Uthenga Wabwino Wolembewa na Luka
3 M’caka ca 15 ca ulamulilo wa Kaisara Tiberiyo, Pontiyo Pilato enze bwanamkubwa wa Yudeya. Herode* enze wolamulila cigao* ca Galileya. Mkwake Filipo enze wolamulila cigao ca madela a Itureya na Tirakoniti. Ndipo Lusaniyo enze wolamulila cigao ca Abilene. 2 M’masiku amene ao, Anasi enze wansembe mkulu ndipo Kayafa enze mkulu wa ansembe. Pa nthawi iyi, mau a Mulungu efwika kwa Yohane apo n’kuti ali m’cipululu. Yohane enze mwana wa Zekariya.
3 Tetyo, yove eluta m’madela ozungulila Yorodano ndipo enzolalikila za ubatizo monga cizindikilo ca kulapa kuti macimo akhululukiwe. 4 Ecita izi mokatizhyana na zelembewa m’buku mwamene muli mau ya mneneli Yesaya kuti: “M’cipululu mwemvwika mau okuwa akuti: ‘Konzani njila ya Yehova! Pangani njila zake kunkhala zasiteleti. 5 Cigwa ciliconse cifwikiliwe, ndipo lupili iliyonse na mtunthu uliwonse visalazhyiwe. Njila zobenda zinkhale zasiteleti ndipo malo okumbikakumbika ankhale osalazhyiwa bwino. 6 Ŵanthu onse akaone njila ya Mulungu yopulumusila ŵanthu.’”
7 Tetyo, eyamba kuuzhya ŵanthu amene enzowela kuli yove kuti aŵabatize kuti: “Mweo ŵana a njoka, kansi ni ŵani wakucenjezhyani kuti muthaŵe ukali wamene ukuza? 8 Citani zinthu zoonesha kulapa. Osazipusisha poziuzhya kuti, ‘Nise ŵana ŵa Abulahamu.’ Cifukwa nukuuzhyani kuti Mulungu angakwanishe kupangila Abulahamu ŵana kufumila ku miyala iyi. 9 Kulaŵila cendi, katemo kaikiwa kale pa mizhyu ya vimiti. Tetyo, cimuti ciliconse camene cutwala lini vipaso vabwino, cikatendewe noponyewa pa mulilo.”
10 Ndipo gulu ya ŵanthu yenzomukonsha kuti: “Lomba kansi tufunika kucita cinji?” 11 Yove enzoŵayankha kuti: “Munthu wamene ali na vovwala viŵili apaseko munthu wamene aliye. Ndipo ula wamene ali na cakulya acite soti cimozimozi.” 12 Nao osonkhesha misonkho eluta kuli yove kuti abatiziwe, ndipo emukonsha kuti: “Mphunzisi, kansi tufunika kucita cinji?” 13 Yove eŵayankha kuti: “Osati mukolipilisha ŵanthu ndalama zinyinji kupambana mtengo wenewene wa msonkho.” 14 Kuyangizhyila apo, masoja enzomukonsha kuti: “Kansi tufunika kucita cinji?” Ndipo yove enzoŵauzhya kuti: “Osati mukovutisha ŵanthu kapena kuimba aliyense mlandu wawenye. Koma mukokhutila na vinthu vamupasiwa.”*
15 Ŵanthu enzoyembekezela Khristu ndipo onse enzozikonsha m’mitima yao zokhuza Yohane kuti, “Kansi wamene uyu niye lini Khristu?” 16 Yohane eyankha ŵanthu onse kuti: “Neo nukubatizani na manzi. Koma muyakine wamphamvu ngako kupambana neo akuza ndipo n’ne wosayenelela kumasula nthambo za masanda* ŵake. Yove akakubatizeni na mzimu utuŵa koma soti mulilo. 17 Fosholo yake youluzila mungu ili m’manja mwake kuti atuŵishe ngako malo ŵake opunthilapo mbeu. Akaike witi m’cimphaka koma mungu akaushoke pa mulilo wamene ungazimyiwe lini.”
18 Epeleka soti malangizo ayakine anyinji ndipo epitilizhya kulengeza uthenga wabwino ku ŵanthu. 19 Koma pofwana kuti Yohane ezuzula Herode wamene enze wolamulila cigao pa nkhani yokhuza Herodiya mkazi wa mkwake koma soti cifukwa ca vinthu viipa vecicita Herode, 20 Herode ecita soti cinthu ciyakine ciipa: Yove eika Yohane m’jele.
21 Ŵanthu onse peenzobatiziwa, naye Yesu ebatiziwa. Peenzopemphela, kululu kweseguka, 22 ndipo mzimu utuŵa wooneka monga ni nkhunda wewela pali yove nomundata. Kululu kwemvwika mau akuti: “Niwe Mwana wangu wanukonda, nukondwela nawe.”
23 Yesu peenzoyamba nchito yake enze na vyaka pafupifupi 30. Ŵanthu enzoziŵa kuti Yesu enze,
mwana wa Yosefe,
mwana wa Heli,
24 mwana wa Matati,
mwana wa Levi,
mwana wa Meliki,
mwana wa Yananai,
mwana wa Yosefe,
25 mwana wa Matatiyo,
mwana wa Amosi,
mwana wa Nahumu,
mwana wa Esili,
mwana wa Nagai,
26 mwana wa Maati,
mwana wa Matatiyo,
mwana wa Semeini,
mwana wa Yoseki,
mwana wa Yoda,
27 mwana wa Yoanani,
mwana wa Resa,
mwana wa Zerubabele,
mwana wa Salatiyeli,
mwana wa Neri,
28 mwana wa Meliki,
mwana wa Adi,
mwana wa Kosamu,
mwana wa Elimadama,
mwana wa Ere,
29 mwana wa Yesu,
mwana wa Eliezere,
mwana wa Yorimu,
mwana wa Matati,
mwana wa Levi,
30 mwana wa Sumiyoni,
mwana wa Yudasi,
mwana wa Yosefe,
mwana wa Yonamu,
mwana wa Eliyakimu,
31 mwana wa Meleya,
mwana wa Mena,
mwana wa Matata,
mwana wa Natani,
mwana wa Davide,
32 mwana wa Jese,
mwana wa Obedi,
mwana wa Boazi,
mwana wa Salimoni,
mwana wa Nasoni,
33 mwana wa Aminadabu,
mwana wa Arini,
mwana wa Hezironi,
mwana wa Perezi,
mwana wa Yuda,
34 mwana wa Yakobo,
mwana wa Isaki,
mwana wa Abulahamu,
mwana wa Tera,
mwana wa Nahori,
35 mwana wa Serugi,
mwana wa Reu,
mwana wa Pelegi,
mwana wa Ebere,
mwana wa Shela,
36 mwana wa Kainani,
mwana wa Aripakisadi,
mwana wa Semu,
mwana wa Nowa,
mwana wa Lameki,
37 mwana wa Metusela,
mwana wa Inoki,
mwana wa Yaredi,
mwana wa Mahalaliyeli,
mwana wa Kainani,
38 mwana wa Enosi,
mwana wa Seti,
mwana wa Adamu,
mwana wa Mulungu.