Labeka Enzopangwa Kutemwesha Yehova

Labeka enze mwanakazi enzotemwa Yehova. Mulume wake enze Isaki, naye enzotemwa Yehova. Mwa Labeka na Isaki eziŵana tyani? Ko Labeka eonesha tyani kuti enzopangwa kutemwesha Yehova? Tiye tisambile zinyinji za Labeka.

Avyazi ŵa Isaki enze Abulahamu na Sala. Enzonkhala m’calo ca Kanani. Ŵanthu a kwamene uko enzolambila lini Yehova, koma Abulahamu enzopangwa kuti mwana wake alungule mwanakazi wolambila Yehova. Tetyo, etumizhya mtumiki wake, maka-maka Eliyezala ku Halana kuti akasakilile Isaki mwanakazi. Kwamene uko niye kwenzonkhala enekwao ŵa Abulahamu.

Eliyezala, pamo na anchito ayakine ŵa Abulahamu, etatika ulwendo wao. Wenze ulwendo utali ngako. Paulwendo wao, eciya na ngamila zili 10 zecinyamulilapo vakulya na mphaso. Mwa Eliyezala enze kuyoziŵa tyani mwanakazi wakuti akasankhile Isaki? Pecifwika pa cisime ku Halana pamo na anchito ayake, eziŵa kuti lombapano ŵanthu atatike kuwela kuzotapa manzi. Tetyo Eliyezala elomba kwa Yehova kuti: ‘Msimbi wati nisenge manzi, akanipa, notapila soti ngamila, niziŵe kuti niye wamwasankha.’

Pamene apo, Labeka ewela pa cisime. Baibolo yulaŵila kuti enze muweme ngako. Eliyezala emsenga manzi yakumwa Labeka. Yove eyankha kuti: ‘Nikutapileni manzi pamo na ngamila zanu.’ Ngamila zikamvwa njota, zikumwa manzi anyinji ngako. Lingilila tyala cinchito cenze naco Labeka! Enzocitoutuka pakuyotapa manzi pacisime, nipo ecita zamene izi mowelezhya-welezhya kuti zikondwe. Ko wamuona pacithunzi-thunzi mwakuseŵenzela na mphamvu?— N’cendi, Eliyezala etemwa ngako kuona mweciyankhila Yehova lombelo yake.

Eliyezala ecipa Labeka mphaso zinyinji ziweme. Labeka eitila Eliyezala na anyanchito ayakine ku ng’anda kwao. Eliyezala efotokoza cikomo cake Abulahamu emutuma ku Halana na mweciyankhila Yehova lombelo yake. Banja ya Labeka yetemwa nipo yevomelezhya kuti Isaki alungule Labeka.

Ko ulingilila kuti Labeka evomela kuti akalunguliwe na Isaki?— Ciweme, Labeka eziŵa kuti Yehova niye etuma Eliyezala. Tetyo pecimukonsha abanja ŵake keno enzopangwa kulunguliwa na Isaki noluta ku Kanani, Labeka enena kuti: ‘Eee, nupangwa kuluta.’ Pamene apo Labeka eluta pamo na Eliyezala ku Kanani. Pecifwika ku Kanani, Labeka elunguliwa na Isaki.

Yehova emudalisa Labeka cikomo cakuti enzocita cifuno cake. Pavuli pa vyaka vinyinji, Yesu ecizovyalikila mu mtundu wao! Keno nawe utemwesha Yehova n’nga mwenzocitila Labeka, yove akudalise.