Kuyangijila luso ya mapemphelo ŵasu kuti ankhale aweme

1. Kansi Yehova ouja atumiki ŵake kuti akochita chinji? (Onanisoti chithunzi.)

KANSI tingalute kwa ŵani tikafuna chitonthojo komasoti malangizo? Sewo tuziŵa yankho ya konsho yamene iyi. Tingavwendele kwa Yehova m’pemphelo. Yehova otiuja kuti tikochita vamene ivi. Komasoti Baibolo yutiuja kuti ‘tikopemphela mosalekeja,’ tetyo sewo tuziŵa kuti yove ofuna kuti tikopemphela kanyinji-kanyinji. (1 Ates. 5:17) Tingalaŵile naye momasuka m’pemphelo nosenga malangizo kuli yove pa mbali iliyonse ya moyo wasu. (Miy. 3:5, 6) Pakuti yove ni Mulungu wopasa, Yehova otiikilalini malile a kupaka kwa maulwendo ŵatingapemphele kuli yove.

2. Kansi tikambilane chinji mu nkhani ino?

² Tutembeja ngako chifukwa chotilola kuti tikopemphela kuli yove. Koma olo n’tetyo, chifukwa chakupaka kwa vinthu vatuchita tingovutika kufwana nthawe yopemphela. Nthawe ziyakine tingawone kuti tufunika kuyangijila luso ya mapemphelo ŵasu kuti ankhale aweme. Chosangalasa n’chakuti tingafwane mphamvu komasoti malangizo m’Malemba. Mu nkhani ino, tikambilane mwatingapatulile nthawe yopemphela mwa kukonkheja chisanzo cha Yesu. Tikambilane soti vatingachite kuti mapemphelo ŵasu akonkhala aweme popamikijamo mfundo ziyakine zofunika zokwanila 5.

YESU ENZEPATULA NTHAWE YOPEMPHELA

3. Kansi Yesu enzeziŵa chinji pa nkhani ya pemphelo?

³ Yesu enzeziŵa kuti mapemphelo ŵasu ni ofunika ngako kwa Yehova. Kale-kale ngako akaliyewela pano pachalo, yove ewona Atata ŵake oyankha mapemphelo ŵa analume na anakazi okhulupilika. Mwachisanzo, Yesu enze pambali pa Atata ŵake, Yehova penzeyankha mapemphelo ofumila pansi pantima a Hana, Davide komasoti Eliya, kungotomolako mazina atontho tyala. (1 Sam. 1:10, 11, 20; 1 Maf. 19:4–6; Sal. 32:5) N’vosadabwisa kuti Yesu ephunzisa ophunzila ŵake kuti akopemphela nthawe zonse komasoti mwachikhulupililo!—Mt. 7:7-11.

4. Kansi tuphunzilapo chinji pa mapemphelo a Yesu?

⁴ Kupitila m’mapemphelo ŵake kwa Yehova, Yesu epeleka chisanzo kuli ophunzila ŵake kuti akomukonkheja. Pa utumiki wake wonse, Yesu enzepemphela pafupi-pafupi. Yove enzefunika kupatula nthawe yopemphela chifukwa nthawe zinyinji enzenkhala bize komasoti pakati pa ŵanthu anyinji. (Mk. 6:31, 45, 46) Yove enzeuka mmawa ngako kuti afwane nthawe yopemphela payeka. (Mk. 1:35) Nthawe iyakine, yove epemphela usiku wonse akaliye panga chosankha chiyakine chofunika. (Lk. 6:12, 13) Komasoti Yesu epemphela moweleja-weleja usiku wakuti apaiwe mmawa mwake pa nthawe yenze eika maganizo ŵake onse pakukwanilishiwa kwa mbali yovuta ngako ya utumiki wake pano pachalo.—Mt. 26:39, 42, 44.

5. Kansi tingamukonkheje tyani Yesu keno tupemphela?

⁵ Chisanzo cha Yesu chutiphunzisa kuti mosasamala kanthu za bize yatunkhala nayo, tufunika kupatula nthawe yopemphela. Molingana na Yesu, tingafunike kupatula nthawe yopemphela mmawa ngako payakine usiku. Tikochita vamene ivi, tuwonesha Yehova kuti tutembeja mphaso yapadela yamene iyi ya pemphelo. Mulongo muyakine zina yake Lynne okumbukila mwechitembejela pechiphunzila pa ulwendo woyamba vokhuza mwayi wopemphela. Yove enena kuti: “Peniphunzila kuti ningakwanishe kulaŵila na Yehova nthawe iliyonse, veniyavya kuti nikomuwona monga ni shamwali wangu wapantima komasoti nifuna kuyangijila luso ya mapemphelo ŵangu kuti ankhale aweme.” Mosakaikila anyinji a sewo tikumvwa chimozimozi. Tetyo, tiyeni tikambilane mfundo 5 zatingapamikijemo m’mapemphelo ŵasu.

