Kansi ni vinthu votyani vatuziŵa ponena za vakuti azachite Yehova pousha ŵanthu?

1. Ndaŵa yanji tinganene kuti tunkhala m’masiku apadela ngako?

MASIKU ŵano ni nthawe yapadela ngako! Nsiku iliyonse, sewo tuwona maulosi am’Baibolo okwanilishiwa kupambana kale yonse. Mwachisanzo, tuwona “mfumu ya kumwela” payuchita mpikishano na “mfumu ya kumpoto” polimbilana ulamulilo. (Dan. 11:40, mawu amnyansi.) Sewo tuwona uthenga unena za Ufumu wa Mulungu ulalikiliwa pachalo chonse ndipo ŵanthu mamiliyoni anyinji ayamba kutumikila Yehova. (Yes. 60:22; Mat. 24:14) Komasoti tulondela vakulya vinyinji vauzimu “panthawe iweme.”—Mat. 24:45-47.

2. Kansi tingankhale osimikijila za chinji, koma tufunika kuziŵa chinji?

² Yehova wankhala opitilija kutiyavya kuti timvwishe vochitika vosiyana-siyana vamene vikuti vichitike kusogolo kwalombapano. (Miy. 4:18; Dan. 2:28) Sewo tingankhale na chidalilo kuti chisauso chikulu chikezeyamba, Mulungu azatiyavye kuziŵa vinthu vatingachite kuti tizapitilije kunkhala okhulupilika nopitilija kunkhala okatijana panthawe yamene iyo yovuta ngako. Koma olo n’tetyo, tufunika kukumbukila kuti pali vinthu viyakine vakusogolo vamene sewo tuviziŵalini. Mu nkhani ino, tiyambe na kukambilana chifukwa chachitisha kuti tichinje vinthu viyakine vetenzekhulupilila vokhuza kusogolo. Pavuli pake, tikambilane vinthu viyakine vakusogolo vatuziŵa sewo, komasoti vakuti azachite Atata ŵasu akululu.

VINTHU VATISAZIŴA SEWO

3. Kansi masiku akuvuli tenzekhulupilila chinji ponena za nthawe yamene ŵanthu azankhalelini soti na mwayi woyamba kukhulupilila Yehova, ndipo ndaŵa yanji tenzeganiza tetyo?

³ Masiku akuvuli, sewo tenzekhulupilila kuti chisauso chikulu chikezeyamba, paliye munthu aliyense wamene akuti azankhale na mwayi woyamba kukhulupilila Yehova nopulumuka pa Aramagedo. Sewo tenzenena tetyo chifukwa tenzeganiza kuti nkhani ya Chigumula, yuphiphilisila vinthu vamene vikuti vizachitike kusogolo. Mwachisanzo, tenzeganiza kuti molingana na mwechichitila Yehova kuvala chiseko cha chingalawa Chigumula chikaliyeyamba, yove ‘azavale chiseko’ na cholinga chakuti munthu aliyense muipa osati azapulumuke.—Mat. 24:37-39.

4. Kansi pali pano nkhani ya Chigumula tuiwona monga ni nkhani yophiphilisila vinthu vakusogolo? Fotokozani.

⁴ Koma kansi n’chendi kuti chinthu chilichonse chamene chechitika pa Chigumula chenzepanamila vinthu vakusogolo? Yankho niyakuti yayi. Ndaŵa yanji? Chifukwa chakuti paliye umboni uliwonse wa m’Malemba wamene uwonesha kuti niye mwavikuti vizankhalile kusogolo.a Yesu eyelekezela “masiku a Nowa” na nthawe yakunkhalapo kwake, koma aliyenene kuti Chigumula chuphiphilisila vinthu vakusogolo, ndipo aliyenene kuti ŵanthu komasoti vinthu vamene vechitika pa nthawe ya Chigumula vuphiphilisila vinthu vakusogolo; olo kuti Mulungu pechivala chiseko chachingalawa enzephiphilisila vinthu vakuti azachite kusogolo. Koma olo n’tetyo, vamene ivi vutanthauzalini kuti paliye chilichonse chatingaphunzilepo pankhani ya Nowa komasoti Chigumula.

