Uthenga Wabwino Wolembewa na Maliko
10 Yesu pecicoka uku, eluta ku malile a Yudeya kusilya kwa Yorodano. Peenze kwamene uku, gulu ikulu ya ŵanthu yesonkhana soti kuli yove. Ndipo monga ni mwa nthawi zonse, eyamba kuŵaphunzisa. 2 Pavuli pake, Afarisi eluta kuli yove na colinga cakuti amuyese. Ove emukonsha ngati cenze cololeka munalume kuleka mkazi wake. 3 Yove eŵayankha kuti: “Kansi Mose ekulamulani cinji?” 4 Ove elaŵila kuti: “Mose elola kuti munalume akolemba cikalata cosilizhyila ukwati ndipo pavuli pake akomuleka.” 5 Koma Yesu eŵauzhya kuti: “Yove ekulembelani lamulo iyi cifukwa ca kuyuma mtima kwanu. 6 Koma kufumila pa ciyambi ca cilengedwe, ‘Mulungu eŵalenga munalume na munakazi. 7 Pa cifukwa ici, munalume akasiye ausuwake na amai ŵake 8 ndipo onse aŵili akankhale muŵili umozi,’ cakuti akankhale lini soti aŵili koma muŵili umozi. 9 Tetyo, cawamanga Mulungu pamozi,* munthu asacilekanishe.” 10 Peciloŵa soti m’ng’anda, ophunzila eyamba kumukonsha zokhuza nkhani iyi. 11 Yove eŵauzhya kuti: “Aliyense woleka mkazi wake nokwatila muyakine, wacita cigololo ndipo wamulakwila munakazi wamene uyo. 12 Ndipo ngati munakazi wasiya mulume wake nolunguliwa na munalume muyakine, niye kuti wacita cigololo.”
13 Pavuli pake, ŵanthu eyamba kumuletela ŵana atontho-atontho kuti aŵakate,* koma ophunzila ŵake eŵakalipila. 14 Yesu peciona izi, ekalipa ndipo eŵauzhya kuti: “Alekeni ŵana aŵa awele kuli neo, musaŵaleshe. Cifukwa Ufumu wa Mulungu ni wa ŵanthu ali monga ni ŵana aŵa. 15 Kulaŵila cendi, nukuuzhyani kuti aliyense wamene olandila lini Ufumu wa Mulungu monga ni mwana mtontho, akaloŵe lini mu Ufumu wamene uyo.” 16 Pavuli pake, ekata ŵana aŵa, kuŵakumbatila ndipo eyamba kuŵadalisa.
17 Peenzocoka kwamene uku, munthu muyakine emuutukila ndipo egwada pamenso pake nomukonsha kuti: “Mphunzisi wabwino, kansi nufunika kucita cinji kuti nikapeze moyo wosasila?” 18 Yesu emuyankha kuti: “Ndaŵa yanji uniita kuti wabwino? Paliye wabwino koma tyala Mulungu. 19 Weo uziŵa malamulo akuti: ‘Musapaye munthu, musacite cigololo, musaiŵe, musacitile umboni wawenye, musaiŵe mwacinyengo koma soti yakuti mukolemekeza ausuwanu na amai ŵanu.’” 20 Munthu ula emuyankha kuti: “Mphunzisi, nankhala nusunga malamulo aya kuyambila nikali mwana.” 21 Yesu emulolesha ndipo emukonda. Pavuli pake emuuzhya kuti, “Usoŵekela cinthu cimozi: Nkhoya ukagulise vinthu vonse vauli navo ndipo ndalama zati upeze upase osauka. Ukacita tetyo, unkhale na cuma kululu. Pavuli pake, uwele unkhale wokonkha wangu.” 22 Koma peecimvwa izi, ekhumudwa ndipo eluta apo n’kuti ali na cisoni cifukwa enze na katundu unyinji.
23 Pavuli pololesha uku na uku, Yesu euzhya ophunzila ŵake kuti: “Cikankhale covuta kuli ŵanthu a ndalama kuti akaloŵe mu Ufumu wa Mulungu!” 24 Ophunzila ŵake edabwa ngako na mau yecilaŵila Yesu. Pavuli pake, yove eŵauzhya kuti: “Ŵanamwe, kuloŵa mu Ufumu wa Mulungu n’kovuta ngako! 25 Ni cinthu capafupi kuti ngamila iloŵe pa linso ya nsingano kupambana kuti munthu wolemela akaloŵe mu Ufumu wa Mulungu.” 26 Ove edabwa ngako ndipo emukonsha* kuti: “Lomba ni ŵani angapulumuke?” 27 Yesu eŵaloleshesha noŵauzhya kuti: “Kuli ŵanthu izi zingaoneke monga n’zosakwanishika, koma osati kwa Mulungu, cifukwa kwa Mulungu zinthu zonse zukwanishika.” 28 Petulo ekamba kuti: “Onani! Tesiya vinthu vonse nokukonkhani.” 29 Yesu elaŵila kuti: “Kulaŵila cendi, nukuuzhyani kuti paliye aliyense wamene wasiya ng’anda, akwake, azilongosi, amai ŵake, ausuwake, ŵana ŵake kapena minda yake cifukwa ca neo koma soti cifukwa ca uthenga wabwino, 30 wati alekopeza vinthu ivi kuyangizhyila maulwendo 100 pali lomba. Yove apeze mang’anda, akwake, azilongosi, amai ŵake, ŵana na minda kuyangizhyilapo na cinzunzo ndipo msogolo akapeze moyo wosasila. 31 Koma anyinji amene ni oyambilila akankhale osilizhyila, ndipo osilizhyila akankhale oyambilila.”
