Uthenga Wabwino Wolembewa na Luka
23 Tetyo, gulu yonse ya ŵanthu yenyamuka nopeleka Yesu kwa Pilato. 2 Pavuli pake, eyamba kumupasa mlandu kuti: “Seo tapeza munthu uyu osokoneza mtundu wasu, olesha ŵanthu kupeleka msonkho kwa Kaisara koma soti olaŵila kuti ni Khristu mfumu.” 3 Pilato emukonsha kuti: “Kansi niwe Mfumu ya Ayuda?” Yove eyankha kuti: “Zamwalaŵila, ni mwamene.” 4 Pavuli pake, Pilato euzhya ansembe akulu na gulu ya ŵanthu kuti: “Nupeza lini mlandu ulionse muli munthu uyu.” 5 Koma ove epitilizhya kulaŵila kuti: “Munthu uyu osokoneza ŵanthu mwa kuphunzisa mu Yudeya monse, kuyambila ku Galileya mpaka kufwika kuno.” 6 Peecimvwa izi, Pilato ekonsha ngati munthu uyu enze wa ku Galileya. 7 Pilato peciziŵa kuti Yesu enzocokela m’cigao camene cenzolamuliliwa na Herode, emutumizhya kuli Herode wamene m’masiku amene ao enze mu Yerusalemu.
8 Herode peciona Yesu, esangalala ngako. Kwa nthawi itali, yove enzofunishisha kuti aone Yesu cifukwa enze ecimvwa zinthu zinyinji zokhuza yove. Ndipo enzoyembekezela kuti aone cizindikilo cati acite. 9 Tetyo, eyamba kumukonsha vinthu vinyinji, koma Yesu aliyomuyankhe. 10 Olo n’tetyo, ansembe akulu na alembi enzopanamapanama nomuimba mlandu mwaukali. 11 Pavuli pake, Herode pamozi na masoja ŵake emucitila vinthu vacipongwe. Emunyoza mwa kumuvwalika covwala cabwino ngako, ndipo pavuli pake emupeleka soti kwa Pilato. 12 Pa siku yamene iyi, Herode na Pilato enkhala pa ushamwali, koma kuvuli konse enzozondana ngako.
13 Pavuli pake, Pilato esonkhanisha ansembe akulu, olamulila na ŵanthu ayakine 14 ndipo eŵauzhya kuti: “Mweo mwaleta munthu uyu kuli neo kuti ali na mlandu wakuti olimbikisha ŵanthu kuukila boma. Koma onani! Neo namukonsha pamenso panu koma niliyomupeze na cifukwa comuimbila milandu iyi yamumupasa. 15 Ndipo olo Herode aliyomupeze na mlandu niye cifukwa cake wamuwezhya kuli seo. Munthu uyu aliyocite ciliconse camene cingamucitishe kuti alandile cilango cakuti apaiwe. 16 Tetyo, nimukwapule tyala nomumasula.” 17 —— 18 Koma gulu yonse yekuwa kuti: “Munthu uyu apaiwe tyala, koma mutimasulile Baraba!” 19 (Baraba eikiwa m’jele cifukwa ca kuukila boma kwenze kwecitika mu mzinda wamene uyo koma soti cifukwa copaya munthu.) 20 Pilato elaŵila nao soti kaciŵili cifukwa enzofunishisha kuti amasule Yesu. 21 Pavuli pake, ŵanthu aŵa eyamba kukuwa kuti: “Apacikiwe tyala! Apacikiwe tyala!”* 22 Eŵakonsha kacitatu kuti: “Ndaŵa yanji? Kansi wacita cinthu ciipa cotyani? Neo niliyomupeze na cifukwa ciliconse comupaila. Tetyo, nimukwapule nomumasula.” 23 Peecimvwa izi, ove emukakamizhya mwa kupunda kuti Yesu apaiwe tyala. Ŵanthu aŵa enzopunda mwamphamvu cakuti Pilato evomela. 24 Tetyo, Pilato epeleka ciweluzo mokatizhyana na zeenzofuna ŵanthu aŵa. 25 Yove emasula munthu weenzofuna ŵanthu aŵa, wamene eikiwa m’jele cifukwa coukila boma nopaya munthu. Koma Yesu emupeleka m’manja mwao kuti acite naye veenzofuna.
26 Peenzokuya naye, ove ekata Simoni wa ku Kurene wamene enzocokela ku dela ya ku minzi. Ove emunyamulisha cimuti conzunzilapo ndipo enzokonkha Yesu kuvuli. 27 Gulu ikulu ya ŵanthu yenzomukonkha kuyangizhyilapo anakazi anyinji amene enzoziniata pa nganga cifukwa ca cisoni koma soti kumulilila. 28 Yesu ecunguluka nouzhya anakazi aŵa kuti: “Mweo ŵana anakazi a Yerusalemu, lekani kunililila. Koma muzililile mweka na ŵana ŵanu. 29 Cifukwa masiku akuza pamene ŵanthu akalaŵile kuti, ‘Osangalala ni anakazi amene aliye ŵana, anakazi amene akaliyovyalapo koma soti amene akaliyonyonshapo!’ 30 Ove akayambe kuuzhya malupili kuti, ‘Tiponeleni!’ ndipo akauzhye malupili atontho-atontho kuti, ‘Tifwikileni!’ 31 Ngati ocita vinthu ivi cimuti cikali cinana, nanga tyani cikayoyuma?”