5. (a) Kansi Nowa enzechita chinji Chigumula chikaliyeyamba? (Aheberi 11:7; 1 Petulo 3:20) (b) Ponena za ntchito yolalikila, kansi mwavilili vinthu masiku ŵano vulingana tyani na mwevenzele m’masiku a Nowa?

⁵ Nowa pechimvwa uthenga wa Yehova wonena za Chigumula, yove ewonesha kuti ali na chikhulupililo pechimanga chingalawa. (Ŵelengani Aheberi 11:7; 1 Petulo 3:20.) Molingana na vamene ivi, ŵanthu amene akumvwa uthenga wokhuza Ufumu wa Mulungu ofunika kukatishila ntchito vinthu vakuphunzila. (Mach. 3:17-20) Petulo enena kuti Nowa “enzelalikila za chilungamo cha Mulungu.” (2 Pet. 2:5) Koma olo n’tetyo, molingana na mweinenela nkhani yapita, sewo tuziŵalini keno Nowa elinganija ntchito yapadela yolalikila kuti akwanishe kulalikila munthu aliyense Chigumula chikaliyechitika. Masiku ŵano, sewo tukata ntchito yolalikila pachalo chonse, ndipo tuyeja-yeja kulalikila mwakhama. Koma olo kuti tilipeleke mwantundu wanji pantchito yamene iyi, tingakwanishelini kulalikila ŵanthu onse mapeto akaliyefwika. Ndaŵa yanji tunena tetyo?

6–7. Ndaŵa yanji tinganene kuti tingakwanishelini kulalikila ŵanthu onse mapeto akaliyefwika? Fotokozani.

⁶ Ganizilani vechilaŵila Yesu ponena za ntchito yasu yolalikila. Yove elosela kuti uthenga uweme “uzalalikiliwe pachalo chonse kwamene kuli ŵanthu kuti unkhale umboni kuli mitundu yonse ya ŵanthu.” (Mat. 24:14) Ulosi wamene uyu ukwanilishiwa ngako masiku ŵano kupambana kale yonse. Uthenga wa Ufumu ufalisiwa m’vilaŵilo vopitilila 1.000, ufalisiwasoti kupitila pa saiti ya jw.org, ndipo ŵanthu anyinji pachalo chonse angakwanishe kuufwana.

⁷ Koma olo n’tetyo, Yesu eujasoti ophunzila ŵake kuti ‘azakwanishelini kuzenguluka matauni onse’, kapena kuti kulalikila ŵanthu onse yove akaliyewela. (Mat. 10:23; 25:31-33) Mawu a Yesu amene aŵa azakwanilishiwe soti masiku ŵano. Ŵanthu mamiliyoni anyinji masiku ŵano onkhala m’madela mwamene sewo tingakwanishelini kulalikila luweme. Kuyangijila pamene apo, ŵana mahandiledi anyinji ovyalika paminisi iliyonse. Tetyo, sewo tingakwanishelini kulalikila ŵanthu onse mapeto akaliyefwika olo kuti tuchita vonse vatingakwanishe kuti polalikila ŵanthu ‘afuko iliyonse, chilaŵilo chilichonse, komasoti antundu uliwonse.’ (Chiv. 14:6)

8. Kansi tingalikonshe konsho yotyani ponena za vakuti azachite Yehova poweluza ŵanthu kusogolo? (Onanisoti chithunzi.)

⁸ Poganizila vinthu vamene ivi vatakambilana, tingalikonshe kuti: Kansi n’chinji chamene chikuti chazachitikile ŵanthu amene enzeve mwayi wakumvwa uthenga uweme nochinja moyo wawo chisauso chikulu chikaliyeyamba? Kansi Yehova pamozi na Mwana wake wamene walondela udindo woweluza, azachite nawo tyani ŵanthu amene aŵa? (Yoh. 5:19, 22, 27; Mach. 17:31) Lemba pafumila mutu wa nkhani ino, yanena kuti Yehova “ofunalini kuti munthu aliyense azawonongewe.” Mmalo mwake, yove ofuna kuti “ŵanthu onse alape.” (2 Pet. 3:9; 1 Tim. 2:4) Olo kuti sewo tuziŵa mfundo yamene iyi yokhuza Yehova, yove akaliyetiululila vakuti azachite na ŵanthu amene enzeve mwayi wakumvwa uthenga uweme. Ndipo kulaŵila chendi, Mulungu niwosakakamijika kutiuja vinthu vonse vakuchita palipano olo vakuti azachite kusogolo.

