Yavyani Ophunzila Baibo Ŵanu Kuyamba Kutumikila Yehova

1-2. (a) Ndaŵa yanji ophunzila Baibo ayakine owayawaya kuyamba kutumikila Yehova? (b) Kansi tilaŵizhyane cinji m’nkhani ino?

KANSI penzeko zinthu ziyakine zamene zenzokupangishani kuwayawaya kunkhala Mboni ya Yehova? Payakine mwenzocita wowa kuti ayanu olo abanja ŵanu angakhumudwe ngati mwankhala Mboni ya Yehova. Olo payakine mwenzocita wowa kuti mukankhala wa Mboni za Yehova, mukakwanishe lini kukonkha mfundo zolungama za Mulungu. Ngati n’tetyo, niye kuti mungamvwishe bwino cifukwa cake ophunzila Baibo ŵanu ayakine owayawaya kuyamba kutumikila Yehova.

² Yesu enzoziŵa kuti zinthu monga izi zingakangishe munthu kusankha kutumikila Yehova. (Mat. 13:​20-22) Olo n’tetyo, epitilizhya kuyavya ŵala amene enzowayawaya kumukonkha. Yove eŵayavya (1) kuzindikila mavuto yenzoŵakangisha kuyamba kutumikila Yehova, (2) kutang’isha cikondi cao pa Yehova, (3) kuika Yehova pasogolo mu umoyo wao na (4) kugonjesa mavuto ŵao. Kansi tingatolele tyani cisanzo ca Yesu pa nkhani yophunzisa patuseŵenzesha buku ya Sangalalani na Moyo Kosasila! kuti tiyavye wophunzila Baibo wasu kuyamba kutumikila Yehova?

YAVYANI WOPHUNZILA BAIBO WANU KUZINDIKILA MAVUTO YAMENE YOMUKANGISHA KUYAMBA KUTUMIKILA YEHOVA

3. Kansi payakine n’cinji camene cekangisha Nikodemo kunkhala wokonkha wa Yesu?

³ Nikodemo, msogoleli wochuka wa Ayuda, ekumanako na mavuto yamene yemukangisha kunkhala wokonkha wa Yesu. Miyezi 6 pavuli pakuti Yesu wayamba utumiki wake, yove ezindikila kuti Yesu ni wopanamilako Mulungu. (Yoh. 3:​1, 2) Olo n’tetyo, Nikodemo esankha kukumana na Yesu mwacinsinsi cifukwa cakuti “enzoyopa Ayuda.” (Yoh. 7:13; 12:42) Payakine enzoganiza kuti ataye zinthu zinyinji ngati angasankhe kunkhala wophunzila wa Yesu.a

4. Kansi Yesu eyavya tyani Nikodemo kuti aziŵe zeenzofuna Mulungu kuti yove acite?

⁴ Nikodemo enzociziŵa bwino Cilamulo, koma enzofunikila thandizo kuti aziŵe zeenzofuna Mulungu kuti yove acite. Kansi Yesu emuyavya tyani? Yesu enze wokonzeka kuseŵenzesha nthawi yake poyavya Nikodemo olo pa nthawi ya usiku. Ndipo mosapita m’mbali, Yesu euzhya Nikodemo zeenzofunika kucita kuti ankhale wophunzila wake. Yove emuuzhya kuti enzofunika kulapa macimo ŵake, kubatizika m’manzi nokhulupilila Mwana wa Mulungu.—Yoh. 3:​5, 14-21.

5. Kansi mungayavye tyani wophunzila Baibo wanu kuzindikila zinthu zamene zumukangisha kuluta pasogolo mwauzimu?

⁵ Mosasamala kanthu kuti wophunzila Baibo wanu omvwisha bwino Malemba, yove angafunikile mphela thandizo kuti azindikile zumukangisha kuti ayambe kutumikila Yehova. Nchito yolembewa olo kusushiwa na abanja ŵake, zingamukangishe kuti alute pasogolo. Tetyo, mukonkhala okonzeka kumuyavya. Mungamuitileko ku cakulya olo kuluta naye ku malo ayakine na colinga cakuti munkhale na nthawi yotandala naye. Ngati mungacite izi, mungamuyavye kunkhala omasuka nokamba za mavuto yakukumana nayo. Mukomulimbikisha kupanga masinthidwe yofunikila, osati kuti akukondwelesheni, koma kuti aoneshe cikondi cake pa Yehova.

