Uthenga Wabwino Wolembewa na Luka

2 M’masiku amene ao, Kaisara Augusito elamula ŵanthu onse enzonkhala m’calo ici kuti akalembeshe mu longanani. 2 (Kulembesha uku kwenze koyamba ndipo kwecitika pa nthawi pamene Kureniyo enze bwanamkubwa wa Siriya.) 3 Ndipo ŵanthu onse eluta kuyolembesha, aliyense ku mzinda wa kwao. 4 Naye Yosefe efuma ku Galileya mu mzinda wa Nazareti noluta ku Yudeya mu mzinda wa Davide woitiwa kuti Betelehemu. Ecita izi cifukwa enze wa m’banja ya Davide. 5 Yove eluta kuyolembesha pamozi na Mariya wamene emulungula molingana na zeenze emulonjeza. Pa nthawi iyi, n’kuti Mariya wasala patontho kunkhala na mwana. 6 Peenze kwamene uko, nthawi yakuti Mariya ankhale na mwana yekwana. 7 Yove evyala mwana wake woyamba munalume ndipo emuvunga pa nyula nomuyoneka molyelamo viŵeto, cifukwa aliyopeze malo m’ng’anda ya alwendo.

8 M’dela yamene iyi, mwenze soti aciŵeta amene enzoyona kusanga polyeshela mbelele zao koma soti kuziyembekezela usiku wonse. 9 Mosayembekezeleka, mngelo wa Yehova epanama pafupi na ove ndipo ulemelelo wa Yehova wewala pa malo onse amene ao. Peciona izi, ecita wowa ngako. 10 Koma mngelo ula eŵauzhya kuti: “Osayopa! Neo nawela kuzolengeza uthenga wabwino wacimwemwe cikulu kuli mweo camene ŵanthu onse akankhale naco. 11 Cifukwa lelo mu mzinda wa Davide mwavyalika mpulumusi wanu, wamene ni Khristu Ambuye. 12 Nukupasani cizindikilo ici: Mukapeze kalucece apo n’kuti akavunga pa nyula nokayoneka molyelamo viŵeto.” 13 Mosayembekezeleka, peoneka soti gulu ikulu ya angelo a kululu yamene yenze pamozi na mngelo ula. Gulu iyi yenzotamanda Mulungu kuti: 14 “Ulemelelo kwa Mulungu kululu ndipo pano pa calo mtendele pakati pa ŵanthu amene omukondwelesha.”

15 Tetyo, angelo ŵala pecicoka nowelela kululu, aciŵeta eyamba kuuzhyana kuti: “Tiyeni tiyeseyese kuluta ku Betelehemu kuti tikaone vinthu vacitika, vawatiziŵisha Yehova.” 16 Ove eluta kamangu-kamangu ndipo epeza Mariya na Yosefe koma soti kalucece apo n’kuti akayoneka molyelamo viŵeto. 17 Peciona izi, ove eŵafotokozela uthenga weciuzhyiwa wokhuza mwana uyu. 18 Ŵanthu onse amene ecimvwa zecilaŵila aciŵeta edabwa. 19 Koma Mariya esunga mau onse aŵa ndipo eyamba kuganizila tanthauzo ya zamene izi mu mtima mwake. 20 Pavuli pake, aciŵeta ŵala ewelela apo n’kuti olemekeza koma soti kutamanda Mulungu cifukwa ca vonse veecimvwa noona, mokatizhyana na zeciuzhyiwa.

21 Pavuli pa masiku 8, nthawi yekwana yakuti acite mdulidwe wa mwana uyu ndipo emuteya zina yakuti Yesu. Zina iyi niye yecitomola mngelo ula, Mariya akaliyonkhala na vumo.

22 Kuyangizhyila apo, nthawi peyekwana yakuti atuŵishiwe mokatizhyana na Cilamulo ca Mose, eluta naye ku Yerusalemu kuyomupeleka kwa Yehova. 23 Izi zenze zokatizhyana na zelembewa m’Cilamulo ca Yehova kuti: “Mwana munalume aliyense woyamba kuvyalika* akankhale mtuŵa kwa Yehova.” 24 Ove epeleka nsembe mokatizhyana na zaculaŵila Cilamulo ca Yehova camene cukamba kuti: “njiŵa ziŵili kapena ŵana aŵili a nkhunda.”

