Elemba zokhuza Yesu

Ko waŵaona analume pa cinthunzi-thunzi?—Mazina ŵao ni Mateyo, Maliko, Luka, Yohane, Petulo, Yakobo, Yuda, na Paulo. Analume onse amene aŵa enkhalako pa nsita imo na Yesu, nipo elemba zokhuza Yesu. Tiye tisambile zinyinji zokhuza ŵeve.

Atatu mwa analume amene ao enze atumwi nipo enzoŵilizhya pamo na Yesu. Mwa uŵaziŵa analume atatu amene aŵa?— Ni Mateyo, Yohane, na Petulo. Mtumwi Mateyo na Yohane enzomuziŵa luweme Yesu nipo onse elemba mabuku ofotokoza umoyo wa Yesu. Mtumwi Yohane elemba buku ya Chivumbulutso na makalata atatu amene ni Yohane wotatika, Yohane waciŵili, na Yohane wacitatu. Mtumwi Petulo elemba makalata aŵili opezeka m’Baibolo. Makalata amene aŵa oitiwa kuti Petulo wotatika na Petulo waciŵili. Mu kalata yake yaciŵili, Petulo elemba za nsita pamene Yehova elaŵila za mwana wake kufumila kululu peeciti: ‘Uyu niye mwana wangu wotemweka mwa yove nutemwa.’

Analume ayakine ali pacithunzi-thunzi apa elemba soti mabuku yotiuzhya za Yesu. Buku ya Maliko ni imo mwa mabuku amene ayo. Cuoneka kuti Maliko enzepo peenzomangiwa Yesu nipo eona vonse vemucitikila. Luka ni yumo mwa analume amene aŵa. Yove enze dokotala nipo cuoneka kuti enkhala M’khilisitu pavuli pakuti Yesu wafwa.

Pa analume elemba Baibolo ŵauona pa cithunzi-thunzi, aŵili enze asaza ŵa Yesu. Kansi uŵaziŵa mazina yao?— Mazina ŵao ni Yakobo na Yuda. Pa nsita iyambine ŵeve enzocetekela lini Yesu. Enzolingilila kuti Yesu enze wofunthako. Koma pavuli pake em’cetekela nipo enkhala Akhilisitu.

Paulo ni wosilizhyila pa analume elemba Baibolo ali pa cithunzi-thunzi. Akaliyonkhala M’khilisitu, Paulo enzoitiwa kuti Saulo. Enzoŵatinkha ngako Akhilisitu nipo enzoŵanzunza. Mwa uziŵa cecitisha kuti Paulo ankhale M’khilisitu?— Nsiku iyakine, Paulo enze paulwendo. Mwazizizi ecimvwa malizu ya munthu muyakine kufumila kululu. Yesu niye elaŵila malizu yamene ayo. Yeve ekonsha Paulo kuti: ‘Ndaŵa yanji unzunza ŵanthu onicetekela?’ Pavuli pake Paulo ecinja nonkhala M’khilisitu. Paulo elemba mabuku 14 ya m’Baibolo. Mabuku amene ayo yotatika na buku ya Aroma mpaka Aheberi.

Tuŵelenga Baibolo nsiku iliyonse, n’tetyo lini?— Keno tuŵelenga Baibolo, tingasambile zinthu zinyinji zokhuza Yesu. Kansi upangwa kusambila zinyinji zokhuza Yesu?—