32 Ŵanthu aŵa etola soti analume aŵili, amene enze anyankapondo kuti akaŵapaile pamozi na Yesu. 33 Pecifwika pa malo oitiwa kuti Sikeletoni ya Mutu, emukhomelela pa cimuti pamozi na anyankapondo ŵala. Muyakine ku kwanja yake yamalendi ndipo muyakine ku yamanjele. 34 Koma Yesu elaŵila kuti: “Atata, akhululukileni cifukwa oziŵa lini vakucita.” Kuyangizhyila apo, ove egaŵana vovwala vake mwa kucita maele. 35 Ŵanthu epanama tyala noonelela venzocitika. Koma olamulila enzomunyoza nolaŵila kuti: “Enzokwanisha kupulumusa ayakine, musiyeni azipulumuse ngati ni Khristu cendi Wosankhiwa wa Mulungu.” 36 Masoja nao enzomucitila vinthu vacipongwe, enzowela nomupasa waini wowawasha 37 nolaŵila kuti: “Ngati niwe Mfumu ya Ayuda, zipulumuse.” 38 Palulu pa mutu wake eikapo cikwangwani cakuti: “Uyu ni Mfumu ya Ayuda.”
39 Pavuli pake, m’mozi mwa anyankapondo amene enze epacikiwa naye pamozi, eyamba kulaŵila mau aipa kuti: “Kansi niwe lini Khristu? Zipulumuse ndipo upulumuse soti na seo!” 40 Nyankapondo muyake emuzuzula kuti: “Kansi uyopa lini Mulungu, poona kuti nawe ulandila cilango colingana na ca munthu uyu? 41 Seo, n’poyenelela kulandila cilango ici cifukwa tulandila zetenzofunika kulandila mokatizhyana na zetecita. Koma munthu uyu aliyolakwe ciliconse.” 42 Pavuli pake, ekamba kuti: “Yesu mukanikumbukile mukayoloŵa mu Ufumu wanu.” 43 Yesu emuyankha kuti: “Kulaŵila cendi nukuuzhya lelo, kuti ukankhale na neo m’Paladaiso.”
44 Apa n’kuti nthawi ili ca ma 12 awazi,* koma m’calo conse mwecita mfinzi mpaka ca m’ma 15 awazi,* 45 cifukwa zuŵa yecita mfinzi. Pa nthawi yamene iyi, ketani ya m’malo opatulika yeng’ambika pakati kucokela palulu mpaka pansi. 46 Pavuli pake, Yesu ekuwa mwamphamvu kuti: “Atata, nusiya mzimu wangu m’manja mwanu!” Pecilaŵila izi, esilizhyika. 47 Peciona zecitika, mkulu wa masoja eyamba kutamanda Mulungu kuti: “Kulaŵila cendi, munthu uyu enze wolungama.” 48 Ŵanthu onse amene enze esonkhana uku kuti aonelele venzocitika, peciona vonse vecitika, ewelela kwao apo n’kuti oziniata pa nganga. 49 Ŵanthu onse amene enzomuziŵa epanama capatali. Kuyangizhyila apo, nao anakazi amene enze emukonkha kucokela ku Galileya, enzepo ndipo eona pevenzocitika vinthu ivi.
50 Penze munalume muyakine wa zina yakuti Yosefe, wamene enze wa m’Khoti Ikulu ya Ayuda. Munthu uyu enze muweme mtima koma soti wolungama. 51 (Yove aliyovomekezhyeko za ciwembu cao koma soti vecicita.) Yosefe enze wa ku Arimateya mzinda wa ku Yudeya ndipo enzoyembekezela Ufumu wa Mulungu. 52 Yove eluta kuli Pilato na kuyosenga mtembo wa Yesu. 53 Tetyo, euselusha nouvunga mu nyula yabwino ngako, ndipo eciyouika m’manda* yamene enze eyagoba m’cimwala. M’manda umu enze akaliyoikamo munthu aliyense. 54 Siku iyi yenze siku Yokonzekela, ndipo Sabata yenze yesala patontho kuti iyambe. 55 Koma anakazi amene ewela pamozi na Yesu kucoka ku Galileya, emukonkha ndipo eona m’manda* mwecimuika koma soti mweciikila mtembo wake. 56 Pavuli pa izi, ewelela na kuyokonza zonunkhilisha na mafuta onunkhila. Koma pa siku ya Sabata epumula mokatizhyana na cilamulo.