6. Kansi mungayavye tyani wophunzila Baibo wanu kuyamba kutumikila Yehova? (1 Akorinto 16:13)

⁶ Ngati wophunzila Baibo wanu ni wosimikizhya kuti Yehova amuyavye kucita zoyenela, ankhale na mphamvu zakufunikila kuti aseŵenzeshe zakuphunzila. (Ŵelengani 1 Akorinto 16:13.) Zamungacite kuti mumuyavye, tingazilinganizhye na zaangacite mphunzisi wabwino ku sukulu. Mukakumbukila umoyo wanu wa ku sukulu, kansi ni mphunzisi wotyani wamwenzokonda ngako? Mosakaikila, ni ula wamene moleza mtima, ekuyavyani kunkhala na cidalilo pa zamungakwanishe. Molingana na izi, mphunzisi wabwino wa Baibo, ophunzisa lini tyala wophunzila wake zakufuna Mulungu kuti tikocita. Koma omusimikizhyila soti kuti na thandizo ya Yehova, angakwanishe kupanga masinthidwe yofunikila mu umoyo wake. Kansi mungacite tyani izi?

YAVYANI WOPHUNZILA BAIBO WANU KUTANG’ISHA CIKONDI CAKE PA YEHOVA

7. Kansi Yesu eyavya tyani ophunzila ŵake kukulisha cikondi cao pa Yehova?

⁷ Yesu enzoziŵa kuti kukonda Yehova kungasonkhezele ophunzila ŵake kuseŵenzesha zeenzophunzila. Mowelezhyawelezhya, yove enzophunzisa zinthu zamene zingayavye ophunzila ŵake kutang’isha cikondi cao pali Ausuwao akululu. Mwacisanzo, yove elinganizhya Yehova na atata amene opasa ŵana ŵao zinthu zabwino. (Mat. 7:​9-11) Payakine ayakine mwa ophunzila a Yesu enzeve atata acikondi. Ganizilani tyala mwecimvwila, Yesu peciŵauzhya za fanizo ya atata acikondi amene elandila mwana wao wamene enze ecoka pa ng’anda noyamba kucita vinthu viipa, pavuli pake nowelela. Yesu eyavya ŵanthu kuona kuti Yehova oŵakonda ngako na kuti ofuna kuŵayavya.—Luka 15:​20-24.

8. Kansi mungayavye tyani wophunzila Baibo wanu kutang’isha cikondi cake pa Yehova?

⁸ Namwe mungayavye wophunzila Baibo wanu kutang’isha cikondi cake pa Yehova mwa kumuphunzisa minkhalidwe yabwino yaali nayo Mulungu. Pa phunzilo ya Baibo iliyonse, mukomuyavya kuona kukatizhyana kulipo pakati pa zakuphunzila na cikondi ca Yehova. Ngati muphunzila naye pa nkhani yokhuza dipo, mukomuyavya kuona kuti Yehova ecita izi cifukwa cakuti omukonda. (Aro. 5:8; 1 Yoh. 4:10) Ngati wophunzila Baibo wanu wamvwisha mwakumukondela Yehova, zingamuyavye kuti naye payeka akomukonda ngako.—Aga. 2:20.

9. Kansi n’cinji cesonkhezela Micheal kucinja umoyo wake?

⁹ Ganizilani cisanzo ca Michael wa ku Indonesia. Yove ekulila m’cendi koma aliyopange cosankha cakuti abatizike. Peenze na vyaka 18, yove ekukila ku calo ciyakine ndipo eyamba kuseŵenza monga woyendesha thiraki. Pavuli pake, elungula ku Indonesia ndipo esiya banja yake nowelela soti ku calo kweenzoseŵenza kuti akapitilizhye nchito yake. M’kuluta kwa nthawi, mkazi wake na mwana wake munakazi eyamba kuphunzila Baibo ndipo eluta pasogolo mwauzimu. Pavuli pakuti amai ŵake amwalila, Michael eganiza zowelela soti ku Indonesia kuti akasamalile ausuwake ndipo eyamba kuphunzila Baibo. Peenzophunzila mutu 27 m’buku ya Sangalalani na Moyo Kosasila! pa mbali yakuti “Phunzilani Zinyinji,” Michael ekhuzika ngako na zeciphunzila. Peenzosinkhasinkha pa mwamene Yehova emvwila peenzoona Mwana wake ovutika, Micheal eponesha misozi. Yove eyamba kuyamikila ngako mphaso ya dipo ndipo izi zemusonkhezela kucinja umoyo wake nobatizika.

YAVYANI WOPHUNZILA BAIBO WANU KUIKA YEHOVA PASOGOLO MU UMOYO WAKE

10. Kansi Yesu ecita cinji camene ceyavya ophunzila ŵake kupanga masinthidwe noyamba kutumikila Yehova nthawi zonse? (Luka 5:​5-11) (Onani soti cithunzithunzi.)

