Uthenga Wabwino Wolembewa na Mateyo
8 Peciseluka pa lupili, gulu ikulu ya ŵanthu yemukonkha. 2 Nthawi yamene iyo, kwewela munthu wolwala khate ndipo emugwadila nomuuzhya kuti: “Ambuye, ngati mufuna, munganituŵishe.” 3 Tetyo, Yesu etambulula kwanja yake nomukata, ndipo elaŵila kuti: “Nufuna. Nkhala mtuŵa.” Nthawi yamene iyo, khate yake yesila. 4 Pavuli pake, Yesu emuuzhya kuti: “Usauzhye munthu aliyense za nkhani iyi. Koma nkhoya ukaonekele kuli wansembe ndipo ukamupase mphaso monga ni mwecilamulila Mose kuti unkhale umboni kuli ove.”
5 Yesu peciloŵa mu mzinda wa Kaperenao, mkulu wa masoja eluta kuli yove noyamba kumupapatila 6 kuti: “Ambuye, wanchito wangu aliyone ku ng’anda cifukwa ni wozizila vizo, ndipo ovutika ngako.” 7 Yove emuuzhya kuti: “Nikaluta kwamene uku, nikamupoleshe.” 8 Koma mkulu wa masoja eyankha kuti: “Ambuye, neo n’ne wosayenelela kuti mweo mukaloŵe m’ng’anda mwangu. Koma mukambe tyala mau ndipo wanchito wangu apole. 9 Cifukwa nane nili na ŵanthu amene oniyanganila, ndipo nili soti na masoja ŵanuyanganila. Nikauzhya m’mozi kuti, “Nkhoya!” oluta, nikauzhya muyakine kuti, “Wela!” owela. Kapolo wangu nikamuuzhya kuti, “Cita ici!” ocita.” 10 Yesu peecimvwa izi, edabwa ngako ndipo euzhya ŵala amene enzomukonkha kuti: “Kulaŵila cendi, mu Isiraeli monse nikaliyopezamo munthu wacikhulupililo cikulu monga ni uyu. 11 Nukuuzhyani kuti ŵanthu anyinji kufumila ku m’mawa na ku m’cingulo akankhale pa thebo imozi na Abulahamu, Isaki na Yakobo mu Ufumu wa kululu. 12 Koma ŵana a Ufumu akaponyewe kunja ku mfinzi. Kwamene uko akalile nokukuta menu.” 13 Pavuli pake, Yesu euzhya mkulu wa masoja kuti: “Nkhoya. Pofwana kuti waonesha cikhulupililo, leka kuti zawasenga zicitike.” Ndipo wanchito wake epola nthawi yamene iyo.
14 Pavuli pake, Yesu peciluta ku ng’anda kwa Petulo epeza kuti apongozi anakazi ŵa Petulo aliyone cifukwa cakuti enzolwala maleliya. 15 Tetyo, eŵakata kwanja ndipo epola. Nthawi yamene iyo, euka noyamba kumukonzela cakulya. 16 Koma m’cingulo, ŵanthu emuletela ŵanthu anyinji amene enze na viŵanda, ndipo ecosa mizimu yamene iyi na mau koma soti epolesha ŵanthu onse amene enzolwala. 17 Ecita izi kuti akwanilishe zecilaŵila mneneli Yesaya kuti: “Yove etola matenda ŵasu nonyamula voŵaŵa vasu.”
18 Yesu peciona kuti gulu ya ŵanthu yamuzungulila, euzhya ophunzila ŵake kuti alute ku mbali iyakine. 19 Mlembi muyakine eluta kuli yove nomuuzhya kuti: “Mphunzisi, nikukonkheni kulikonse kwati mulute.” 20 Koma Yesu emuyankha kuti: “Nkhandwe zili na nkhwema, ndipo tunyoni twa m’mululu tuli na tuvumbo. Koma Mwana wa munthu aliye olo posamila mutu wake.” 21 Pavuli pake, wophunzila muyakine emuuzhya kuti: “Ambuye, niloleni kuti nilute nikaikiletu atata m’manda.” 22 Yesu emuyankha kuti: “Pitilizhya kunikonkha. Ŵaleke akufwa aike akufwa ŵao.”
23 Pecikwela boti, ophunzila ŵake emukonkha. 24 Pavuli pake, pa nyanja peyamba cimphepo camphamvu ndipo manzi yenzoloŵa m’boti. Koma Yesu enze m’tulo. 25 Ove eluta kuyomuusha nomuuzhya kuti: “Ambuye, tipulumuseni, titifwe!” 26 Koma Yesu eŵauzhya kuti: “Ndaŵa yanji mwacita wowa teti mweo ŵanthu a cikhulupililo citontho?” Pavuli pake, euka nozuzula mphepo na nyanja ndipo kwedekha. 27 Analume aŵa edabwa ngako ndipo elaŵila kuti: “Kansi uyu ni munthu wotyani? Olo mphepo na nyanja vumumvwila.”
28 Pecifwika kusilya m’dela ya Agadara, analume aŵili amene enze na viŵanda esokoloka kufumila pa manda* nokumana naye. Analume aŵa enze oyofya ngako cakuti paliye munthu aliyense wamene enzokwanisha kupita njila iyi. 29 Nthawi yamene iyo, ekuwa kuti: “Takulakwilani cinji mweo Mwana wa Mulungu? Kansi mwawela kuti mutinzunze nthawi yoikika ikaliyokwana?” 30 Capatali na ove, penze gulu ya nkhumba zamene zenzolyela. 31 Tetyo, viŵanda ivi veyamba kumupapatila kuti: “Ngati muticose muli ŵanthu aŵa, tusenga kuti mutilole tikaloŵe muli nkhumba izo!” 32 Yove eviuzhya kuti: “Nkhoyani!” Tetyo, vecoka muli ŵanthu ŵala na kuyoloŵa mu nkhumba, ndipo gulu yonse ya nkhumba yeutukila ku m’polipoli na kuyoloŵa m’nyanja ndipo zefwila mwamene umo. 33 Koma aciŵeta ethaŵa. Ndipo peciloŵa mu mzinda efotokoza vinthu vonse vecitika, kuyangizhyilapo nkhani yokhuza analume amene enze na viŵanda. 34 Nthawi yamene iyo, ŵanthu onse a mu mzinda enyamuka kuti akakumane na Yesu. Pecimuona, emusenga kuti acoke m’dela yao.