Uthenga Wabwino Wolembewa na Mateyo
21 Pecifwika pafupi na Yerusalemu, efwika pa malo oitiwa kuti Betefage pa Lupili ya Maolivi, ndipo Yesu etuma ophunzila ŵake aŵili. 2 Eŵauzhya kuti: “Nkhoyani m’munzi uyo uonekela pala. Mwamene mula, mukapeze bulu womangilila pamozi na mwana wake munalume. Mukaŵamasule noŵaleta kuli neo. 3 Ngati aliyense angakukonsheni cifukwa cake mucita izi, mumuuzhye kuti, ‘Ambuye oŵafuna.’ Ndipo nthawi yamene iyo akuloleni kuti muŵalete kuno.”
4 Izi zecitika kuti zikwanilishe mau yecilaŵila mneneli akuti: 5 “Uzhyani mwana munakazi wa Ziyoni kuti: ‘Ona! Mfumu yako ikuza. Mfumu iyi ni yofasa ndipo yakwela pa bulu. Eee, yakwela pa mwana munalume wa bulu, mwana wa nyama yamene yunyamula katundu.’”
6 Tetyo, ophunzila aŵa eluta nocita zeciŵalamula Yesu. 7 Ove emuletela bulu ula na mwana wake munalume. Ndipo eyanzikapo vovwala vao vakunja. Pavuli pake, Yesu ekwela pa mwana uyu wa bulu. 8 Ŵanthu anyinji enzoyanzika vovwala vao vakunja m’njila ndipo ayakine enzotenda misambo ya vimiti noiyanzika m’njila. 9 Kuyangizhyila apo, gulu ya ŵanthu yamene yenze pasogolo pake koma soti yamene yenzokuza kuvuli kwake, yepitilizhya kukuwa kuti: “Tusenga kuti m’pulumuseni mwana wa Davide! Wodalisiwa ni munthu wamene akuza m’zina ya Yehova. Tusenga kuli mweo amene munkhala kululu kuti, m’pulumuseni!”
10 Peciloŵa mu Yerusalemu, mu mzinda monse mwenkhala congo cikulu ndipo ayakine enzokonsha kuti: “Ni ŵani uyu?” 11 Gulu ya ŵanthu yenzoyankha kuti: “Uyu ni mneneli Yesu wa ku Nazareti, ku Galileya.”
12 Yesu eloŵa m’kacisi nopitikisha ŵanthu onse amene enzogulisa koma soti kugula vinthu m’kacisi. Egubuduza soti mathebo ya ŵanthu amene enzocinjanisha ndalama koma soti mabenchi ya ŵanthu amene enzogulisa nkhunda. 13 Yove eŵauzhya kuti: “Malemba olaŵila kuti, ‘Ng’anda yangu ikoitiwa kuti ng’anda yopemphelelamo,’ koma mweo mwaicitisha kuti inkhale nkhwema ya akawalala.” 14 Kuyangizhyila apo, mphofu koma soti ŵanthu olemala eluta kuli yove m’kacisi ndipo eŵapolesha.
15 Ansembe akulu na alembi ekalipa ngako peciona vinthu vodabwisa vecicita Yesu koma soti peciona acilumbwana amene enzokuwa m’kacisi kuti, “Tusenga kuti m’pulumuseni Mwana wa Davide!” 16 Ove emukonsha kuti: “Kansi mukumvwa zakukamba ŵanthu aŵa?” Yesu eyankha kuti: “Eee. Kansi muliyoŵelenge kuti, ‘Mwacitisha kuti m’kamwa mwa ŵana na mwa malucece mufume mau otamanda’?” 17 Pavuli pake, eŵasiya mu mzinda uyu noluta ku Betaniya ndipo elala kwamene uko.
18 Peenzowelela mu mzinda ula m’mamawa ngako, yove ecimvwa njala. 19 Eona cimuti ca mkuyu m’mbali mwa njila ndipo eluta m’cimuti ici koma aliyopezemo ciliconse. M’malo mwake, epezamo tyala matepo. Tetyo euzhya cimuti ici kuti: “Kuyambila lelo, ukatwalepo lini soti cipaso ciliconse.” Nthawi yamene iyo cimuti ici ca mkuyu cefota. 20 Ophunzila ŵake peciona izi, edabwa ngako ndipo elaŵila kuti: “Zakwanishika tyani kuti cimuti ici ca mkuyu cifote nthawi yamene iyi?” 21 Yesu eŵayankha kuti: “Kulaŵila cendi, nukuuzhyani kuti ngati mungankhale na cikhulupililo ndipo mukaikila lini, mukwanishe osati tyala kucita zanacitila cimuti ici, koma mukwanishe kuuzhya lupili iyi kuti, ‘Coka pano ukaziponye m’nyanja,’ ndipo zicitike cendi. 22 Vinthu vonse vamusenga m’pemphelo, mupasiwe ngati muli na cikhulupililo.”