MFUNDO 5 ZOFUNIKA POPEMPHELA

6. Mokatijana na Chivumbulutso 4:10, 11, kansi Yehova owamila kulondela chinji?

⁶ Mukotamanda Yehova. M’mesomphenya ochitisha wowa, ntumwi Yohane ewona akulu 24 olambila Yehova kululu. Ove enzetamanda Mulungu novomekeja kuti yove ni wowamila kulondela “ulemelelo na ulemu.” (Ŵelengani Chivumbulutso 4:10, 11.) Angelo okhulupilika alisoti na vifukwa votamanda nolemekeza Yehova. Ove ali naye pamozi kululu ndipo omuziŵa luweme. Ove owona minkhalidwe yake kupitila mu vinthu vakuchita. Akomuwona okata ntchito, ove olimbikisiwa kuti akomutamanda.—Yobu 38:4–7.

7. Kansi tingamutamande Yehova pachifukwa chotyani?

⁷ Nase tufunikasoti kumutamanda Yehova m’mapemphelo ŵasu. Tingachite vamene ivi mwa kumuuja chifukwa chatumukondela komasoti chifukwa chatumulemekezela. Pamuŵelenga nophunzila Baibolo, yejani kuziŵa minkhalidwe ya Yehova yamene yukusangalasani. (Yobu 37:23; Aro. 11:33) Pavuli pake muujeni Yehova mwamumvwila chifukwa cha minkhalidwe yamene iyi. Tingatamande soti Yehova chifukwa otiyavya sewo komasoti chifukwa oyavya abale na alongo onse Achikhilisitu. Yove otisamalila notiteteza nthawe zonse.—1 Sam. 1:27; 2:1, 2.

8. Kansi viyakine mwa vifukwa vinyinji vatutembejela Yehova ni votyani? (1 Atesalonika 5:18)

⁸ Mukotembeja Yehova. Tili na vifukwa vinyinji votembejela Yehova m’pemphelo. (Ŵelengani 1 Atesalonika 5:18.) Tingamutembeje chifukwa cha vinthu vonse viweme vatili navo, chifukwa chakuti mphaso iliyonse iweme yufumila kuli yove. (Yak. 1:17) Mwachisanzo, payakine tingamutembeje chifukwa cha chalo chiweme komasoti vinthu vodabwisa vechilenga. Tingamutembeje soti chifukwa cha moyo wasu, banja yasu komasoti chiyembekezo chatili nacho. Ndipo tufunasoti kumutembeja Yehova chifukwa chotilola kuti tinkhale naye paushamwali uweme.

9. Ndaŵa yanji tingafunike kukulisha kutembeja kwasu pa vakutichitila Yehova?

⁹ Tingafunike kuyeja-yeja mwapadela kuganizila vifukwa vatili navo sewo paseka votembejela Yehova. Ŵanthu anyinji masiku ŵano ni osatembeja. Kanyinji-kanyinji ŵanthu ongoganizila tyala vangachite kuti afwane vinthu vakufuna m’malo moganizila vangachite kuti awoneshe kutembeja. Keno tingayambe kutolela maganizo amene aŵa, mapemphelo ŵasu angankhale tyala ndandanda ya vinthu vatufuna kusenga. Kuti vamene ivi osati vichitike, tufunika kupitilija kukulisha nowonesha kutembeja kwasu pa vonse vakutichitila Yehova.—Lk. 6:45.

10. Kansi kutembeja kwemuyavya tyani mulongo muyakine kuti akwanishe kupilila? (Onanisoti chithunzi.)

¹⁰ Ntima wotembeja ungatiyavye kupilila mavuto. Tiyeni tikambilane vichitikila Kyung-sook, vamene vupezeka mu nkhani yophunzila ya mu Nsanja ya Olonda ya 15 January, 2015. Yove emufwana na khansa yoyofya ngako. Yove enena kuti, “Matenda amene aŵa enikhuza ngako.” Yove eyangijila kunena kuti, “Nenzewona kuti nataya chilichonse, ndipo nenzechita wowa ngako.” Kansi n’chinji chemuyavya kupilila? Yove enena kuti usiku uliwonse akaliye yona, enzeluta palulu pang’anda yake nopemphela mofumya mawu potomola vinthu 5 vowonesha kutembeja pa nsiku yamene iyo. Vamene ivi venzemunkhazika ntima pansi ndipo venzemulimbikisa kuwonesha chikondi chake kwa Yehova. Yove ewona mwamene Yehova mwakusamalilila atumiki ŵake okhulupilika ndipo eziŵa kuti pali madaliso anyinji ŵatingafwane pamoyo wasu kupambana mayeselo. Molingana na Kyung-sook, tili na vifukwa vinyinji vatutembejela Yehova olo pa nthawe yatukumana na mayeselo. Kuwonesha kutembeja kwasu kuli yove m’pemphelo kungatiyavye kupitilija kunkhala osangalala.