¹⁰ Ophunzila a Yesu ezindikila kamangu kuti Yesu enze Mesiya wolonjezewa. Olo n’tetyo, ove enzofunikila thandizo kuti ayambe kuona nchito yolalikila kunkhala yofunika ngako mu umoyo wao. Yesu peciuzhya Petulo na Andireya kuti ayambe kumukonkha nthawi zonse, n’kuti ove ankhala kale ophunzila ŵake kwa kanthawi. (Mat. 4:​18, 19) Ove pamozi na Yakobo na Yohane enzokasha nsomba, ndipo bizinesi yao yenzoyenda bwino. (Mko. 1:​16-20) Koma Petulo na Andireya eleka kukasha nsomba noyamba kukonkha Yesu nthawi zonse. Pecipanga cosankha ici, ove eoneshesha soti kuti akokwanisha kusamalila mabanja ŵao apo n’kuti okonkha Yesu. Kansi n’cinji ceŵasonkhezela kusiya bizinesi yao? Nkhani yecilemba Luka yutiuzhya kuti Yesu ecita cozizwisa camene cetang’isha cidalilo cao cakuti Yehova angakangiwe lini kuŵasamalila.—Ŵelengani Luka 5:​5-11.

11. Kansi mungaseŵenzeshe tyani zinthu zemwekumana nazo kuti mutang’ishe cikhulupililo ca wophunzila Baibo wanu?

¹¹ Tingakwanishe lini kucita zozizwisa monga ni mweenzocitila Yesu. Koma tingauzhyeko ayakine zokumana nazo zamene zuonesha mwamene Yehova oyavyila ŵala amene oika yove pasogolo mu umoyo wao. Mwacisanzo, kansi mukumbukila mwamene Yehova ekuyavyilani pemweyamba kupezeka pa misonkhano? Payakine mwenzofunika kuonana na abwana ŵanu noŵafotokozela kuti mukoseŵenza lini soti ma ovataimu na colinga cakuti mukokwanisha kupezeka pa misonkhano. Pamuuzhya wophunzila wanu zinthu zemwekumana nazo, mukomufotokozela mwamene cikhulupililo canu cetang’ila pemweona mwamene Yehova ecilikizila zosankha zemwepanga kuti muyambe kumutumikila.

12. (a) Ndaŵa yanji tufunika kuluta na akwasu na azilongosi osiyanasiyana ku phunzilo yasu ya Baibo? (b) Kansi mungaseŵenzeshe tyani mavidyo kuti mum’fwike pa mtima wophunzila Baibo wanu? Fotokozani cisanzo.

¹² Wophunzila Baibo wanu angapindule soti ngati angamvwishileko zamene zeyavya Akhristu ayakine kucinja umoyo wao noyamba kutumikila Yehova. Tetyo, mukosenga akwasu na azilongosi osiyanasiyana kuti akoluta namwe ku maphunzilo ŵanu a Baibo. Mukoŵasenga kuti afotokoze mweciphunzilila cendi na zecicita kuti aike kutumikila Yehova pasogolo mu umoyo wao. Kuyangizhyila apo, mukopeza nthawi yotamba mavidyo pamozi na wophunzila Baibo wanu pa mbali yakuti “Phunzilani Zinyinji” olo pa mbali yakuti “Fufuzani” m’buku ya Sangalalani na Moyo Kosasila! Mwacisanzo, pamuphunzila mutu 37, mungatambe vidyo pamozi na wophunzila Baibo wanu ya mutu wakuti Yehova Atisamalile. Pavuli pake, mungalaŵizhyane mfundo zupezeka mu vidyo iyi, nomuyavya kuona kuti Yehova angamusamalile ngati angamuike pasogolo mu umoyo wake.

YAVYANI WOPHUNZILA BAIBO WANU KUGONJESA MAVUTO ŴAKE

13. Kansi Yesu ekonzekelesha tyani ophunzila ŵake za cizunzo ceenze kuzokumana naco?

¹³ Mowelezhyawelezhya, Yesu euzhya okonkha ŵake kuti enze kuzokumana na cinzunzo kufumila kuli ŵanthu ayakine, kuyangizhyilapo na kuli abanja ŵao. (Mat. 5:11; 10:​22, 36) Yesu pecisala patontho kusilizhya utumiki wake, ecenjeza ophunzila ŵake kuti payakine enze kuzopaiwa cifukwa cotumikila Yehova. (Mat. 24:9; Yoh. 15:20; 16:2) Yove eŵalimbikisha kuti enzofunika kunkhala osamala paakucita utumiki wao. Mwacisanzo, eŵauzhya kuti enzofunika lini kukangana na ŵala amene enzoŵasusha na kuti enzofunika kunkhala osamala na colinga cakuti apitilizhye kulalikila.

