Mulisa Wa Paulo Enze Wotang’a Mtima

Tiye tisambile za mulumbwana epuzumusha amalume ŵake. Mulumbwana wamene uyo enze mulisa wa Paulo. Tuziŵa lini zina yake, koma tuziŵa kuti ecita cinthu ceonesha kuti enze wotang’a mtima. Ko ungapangwe kuziŵa cecicita?—

Paulo enze mu jele ku Yelusalemu. Enze emangiwa cikomo coŵilizhya uthenga wokhuza Yesu. Ŵanthu aipa mitima enzomutinkha Paulo, nipo epangana kuti am’paye. Ŵeve enena kuti: ‘Tiyeni tisenge m’kulu wa masoja kuti auzhye masoja ŵake kuti akamulete Paulo ku khoti. Seo tikabisame m’mbali mwa mseu kuti Paulo potendesha tikam’paye.’

Mulisa wa Paulo ecimvwa vecipangana ŵanthu amene ao. Mwa ecitanji? Eluta ku jele kuyouzhya Paulo zamene izo. Pamene apo, Paulo euzhya mulisa wake kuti auzhye mukulu wa masoja za nkhani yamene iyo. Mwa ulingilila kuti cenze cinthu cipepu kuti mulisa wa Paulo alaŵile na mkulu wa masoja?—Yai, cikomo cakuti mkulu wa masoja enze munthu wocinzikika ngako. Nangu n’tetyo, mulisa wa Paulo etang’a mtima nipo elaŵila naye mkulu wa masoja.

Mkulu wa masoja eziŵa zocita. Eseŵenzesha umba ya masoja cifupi-fupi 500 kuti acingilile Paulo ku ŵanthu enzofunom’paya. Usiku wamene uyo, euzhya masoja kuti am’pelekezhye Paulo pakuya ku Kaisaleya. Kansi Paulo epuzumuka?— Eee, epuzumuka. Analume ŵala aliyokwanishe kum’paya.

Mwa ungasambile cinji pa nkhani iyi?— Nawe ungaŵe wotang’a mtima n’nga mwenzele mulisa wa Paulo. Tuwamila kuŵa wotang’a mtima pouzhya ayakine za Yehova. Ko uŵe wotang’a mtima nopitilizhya kulaŵila za Yehova?— Keno uŵe wotang’a mtima, uyavye ŵanthu ayakine kuti akapuzumuke.