Uthenga Wabwino Wolembewa na Maliko

9 Yesu eŵauzhya soti kuti: “Kulaŵila cendi, nukuuzhyani kuti ayakine amene apanama pano akailaŵe lini imfwa olo patontho mpaka coyamba akaone Ufumu wa Mulungu wayamba kulamulila.” 2 Pavuli pa masiku 6, yove etola Petulo, Yakobo na Yohane noluta nao mu lupili itali kwaŵeka. Pavuli pake, maonekedwe a Yesu ecinja apo n’kuti ove ololesha. 3 Vovwala vake vakunja veyamba kunyezimila notuŵa ngako kupambana mwaangatuŵishile wowasha vovwala aliyense pano pa calo. 4 Kuyangizhyila apo, ove eona Eliya na Mose ndipo enzolaŵizhyana na Yesu. 5 Pavuli pake, Petulo euzhya Yesu kuti: “Rabi, zingankhale bwino kuti tikonkhala pamene pano. Tetyo, lekani kuti timange misasa itatu. Umozi wanu, umozi wa Mose koma soti umozi wa Eliya.” 6 Yove elaŵila izi posoŵa cati acite cifukwa onse enze ecita wowa ngako. 7 Pavuli pake, kwecita mkumbi wamene weŵavwinikila. Ndipo pemvwika mau kufumila mu mkumbi akuti: “Uyu ni Mwana wangu wanukonda. Mukomumvwila.” 8 Pavuli pa izi, ove elolesha uku na uku ndipo eona kuti penzeve aliyense koma tyala Yesu.

9 Peenzoseluka mu lupili, Yesu eŵalamula mwamphamvu kuti asauzhye aliyense zeciona mpaka Mwana wa munthu akaukishiwe kwa akufwa. 10 Ove esunga cendi izi mu mtima mwao,* koma eyamba kulaŵizhyana zecitanthauza Yesu pecilaŵila za kuuka kwa akufwa. 11 Pavuli pake, eyamba kumukonsha kuti: “Ndaŵa yanji alembi olaŵila kuti Eliya ofunika kuwela coyamba?” 12 Yove eŵayankha kuti: “Eliya akawele cendi coyamba nowezhyelesha vinthu vonse. Koma ndaŵa yanji malemba olaŵila kuti Mwana wa munthu ofunika kukumana na mavuto anyinji koma soti kucitiliwa zinthu zacipongwe? 13 Koma nukuuzhyani kuti Eliya ewela kale ndipo emucitila vilivonse veenzofuna ove mokatizhyana na zayolaŵila Malemba zokhuza yove.”

14 Pecifwika kwenze ophunzila ayakine, eona gulu ya ŵanthu apo n’kuti yazungulila ophunzila aŵa ndipo penze alembi amene enzokangana nao. 15 Koma gulu yonse peyeona Yesu, yedabwa ngako ndipo yemuutukila kuti ikamupase moni. 16 Tetyo yove eŵakonsha kuti: “Kansi mukangana nao cinji?” 17 Munthu muyakine wamene enze pa gulu iyi emuyankha kuti: “Mphunzisi, neo naleta mwana wangu munalume kuli mweo cifukwa ali na mzimu wamene umukangisha kulaŵila. 18 Mzimu uyu ucita kuti ukamukata, umuponeshela pansi. Pavuli pake, ocita povu kukamwa, okukuta menu ndipo ofoka. Nasenga ophunzila ŵanu kuti acose mzimu uyu, koma akangiwa.” 19 Yove eŵayankha kuti: “Mweo m’badwo uliye cikhulupililo, kansi nipitilizhye kunkhala namwe mpaka lini? Kansi nikupilileni mpaka lini? Muleteni kuno.” 20 Tetyo, eluta naye kuli yove. Koma mzimu ula peweona Yesu, nthawi yamene iyo wecitisha kuti mwana ula apone pansi nopalapata. Pecipona pansi, eyamba kupindamukapindamuka ndipo ecita povu kukamwa. 21 Pavuli pake, Yesu ekonsha ausuwake a mwana ula kuti: “Kansi izi zankhala zumucitikila kwa nthawi itali tyani?” Ove eyankha kuti: “Kuyambila tyala peenze mwana 22 ndipo kanyinji-kanyinji, umuponeshela pa mulilo koma soti m’manzi kuti umuononge. Koma ngati mungakwanishe kutiyavya, ticitileni cifundo ndipo tiyavyeni.” 23 Yesu ekonsha ausuwake a mwana ula kuti: “Ndaŵa yanji mwanena kuti, ‘Ngati ningakwanishe’? Ciliconse n’cokwanishika kuli munthu wamene ali na cikhulupililo.” 24 Nthawi yamene iyo, ausuwake a mwana uyu ekuwa kuti: “Nili na cikhulupililo! Tang’ishani cikhulupililo cangu!”