14. Kansi tingakonzekeleshe tyani wophunzila Baibo wasu kuziŵa zaangacite ngati ayakine omususha? (2 Timoteyo 3:12)

¹⁴ Tingayavye phunzilo yasu ya Baibo kukonzekela kusushiwa mwa kumufotokozela zinthu zaangayembekezele kumvwa kufumila kuli ayake na abanja ŵake. (Ŵelengani 2 Timoteyo 3:12.) Ayake ayakine a ku nchito angayambe kumuseka cifukwa cakuti wayamba kukonkha mfundo za m’Baibo. Olo abanja ŵake, angayambe kumunyoza cifukwa ca zinthu zaangophunzila m’Baibo. Ngati tuyavya wophunzila Baibo wasu kuziŵa zaangacite ngati ayakine omususha, zimuyavye kuziŵa zaangalaŵile olo kucita ngati ŵanthu ayakine ayamba kumususha.

15. Kansi mungacite cinji kuti muyavye wophunzila Baibo wanu kupilila ngati osushiwa na abanja ŵake?

¹⁵ Ngati wophunzila Baibo wanu osushiwa na abanja ŵake, mukomuyavya kuganizila cifukwa cake abanja ŵake ofuna lini kuti yove akophunzila na Mboni za Yehova. Payakine abanja ŵake angoganiza kuti a Mboni za Yehova ophunzisa vinthu vawenye na kuti ni ŵanthu aipa. Yesu naye esushiwapo na abanja ŵake. (Mko. 3:21; Yoh. 7:5) Mukoyavya wophunzila Baibo wanu kupitilizhya kunkhala woleza mtima nolaŵila mwacikondi na ŵanthu ayakine kuyangizhyilapo abanja ŵake.

16. Kansi mungayavye tyani wophunzila Baibo wanu kuuzhyako ayakine zinthu zakukhulupilila m’njila yosavuta?

¹⁶ Ngati abanja ŵake ofuna kuziŵa zinyinji zokhuza zakuphunzila m’Baibo, wophunzila Baibo ofunika lini kufotokoza zinthu zonse pa nthawi imozi. Cifukwa ngati angacite izi, abanja ŵake angakhumudwe ndipo angafune lini soti kulaŵizhyana naye zokhuza zinthu zakukhulupilila. Tetyo, mukolimbikisha wophunzila Baibo wanu kuuzhyako ayakine zinthu zakukhulupilila m’njila yosavuta, zamene zingayavye kuti msogolo akakwanishe kukambilana nao soti. (Akol. 4:6) Payakine angauzhye abanja ŵake kuti alute pa webusaiti ya jw.org. Izi zingaŵayavye kuziŵa zinyinji zokhuza Mboni za Yehova pa nthawi iliyonse yaangafune.

17. Kansi mungayavye tyani wophunzila Baibo wanu kuyankha makonsho okhuza Mboni za Yehova? (Onani soti cithunzithunzi.)

¹⁷ Mungaseŵenzeshe nkhani za m’Cinyanja zupezeka pa jw.org za mutu wakuti “Mafunso Amene Amafunsidwa Kawili-kaŵili Ponena za Mboni za Yehova,” kuti muyavye wophunzila Baibo wanu kukonzekela mayankho osavuta pa makonsho yaangamukonshe ayake olo abanja ŵake. (2 Tim. 2:​24, 25) Kosilizhyila kwa phunzilo ya Baibo iliyonse, mukolaŵizhyana mbali yakuti “Ŵanthu Ayakine Okamba Kuti” ya m’buku ya Sangalalani na Moyo Kosasila! Mukolimbikisha wophunzila Baibo wanu kuyeselela mayankho yaangayankhe m’mau ŵake-ŵake. Ngati n’pofunikila, mukomuyavya kupeza njila yabwino yaangafotokozelemo zinthu zakukhulupilila. Kucita izi, kumuyavye kufotokoza zinthu zakukhulupilila mwacidalilo.

