Cisinsi Camene Nise Otemwa Kuciziŵa

Ko pali ekuuzhyako cisinsi ciliconse?—aBaibolo yulaŵila za cisinsi cofunika ngako. Cisinsi camene ico ni cisinsi ca Mulungu. Ni cisinsi cikomo cakuti ŵanthu enzociziŵalini. Nangu angelo enzopangwa kuziŵa vinyinji va cisinsi camene ico. N’nga weo ungapangwe lini kuciziŵa cisinsi camene ico?—

Kale ngako Mulungu elenga munalume na munakazi otatika. Mazina yao enze Adamu na Eva. Mulungu eŵapa munzi uweme woitiwa kuti munda wa Edeni. Kuti Adamu na Eva emvwila Mulungu, ŵeve na ŵana ŵao sembe ewamya calo conse kuŵa paladaiso n’nga ni mwewenzele munda wa Edeni. Soti sembe enkhala m’paladaiso kosasila. Koma kansi ukumbukila vecicita Adamu na Eva?—

Adamu na Eva aliyemvwile Mulungu. Niye cikomo cake tunkhala lini m’paladaiso lomba. Koma Mulungu enena kuti akawamye calo conse kuŵa ciweme, nakuti aliyense akankhale kosasila, soti akaŵe wotemwa. Ko akacite tyani vamene ivi? Kwa nsita ikuleni, ŵanthu enzoziŵa lini, cikomo cakuti cenze cisinsi.

Yesu peciwela pacalo, esambizhya ŵanthu vinthu vinyinji va cisinsi camene ici. Eŵauzhya kuti cisinsi camene ici n’cokatizhyana na Ufumu wa Mulungu. Esambizhya ŵanthu kulomba kuti Ufumu wamene uyu uwele. Niye wati ukawamye calo conse kuŵa paladaiso.

Ko watemwa pawaziŵa cisinsi camene ici?— Koma kumbukila kuti ŵala tyala omvwila Yehova niye ati akankhale m’paladaiso. Baibolo yutiuzhya nkhani zinyinji za analume na anakazi emvwila Yehova. Mwa ungapangwe lini kusambila za ŵanthu amene awo?— Ciweme, tiye tione kuti ŵanthu amene awo enze ŵani, noona mwatingakhalile n’nga ni ove.