Mwaakutiyavyila Yehova Kuti Tipilile Mavuto

1. Ndaŵa yanji tufunika kupilila, ndipo ni ŵani angatiyavye kupilila? (1 Petulo 5:10)

M’MASIKU ŵano osilizhya koma soti ovuta, atumiki a Yehova ofunika kupilila. Talaŵila teti cifukwa cakuti ayakine ovutika cifukwa ca matenda akulu ndipo ayakine etaikiliwa okondeka ŵao mu imfwa. Kuyangizhyila apo, ayakine osushiwa na abanja ŵao olo boma. (Mat. 10:​18, 36, 37) Olo n’tetyo, nkhalani osimikizhya kuti Yehova akuyavyeni kupilila mavuto yaliyonse yamungakumane nayo.—Ŵelengani 1 Petulo 5:10.

2. Ndaŵa yanji tukwanisha kupilila?

² Kupilila, kutanthauza kupitilizhya kunkhala okhulupilika kwa Yehova nomutumikila mwacimwemwe mosasamala kanthu za cinzunzo olo mayeselo yatingakumane nayo. Kuti tikwanishe kupilila, tufunikila soti kunkhala na cikhulupililo cakuti zinthu zinkhale bwino. Monga Akhristu, tukwanisha kupilila osati mwa mphamvu zasu, koma cifukwa cakuti Yehova otipasa “mphamvu yopambana yacibadwa.” (2 Akor. 4:7) M’nkhani ino, tilaŵizhyane zinthu 4 zawatipasa Yehova zamene zingatiyavye kupilila. Tione soti mwatingaseŵenzeshele zinthu izi.

PEMPHELO

3. Ndaŵa yanji tingalaŵile kuti pemphelo ni cinthu cofunika ngako cawatipasa Yehova kuti tikokwanisha kulaŵizhyana naye?

³ Yehova watipasa cinthu ciyakine cofunika ngako, camene cingatiyavye kupilila. Cinthu ici ni mwai wa pemphelo. Yove wacitisha kuti zinkhale zokwanishika kulaŵizhyana naye olo kuti nise ocimwa. (Aheb. 4:16) Ganizilani tyala. Tingapemphele kwa Yehova nthawi iliyonse koma soti tingamusenge zinthu zilizonse. Kuyangizhyila apo, yove otimvwa ngati tupemphela m’cilaŵilo ciliconse, kulikonse kwatingankhale olo kuti tili kwaseka m’jele. (Yona 2:​1, 2; Mac. 16:​25, 26) Ngati tili na nkhaŵa ngako cakuti tuziŵa lini mwatingamuuzhyile Yehova mwatumvwila, yove okwanisha kuziŵa zatufuna kulaŵila. (Aro. 8:​26, 27) Kulaŵila cendi, pemphelo ni cinthu cofunika ngako cawatipasa Yehova kuti tikokwanisha kulaŵizhyana naye.

4. Ndaŵa yanji tingalaŵile kuti pemphelo yosenga Yehova kuti atiyavye kupilila ni yokatizhyana na cifunilo cake?

⁴ Kupitila m’Mau ŵake, Yehova otisimikizhyila kuti “ciliconse catingamusenge mokatizhyana na cifunilo cake otimvwa.” (1 Yoh. 5:14) Kansi tingasenge Yehova kuti atiyavye kupilila? Eee. Kucita izi, ni kokatizhyana na cifunilo cake. Ndaŵa yanji talaŵila teti? N’cifukwa cakuti ngati tukwanisha kupilila, tucitisha Yehova kuyankha ula wamene omutonzhya, Satana Maleŵania. (Miy. 27:11) Kuyangizhyila apo, Baibo yulaŵila kuti Yehova ni wofunishisha kuti “aoneshe mphamvu zake kuli ŵanthu ozipeleka na mtima wonse kuli yove.” (2 Mbi. 16:9) Tetyo, tingankhale osimikizhya kuti Yehova ali na mphamvu koma soti cifuno coyavya ŵanthu kuti akwanishe kupilila.—Yes. 30:18; 41:10; Luka 11:13.