9. Kansi Yehova watiululila chinji kupitila m’Baibolo?

⁹ Kupitila m’Mawu ŵake, Yehova watiululila vinthu viyakine vakuti azachite kusogolo. Mwachisanzo, Baibolo yutiuja kuti Yehova azapelekesoti moyo kuli “ŵanthu osalungama” amene enzeve mwayi wakumvwa uthenga uweme noleka kuchita vinthu viipa. (Mach. 24:15; Luk. 23:42, 43) Vamene ivi vuleta makonsho ayakine ofunika ngako.

10. Kansi ni makonsho ayakine otyani ŵatingankhale nawo?

¹⁰ Kansi ŵanthu onse amene akuti azafwe pachisauso chikulu Mulungu azaŵaushelini? Malemba owonesha luweme kuti ŵanthu oshusha amene Yehova pamozi na gulu yake yankhondo ŵakuti azawononge pa Aramagedo azaukelini. (2 Ates. 1:6-10) Lomba tyani ponena za ŵanthu ayakine, mwachisanzo, amene echifwa pamasoka am’chelengedwe, pangozi, olo amene epaiwa na ŵanthu ayawo? (Mlal. 9:11; Zek. 14:13) Kansi ayakine mwa ove ali m’gulu ya “ŵanthu osalungama” amene Mulungu azaŵaushe mu chalo chanyowani? Yankho yachidule niyakuti tuziŵalini.

VINTHU VATUZIŴA SEWO

11. Kansi Mulungu azakatishile ntchito maziko otyani poweluza ŵanthu pa Aramagedo?

¹¹ Pali vinthu vinyinji vakusogolo vamene vatuziŵa sewo. Mwachisanzo, sewo tuziŵa kuti panthawe ya Aramagedo ŵanthu azapasiwe chiweluza mokatijana na mwakuchitila vinthu na akwake a Khilisitu. (Mat. 25:40) Ŵanthu amene oyavya ozozewa pamozi na Khilisitu azaweluziwe kuti ni mbelele. Tuziŵasoti kuti ayakine mwa akwake a Khilisitu azankhale akalipano pachalo pavuli pachisauso chikulu, ndipo Mulungu azaŵatole kuluta nawo kululu nkhondo ya Aramagedo ikezesala patontho kuti iyambe. Vuwoneka kuti panthawe yamene iyo ŵanthu aweme mitima azankhale na mwayi woyavya akwake a Khilisitu mwanjila ziyakine komasoti pantchito zakuti akokata. (Mat. 25:31, 32; Chiv. 12:17) Ndaŵa yanji mfundo yamene iyi niyomvwika?

12–13. Kansi vuwoneka kuti ŵanthu ayakine azachite tyani pavuli pakuti awona kuwonongewa kwa “Babulo nkulu”? (Onanisoti chithunzi.)

¹² Olo pavuli pachisauso chikulu, vuwoneka kuti ŵanthu ayakine akezewona kuwonongewa kwa “Babulo nkulu” azakumbukile kuti Amboni za Yehova enze enenelatu za chochitika chamene icho kukali nthawe. Kansi ayakine mwa ŵanthu amene akuti azawone kuwonongewa kwa “Babulo nkulu” pachisauso chikulu azayambe kukhulupilila Yehova?—Chiv. 17:5; Eze. 33:33.

¹³ Vinthu vamene vikuti vizachitike pachisauso chikulu vizankhale volingana na vechitika ku Iguputo m’masiku a Mose. Kumbukilani kuti “gulu ya ŵanthu amitundu yosiyana-siyana”, inkhala kumbali ya Aisiraeli panthawe yenzefuma mu Iguputo. Vuwoneka kuti ayakine mwa ŵanthu amene awo eyamba kukhulupilila ngako Mulungu pechiwona kukwanilishiwa kwa uthenga wa Mose wokhuza Milili 10. (Eks. 12:38) Kansi vamene ivi vikezechitika pavuli pakuti Babulo nkulu wawonongewa tizaganize kuti Mulungu aliyechite chilungamo poŵalola ŵanthu kuti ankhale kumbali yasu kumapeto ngako-ngako kwa chino chalo chiipa? Kutali-tali! Sewo tufuna kukonkheja minkhalidwe ya Atata ŵasu akululu amene ni “Mulungu wachifundo na muweme ntima, asakalipa kamangu komasoti wachikondi chokhulupilika chikulu na chonadi.”b—Eks. 34:6.

