Uthenga Wabwino Wolembewa na Luka
1 Ŵanthu anyinji ayesayesa kulemba nkhani yofotokoza zocitika zenezene zamene seo tonse tuzikhulupilila. 2 Ove elemba ndendende monga ni mwecitiuzhyila ŵanthu amene kucokela pa ciyambi, enze mboni zamene zeona na menso koma soti atumiki a uthenga wamene uyo. 3 Pofwana kuti nafufuza vinthu vonse mosamala ngako kufumila pa ciyambi, nane nasimikizhyila kuti nikulembeleni mwandondomeko, mweo olemekezeka ngako, a Teofilo. 4 Nacita izi na colinga cakuti muziŵe kuti vinthu vecikuphunzisani na mau apakamwa, ni vodalilika.
5 M’nthawi ya Herode, mfumu ya Yudeya, kwenze wansembe muyakine wa zina yakuti Zekariya wamene enze m’gulu ya ansembe ya Abiya. Mkazi wake enzofumila m’banja ya Aroni ndipo zina yake enze Elizabeti. 6 Onse aŵili enze olungama pamenso pa Mulungu cifukwa enzoyenda mokhulupilika, mokatizhyana na malamulo onse koma soti enzocita vonse vecenzofuna cilamulo ca Yehova. 7 Koma enzeve mwana cifukwa Elizabeti enze cumba ndipo onse aŵili enze akulukazi.
8 Siku iyakine, Zekariya enzotumikila monga wansembe pamenso pa Mulungu popanamilako gulu yake ya ansembe. 9 Yove enzocita izi mokatizhyana na zeenzocita ansembe nthawi zonse. Ndipo yenze nthawi yakuti aloŵe m’ng’anda yopatulika ya Yehova kuti akapeleke nsembe zoshoka. 10 Ndipo gulu yonse ya ŵanthu yenzopemphela panja, pa nthawi yamene yove enzopeleka nsembe izi. 11 Mngelo wa Yehova eonekela kuli yove ndipo enze epanama ku mbali yamalendi ya guwa ya nsembe zoshoka. 12 Koma Zekariya pecimuona, evutika mu mtima ndipo ecita wowa ngako. 13 Mngelo ula emuuzhya kuti: “Usacite wowa Zekariya cifukwa pemphelo yako yopapatila yamvwika. Mkazi wako Elizabeti akakuvyalile mwana munalume ndipo ukamuteye zina yakuti Yohane. 14 Ukasangalale koma soti ukakondwele ngako. Ndipo ŵanthu anyinji akasangalale na kuvyalika kwake, 15 cifukwa akankhale mkulu pamenso pa Yehova. Koma osati akamwe waini olo patontho kapena cakumwa ciliconse cokolwesha. Ndipo akankhale na mzimu utuŵa olo akaliyovyalika. 16 Yove akayavye Aisiraeli anyinji kuti alape noyamba soti kumvwila Yehova Mulungu wao. 17 Kuyangizhyila apo, akatangule monga wokonza njila wa Mulungu apo n’kuti ali na mzimu koma soti mphamvu monga ni za Eliya. Yove akatembenule mitima ya atata kuti inkhale monga ni ya ŵana. Ndipo ŵanthu osamvwila, akaŵayavye kupeza nzelu yeneyene ya ŵanthu olungama. Akacite izi kuti asonkhanishe ŵanthu amene akonzekela kutumikila Yehova.”
18 Koma Zekariya ekonsha mngelo ula kuti: “Kansi ningasimikizhyile tyani kuti zamwalaŵila zikacitike cendi? Cifukwa n’ne mkulukazi ndipo naye mkazi wangu ni mkulukazi.” 19 Mngelo ula emuyankha kuti: “N’ne Gabirieli ndipo nupanama pamenso pa Mulungu. Yove wanituma kuti nizelaŵile nawe nokuuzhya uthenga uyu wabwino. 20 Lomba mvwaya, unkhale celele ndipo ukokwanisha lini kulaŵila mpaka pati vikacitike vinthu ivi cifukwa uliyokhulupilile mau ŵangu ŵati akakwanilishiwe pa nthawi yake yoikika.” 21 Pa nthawi iyi n’kuti ŵanthu akaluyembekezela Zekariya ndipo edabwa cifukwa cakuti ecelwa ngako m’ng’anda yopatulika. 22 Pecifuma, enzokwanisha lini kulaŵila nao ndipo ŵanthu aŵa ezindikila kuti waona vinthu vodabwisa* m’ng’anda yopatulika. Yove enzolaŵila nao poseŵenzesha manja ndipo epitilizhya kukangiwa kulaŵila. 23 Masiku ŵake ocita utumiki wopatulika peyesila, yove eluta kwao.
