja molichefa kuti tuziŵalini vinthu viyakine, noika maganizo ŵasu pa vinthu vatuziŵa komasoti kudalila Yehova.
1. Kansi Yehova etipasa luso yotyani, ndipo ndaŵa yanji?
YEHOVA etipanga na luso yoganiza, yophunzila vinthu vanyowani, komasoti nzelu. Kansi ndaŵa yanji etipanga mwanjila yamene iyi? Chifukwa chakuti ofuna kuti sewo ‘timuziŵe chendi’ komasoti ofuna kuti tikomutumikila pokatishila ntchito luso yasu yoganiza.—Miy. 2:1-5; Alo. 12:1.
2. (a) Kansi ni vinthu votyani vamene tingavikwanishelini kuchita? (Yobu 37:23, 24) (Onanisoti chithunzi.) (b) Kansi tufwana mapindu otyani tikavomekeja kuti tuziŵalini vinthu viyakine?
2 Olo kuti sewo tili na luso yophunzila vinthu, luso yamene iyi ili na malile ŵake. (Ŵelengani Yobu 37:23, 24.) Ganizilani chisanzo cha Yobu. Yehova ekonsha Yobu makonsho anyinji amene emuyavya kuziŵa kuti pali vinthu viyakine vinyinji vamene okwanishalini kuviziŵa. Makonsho amene awo, emuyavya Yobu kuti ankhale wolichefya komasoti kuti achinje kaganizidwe kake. (Yobu 42:3-6) Nasesoti tupindula keno nise olichefya novomekeja kuti pali vinthu vatisaziŵa. Kulichefya kwa ntundu wamene uyu kutiyavya kukhulupilila kuti Yehova azatiyavye kuziŵa vinthu ngavo-ngavo vatufunikila kuziŵa kuti tikwanishe kupanga vosankha viweme.—Miy. 2:6.
Kuvomekeja kuti pali vinthu viyakine vasaziŵa kwemuyayva Yobu, ndipo nasesoti kungatiyavye (Onani ndime 2.)
3. Kansi tikambilane chinji munkhani ino?
3 Munkhani ino, tikambilane vinthu viyakine vatisaziŵa komasoti mavuto ŵatingakumane nawo monga vokonkhapo vake. Tikambilanesoti chifukwa chake tupindula tikaziŵa kuti pali vinthu viyakine vatisaziŵa. Kuziŵa vinthu vamene ivi kungatiyavye kuti osati tikokaikila kuti Yehova “Mulungu wamene oziŵa chilichonse,” akotiuja vinthu vatufunikila kuziŵa pakafunikila.—Yobu 37:16.
TUZIŴALINI KUTI MAPETO AZAFWIKE NTHAWE YANJI
4. Mokatijana na lemba ya Mateyo 24:36, kansi ni mfundo yotyani yatisaziŵa?
4 Ŵelengani Mateyo 24:36. Sewo tuziŵalini kuti mapeto a ichi chalo chiipa afwike nthawe yanji. Olo Yesu penze pano pa chalo, enzeiziŵalini “nsiku yamene iyo na nthawe yake.”a Pavuli pake, yove efotokozela atumwi ŵake kuti Yehova wamene ni Munecho wanthawe niye oika nthawe ya vochitika vosiyana-siyana ‘mu ulamulilo wake’. (Ntchi. 1:6, 7) Yehova ekonzelatu nthawe yachikuti chizasile ichi chalo chiipa, koma sewo tiliye udindo woziŵa nthawe ngayo-ngayo yakuti azafwike mapeto a ichi chalo.
5. Kansi ni mavuto otyani ŵatingakumane nayo chifukwa chakuti tuziŵalini nthawe ya mapeto?
5 Mokatijana na mwechilaŵilila Yesu, sewo tuziŵalini kuti tiyembekezele kwa nthawe itali tyani kuti mapeto afwike. Chifukwa cha vamene ivi, tingafoke olo kutaya ntima ngako-ngako keno tankhala tuyembekezela kwa nthawe itali kuti nsiku ya Yehova ifwike. Payakine tingakhumudwe keno enekwasu olo ŵanthu ayakine otinyoza chifukwa chakuti mapeto akaliye fwika. (2 Pet. 3:3, 4) Nthawe ziyakine tingaganize kuti, kuti tenzeziŵa nthawe ngayo-ngayo yakuti azafwike mapeto sembe tuŵayembekezela moleza ntima nopilila mosavuta keno tunyozewa.