5. Kansi pemphelo ingatiyavye tyani kuti tinkhale na mtendele wa m’maganizo? (Yesaya 26:3)

⁵ Baibo yulaŵila kuti ngati tapemphela kwa Yehova, ‘mtendele wa Mulungu wamene ŵanthu angakwanishe lini kuumvwisha uteteze mitima na maganizo ŵasu.’ (Afil. 4:7) Tuyamikila ngako cifukwa ca mwai uyu. Ŵanthu amene otumikila lini Yehova nao okumana na mavuto ndipo angayese njila zosiyanasiyana kuti ankhale na mtendele wa m’maganizo. Mwacisanzo, ayakine oyesa kuleka kuganizila zinthu zilizonse na colinga cakuti ankhale na mtendele wa m’maganizo. Koma ngati munthu angaleke kulamulila maganizo ŵake, angayambe kusonkhezelewa na viŵanda ndipo izi zingankhale zoyofya ngako. (Linganizhyani na Mateyu 12:​43-45.) Koma mtendele waakupeleka Yehova ngati tapemphela, ni ukulu ngako kupambana mtendele waangankhale nao munthu ngati waleka kuganizila zinthu zilizonse. Tetyo ngati tapemphela kwa Yehova, tuonesha kuti tumudalila ngako ndipo yove otipasa “mtendele wosasila.” (Ŵelengani Yesaya 26:3.) Njila imozi yamene Yehova ocitilamo izi, ni mwa kutiyavya kukumbukila mfundo za cendi zetephunzila m’Mau ŵake. Mfundo izi, zingatiyavye kuti tinkhale na mtendele wa m’maganizo cifukwa tuziŵa kuti Yehova otisamalila na kuti ofuna kuti tipambane.—Sal. 62:​1, 2.

6. Kansi tingaseŵenzeshe tyani mokwanila mwai wa pemphelo? (Onani soti cithunzithunzi.)

⁶ Zamungacite. Pamupilila mayeselo, ‘mukomutulila Yehova nkhaŵa zanu’ koma soti mukomusenga kuti akupaseni mtendele wake. (Sal. 55:22) Mukomusenga soti kuti akupaseni nzelu zamufunikila kuti mukwanishe kulimbana na mavuto. (Miy. 2:​10, 11) Kuyangizhyila pa mapembezelo yomusenga kuti mukwanishe kupilila, mufunika soti kupeleka mapemphelo yomuyamikila. (Afil. 4:6) Mukoona zinthu zamene zuonesha kuti Yehova okuyavyani pa nthawi ya mavuto, ndipo mukomuyamikila cifukwa cokuyavyani. Osati mukolola mayeselo kukukangishani kuona madaliso yawakupasani Yehova.—Sal. 16:​5, 6.

MAU A MULUNGU

7. Kansi kuphunzila Baibo kungatiyavye tyani kupilila?

⁷ Yehova watipasa Mau ŵake kuti akotiyavya kupilila. M’Baibo, muli mavesi anyinji amene otisimikizhyila kuti Yehova akoticilikiza. Ganizilani cisanzo cimozi ici. Lemba ya Mateyu 6:8 yulaŵila kuti: “Ausuwanu oziŵa zamufunikila olo mukaliyoŵasenga.” Yesu niye elaŵila mau aŵa, ndipo yove omuziŵa bwino ngako Yehova kupambana mwakumuziŵila munthu aliyense. Tetyo, tiliye cifukwa ciliconse cokaikila kuti Yehova ni wofunishisha kutiyavya ngati tukumana na mavuto. M’Baibo, muli malonjezo anyinji ofumila kwa Yehova amene angatipase mphamvu zatufunikila kuti tipilile mavuto.—Sal. 94:19.

8. (a) Fotokozani cisanzo ca mfundo ya m’Baibo yamene ingatiyavye kupilila. (b) Kansi n’cinji cingatiyavye kukumbukila mfundo za m’Baibo zamene zingatiyavye kupilila?

⁸ Mfundo za m’Baibo zingatiyavye kupilila. Mfundo izi, zingatipase nzelu zamene zingatiyavye kuti tipange zosankha zabwino. (Miy. 2:​6, 7) Mwacisanzo, Baibo yutiuzhya kuti tufunika kupewa kuganizila zinthu zingayoticitikila msogolo. M’malo mwake, tufunika kudalila Yehova siku iliyonse. (Mat. 6:34) Tetyo ngati tili na ciyoŵelezi coŵelenga Baibo nosinkhasinkha, tikokwanisha kukumbukila mfundo zamene zingatiyavye kupilila.

9. Kansi kuganizila pa visanzo va atumiki a Yehova okhulupilika akale kungatang’ishe tyani cidalilo casu cakuti Yehova angatiyavye?

⁹ M’Baibo muli visanzo va ŵanthu akale amene enze monga ni seo. Ŵanthu aŵa enze okhulupilika kwa Yehova ndipo yove enzoŵacilikiza. (Aheb. 11:​32-34; Yak. 5:17) Ngati tuganizila pa cisanzo cao, tingatang’ishe cidalilo casu cakuti Yehova ni “pothaŵila pasu koma soti mphamvu yasu, thandizo yopezeka mosavuta pa nthawi ya mavuto.” (Sal. 46:1) Tetyo kuphunzila za atumiki a Yehova okhulupilika akale, kutisonkhezele kutolela kukhulupilika na kupilila kwao.—Yak. 5:​10, 11.