32 Yesu na ophunzila ŵake epitilizhya ulwendo wao wakuya ku Yerusalemu ndipo yove enze pasogolo pao. Ophunzila ŵake edabwa ngako ndipo ŵala amene enzomukonkha eyamba kucita wowa. Pavuli pake, Yesu etola soti ophunzila ŵake 12 noluta nao kwaŵeka ndipo eyamba kuŵauzhya vinthu venze vesala patontho kumucitikila kuti: 33 “Lomba, tikuya ku Yerusalemu ndipo Mwana wa munthu akapelekewe kuli ansembe akulu na alembi. Ove akamuweluze kuti apaiwe ndipo akamupeleke kuli ŵanthu a mitundu iyakine. 34 Ove akamunyoze, kumutila mata, kumukwapula ndipo akamupaye. Koma pavuli pa masiku atatu, akaukishiwe.”
35 Ŵana a Zebedayo amene ni Yakobo na Yohane, eluta kuli yove ndipo emuuzhya kuti: “Mphunzisi, tufuna kuti muticitile zilizonse zati tikusengeni.” 36 Yove eŵakonsha kuti: “Kansi mufuna kuti nikucitileni cinji?” 37 Ove emuyankha kuti: “Tusenga kuti m’mozi wa seo akankhale ku kwanja yanu yamalendi ndipo muyakine akankhale ku kwanja yanu yamanjele mu ulemelelo wanu.” 38 Koma Yesu eŵayankha kuti: “Muziŵa lini vamusenga. Kansi mungakwanishe kumwa za m’kapu yanukumwa olo kubatiziwa na ubatizo wanubatiziwa nao?” 39 Ove eyankha kuti: “Eee, tingakwanishe.” Peecimvwa izi, Yesu eŵauzhya kuti: “Mukamwe cendi za m’kapu yanukumwa ndipo mukabatiziwe na ubatizo wanubatiziwa nao. 40 Koma ni udindo lini wangu kusankha wati akankhale ku kwanja yangu yamalendi kapena yamanjele. Koma Atata niye ati akapeleke malo aŵa kuli ŵanthu ŵecikonzela.”
41 Ophunzila ayakine 10 peecimvwa zecicita Yakobo na Yohane, ekalipa ngako. 42 Koma Yesu eŵaita noŵauzhya kuti: “Mweo muziŵa kuti ŵala amene olamulila ŵanthu a mitundu iyakine, okandikizhya ŵanthu ŵao ndipo akulu-akulu ŵao oonesha mphamvu zao pali ove. 43 Umu niye lini mwazufunikila kunkhalila pakati panu. Koma aliyense wamene ofuna kunkhala mkulu pakati panu, ofunika kunkhala mtumiki wanu. 44 Ndipo aliyense wamene ofuna kunkhala woyamba pakati panu, ofunika kunkhala kapolo wa onse. 45 Cifukwa olo Mwana wa munthu aliyowele kuzotumikiliwa koma kuzotumikila nopeleka moyo wake monga dipo kuti aombole ŵanthu anyinji.”
46 Pavuli pake, efwika mu Yeriko. Koma peenzocoka mu Yeriko pamozi na ophunzila ŵake na gulu ya ŵanthu, Batimeyu (mwana wa Timeyu) wosengasenga wamene enzololesha lini, enze nkhezi m’mbali mwa njila. 47 Munthu uyu peecimvwa kuti Yesu Mnazareti niye enzopita, eyamba kukuwa kuti: “Yesu, Mwana wa Davide, nicitileni cifundo! 48 Pavuli pake, ŵanthu anyinji eyamba kumuzuzula nomuuzhya kuti ankhale celele. Koma peenzomulesha yove niye pecipitilizhya kukuwa ngako kuti: “Mwana wa Davide, nicitileni cifundo!” 49 Tetyo, Yesu epanama ndipo elaŵila kuti: “Muuzhyeni awele kuno.” Tetyo, ove eita munthu ula wamene enzololesha lini ndipo emuuzhya kuti: “Tang’a mtima, nyamuka, okuita.” 50 Tetyo, yove eponya covwala cake cakunja pansi, ndipo kamangu-kamangu enyamuka noluta kuli Yesu. 51 Pavuli pake, Yesu emukonsha kuti: “Kansi ufuna kuti nikucitile cinji?” Munthu ula wamene enzololesha lini emuyankha kuti: “Rab·boʹni,* niyavyeni kuti niyambe kuona.” 52 Yesu emuuzhya kuti: “Nkhoya. Cikhulupililo cako cakupolesha.” Nthawi yamene iyo, munthu ula eyamba kulolesha ndipo eyamba kukonkha Yesu mu mseu.