6. Kansi tupindula tyani chifukwa chakuti tuziŵalini nthawe ya mapeto?
6 Kulaŵila chendi, chifukwa chakuti Yehova otiululilalini nthawe ngayo-ngayo yakuti azafwike mapeto, vutipasa mwayi wowonesha kuti tumutumikila chifukwa chakuti tumukonda komasoti kumudalila. Chatufuna sewo nikutumikila Yehova mpaka kale-kale, osati mpaka nthawe ya mapeto. Mmalo moganizila ngako kuti “nsiku ya Yehova” izafwike nthawe yanji, tikoganizila vinthu viweme vatuyembekezela. Vamene ivi vingatiyavye kuti tipitilije kutumikila Mulungu molipeleka, komasoti kuchita vonse vatingakwanishe kuti tikomukondwelesha.—2 Pet. 3:11, 12.
7. Kansi ni vinthu votyani vatuziŵa?
7 Tingachite luweme kuganizila ngako mfundo yatuziŵa yakuti masiku osilija eyamba mu 1914. Yehova eika maulosi ayakine mu Baibolo amene okhuza chaka chamene ichi, ndipo efotokoza momvwika luweme vinthu vosiyana-siyana vamene vankhala vuchitika kufumila mu chaka chamene ichi. Chifukwa cha vamene ivi, sewo tukaikilalini kuti “nsiku ikulu ya Yehova ili pafupi.” (Zef. 1:14) Tuziŵasoti kuti ni ntchito yotyani ikulu yakufuna Yehova kuti tiikate. Yove ofuna kuti tilalikile “uthenga uweme wa Ufumu” kuli ŵanthu anyinji mwatingakwanishile. (Mat. 24:14) Uthenga wamene uyu, ulalikiliwa mu vyalo pafupi-fupi 240 mu vilaŵilo vopitilila 1.000. Tufunikilalini kuziŵa “nsiku olo nthawe” yakuti azafwike mapeto kuti tikokata ntchito yofunika yamene iyi mwakhama.
TUZIŴALINI VINTHU VAKUTI AZACHITE YEHOVA
8. Kansi mawu a kuti “ntchito ya Mulungu wachendi” onena za chinji? (Mlaliki 11:5)
8 Ni nthawe zonselini patingaziŵe “ntchito za Mulungu wachendi.” (Ŵelengani Mlaliki 11:5.) Mawu amene aŵa otanthauza vinthu vakuchita Yehova olo vakulola kuti vichitike pofuna kuti vinthu vakufuna yove vichitike. Sewo tingaziŵelini luweme kuti ndaŵa yanji Yehova walola kuti vinthu viyakine vichitike komasoti mwangavichitile pofuna kutiyavya. (Sal. 37:5) Vamene ivi ni vosamvwishishika kuli sewo molingana na mwatisaziŵila mwakukulila mwana mmala mwa amayi ŵake. Nawosoti asayansi omvwishalini luweme mwavuchitikila vamene ivi.
9. Kansi ni maganizo otyani ŵatingankhale nawo chifukwa chakuti tuziŵalini vinthu vakuti azachite Yehova?
9 Keno tuziŵalini luweme vinthu ngavo-ngavo vakuti azachite Yehova kuti atiyavye, tingayambe kuwaya-waya tikafuna kupanga vosankha pankhani zosiyana-siyana. Tingawaye-waye kulolela kulitana vinthu viyakine kuti tikochita vinyinji potumikila Yehova, monga kunkhala moyo wosafuna vinthu vinyinji olo kufulukila kudela kwamene kufunikila ofalisa anyinji. Tingayambesoti kuganiza kuti Yehova okondwelalini nase tikakangiwa kukwanilisha volinga vasu vauzimu, keno vinthu vutiyendelalini monga ni mwatufunila muutumiki wakumunda, olo keno tukumana na mavuto ayakine potumikila Yehova.
