Uthenga Wabwino Wolembewa na Luka

22 Cikondwelelo ca Buledi Iliye Vofufumisha camene cuitiwa soti kuti Pasika cenze cesala patontho kucitika. 2 Ndipo ansembe akulu na alembi enzosakila njila yabwino yakuti apailemo Yesu cifukwa enzoyopa ŵanthu. 3 Pavuli pake, Satana eloŵa muli Yudasi wamene enzoziŵika kuti Isikariyoti wamene enze m’mozi mwa ophunzila 12. 4 Yove eluta kuyolaŵizhyana na ansembe akulu na oyanganila kacisi zokhuza mwaangapelekele Yesu kuli ove. 5 Ove esangalala ngako peecimvwa izi, ndipo ekatizhyana kuti amupase ndalama zasiliva. 6 Tetyo, yove evomela ndipo eyamba kusakila mpata wabwino wakuti amupelekelemo kuli ove paliye gulu ya ŵanthu.

7 Siku ya Cikondwelelo ca Buledi Iliye Vofufumisha yefwika. Pa siku iyi, nsembe ya Pasika yenzofunika kupelekewa. 8 Tetyo, Yesu etuma Petulo na Yohane ndipo eŵauzhya kuti: “Nkhoyani mukatikonzele Pasika kuti tilye.” 9 Ove emukonsha kuti: “Kansi mufuna kuti tikakukonzeleni kuni?” 10 Yove eŵauzhya kuti: “Mukaloŵa mu mzinda, mukakumane na munalume muyakine wamene wanyamula nongo ya manzi. Mukamukonkhe, mpaka mu ng’anda mwati akaloŵe. 11 Ndipo mukauzhye mwineco wa ng’anda yamene iyo kuti: ‘Mphunzisi watituma kuti tizekukonsheni kuti: “Kansi cipinda ca alwendo cili kuni caningalyelemo Pasika neo na ophunzila ŵangu?”’ 12 Yove akakuonesheni cipinda cikulu capalulu koma soti cokonzewa bwino. Mukakonze Pasika m’cipinda camene ico.” 13 Tetyo, eluta ndipo zecitika ndendende monga ni mweciŵauzhyila Yesu. Ndipo ove ekonza vinthu vonse vofunikila pa Pasika.

14 Nthawi peyekwana, yove eyamba kulya cakulya pa thebo pamozi na atumwi ŵake. 15 Ndipo eŵauzhya kuti: “Nenzofunishisha ngako kulya Pasika uyu pamozi na mweo nikaliyoyamba kunzunziwa. 16 Cifukwa nukuuzhyani kuti nikalye lini soti Pasika mpaka vonse vaupanamila Pasika uyu vikakwanilishiwe mu Ufumu wa Mulungu.” 17 Pavuli pake, elandila kapu noyamika, ndipo elaŵila kuti: “Aneni kapu iyi, mupasilane ndipo monse mumwe. 18 Cifukwa nukuuzhyani kuti kuyambila lomba nikamwe lini soti cakumwa ciliconse cocokela ku mphesa mpaka Ufumu wa Mulungu ukawele.”

19 Kuyangizhyila apo, etola buledi, ndipo pavuli poyamika eisunasuna noŵapasa. Ndipo eŵauzhya kuti: “Buledi iyi, yupanamila muŵili wangu wati upelekewe cifukwa ca mweo. Mukocita izi ponikumbukila.” 20 Pavuli pakulya cakulya ca m’cingulo, ecita soti cimozimozi na kapu. Yove eŵauzhya kuti: “Kapu iyi yupanamila pangano yalomba yamene yenkhazikishiwa poseŵenzesha milopa yangu yati itaike cifukwa ca mweo.

21 “Koma onani! Wonipeleka nili naye pamozi pamene pano pa thebo. 22 Cifukwa Mwana wa munthu akuya mokatizhyana na zelaŵiliwa. Koma soka kuli munthu wati amupeleke.” 23 Tetyo, ove eyamba kukambilana pakati pao kuti ni ŵani makamaka enzofuna kucita izi.