11. Ndaŵa yanji ophunzila a Yesu enzefunika kutang’a ntima pavuli pakuti Yesu wajokela kululu?

¹¹ Mukosenga Yehova kuti akuyavyeni kunkhala otang’a ntima mu utumiki. Yesu pechisala patontho kujokela kululu, ekumbusha ophunzila ŵake za ntchito yechipasiwa yochitila umboni za yove “ku Yerusalemu, ku Yudeya konse na ku Samariya, mpaka kwachulekejela chalo.” (Mac. 1:8; Lk. 24:46-48) Papita tyala nthawe itontho, asogoleli Achiyuda ekata ntumwi Petulo na Yohane noluta nawo ku khoti ikulu ya Ayuda, nolamula moyofya analume okhulupilika amene aŵa kuti aleke kulalikila. (Mac. 4:18, 21) Kansi Petulo na Yohane echita tyani?

12. Mokatijana na Machitidwe 4:29, 31, kansi atumwi echita tyani?

¹² Poyankha asogoleli achipembezo Achiyuda enzeŵayofya amene aŵa, Petulo na Yohane enena kuti: “Weluzani mweka keno n’viweme pamenso pa Mulungu kumvwila mwewo kupambana Mulungu. Koma sewo tingalekelini kulaŵila vinthu vetiwona nakumvwa.” (Mac. 4:19, 20) Petulo na Yohane pechimasuliwa, ophunzila amene awo epemphela kwa Yehova kuti aŵayavye kuchita chifunilo chake. Ove epemphela nonena kuti: “Lolani kuti akapolo ŵanu apitilije kulaŵila mawu ŵanu motang’a ntima.” Yehova eyankha pemphelo yofumila pansi pantima yamene iyi.—Ŵelengani Machitidwe 4:29, 31.

13. Kansi tingaphunzilepo chinji pachisanzo cha Jin-hyuk?

¹³ Sewo tingakonkheje ophunzila amene aŵa mwa kupitilija kulalikila olo kuti akulu-akulu aboma atilamula kuti tileke. Ganizilani chisanzo cha m’bale muyakine zina yake Jin-hyuk, wamene eikiwa mudjeli chifukwa chosaloŵelela mu nkhani za ndale. Ali mudjeli, epasiwa ntchito yosamalila akaidi ayakine amene enze mudjeli ya chipinda chayeka-chayeka, koma aliye lolewe kulaŵila vokhuza chilichonse chosakatijana na ntchito yamene iyo, kupamikijapo Baibolo. Yove epemphela posenga kuti ankhale wotang’a ntima komasoti nzelu kuti akwanishe kulalikila pa mpata uliwonse. (Mac. 5:29) Yove enena kuti: “Yehova eyankha mapemphelo ŵangu poniyavya kunkhala wotang’a ntima nonipasa nzelu kuti niyambishe maphunzilo a Baibolo anyinji mu maminesi 5 m’miliyango ya djeli. Pavuli pake usiku, nenzelemba makalata amene nenzeŵapeleka kuli akaidi kukacha mmawa.” Nase tingankhale na chidalilo chakuti Yehova azatiyavye kukwanilisha utumiki wasu. Molingana na Jin-hyuk, tingapemphele posenga kuti tinkhale otang’a ntima na nzelu.

14. Kansi n’chinji chingatiyavye tikakumana na mavuto? (Salimo 37:3, 5)

¹⁴ Mukopemphela kuti Yehova akuyavyeni kulimbana na mavuto. Anyinji a sewo tukumana na mavuto akuthupi olo a m’maganizo, imfwa ya okondewa ŵasu, mavuto a m’banja, kutamanishiwa olo mavuto ayakine. Ndipo vinthu monga mulili na nkhondo vachitisha anyinji mwa mavuto amene aŵa kunkhala ovuta kuŵapilila. Muujeni Yehova mwamumvwila. Muujeni za vuto yanu monga ni mwamungaujile shamwali wanu wapantima. Mukonkhala osimikijila kuti Yehova “azachitepo kanthu.”—Ŵelengani Salimo 37:3, 5.