10. Kansi ni minkhalidwe yotyani iweme yatufunikila kukulisha chifukwa chakuti tuziŵalini luweme vinthu vakuti azachite Yehova?
10 Kusaziŵa mwakuti azachitile Yehova vinthu, kutiyavya kunkhala na minkhalidwe yofunika ngako, monga kulichefya. Nkhalidwe yamene iyi yutiyavya kuziŵa kuti maganizo komasoti njila za Yehova nizapalulu ngako kupambana zasu. (Yes. 55:8, 9) Tuphunzilasoti kudalila ngako Yehova kuti vinthu vikotiyendela luweme. Vinthu vikatiyendela luweme muutumiki wakumunda olo pantchito ziyakine mugulu yasu, tupeleka ulemelelo woyenelela kwa Yehova. (Sal. 127:1; 1 Ako. 3:7) Keno vinthu viliyechitike monga nimwetenzefunila, tufunikila kukumbukila kuti Yehova oziŵa vinthu vonse. (Yes. 26:12) Sewo tuchita mbali yasu, ndipo tukaikilalini kuti Yehova akotiyavya. Sewo tukaikilalini kuti Mulungu azatisogolele luweme ngako, olo kuti angachitelini vamene ivo mu njila yodabwisa monga nimwenzechitila nthawe ziyakine kuvuli.—Ntchi. 16:6-10.
11. Kansi ni vinthu votyani vofunika ngako vatuziŵa sewo?
11 Tikokumbukila kuti Yehova ochita vinthu mwachikondi nthawe zonse, mwachilungamo komasoti mwanzelu. Tuziŵasoti kuti yove otembeja ngako vinthu vatumuchitila komasoti vatuchitila Akhilisitu ayasu. Komasoti tuziŵa kuti Yehova nthawe zonse odalisa ŵanthu amene ni okhulupilika kuli yove.—Ahe. 11:6.
TUZIŴALINI VIKUTI VIZACHITIKE MAILO
12. Mokatijana na lemba ya Yakobo 4:13, 14, kansi ni chinji chatisaziŵa?
12 Ŵelengani Yakobo 4:13, 14. Mfundo yakuti tuziŵalini mwaukuti uzankhalile moyo wasu mailo ni mfundo ikulu ngako ya choonadi. Mmasiku ŵano osilijila “nthawe ya soka komasoti vinthu vosayembekezeleka” vingatichitikile tonse. (Mlal. 9:11) Chifukwa cha vamene ivi, tingakwanishelini kuziŵa keno vinthu vatufuna kuchita pamoyo wasu vizatiyendele luweme. Tingaziŵelinisoti keno tingapitilije kunkhala na moyo novikwanilisha paliye vuto iliyonse.
13. Kansi kusaziŵa vinthu viyakine vikuti vizachitike kusogolo kungatikhuze tyani nthawe ziyakine?
13 Tingavutike kupilila mavuto chifukwa chakuti tuziŵalini luweme vinthu vikuti vizachitike kusogolo. Ndaŵa yanjii? Chifukwa chakuti tingayambe kuyopa vinthu vamene vingachitike, ndipo vamene ivi vingatikangishe kuti tikosangalala. Ngozi zamwazizizi komasoti mavuto osayembekezeleka, angatikhumudwise ndipo tingankhale na chisoni chikulu ngako. Komasoti vinthu vetenzeyembekezela vikakanga, tingafoke ndipo tingakhumudwe ngako.—Miy. 13:12.
