Uthenga Wabwino Wolembewa na Mateyo
7 “Lekani kuweluza ayakine kuti namwe musaweluziwe. 2 Cifukwa mwamuweluzila ayakine, namwe akakuweluzeni tetyo. Ndipo mpimo wamupimilamo ayakine, namwe akakupimileni wamene uyo. 3 Ndaŵa yanji ulolesha ciswaswa cili mu linso ya mkwako nokangiwa kuona nsondo ya ng’anda ili mu linso yako? 4 Olo kansi ungauzhye tyani mkwako kuti, ‘Leka nikucose ciswaswa cili mu linso yako,’ pamene mu linso yako muli nsondo ya ng’anda? 5 Weo munthu wacinyengo, coyamba cosa nsondo ya ng’anda ili mu linso yako, kuti uone bwino mwaungacosele ciswaswa cili mu linso ya mkwako.
6 “Osapasa imbwa vinthu vopatulika kapena kuponyela nkhumba ngale zanu, kuyopela kuti zingavikandekande ndipo pavuli pake, zingakuukileni nokukhazulani.
7 “Pitilizhyani kusenga ndipo akupaseni, pitilizhyani kusakila ndipo mupeze, pitilizhyani kugogoda ndipo akusegulileni. 8 Cifukwa aliyense wamene osenga opasiwa, aliyense wamene osakilasakila opeza ndipo aliyense wamene ogogoda omusegulila. 9 Ni ŵani wa mweo, wamene angapase mwana wake mwala koma wamusenga buledi? 10 Olo kumupasa njoka pavuli pakuti wamusenga nsomba? 11 Tetyo, ngati mweo amene nimwe ŵanthu aipa mukwanisha kupasa ŵana ŵanu mphaso zabwino, nanga tyani ponena za Ausuwanu a kululu? Mosakaikila ove opeleka vinthu vabwino kuli ŵanthu amene omusenga.
12 “Tetyo, vinthu vonse vamufuna kuti ŵanthu akucitileni, namwe mukoŵacitila vamene ivo. Cifukwa izi niye zukambiwa mu Cilamulo na m’Mau ŵa Aneneli.
13 “Loŵani pa kageti katontho, cifukwa mseu ukulu ukuya ku cionongeko koma soti geti yake ni ikulu ndipo ŵanthu anyinji oloŵa pa geti yamene iyi. 14 Koma kageti katontho kamene kotwala ŵanthu ku moyo, kali na mseu utontho ndipo ni ŵanthu atontho okapeza.
15 “Cenjelani na aneneli awenye amene akuza kuli mweo apo n’kuti oonesha minkhalidwe monga ni ya mbelele, koma mkati ali monga ni mimbulu yolusa. 16 Mukaŵaziŵe cifukwa ca nchito zao. Kansi munthu angathyole mphesa pa minga, kapena angathyole nkhuyu mu cimuti ca minga? 17 Tetyo, cimuti ciliconse cabwino cutwala vipaso vabwino, koma cimuti ciliconse ciipa cutwala vipaso viipa. 18 Cimuti cabwino cingatwale lini vipaso viipa, ndipo cimuti ciipa cingatwale lini vipaso vabwino. 19 Cimuti ciliconse camene cutwala lini vipaso vabwino, cutendewa noponyewa pa mulilo. 20 Kulaŵila cendi, mukazindikile ŵanthu amene aŵa cifukwa ca vocita vao.
21 “Ni onse lini okamba kuti: ‘Ambuye, Ambuye,’ ŵati akaloŵe mu Ufumu wa kululu, koma ni ŵala tyala ocita cifunilo ca Atata a kululu. 22 Pa siku yamene iyo ŵanthu anyinji akalaŵile kuti: ‘Ambuye, Ambuye, kansi tiliyolosele m’zina yanu, kucosa viŵanda m’zina yanu, koma soti kucita nchito zinyinji zamphamvu m’zina yanu?’ 23 Koma neo nikaŵayankhe kuti: ‘Nukuziŵani lini! Cokani pamenso pangu mweo ŵanthu osamvwila malamulo!’
24 “Tetyo, munthu aliyense wamene akumvwa mau ŵangu noŵakonkha, ankhale monga ni munthu wanzelu wamene emanga ng’anda yake pa mwala. 25 Ndipo kwelokwa cimvula cikulu, manzi yesefukila koma soti kwewela cimphepo camphamvu nochaya ng’anda iyi, koma iliyopone cifukwa cakuti yemangiwa pa mwala. 26 Aliyense wamene akumvwa mau ŵangu koma osaŵakonkha, ankhale monga ni munthu wopusa wamene emanga ng’anda yake pa misece. 27 Ndipo kwelokwa cimvula cikulu, manzi yesefukila ndipo cimphepo camphamvu cechaya ng’anda iyi ndipo yepona. Kupona kwake kwenze kukulu ngako.”
28 Yesu pecisilizhya kulaŵila mau aŵa, gulu ya ŵanthu yedabwa ngako na kaphunzisidwe kake. 29 Cifukwa enzophunzisa monga munthu waulamulilo, osati monga ni mweenzophunzisila alembi ŵao.