18. Kansi mungayavye tyani wophunzila Baibo wanu kuyamba kulalikila pamozi na mpingo? (Mateyu 10:27)

¹⁸ Yesu elamula ophunzila ŵake kulalikila uthenga wabwino kuli ŵanthu. (Ŵelengani Mateyu 10:27.) Ngati wophunzila Baibo wanu wayamba kulalikila pamozi na mpingo, yove aphunzile kudalila ngako Yehova. Kansi mungayavye tyani wophunzila Baibo wanu kuziikila colinga coyamba kulalikila pamozi na mpingo? Ngati kukankhale kampeni yolalikila m’dela yanu, yavyani wophunzila Baibo wanu kuona zakufunika kucita kuti ankhale wofalisa. Mufotokozeleni kuti ni cosavuta kulalikila pa nthawi ya kampeni. Kuyangizhyila apo, yove angapindule ngako ngati angaziikile colinga coyamba kulaŵila nkhani pa misonkhano ya m’kati mwa wiki. Paakuyesayesa kukwanilisha colinga ici, yove aphunzile kufotokoza bwino koma soti mwacidalilo zinthu zakukhulupilila kuli ŵanthu ayakine.

MUKOONESHA KUTI MUDALILA WOPHUNZILA BAIBO WANU

19. Kansi Yesu eonesha tyani kuti enzodalila ophunzila ŵake, ndipo tingatolele tyani cisanzo cake?

¹⁹ Yesu akaliyowelela kululu, euzhya ophunzila ŵake kuti siku iyakine akankhale soti pamozi. Koma ove aliyomvwishe zecilaŵila Yesu zakuti ove akalute kululu. Olo kuti ophunzila ŵake aliyomvwishe zinthu zonse, Yesu enze wosimikizhya kuti ove enzofuna kukondwelesha Yehova. (Yoh. 14:​1-5, 8) Yove enzoziŵa kuti ove enzofunikila nthawi kuti amvwishe zinthu ziyakine monga zokhuza ciyembekezo cao cakuyonkhala kululu. (Yoh. 16:12) Molingana na Yesu, nase tingaoneshe maphunzilo ŵasu a Baibo kuti tuziŵa kuti ofuna kukondwelesha Yehova.

20. Kansi kalongosi muyakine wa ku Malawi, eonesha tyani kuti enzodalila phunzilo yake?

²⁰ Mukonkhala na cidalilo cakuti phunzilo yanu yufuna kucita zinthu zoyenela. Mwacisanzo, ganizilani za kalongosi Chifundo wa ku Malawi. Yove eyamba kuphunzila Baibo na munakazi muyakine wa Cikatolika wa zina yakuti Alinafe poseŵenzesha buku ya Sangalalani na Moyo Kosasila! Pecisilizhya kulaŵizhyana mutu 14, kalongosi Chifundo ekonsha phunzilo yake zeenzoganiza pa nkhani yoseŵenzesha mafano polambila. Alinafe ekalipa ngako ndipo eyankha kuti, “Ni cosankha ca munthu aliyense.” Pavuli pa izi, kalongosi Chifundo eganiza kuti payakine Alinafe aleke kuphunzila Baibo. Koma moleza mtima, epitilizhya kuphunzila naye Baibo ali na ciyembekezo cakuti payakine msogolo akamvwishe kuti kulambila mafano ni kuipa. Vyaka vitontho pavuli pa izi, Kalongosi Chifundo ekonsha Alinafe konsho ya m’mutu 34 yakuti “Kansi mwapindula tyani cifukwa cophunzila Baibo noziŵa Mulungu wacendi, Yehova?” Kalongosi Chifundo, efotokoza zeciyankha Alinafe kuti “Elaŵila mfundo zinyinji zosangalasa. Imozi mwa mfundo zecilaŵila ni yakuti Mboni za Yehova, zucita lini zinthu zamene Baibo yulaŵila kuti ni zolakwika.” Nthawi itontho pavuli pa izi, Alinafe eleka kuseŵenzesha mafano ndipo eyenelela kubatizika.

21. Kansi tingayavye tyani phunzilo yasu ya Baibo kuyamba kutumikila Yehova?

²¹ Olo kuti Yehova niye “okulisha,” nase tili na udindo woyavya phunzilo yasu ya Baibo kuluta pasogolo. (1 Akor. 3:7) Tucita zinyinji osati tyala kumuphunzisa zakufuna Mulungu kuti yove akocita. Tumuyavya kukulisha cikondi cake pa Yehova. Tumulimbikisha soti kuonesha cikondi cake mwa kuika Yehova pasogolo mu umoyo wake. Ndipo tumuphunzisa mwaangaoneshele kuti odalila Yehova ngati wakumana na mavuto. Mwa kuonesha kuti tumudalila, tutang’isha cidalilo cake cakuti naye angakwanishe kukonkha mfundo zolungama za Yehova noyamba kumutumikila.