14. Kansi chisangalalo ngacho-chacho chudalila chinji? (Onanisoti chithunzi.)
14 Keno tupilila mavuto tuwonesha kuti niselini ŵanthu adyela, koma tutumikila Atata ŵasu akulu chifukwa chakuti tuŵakonda. Nkhani zamu Baibolo zuwonesha kuti Yehova angalole kuti sewo tikumane na mavuto ayakine, ndipo vinthu vosiyana-siyana vatukumana navo niyovelini esankha kuti vikotichitikila. Yove oziŵa kuti chisangalalo chasu chudalilalini vinthu vatuziŵa olo vatisaziŵa vokhuza kusogolo. Mmalo mwake, tunkhala osangalala chifukwa chakuti tulola kuti yove akotisogolela komasoti kumumvwila. (Yer. 10:23) Keno tudalila Yehova tikafuna kupanga vosankha, tunkhala monga tunena kuti, “Yehova akalola tinkhale na moyo ndipo tichite vakuti-vakuti.”—Yako. 4:15.
Kulola kuti Yehova akotisogolela komasoti kumumvwila kutiyavya kuti tinkhale otetezeka (Onani ndime 14-15.)b
15. Kansi ni vinthu votyani vatuziŵa sewo vikuti vizachitike kusogolo?
15 Olo kuti tuziŵalini vinthu vingachitike mailo, sewo tuziŵa kuti Yehova watilonjeza moyo wosasila—viliye kanthu keno tikuya kululu olo tizankhale pano pachalo. Tuziŵa kuti yove angatalelini wenye ndipo paliye chingamukangishe kukwanilisha malonjezo ŵake onse. (Tito 1:2) Yove yeka niye angakwanishe ‘kulaŵililatu vinthu vikuti vizachitike, ndipo kale-kale ngako elaŵililatu vinthu vamene vizachitike kusogolo.’ Vinthu vonse vechilonjeza Mulungu mu nthawe za mu Baibolo vikwanilishiwa, ndipo niyesoti vatuyembekezela kusogolo. (Yes. 46:10) Tuziŵa mofumila pansi pantima kuti Yehova angalekelini kutikonda. (Alo. 8:35-39) Yove angatipase nzelu, angatitonthoje komasoti angatipase mphamvu zatufunikila kuti tikwanishe kupilila mavuto aliwonse ŵatingakumane nawo. Tinganene mosimikijila kuti Yehova azatiyavye notipasa madaliso.—Yer. 17:7, 8.
TINGAKWANISHELINI KUMVWISHA MWAKUTIZIŴILA LUWEME YEHOVA
16. Mokatijana na Salimo 139:1-6, kansi ni vinthu votyani vakuziŵa Yehova vokhuza sewo, ndipo mukumvwa tyani mukaganizila vamene ivi?
16 Ŵelengani Salimo 139:1-6. Nyamalenga wasu oziŵa luweme mwechitilengela komasoti mwechiumbila muŵili wasu, mwatumvwila komasoti mwatuganizila. Yove ochita nase chidwi nthawe zonse. Yove oziŵa vinthu vatulaŵila na vatutanthauza, vatuchita komasoti cholinga chasu pochita vinthu vamene ivo. Monga ni mweinenela Mfumu Davite, Yehova otiteteza mbali zonse kulikonse kwatingankhale. Nivochitisha chidwi ngako kuti Nyamalenga wasu wamene ni Munecho wa chilengedwe chonse elenga kululu komasoti chalo otiganizila mwanjila yamene iyi! Davite enena kuti: “Kuli newo ni vovuta ngako kuti nivimvwishe vinthu vamene ivi. Vinthu vamene ivi nivodabwisa ngako kuli newo.”—Sal. 139:6, na mawu amnyansi.
17. Ndaŵa yanji vingativute kuvomekeja kuti Yehova otiziŵa luweme?
17 Nthawe ziyakine vingativute kuwona kuti Yehova ni Atata ŵasu achikondi amene otikonda chifukwa cha chinkhalidwe cha makolo ŵasu, olo vinthu vetenze khulupilila tikaliye phunzila choonadi. Olo tingayambe kuganiza kuti techita vinthu viipa ngako kuvuli ndipo Yehova okondwelalini nase komasoti ali nase kutali. Nayesoti Davite enzelimvwa tetyo nthawe ziyakine. (Sal. 38:18, 21) Nthawe ziyakine munthu wamene oyeja-yeja mwakhama kuti achinje moyo wake kuti akokonkheja mfundo zolungama za Mulungu, angalikonshe kuti ‘Keno Mulungu oniziŵa luweme, ndaŵa yanji ofuna kuti nileke minkhalidwe yamene newo nuiwona kuti iliye vuto?’