24 Pavuli pake, eyamba kukangana ngako pa nkhani yakuti mkulu ngako ni ŵani pakati pao. 25 Koma yove eŵauzhya kuti: “Mafumu a ŵanthu a mitundu iyakine okandikizhya ŵanthu ŵao ndipo ŵala amene ali na ulamulilo pali ove, oziŵika kuti ni ŵanthu amene ocitila ŵanthu ayakine vinthu viweme. 26 Koma mweo mufunika lini kunkhala teti. M’malo mwake, wamene ni mkulu ngako pakati panu ofunika kunkhala monga ni mtontho ngako, ndipo wamene osogolela ofunika kunkhala monga ni wotumikila. 27 Kansi mkulu ni ŵani pali ula wamene akulya pa thebo kapena ula wamene otumikila? Kansi ni ula lini wamene akulya pa thebo? Koma neo nili pakati panu monga wotumikila.

28 “Olo n’tetyo, mweo niye mwankhala nane m’mayeselo ŵangu. 29 Ndipo nucita namwe pangano monga ni mwamene Atata ecitila pangano ya Ufumu na neo 30 kuti mukalye na kumwa pa thebo yangu mu Ufumu wangu koma soti kuti mukankhale pa mipando yacifumu kuweluza mafuko 12 ya Isiraeli.

31 “Simoni, Simoni! Satana ofuna kuti mweo monse akusefeni monga ni witi. 32 Koma neo nakupemphelela mopapatila kuti cikhulupililo cako cisafoke. Tetyo ukawelela, ukatang’ishe akwako.” 33 Pavuli pake, Petulo euzhya Yesu kuti: “Ambuye, n’ne wokonzeka kulutila namwe pamozi ku jele olo kufwa namwe pamozi.” 34 Koma yove elaŵila kuti: “Nukuuzhya weo Petulo kuti kombwe akaliyolila lelo, unikane katatu kuti uniziŵa lini.”

35 Yesu euzhya soti ophunzila ŵake kuti: “Penekutumizhyani muliye kacola ka ndalama, cola ca vakulya va pa ulwendo olo masanda,* kansi mwesoŵa kanthu kalikonse?” Ove eyankha kuti: “Yai.” 36 Pavuli pake, eŵauzhya kuti: “Koma lomba nukuuzhyani kuti ali na kacola ka ndalama anyamule. Ndipo ali na cola ca vakulya va pa ulwendo naye anyamule. Wamene aliye bemba agulise covwala cake cakunja nogula bemba. 37 Cifukwa nukuuzhyani kuti zelembewa zufunika kukwanilishiwa pali neo zakuti, ‘Yove eikiwa pa gulu ya ŵanthu asamvwila malamulo.’ Zili teti cifukwa zelaŵiliwa zokhuza neo zukwanilishiwa.” 38 Pavuli pake, ove emuuzhya kuti: “Ambuye, onani! Tili na mabemba aŵili.” Yove eŵauzhya kuti: “Niyokwanila.”

39 Pecicoka ku malo uku, eluta ku Lupili ya Maolivi monga ni mweenzocitila nthawi zonse, ndipo ophunzila ŵake nao emukonkha. 40 Pecifwika ku malo uku, yove eŵauzhya kuti: “Pitilizhyani kupemphela kuti musaloŵe m’mayeselo.” 41 Yove efuma penze ophunzila ŵake noyendako patontho pa kamsenga paungaponele mwala ngati munthu wauponya. Kwamene uku, yove egwada noyamba kupemphela 42 kuti: “Atata, ngati mufuna nicoseleni kapu iyi. Olo n’tetyo, osati mwa kufuna kwangu, koma mwa kufuna kwanu.” 43 Pavuli pake, mngelo wofumila kululu eonekela kuli yove nomulimbikisha. 44 Koma yove evutika ngako mu mtima cakuti epitilizhya kupemphela mocokela pansi pa mtima, ndipo ciŵe cake ceyamba kuoneka monga ni madontho a milopa yamene yenzoponela pansi. 45 Pecisilizhya kupemphela, enyamuka noluta penze ophunzila ŵake ndipo eŵapeza kuti aliyone cifukwa enze efoka na cisoni. 46 Yove eŵauzhya kuti: “Ndaŵa yanji muyona? Ukani ndipo mupitilizhye kupemphela kuti musaloŵe m’mayeselo.”

