MUTU 49
Kansi mungachite tyani kuti banja yanu inkhale yosangalala?—Mbali yoyamba
Ŵanthu akankhala kuti alungulana kwalombapano, oyembekezela kuti akonkhala osangalala monga ni mwevenzele pa nsiku ya ukwati wawo. Ndipo vamene ivi ni vokwanishika. Akhilisitu amene ankhala m’banja kwa nthawe itali noyeja-yeja kukonkha malangizo a m’Baibolo, oziŵa kuti vamene ivi ni vokwanishika.
1. Kansi Baibolo yupeleka malangizo otyani kuli analume olungula?
Yehova epasa mwanalume wolungula udindo wonkhala mutu wa banja yake. (Ŵelengani Aefeso 5:23.) Tetyo Yehova oyembekezela kuti mwanalume akosankha vinthu vamene vingayavye banja yake. Baibolo yulangiza analume olungula kuti: “Pitilijani kukonda anakazi ŵanu.” (Aefeso 5:25) Kansi vamene ivi vutanthauza chinji? Mwanalume wachikondi ochita vinthu mowamila ntima mwanakazi wake akankhala kwaŵeka olo akankhala pa ŵanthu. Owoneshesha kuti mwanakazi wake ni wotetezeka komasoti osangalala ndipo omupasa vinthu vonse vakufunikila. (1 Timoteyo 5:8) Koma chinthu chofunika ngako ni kuyavya mwanakazi wake kunkhala pa ushamwali wotang’a na Yehova. (Mateyu 4:4) Mwachisanzo, opemphela komasoti kuŵelenga Baibolo pamozi na mwanakazi wake. Keno mwanalume okonda nosamalila mwanakazi wake, onkhala pa ushamwali wotang’ a na Yehova.—Ŵelengani 1 Petulo 3:7.
2. Kansi Baibolo yupeleka malangizo otyani kuli anakazi olunguliwa?
Mawu a Mulungu onena kuti mwanakazi wolunguliwa “akolemekeza ngako mwanalume wake.” (Aefeso 5:33) Kansi angachite tyani vamene ivi? Angaganizile minkhalidwe iweme yalinayo mwanalume wake komasoti khama yakuchita mwanalume wake pomusamalila komasoti kusamalila ŵana ŵawo. Angawoneshesoti kuti olemekeza vawasankha mwanalume wake, akomulaŵija mwaulemu komasoti akolaŵila vinthu viweme vokhuza mwanalume wake olo kuti otumikilalini Yehova.
3. Kansi ŵanthu olungulana angatang’ishe tyani banja yawo?
Ponena za ŵanthu olungulana, Baibolo yunena kuti: “Aŵili amene awo azankhale muŵili umo.” (Mateyu 19:5) Vamene ivi vutanthauza kuti ofunikila kuyeja-yeja kuchita vonse vangakwanishe kuti chikondi chawo osati chiyambe kuchepa. Ove angachite vamene ivi akoyeja-yeja nthawe zonse kufwana nthawe yotandalila pamozi, kuujana vakukosi komasoti kuujana maganizo ŵawo momasuka komasoti mwachikondi. Kupatulapo Yehova, ove—owona kuti mwanalume wawo olo mwanakazi wawo—ni wofunika ngako kupambana chinthu chiyakine chilichonse olo munthu aliyense. Komasoti oyeja-yeja kupewa kudjailana kapena kutandala ngako na munthu wamene ni mwanalume olo mwanakazi wakelini.
VATI TIPHUNZILE
Tiphunzile mfundo za m’ Baibolo zamene zingakuyavyeni kuti banja yanu inkhale yotang’a.
4. Analume, mukokonda komasoti kusamalila luweme mwanakazi wanu
Baibolo yunena kuti: “Analume akonde anakazi ŵawo monga ni miŵili yawo.” (Aefeso 5:28, 29) Kansi vamene ivi vutanthauza chinji? Lolelani VIDIYO, ndipo pavuli pake mukambilane konsho iyi.
Kansi mwanalume angawoneshe tyani kuti omukonda na kumusamalila mwanakazi wake?
Ŵelengani Akolose 3:12, ndipo pavuli pake mukambilane konsho iyi:
Kansi mwanalume angamuwoneshe tyani minkhalidwe iweme mwanakazi wake?