18. Kansi kuziŵa kuti Yehova otiziŵa luweme kupambana mwatuliziŵila seka kutipindulisha tyani? (Onanisoti vithunzi.)
18 Tingakwanishe kumvwisha kuti Yehova otiziŵa luweme ngako kupambana mwatuliziŵila seka komasoti kuti owona minkhalidwe yasu iweme yamene sewo tuiziŵalini. Koma olo kuti Mulungu okwanisha kuwona vinthu vatisachita luweme komasoti vinthu vutichitisha kuti tikophoniyesha vinthu vamene ivo, yove otikonda ngako. (Alo. 7:15) Kuziŵa kuti Yehova oziŵa kuti sewo tingakwanishe kuchinja, kutiyavya kuti tikomutumikila mokhulupilika komasoti mosangalala.
Yehova otiyavya kulimbana na mavuto ŵatukumana nawo muli ichi chalo chiipa potisimikijila kuti kukuza chalo chanyowani ndipo tizasangalale ngako (Onani ndime 18-19.)c
19. Kansi ni vinthu votyani ngavo-ngavo vokhuza Yehova vatuziŵa sewo?
19 Tuziŵa kuti Yehova niye chikondi, ndipo tukayikilalini vamene ivi. (1 Yoh. 4:8) Tuziŵa kuti mfundo zake zolungama zuwonesha kuti otikonda komasoti kuti nthawe zonse otisakilila viweme. Tuziŵasoti kuti Yehova ofuna kuti tizafwane moyo wosasila. Yove epeleka dipo kuti vamene ivi vikwanishike. (Alo. 7:24, 25) Tuziŵasoti kuti “Mulungu ni Nkulu kupambana mitima yasu ndipo oziŵa vonse.” (1 Yoh. 3:19, 20) Yehova owona chinthu chilichonse chatuchita, ndipo okaikilalini kuti tingakwanishe kuchita vinthu vakufuna yove.
20. Kansi ni chinji chingatiyavye kuti osati tikodela nkhaŵa ngako na vinthu vatisaziŵa?
20 Yehova otifisilalini chilichonse chatufunikila kuziŵa. Tikankhala olichefya novomekeja mfundo yamene iyi, tupewa nkhaŵa zosafunikila pankhani ya vinthu vamene vutikhuzalini, ndipo mmalomwake tuika maganizo ŵasu pa vinthu vofunikila chendi. Keno tuchita vamene ivi tuwonesha kuti tumudalila ngako Yehova, ‘wamene oziŵa vinthu vonse.’ (Yobu 36:4) Olo kuti palipano tiliye mwayi woziŵa vinthu vinyinji, tuyembekezela mwachidwi nthawe yamene ikuza kusogolo, ndipo tizaziŵe vinthu vinyinji vanyowani vokhuza Mulungu wasu Nkulu.—Mlal. 3:11.
NYIMBO N.° 104 Mphaso ya Mulungu ya mzimu utuŵa
a Yesu niye akuti azasogolele pa nkhondo yowononga ichi chalo chiipa cha Satana. Tetyo, tinganene mosakaikila kuti yove oziŵa lomba nsiku ya Alumagedo komasoti nthawe yakuti ‘azapambane’ pankhondo yamene iyo.—Chiv. 6:2; 19:11-16.
b MAWU OFOTOKOZA CHITHUNZI: Tata pamozi na mwana wake oika vinthu vofunikila mu chola pokonzekela ngozi za mwazizizi.
c MAWU OFOTOKOZA CHITHUNZI: Nkwasu wamene okumana na mavuto oganizila chisangalalo chakuti azafwane mu chalo chanyowani.