24 Pavuli pa masiku atontho, mkazi wake Elizabeti enkhala na vumo ndipo enzocoka lini pa ng’anda kwa miyezi 5. Yove elaŵila kuti: 25 “Izi niye zawanicitila Yehova masiku ŵano. Yove wanikumbukila kuti acose kunyozeka kwangu pamenso pa ŵanthu.”
26 Vumo ya Elizabeti peyekwanisha miyezi 6, Mulungu etuma mngelo Gabirieli ku mzinda uyakine wa ku Galileya, woitiwa kuti Nazareti. 27 Emutuma kuli msimbi muyakine wa zina yakuti Mariya wamene enze ndola. Msimbi uyu enze pa citomelo na munalume muyakine wa zina yakuti Yosefe wamene enze wa m’ng’anda ya Davide. 28 Mngelo pecifwika kuli msimbi uyu, emuuzhya kuti: “Uli tyani, weo munthu wodalisika ngako? Yehova ali nawe.” 29 Koma yove edabwa ngako na mau a mngelo ndipo eyamba kuganizila kuti moni uyu wenze wa mtundu wanji. 30 Tetyo, mngelo uyu emuuzhya kuti: “Usacite wowa Mariya, cifukwa Mulungu wakuwamila mtima. 31 Lomba mvwaya, ukankhale na vumo ndipo ukavyale mwana munalume. Mwana uyu ukamuteye zina yakuti Yesu. 32 Yove akankhale mkulu ndipo akoitiwa kuti Mwana wa Wapalulu Ngako. Yehova Mulungu akamupase mpando wacifumu wa Davide ausuwake. 33 Yove akalamulile monga mfumu pa ng’anda ya Yakobo mpaka kale-kale ndipo Ufumu wake ukasile lini.”
34 Koma Mariya ekonsha mngelo ula kuti: “Pofwana kuti nikaliyolalanapo na munalume, kansi izi zikakwanishike tyani?” 35 Mngelo ula eyankha Mariya kuti: “Mzimu utuŵa ukawele pali weo ndipo mphamvu ya Wapalulu Ngako ikankhale pali weo. Cifukwa ca izi, wati akavyalike akaitiwe kuti mtuŵa, Mwana wa Mulungu. 36 Ndipo m’bululu wako Elizabeti wamene ŵanthu omukamba kuti ni cumba, naye ali na vumo ya miyezi 6 ndipo akavyale mwana munalume olo kuti ni mkulukazi. 37 Cifukwa zilizonse zawalaŵila Mulungu zukwanishika.” 38 Mariya elaŵila kuti: “N’ne kapolo wa Yehova. Lekani kuti zamwakamba, zicitike kuli neo.” Pavuli pake, mngelo ula eluta.
39 Tetyo m’masiku amene ao, Mariya enyamuka kamangu-kamangu noluta ku dela ya malupili mu mzinda uyakine wa fuko ya Yuda. 40 Kwamene uku, eloŵa m’ng’anda ya Zekariya ndipo epasa moni Elizabeti. 41 Elizabeti peecimvwa moni wa Mariya, mwana wamene enze m’mala mwake elumpha ndipo mzimu utuŵa weyamba kukata nchito pali Elizabeti. 42 Tetyo, ekuwa mwamphamvu kuti: “Niwe wodalisika ngako pa anakazi onse, ndipo naye mwana wati ukavyale ni wodalisika! 43 Koma kansi zakwanishika tyani kuti ninkhale na mwai uyu wakuti amai ŵao ŵa Ambuye ŵangu awele kuli neo? 44 Cifukwa panamvwa moni wako, mwana ali m’mala mwangu walumpha mwacimwemwe. 45 Niwe wosangalala cifukwa wekhulupilila ndipo zonse zeweuzhyiwa kufumila kuli Yehova, zikakwanilishiwe.”