47 Peenze akalulaŵila, pewela gulu ya ŵanthu pamozi na Yudasi m’mozi mwa ophunzila 12 apo n’kuti yove oŵasogolela. Pavuli pake, Yudasi eluta penze Yesu kuti amukising’e. 48 Koma Yesu emukonsha kuti: “Yudasi, kansi upeleka Mwana wa munthu mwa kumukising’a?” 49 Ŵanthu amene enze pafupi na Yesu peciona zenzofuna kucitika, elaŵila kuti: “Ambuye, kansi tiŵacenchene na cibemba?” 50 M’mozi mwa ove etenda kwatu ya kumalendi ya kapolo wa mkulu wa ansembe. 51 Koma Yesu elaŵila kuti: “Osacita izi.” Pavuli pake, ekata kwatu iyo, nomupolesha. 52 Pavuli pa izi, Yesu ekonsha ansembe akulu, oyanganila kacisi na akulu amene enze eluta kuli yove kuyomukata, kuti: “Ndaŵa yanji mwanyamula mabemba na nkholi pakuzonimanga monga kuti n’ne kawalala? 53 Masiku onse nenzonkhala namwe m’kacisi kuphunzisa, koma muliyonikate. Koma ino ni nthawi yanu koma soti nthawi ya ulamulilo wa ŵanthu amene ali mu mfinzi.”

54 Pavuli pa izi, emumanga ndipo emutola noluta naye ku ng’anda kwa mkulu wa ansembe, koma Petulo enzoŵakonkha capatali. 55 Ŵanthu peciyasha mulilo mkati mwa luŵanza nonkhala pansi pamozi, naye Petulo enze enkhala nao pamozi. 56 Koma msimbi muyakine wanchito pecimuona apo n’kuti ali nkhale ndipo wasanikiwa na mulilo, emuloleshesha nolaŵila kuti: “Munthu uyu naye enze pamozi na Yesu.” 57 Koma Petulo ekana nolaŵila kuti: “Weo msimbi, numuziŵa lini munthu uyu.” 58 Pavuli pa kanthawi katontho, munthu muyakine emuona ndipo elaŵila kuti: “Nawe niwe m’mozi mwa ophunzila ŵake.” Koma Petulo elaŵila kuti: “Shamwali, n’ne lini m’mozi mwa ove.” 59 Pavuli pakuti papita pafupifupi awa imozi, munthu muyakine eyamba kulaŵila mosimikizhya kuti: “Kulaŵila cendi, munthu uyu enze naye pamozi, ndipo ni wa ku Galileya!” 60 Koma Petulo elaŵila kuti: “Shamwali, nuziŵa lini zaulaŵila.” Nthawi yamene iyo peenze akalulaŵila, kombwe elila. 61 Pavuli pa izi, Ambuye ecunguluka nololeshesha Petulo. Ndipo Petulo ekumbukila mau yeenze emuuzhya Ambuye pecimuuzhya kuti: “Lelo, kombwe akaliyolila, unikane katatu.” 62 Pavuli pake, ecoka panja noyamba kulila mokhuzika.

63 Analume ŵala amene enze ekata Yesu, eyamba kumucitila vinthu viipa koma soti kumuniata. 64 Ove emuvala pamenso noyamba kumuuzhya kuti: “Lotela! Ni ŵani wakuniata?” 65 Ndipo epitilizhya kulaŵila vinthu vinyinji vomunyoza.

66 Pavuli pakuti kwaca, akulu a ŵanthu kuyangizhyilapo ansembe akulu na alembi, esonkhana pamozi ndipo emutwala ku holo ya Sanihedirini.* Pecifwika kwamene uko, ove elaŵila kuti: 67 “Tiuzhye ngati niwe Khristu.” Koma yove eŵauzhya kuti: “Olo kuti nikuuzhyeni, munikhulupilile lini. 68 Ndipo olo kuti nikukonsheni, munganiyankhe lini. 69 Koma kuyambila lomba mpaka msogolo, Mwana wa munthu ankhale ku kwanja yamphamvu yamalendi ya Mulungu.” 70 Pavuli pa izi, ŵanthu onse elaŵila kuti: “Lomba kansi niwe Mwana wa Mulungu?” Yove eyankha kuti: “Mwalaŵila mweka kuti n’ne Mwana wa Mulungu.” 71 Ove elaŵila kuti: “Kansi pali cifukwa cakuti tisakilile umboni uyakine? Tazimvwila seka kufumila pakamwa pake.”