23 Yesu peciloŵa m’kacisi, ansembe akulu na akulu eluta kuli yove peenzophunzisa ndipo emukonsha kuti: “Kansi mucita vinthu ivi na ulamulilo wa ŵani? Kansi ni ŵani ekupasani ulamulilo wamene uyu?” 24 Yesu eŵayankha kuti: “Nane nikukonsheni cinthu cimozi. Ngati muniyankhe, nikuuzhyeni enipasa ulamulilo wanucitila vinthu ivi. 25 Kansi ubatizo wa Yohane wecokela kuni, kululu kapena kuli ŵanthu?” Koma ove eyamba kukambilana kuti: “Tikakamba kuti, ‘Wecokela kululu,’ yove atikonshe kuti, ‘Lomba ndaŵa yanji muliyomukhulupilile?’ 26 Koma soti tingalaŵile lini kuti, ‘Wecokela kuli ŵanthu,’ cifukwa tuyopa gulu iyi ya ŵanthu. Ove okhulupilila kuti Yohane enze mneneli.” 27 Tetyo ove eyankha Yesu kuti: “Tuziŵa lini.” Naye eŵauzhya kuti: “Nane nikuuzhyeni lini enipasa ulamulilo wanucitila vinthu ivi.
28 “Kansi muganiza tyani? Munthu muyakine enze na ŵana aŵili. Eluta kuli mwana woyamba nomuuzhya kuti, ‘Mwana wangu, lelo ulute kuyoseŵenza m’munda wa mpesa.’ 29 Yove eyankha kuti, ‘Nilute lini,’ koma pavuli pake, ecinja nzelu ndipo eluta. 30 Eluta soti kuli mwana wake waciŵili nomuuzhya cimozimozi. Mwana uyu eyankha kuti, ‘Nilute atata,’ koma aliyolute. 31 Kansi ni ŵani mwa ŵana aŵili aŵa wamene ecita cifunilo ca ausuwake?” Ove eyankha kuti: “Ni mwana woyamba.” Yesu eŵauzhya kuti: “Kulaŵila cendi, nukuuzhyani kuti osonkhesha misonkho na mahule akusiyeni kuvuli na kuyoloŵa mu Ufumu wa Mulungu. 32 Cifukwa Yohane ewela kuli mweo m’njila yacilungamo koma muliyomukhulupilile. Koma osonkhesha misonkho na mahule emukhulupilila. Olo pavuli pakuti mwaona izi, mweo muliyocinje maganizo kuti mumukhulupilile.
33 Mvwani fanizo iyakine. Penze munthu muyakine wamene enze na munda ndipo ekomola mpesa m’munda mwake noucingilila na mpanda. Kuyangizhyila apo, ekumba cisengu copondelamo mphesa nomanga nsanja. Pavuli pake, esiya munda uyu m’manja mwa alimi noluta ku calo ciyakine. 34 Nthawi yotwala vipaso peyefwika, etumizhya akapolo ŵake kuli alimi aŵa kuti akatole vipaso vake. 35 Koma alimi aŵa ekata akapolo ŵake aŵa ndipo muyakine emuniata, muyakine emupaya ndipo muyakine emutema miyala. 36 Mwineco wa munda etumizhya soti akapolo ayakine anyinji kupambana ŵecitumizhya poyamba, koma nao eŵacita cimozimozi. 37 Posilizhyila pake, etumizhya mwana wake kuli ove nolaŵila kuti, ‘Mwana wangu akamulemekeze.’ 38 Peciona mwana uyu, alimi eyamba kuuzhyana kuti, ‘Uyu niye wati akalandile coloŵa. Welani, tiyeni timupaye notolako coloŵa cake!’ 39 Tetyo, emutola nomucosa m’munda wa mpesa nomupaya. 40 Lomba ngati mwineco wa munda wa mpesa wawela, kansi azecite nao cinji alimi aŵa?” 41 Ove eyankha kuti: “Cifukwa cakuti ni ŵanthu aipa, akaŵaononge caipa ndipo akatole munda uyu noupeleka kuli alimi ayakine, amene angamupase vipaso pa nthawi yake.”
42 Yesu eŵauzhya kuti: “Malemba okamba kuti, ‘Mwala wamene ŵanthu omanga ng’anda eukana, wankhala mwala wofunika ngako wapakona.* Mwala uyu wefumila kwa Yehova ndipo ni wocitisha cidwi m’menso mwasu.’ Kansi muliyoŵelenge izi? 43 Niye cifukwa cake nukuuzhyani kuti, Ufumu wa Mulungu ukacosewe kuli mweo nopelekewa kuli mtundu wati ukotwala vipaso vake. 44 Kuyangizhyila apo, munthu wati akaponele pa mwala wamene uyo akaphwanyike ndipo aliyense wati akaponelewe na mwala uyu, akasasanthike.”
45 Ansembe akulu na Afarisi peecimvwa mafanizo ŵake, eziŵa kuti enzokamba za ove. 46 Olo kuti enzofuna kumukata,* enzoyopa gulu ya ŵanthu cifukwa ŵanthu aŵa enzokhulupilila kuti ni mneneli.