46 Tetyo, Mariya elaŵila kuti: “Moyo wangu ulemekeza Yehova. 47 Ndipo mtima wangu* uli na cimwemwe cikulu ngako cifukwa ca Mulungu Mpulumusi wangu, 48 wamene waona malo apansi a kapolo wake munakazi. Ndipo kuyambila lomba kuluta msogolo, mibadwo yonse ikoniita kuti wosangalala. 49 Zili teti cifukwa Wamphamvu wanicitila vinthu vikulu ndipo zina yake ni ituŵa. 50 Ku mibadwo-mibadwo, yove ocitila cifundo ŵanthu amene omuyopa. 51 Wacita vinthu vamphamvu na kwanja yake ndipo wamwazhya ŵanthu amene ni olikuzhya m’mitima yao. 52 Waselusha ŵanthu amphamvu pa mipando yao yacifumu ndipo waika palulu ŵanthu onyozeka. 53 Wakutisha ŵanthu anjala na vinthu vabwino koma ŵala amene enze na cuma waŵapitikisha cimanjamanja. 54 Yove wayavya mtumiki wake Isiraeli pokumbukila lonjezo yake yakuti akamuoneshe cifundo 55 kwamuyaya mokatizhyana na zeciuzhya makolo ŵasu akale, Abulahamu na mbadwa* zake.” 56 Mariya enkhala na Elizabeti pafupifupi miyezi itatu. Pavuli pake, ewelela kwao.
57 Nthawi yakuti Elizabeti ankhale na mwana yekwana ndipo evyala mwana munalume. 58 Maneba ŵake koma soti abululu ŵake ecimvwa kuti Yehova wamucitila cifundo cikulu ndipo esangalalila naye pamozi. 59 Pa siku ya namba 8, ove eluta kuyocita mdulidwe wa mwana ula koma soti enzofuna kumuteya zina ya ausuwake yakuti Zekariya. 60 Koma amai ŵake eyankha kuti: “Osati iyo. Zina yake ankhale Yohane.” 61 Peecimvwa izi, ove emuuzhya kuti: “Paliye m’bululu wako aliyense wamene ali na zina iyi.” 62 Pavuli pake, ekonsha ausuwake poseŵenzesha manja, zina yeenzofuna kuteya mwana uyu. 63 Tetyo, Zekariya esenga pati alembe ndipo elembapo kuti: “Zina yake ni Yohane.” Peciona izi, onse edabwa ngako. 64 Nthawi yamene iyo, pakamwa pake peseguka ndipo lilime yake yemasuka cakuti eyamba kulaŵila notamanda Mulungu. 65 Ŵanthu onse amene enzonkhala m’dela iyi, ecita wowa ndipo nkhani iyi yenze paliponse m’dela yonse ya malupili ku Yudeya. 66 Onse amene ecimvwa izi, ezisunga m’mitima yao ndipo enzozikonsha kuti: “Kansi mwana uyu akankhale munthu wotyani?” Cifukwa kwanja ya Yehova yenze cendi pali yove.
67 Pavuli pake, mzimu utuŵa weyamba kukata nchito pali Zekariya ausuwake a mwana ula ndipo elosela kuti: 68 “Atamandike Yehova Mulungu wa Isiraeli cifukwa wakumbukila ŵanthu ŵake noŵaletela cipulumuso. 69 Yove watiimyila nsengo ya cipulumuso* m’ng’anda ya mtumiki wake Davide, 70 mokatizhyana na zecilaŵila kupitila muli aneneli ŵake atuŵa akale. 71 Yove elaŵila kuti akatipulumuse kuli adani ŵasu koma soti m’manja mwa ŵanthu onse amene otizonda. 72 Akakwanilishe zecilonjeza makolo ŵasu akale ndipo akaŵaoneshe cifundo. Yove akakumbukile pangano yake ituŵa, 73 lumbilo yecilumbilila kolo yasu Abulahamu, 74 yakuti pavuli pakuti watipulumusa m’manja mwa adani, akatipase mwai wocita utumiki wopatulika kuli yove motang’a mtima, 75 mokhulupilika koma soti mwacilungamo pamenso pake masiku onse a moyo wasu. 76 Koma pokamba za weo mwanawe, ukaitiwe kuti mneneli wa Wapalulu Ngako cifukwa ukatangule pamenso pa Yehova kuti ukakonze njila zake. 77 Kuyangizhyila apo, ukayavye ŵanthu ŵake kuziŵa za cipulumuso cati cikakwanishike macimo ŵao akayokhululukiwa, 78 cifukwa ca cifundo cikulu ca Mulungu wasu. Na cifundo ici, kuwala kwa m’mawa kukatifwikile kufumila kululu. 79 Ndipo kukasanikile ŵanthu amene ali mu mfinzi koma soti m’cimvwilimvwili ca imfwa nosogolela mendo ŵasu pa njila yamtendele.”
80 Tetyo, mwana ula ekula ndipo etang’a mwauzimu. Yove epitilizhya kunkhala m’cipululu mpaka pa nthawi yecizionesha patuŵa kuli Aisiraeli.