Uthenga Wabwino Wolembewa na Mateyo
20 “Ufumu wa kululu uli monga ni munthu wamene enze na munda wa mpesa. Munthu uyu euka m’mamawa kuyosakila anchito kuti akaseŵenze m’munda wake. 2 Pavuli pakuti wapangana na anchito kuti aŵalipile dinari imozi pa siku, eŵatumizhya ku munda wake wa mpesa. 3 Ca m’ma 9 awazi,* eluta soti kuyosakila anchito ayakine ndipo eona ŵanthu amene enze peneme pa maketi, ndipo enzeve cocita. 4 Eŵauzhya kuti, ‘Namwe nkhoyani m’munda wa mpesa ndipo nikupaseni malipilo oyenelela.’ 5 Ove eluta. Ca m’ma 12 awazi koma soti m’ma 15 awazi,* yove eluta soti kuyosakila anchito. 6 Posilizhyila pake, eluta soti ca m’ma 17 awazi,* ndipo epeza ŵanthu amene enze peneme. Yove eŵakonsha kuti, ‘Ndaŵa yanji mwapanama pano siku yonse osakata nchito?’ 7 Ove emuyankha kuti, ‘N’cifukwa cakuti paliye munthu watilemba nchito.’ Yove eŵauzhya kuti, ‘Namwe, nkhoyani m’munda wa mpesa.’
8 “M’cingulo nthawi peifwika yakuti anchito alandile malipilo, mwineco wa munda wa mpesa euzhya woyanganila anchito kuti, ‘Ita anchito kuti uŵapase malipilo ŵao, uyambilile na osilizhyila nosilizhyila na oyambilila.’ 9 Anchito amene eyamba kuseŵenza na 17 awazi peciwela, aliyense emupasa malipilo a dinari imozi. 10 Tetyo, ŵala amene enze oyamba peciwela, eganiza kuti alandile malipilo anyinji, koma nao epasiwa malipilo a dinari imozi aliyense. 11 Pecilandila malipilo ŵao, ove eyamba kudandaulila mwineco wa munda 12 kuti, ‘Ayasu awela mocelwa ngako ndipo angoseŵenza tyala awa imozi, koma mwaŵapasa malipilo olingana na yasu amene taseŵenza siku yonse pa zuŵa. 13 Mwineco wa munda eyankha m’mozi mwa anyanchito aŵa kuti, ‘Shamwali, niliyokulakwile ciliconse. Kansi tiliyopangane kuti nikupase malipilo a dinari imozi? 14 Tola malipilo ŵako noyambako. Nufuna kuti nipase soti muyako wosilizhyila malipilo yolingana na yanakupasa. 15 Kansi niliye ufulu woseŵenzesha cuma cangu mwanufunila? Olo kapena linso yako yacita nsanje* cifukwa cakuti n’ne wabwino?’* 16 Molingana na izi, osilizhyila akankhale oyambilila ndipo oyambilila akankhale osilizhyila.”
17 Peenzokuya ku Yerusalemu, Yesu etola ophunzila ŵake 12 noluta nao kwaŵeka ndipo eŵauzhya kuti: 18 “Lomba, tikuya ku Yerusalemu, ndipo Mwana wa munthu akapelekewe m’manja mwa ansembe akulu na alembi. Ove akamuweluze kuti apaiwe. 19 Ndipo akamupeleke m’manja mwa ŵanthu a mitundu iyakine kuti akamunyoze, kumukwapula koma soti kumupacika pa cimuti. Koma pa siku yacitatu akaukishiwe.”
20 Pavuli pake, mkazi wa Zebedayo na ŵana ŵake aŵili analume eluta kuli Yesu nomugwadila ndipo emusenga cinthu ciyakine. 21 Yove ekonsha munakazi uyu kuti: “Kansi mufuna cinji?” Munakazi uyu eyankha kuti: “Lonjezani kuti ŵana ŵangu aŵa akankhale m’mozi ku kwanja yanu yamalendi, ndipo muyakine ku kwanja yanu yamanjele mu Ufumu wanu.” 22 Yesu eyankha kuti: “Muziŵa lini vamusenga. Kansi mungakwanishe kumwa vanasala patontho kumwa?” Ove eyankha kuti: “Eee, tingakwanishe.” 23 Yove eŵauzhya kuti: “Mukamwe cendi vanasala patontho kumwa. Koma n’ne wosayenelela kusankha wati akankhale ku kwanja yangu yamalendi kapena ku kwanja yangu yamanjele. Atata akapeleke mwai uyu kuli ŵecikonzela.”
24 Ophunzila ayakine 10 peecimvwa izi, ekalipa ngako na zecicita analume aŵa aŵili amene enze pokwao. 25 Koma Yesu eŵaita noŵauzhya kuti: “Mweo muziŵa kuti olamulila a ŵanthu a mitundu iyakine okandikizhya ŵanthu ŵao. Ndipo analume akulu-akulu oonesha mphamvu zao pali ŵanthu aŵa. 26 Umu niye lini mwazufunikila kunkhalila pakati panu. Koma aliyense wamene ofuna kunkhala mkulu pakati panu, ofunika kunkhala mtumiki wanu. 27 Ndipo aliyense wamene ofuna kunkhala woyamba pakati panu, ofunika kunkhala kapolo wanu. 28 Izi niye zecicita Mwana wa munthu. Yove aliyowele kuzotumikiliwa koma kuzotumikila nopeleka moyo wake monga dipo kuti aombole ŵanthu anyinji.”
29 Peenzocoka mu Yeriko, gulu ikulu ya ŵanthu yemukonkha. 30 Tetyo analume aŵili amene enzololesha lini enze nkhezi m’mbali mwa njila. Peecimvwa kuti Yesu opita, ove ekuwa kuti: “Ambuye, Mwana wa Davide, ticitileni cifundo!” 31 Koma gulu ya ŵanthu yeŵakalipila noŵauzhya kuti ankhale celele. Koma ove ndiye pecikuwa ngako kuti: “Ambuye, Mwana wa Davide, ticitileni cifundo!” 32 Tetyo, Yesu epanama noŵaita ndipo eŵakonsha kuti: “Kansi mufuna nikucitileni cinji?” 33 Ove emuyankha kuti: “Ambuye, tiyavyeni kuti tiyambe kulolesha.” 34 Yesu eŵamvwila cifundo ndipo ekata menso yao. Nthawi yamene iyo, ŵanthu aŵa eyamba kulolesha ndipo emukonkha.