15. Kansi pemphelo yutiyavya tyani ‘kupilila chisauso’? Pelekani chisanzo.

¹⁵ Kupemphela monkhazikika kuzatiyavye ‘kupilila chisauso.’ (Aro. 12:12) Yehova oziŵa vakukumana navo atumiki ŵake—‘yove akumvwa kulila kwawo kosenga thandizo.’ (Sal. 145:18, 19) Mpainiya muyakine wa vyaka 29 zina yake Kristie owona kuti vamene ivi n’vachendi. Yove eyamba kulwala matenda akulu mosayembekezeleka. Chifukwa cha vamene ivi elwala matenda ovutika ngako maganizo. Pavuli pake, echimvwa kuti amayi ŵake eŵapeza na matenda aliye mankhwala. Kristie enena kuti: “Nenzepemphela ngako kwa Yehova posenga mphamvu kuti nikwanishe kupilila nsiku iliyonse. Niyeja-yeja kukatijana na ŵanthu aviyoloŵezi viweme vauzimu mwa kupezeka pa misonkhano nochita phunzilo ya paneka.” Yove eyangijila kunena kuti: “Pemphelo iniyavya kupilila mavuto. Nenzeziŵa kuti Yehova ali nane pafupi nthawe zonse ndipo vamene ivi, venzenilimbikisa ngako. Olo kuti matenda ŵangu aliye sililetu, Yehova eyankha mapemphelo ŵangu ponipasa ntendele wa muntima komasoti ntima wodekha.” Tikokumbukila kuti “Yehova oziŵa kupulumusha ŵanthu olitwala kuli yove akankhala pa mayeselo.”—2 Pet. 2:9.

16. Ndaŵa yanji tufunikila thandizo ya Yehova kuti tikwanishe kupewa mayeselo?

¹⁶ Mukopemphela kwa Yehova kuti akuyavyeni kulimbana na mayeselo. Monga ŵanthu aliye ungwilo, nthawe zonse tukumana na mayeselo akuti tichite chinthu chiipa. Satana ochita vonse vangakwanishe kuti mayeselo amene aŵa ankhale ovuta kupilila. Njila imozi yakukatishila ntchito pofuna kuipisha maganizo ŵasu ni vosangulusha viipa. Vosangulusha vamene ivo vingazuje maganizo ŵasu na vinthu viipa—maganizo amene awo angatichitishe kunkhala aipa pamenso pa Yehova notichitisha kuchita machimo akulu-akulu.—Mk. 7:21-23; Yak. 1:14, 15.

17. Pavuli posenga Yehova kuti atiyavye, kansi tufunika kuchita tyani kuti tipewe mayeselo? (Onanisoti chithunzi.)

¹⁷ Sewo tufunikila thandizo ya Yehova kuti tigonjese mayeselo ofuna kuchita vinthu viipa. Mu pemphelo yake ya chisanzo, Yesu epamikijamo pemphelo iyi yokonkhapo: “Osati mutiloŵeshe m’mayeselo, koma mutipulumushe kwa Satana.” (Mt. 6:13) Yehova ofuna kutiyavya, koma sewo tufunikila kumusenga kuti atiyavye. Tufunikila soti kuchita vinthu mokatijana na mapemphelo ŵasu. Tingachitepo kanthu kuti tipewe kukopeka na maganizo ophoniyeka komasoti maganizo amene ali paliponse mu chalo ichi chiipa cha Satana. (Sal. 97:10) Tingazuje maganizo ŵasu na vinthu viweme tikoŵelenga nophunzila Baibolo. Kupezeka pamisonkhano komasoti kukata nawo ntchito yolalikila kuzatetezesoti maganizo ŵasu ku vinthu viipa. Yehova naye elonjeza kuti azalolelini kuti tiyesewe kufwika patingaleke kwanisha kupilila.—1 Akor. 10:12, 13.

18. Pa nkhani ya pemphelo, kansi tonse tufunikila kuchita tyani?

¹⁸ Aliyense wa sewo ofunikila kupemphela ngako kwa Yehova kupambana kale yonse, kuti apitilije kunkhala wokhulupilika kwa Yehova m’masiku ŵano osilijila amene ni ovuta. Mukopatula nthawe nsiku iliyonse yopemphela mofumila pansi pantima. Yehova ofuna kuti ‘tikomukhutulila vamuntima mwasu’ m’pemphelo. (Sal. 62:8) Mukotamanda Yehova nomutembeja pa vonse vawachita. Mukomusenga kuti akokuyavyani kunkhala wotang’a ntima mu utumiki. Mukomusenga kuti akokuyavyani kulimbana na vuto iliyonse komasoti kupewa mayeselo aliwonse ŵamungakumane nawo. Osati mukolola kuti chilichonse kapena munthu aliyense akukangisheni kupemphela kwa Yehova nthawe zonse. Koma kansi Yehova oyankha tyani mapemphelo ŵasu? Tizakambilane konsho yofunika yamene iyi mu nkhani ikuza.