25 Yesu peciona kuti gulu ya ŵanthu yuutukila kuli ove, ezuzula mzimu uipa ula kuti: “Weo mzimu wamene ukangisha munthu kulaŵila na kumvwa, nukulamula kuti fuma ndipo osati ukaloŵe soti muli yove.” 26 Pavuli pakuti mwana ula wakuwa nopalapata ngako, mzimu ula wefuma ndipo eoneka monga kuti wafwa cakuti ŵanthu anyinji enzolaŵila kuti: “Wamwalila.” 27 Koma Yesu emukata kwanja nomuusha ndipo mwana uyu epanama. 28 Tetyo peciloŵa m’ng’anda apo n’kuti ali paŵeka, ophunzila ŵake emukonsha kuti: “Ndaŵa yanji tiliyokwanishe kucosa mzimu ula?” 29 Yove eŵayankha kuti: “Mzimu monga ula ungacoke lini na ciliconse koma tyala na pemphelo.”

30 Pavuli pake, efuma ku malo aŵa ndipo epitila ku Galileya koma aliyofune kuti aliyense aziŵe kuti enze ku malo uku. 31 Zenze teti cifukwa cakuti Yesu enzophunzisa ophunzila ŵake noŵauzhya kuti: “Mwana wa munthu akapelekewe m’manja mwa ŵanthu ndipo akamupaye. Koma olo kuti akamupaye, yove akaukishiwe pavuli pa masiku atatu.” 32 Koma ove aliyomvwishe tanthauzo ya mau aŵa ndipo enzoyopa kumukonsha.

33 Pavuli pake, efwika ku Kaperenao. Peenze m’ng’anda, yove eŵakonsha kuti: “Kansi mwenzokangana cinji m’njila?” 34 Ove enkhala tyala celele cifukwa peenze m’njila, enzokangana pa nkhani yakuti mkulu ni ŵani pakati pao. 35 Tetyo, enkhala pansi noita ophunzila ŵake 12 ndipo eŵauzhya kuti: “Aliyense wamene ofuna kunkhala woyamba ofunika kunkhala wosilizhyila pa onse koma soti mtumiki wa onse.” 36 Pavuli pake, etola mwana mtontho nomupanamika pakati pao ndipo eika manja ŵake pa vipikiti va mwana uyu ndipo eŵauzhya kuti: 37 “Aliyense wamene olandila mwana mtontho monga ni uyu cifukwa ca zina yangu, olandila soti neo. Ndipo aliyense wamene olandila neo, olandila lini tyala neo koma olandila soti Wala wamene enituma.”

38 Pavuli pake, Yohane emuuzhya kuti: “Mphunzisi, seo tenze taona munthu muyakine wamene enzocosa viŵanda m’zina yanu. Ndipo tamulesha cifukwa oyenda lini nase.” 39 Koma Yesu elaŵila kuti: “Osamulesha, cifukwa paliye aliyense wamene angacite nchito zamphamvu m’zina yangu, wamene nthawi yamene iyo angayambe kunilaŵilila vinthu viipa. 40 Cifukwa aliyense wamene osushana lini nase, ali ku mbali yasu. 41 Ndipo aliyense wamene okupasani kapu ya manzi kuti mumwe cifukwa cakuti nimwe okonkha a Khristu, kulaŵila cendi nukuuzhyani kuti akalandile mphoto yake. 42 Koma aliyense wokhumudwisha m’mozi mwa tuŵana utu twamene tuli na cikhulupililo muli neo, zingankhale bwino kumumangilila cimwala ca mphelo mu mkosi mwake camene cuyendeshewa na bulu nomuponya m’nyanja.

43 “Ngati kwanja yako yukucimwisha, uitende. Cili bwino kuti ukapeze moyo uliye cizo cimozi kupambana kuti ukalute ku mulilo wamene ungazimyiwe lini ku Gehena uli na manja yonse yaŵili. 44 —— 45 Ndipo ngati kwendo yako yukucimwisha, uitende. Zingankhale bwino kuti ukapeze moyo apo n’kuti niwe wolemala kupambana kuti ukaponyewe mu Gehena uli na mendo yonse yaŵili. 46 —— 47 Ndipo ngati linso yako yukucimwisha, uitaye. Cili bwino kuti ukaloŵe mu Ufumu wa Mulungu uli na linso imozi kupambana kuti ukaponyewe mu Gehena uli na menso yaŵili, 48 kwamene vikusi vikufwa lini ndipo mulilo uzima lini.

49 “Molingana na mwamene munyu utiliwila, aliyense mwa ŵanthu amene aŵa akatiliwe mulilo. 50 Munyu ni wabwino, koma ngati munyu wasila mphamvu, kansi mphamvu yamene iyo mungaiwezhyeleshe tyani? Nkhalani na munyu ndipo nkhalani na mtendele pakati panu.”