5. Anakazi mwaokonda na kulemekeza analume ŵanu
Baibolo yulimbikisa kuti anakazi ofunikila kulemekeza analume ŵawo keno otumikila Yehova olo yayi. Ŵelengani 1 Petulo 3:1, 2, ndipo pavuli pake mukambilane makonsho aŵa:
Kansi njila iweme yoyavyila mwanalume wanu kuti ayambe kutumikila Yehova ni kumulalikila nthawe zonse, olo kapena mufunikila kumulemekeza ngako na kumuwonesha minkhalidwe iweme? Ndaŵa yanji mwayankha tetyo?
Vunkhala luweme ngako mwanalume na mwanakazi wake akosankha vochita ali pamozi. Komalomba nthawe ziyakine, mwanakazi angakatijanelini na vawasankha mwanalume wake. Vikankhala tetyo, mwanakazi wamene uyo ofunika kufotokoza maganizo ŵake modekha komasoti mwaulemu ndipo ofunika kuziŵa kuti Yehova epeleka udindo kwa mwanalume wake wosankha vinthu vokhuza banja yawo. Tetyo, ofunika kuchita vonse vangakwanishe kuti vinthu vawasankha mwanalume viyende luweme. Akochita vamene ivi, onkhala kuti oyavya banja yake kuti inkhale yosangalala. Ŵelengani 1 Petulo 3:3-5, ndipo pavuli pake mukambilane konsho iyi:
Kansi Yehova akumvwa tyani keno mwanakazi olemekeza ngako mwanalume wake?
6. Ni vokwanishika kusilijana na mavuto a m’banja mwanu
Paliye banja iliye mavuto. Tetyo, ŵanthu olungulana ofunika kuchita vinthu mokatijana kuti asilijane na mavuto ŵawo. Lolelani VIDIYO, ndipo pavuli pake mukambilane makonsho aŵa.
Mu vidiyo yamene iyi ni chinji chuwonesha kuti uyu mwanalume na mwanakazi wake enze eleka kukondana monga ni mwenzechitila kale?
Kansi echita tyani kuti atang’ishe banja yawo?
Ŵelengani 1 Akorinto 10:24 na Akolose 3:13. Ndipo pavuli pakuti mwaŵelenga lemba iliyonse mukambilane konsho iyi:
Kansi kukonkheja malamulo amene aŵa kungayavye tyani banja kunkhala yotang’a?
Baibolo yunena kuti tufunika kulemekezana. Kulemekezana kupamikijapo kuchitilana vinthu mowama ntima komasoti mwaulemu. Ŵelengani Aroma 12:10, ndipo pavuli pake mukambilane makonsho aŵa:
Kansi ŵanthu olungulana ofunikila kuyembekezela kuti mwanalume olo mwanakazi wawo niye ofunikila kuyamba kumulemekeza kuti nayesoti akomulemekeza? Ndaŵa yanji mwayankha tetyo?
ŴANTHU AYAKINE ONENA KUTI: “Nkazi wangu na newo tukatijanalinisoti monga ni kale ndipo banja yasu yuyendalini na bwino yayi.”
Kansi mungaŵayavye tyani kuziŵa kuti Baibolo ingaŵayavye kuti banja yawo ikoyenda luweme?
MFUNDO ZACHIDULE
Mwanalume na mwanakazi wake angosangalala keno okondana, kulemekezana komasoti kukonkheja mfundo za m’Baibolo.
Makonsho oweleja
Kansi mwanalume angachite tyani kuti banja yake inkhale yosangalala?
Kansi mwanakazi angachite tyani kuti banja yake inkhale yosangalala?
Keno muli pabanja, kansi ni mfundo yotyani ya m’Baibolo yamene ingayavye kuti banja yanu inkhale yotang’a?
PHUNZILANI VINYINJI
Onani vingakuyavyeni kuti mukosangalala m’banja mwanu.
Onani yidiyo ya nyimbo yamene yuwonesha ubwino wokonkha malangizo a Mulungu m’banja mwanu.
Onani vakutanthauza kugonjela mwanalume monga mutu wa banja.
“Anakazi, ndaŵa yanji mufunika kugonjela mwanalume monga mutu?” (Nsanja ya Olonda, 15 May, 2010)
Kansi banja iyakine isilija tyani mavuto akulu a mʼbanja kupamikijapo chisuzulo chawo?