14–15. Kansi mwayi wolondela moyo wosasila udalila nthawe yangamwalile munthu olo malo ŵakuti azankhale panthawe yamene iyo? Fotokozani. (Salimo 33:4, 5)

¹⁴ Nthawe ziyakine, enekwasu na akalongosi podela nkhaŵa ŵanthu am’banja mwawo anganene kuti: “Vingankhale luweme ngako kuti amwalile chisauso chikulu chikaliyeyamba chifukwa angankhale na chiyembekezo kuti Mulungu azaŵaushe.” Kulaŵila chendi, pali vifukwa viweme vamene vingachitishe munthu kuti anene tetyo. Koma kuti Mulungu azapeleke moyo kuli munthu, vizadalilelini nthawe yechimwalila munthu wamene uyo. Yehova ni woweluza muweme ngako. Vinthu vakuchita, nthawe zonse vunkhala viweme komasoti vachilungamo. (Ŵelengani Salimo 33:4, 5.) Sewo tingankale na chidalilo kuti “Woweluza wa chalo chonse” azachite chilungamo.—Gen. 18:25.

¹⁵ Kuyangijila pamene apo, tili na vifukwa viweme vonenela kuti mwayi wolondela moyo wosasila uzadalilelini malo ŵakuti azankhale munthu pa nthawe yamene iyo. Yehova azaweluzelini mamiliyoni ya ŵanthu kuti ni “mbuzi” pachifukwa tyala chakuti ove enzenkhala m’madela mwamene enzeve mwayi wakumvwa uthenga wa Ufumu. (Mat. 25:46) Woweluza wachalo chonse oganizila ngako aliyense mwa ŵanthu amene aŵa kupambana mwatuchitila sewo. Sewo tuziŵalini vakuti azachite Yehova panthawe yachisauso chikulu. Vingachitike kuti ayakine mwa ŵanthu amene aŵa, Yehova azaŵapase mwayi kuti ayambe kumukhulupilila nonkhala kumbali yake panthawe yakuti azatuŵishe zina yake pakati pa ŵanthu amitundu yonse.—Eze. 38:16.

16. Kansi ni vinthu votyani vataziŵa ponena za Yehova? (Onanisoti chithunzi.)

¹⁶ Sewo tuziŵa kuti moyo wa ŵanthu ni wofunika ngako kwa Yehova chifukwa cha vinthu vatuphunzila m’Baibolo. Mulungu epeleka Mwana wake pofuna kuyavya ŵanthu kuti azankhale na moyo kosasila. (Yoh. 3:16) Sewo tonse tukwanisha kuwona kuti Mulungu otikonda ngako. (Yes. 49:15) Mulungu oziŵa zina ya aliyense wasewo payeka-payeka. Mulungu otiziŵa luweme ngako mwakuti olo timwalile yove angatiushe chifukwa oziŵa chilichonse chokhuza sewo, komasoti vinthu vatukumbukila vamene niye vupanga umunthu wasu! (Mat. 10:29-31) Kulaŵila chendi, sewo tili na vifukwa vokwanila vokhulupilila Atata ŵasu akululu amene otikonda, chifukwa chakuti yove ni Mulungu wanzelu, wachilungamo, komasoti wachifundo chikulu.—Yako. 2:13.

17. Kansi tizakambilane chinji munkhani yokonkhapo?

¹⁷ Chifukwa cha kuchinja kwa vinthu vetenzekhulupilila, palipano tuziŵa kuti ntchito yasu yolalikila tufunika kuikata mokulumija ngako kupambana kale yonse. Ndaŵa yanji tinganene tetyo? Ndipo pali vifukwa votyani vamene vutichitisha kupitilija kulalikila uthenga uweme mwakhama? Munkhani ikuza tizakambilane momvwika luweme mayankho amakonsho onse amene aŵa.