25 Mu Yerusalemu mwenze munthu muyakine wa zina yakuti Simiyoni. Munalume uyu enze wolungama koma soti wozipeleka kwa Mulungu. Yove enzoyembekezela nthawi pamene Mulungu enze kuzotonthoza Isiraeli ndipo mzimu utuŵa wenze pali yove. 26 Kuyangizhyila apo, Mulungu emuululila kupitila mwa mzimu utuŵa kuti akafwe lini akaliyoona Khristu wa Yehova. 27 Mosogolelewa na mzimu, yove ewela ku kacisi. Ndipo makolo a Yesu peenze emuleta kuti amucitile zecenzofuna Cilamulo, 28 yove enyamula mwana ula m’manja mwake notamanda Mulungu kuti: 29 “Lomba, Ambuye Mkulu Ngako mulola kapolo wanu kuluta mwamtendele mokatizhyana na zemwelaŵila. 30 Cifukwa menso ŵangu aona njila yanu yopulumusilamo ŵanthu 31 yamwakonza pamenso pa ŵanthu a mitundu yonse. 32 Menso ŵangu aona kuwala kocosa cinyula covwinikila pamenso camene cukangisha mitundu ya ŵanthu kuona koma soti naona ulemelelo wa ŵanthu ŵanu Aisiraeli.” 33 Ausuwake a mwana ula na amai ŵake epitilizhya kudabwa na vinthu veenzolaŵila Simiyoni vokhuza mwana ula. 34 Kuyangizhyila apo, Simiyoni edalisa makolo aŵa ndipo euzhya Mariya amai ŵake a mwana uyu kuti: “Mvwaya! Mwana uyu waikiwa kuti anyinji apone na kuti anyinji auke soti mu Isiraeli koma soti kuti ankhale cizindikilo cati akasushe ŵanthu 35 (eee, bemba itali ikakulase) kuti zakuganiza ŵanthu anyinji m’mitima mwao zikaonekele patuŵa.”

36 Kwenze soti mneneli munakazi wa zina yakuti Ana wamene enze mwana wa Fanueli, wa fuko ya Aseri. Mzimai uyu enze wacikulile ngako ndipo enkhala na mulume wake kwa vyaka tyala 7 kucokela pecilungulana.* 37 Pa nthawi iyi, yove enze wamasiye ndipo enze na vyaka 84. Koma enzopezeka pa kacisi nthawi zonse. Enzocita utumiki wopatulika mzuŵa na usiku ndipo enzoleka kulya kwakanthawi koma soti kupemphela mopapatila. 38 Mu awa yamene iyo, yove efwika pafupi noyamba kuyamikila Mulungu nolaŵila zokhuza mwana uyu kwa onse amene enzoyembekezela cipulumuso ca Yerusalemu.

39 Tetyo, ove pecicita vonse mokatizhyana na Cilamulo ca Yehova, ewelela ku Galileya ku mzinda wao wa Nazareti. 40 Mwana uyu epitilizhya kukula koma soti kunkhala wamphamvu. Nzelu zake zenzopakilako ndipo Mulungu epitilizhya kukondwela naye.

41 Caka ciliconse, makolo ŵake enzokonda kuluta ku Yerusalemu ku cikondwelelo ca Pasika. 42 Mwana uyu peenze na vyaka 12, ove eluta naye kwamene uku mokatizhyana na mwambo wa cikondwelelo camene ici. 43 Cikondwelelo pecesila, ove enyamuka kuwelela kwao. Koma Yesu esalila ku Yerusalemu ndipo makolo ŵake aliyoziŵe. 44 Ove enzoganiza kuti ali pa gulu ya ŵanthu ŵeenze nao pa ulwendo uyu cakuti eyenda ulwendo wa siku imozi. Pavuli pake, eyamba kumusakila pakati pa acibululu ŵao koma soti ayao. 45 Koma cifukwa cakuti aliyomupeze, ewelela ku Yerusalemu kuti akamusakile mosamala. 46 Pavuli pa masiku atatu, emupeza m’kacisi apo n’kuti wankhala pakati pa aphunzisi ndipo enzoŵamvwishila noŵakonsha makonsho. 47 Koma ŵanthu onse amene enzomumvwishila edabwa ngako na mayankho ŵake koma soti poona kuti enzomvwisha ngako vinthu. 48 Makolo ŵake pecimuona edabwa ngako ndipo amai ŵake emukonsha kuti: “Mwanawe, ndaŵa yanji wativutisha teti? Neo na ausuwako tenze tacita nkhawa ngako ndipo tenzokusakila.” 49 Koma yove eŵayankha kuti: “Ndaŵa yanji mwenzonisakila? Kansi muziŵa lini kuti nufunika kupezeka m’ng’anda ya Atata?” 50 Koma ove aliyomvwishe zeenzotanthauza.

51 Pavuli pake, enyamukila nao pamozi kuluta ku Nazareti ndipo epitilizhya kuŵamvwila. Kuyangizhyila apo, amai ŵake esunga mosamala ngako mau onse aŵa mu mtima mwao. 52 Koma Yesu epitilizhya kukula mu nzelu na mu msinkhu. Ndipo Mulungu na ŵanthu epitilizhya kukondwela naye.