10. Kansi tingayaseŵenzeshe tyani mokwanila Mau a Mulungu?

¹⁰ Zamungacite. Mukoŵelenga Baibo siku iliyonse, ndipo mukolemba m’ndandanda wa mavesi yamuona kuti ni yofunika ngako kuli mweo. Anyinji aona kuti ni zoyavya ngako kuŵelenga lemba ya siku m’mawa mulimonse, cifukwa olimbikishiwa na mfundo za m’Baibo. Kalongosi muyakine wa zina yakuti Mariea eona kuti mfundo iyi ni yacendi, makamaka makolo ŵake pecipezeka na matenda akhansa. Kansi n’cinji cemuyavya kusamalila makolo ŵake, apo n’kuti asala tyala na miyezi itontho kuti afwe? Yove elaŵila kuti: “M’mawa mulimonse, nenzoŵelenga nosinkhasinkha lemba ya siku kufumila m’kabuku kakuti Kuphunzila Malemba Siku Iliyonse. Kucita izi nthawi zonse, kwenzoniyavya kukumbukila mfundo za m’Malemba zamene zenzoniyavya kuika maganizo ŵangu pa zinthu zofunika ngako, m’malo moika maganizo ŵangu pa mavuto yenenzokumana nayo pa umoyo.”—Sal. 61:2.

OLAMBILA AYASU

11. Ndaŵa yanji n’zolimbikisha kuziŵa kuti patupilila mavuto tili lini seka?

¹¹ Yehova watipasa akwasu na azilongosi pa calo conse kuti akotiyavya kupilila. Kuziŵa kuti ‘akwasu pa calo conse okumana na mavuto monga ni yatukumana nayo seo,’ kutisimikizhyila kuti tili lini seka. (1 Pet. 5:9) Kulaŵila cendi, tingankhale osimikizhya kuti mavuto yaliyonse yatingakumane nayo, ayakine okumana soti na mavuto amozimozi ndipo okwanisha kupilila. Izi zuonesha kuti nase tingakwanishe kupilila.—Mac. 14:22.

12. Kansi Akhristu ayasu angatiyavye tyani, ndipo nase tingaŵacitile cinji? (2 Akorinto 1:​3, 4)

¹² Akhristu ayasu angatilimbikishe patupilila mavuto. Mtumwi Paulo eona mfundo iyi kuti ni yacendi. M’makalata ŵake, yove enzotomola mazina ya ŵanthu amene enzomuyavya peenze m’jele yosafuma pa ng’anda, ndipo enzoŵayamikila. Ove enzoyavya mtumwi Paulo mwa kumutonthoza, kumulimbikisha nomupasa thandizo yeenzofunikila. (Afil. 2:​25, 29, 30; Akol. 4:​10, 11) Nase tingakumane na mavuto yolinganako na aya. Tetyo ngati tufunikila thandizo kuti tipilile, akwasu na azilongosi angatiyavye ndipo nase tingaŵayavye ngati ofunikila thandizo.—Ŵelengani 2 Akorinto 1:​3, 4.

13. Kansi n’cinji ceyavya kalongosi Maya kupilila?

¹³ Kalongosi muyakine wa ku Russia wa zina yakuti Maya, elimbikishiwa ngako na akwasu na azilongosi. Mu 2020, ng’anda yake yesecewa na apolisi ndipo pavuli pake eimbiwa mlandu cifukwa couzhyako ayakine zakukhulupilila. Kalongosi Maya elaŵila kuti: “Pa nthawi yonse yenenzovutika maganizo, akwasu na azilongosi enzonitumila mafoni, kunilembela mameseji ndipo enzonisimikizhyila kuti onikonda. Nthawi zonse nenzoziŵa kuti nili na banja ikulu koma soti yacikondi. Tetyo kufumila pezecitika izi mu 2020, n’ne wosimikizhya kuti ove onikonda ngako.”

14. Kansi mungapindule tyani ngati muyavya ayakine? (Onani soti cithunzithunzi.)

¹⁴ Zamungacite. Pamupilila mavuto, mukonkhala pafupi na akwasu na azilongosi. Kuyangizhyila apo, osati mukowayawaya kusenga thandizo kuli akulu. Ove angankhale “malo ofisamilapo mphepo koma soti malo ofisamilapo mvula yamkuntho.” (Yes. 32:2.) Mukokumbukila kuti nao Akhristu ayanu opilila mavuto. Ngati muyavya ayakine amene ofunikila thandizo, zingakuyavyeni kunkhala na maganizo oyenelela pamupilila mavuto.—Mac. 20:35.

CIYEMBEKEZO CASU

15. Kansi ciyembekezo ca msogolo ceyavya tyani Yesu, ndipo nase cingatiyavye tyani masiku ŵano? (Aheberi 12:2)

¹⁵ Yehova watipasa ciyembekezo codalilika kuti cikotiyavya kupilila. (Aro. 15:13) Kumbukilani mwamene ciyembekezo ceyavyila Yesu kupilila mavuto yecikumana nayo, pa siku yosilizhyila ya umoyo wake pa calo. (Ŵelengani Aheberi 12:2.) Yesu enzoziŵa kuti kukhulupilika kwake kucitishe kuti zina ya Yehova ituŵishiwe. Yove enzoyembekezela mwacidwi kuyonkhala soti na Ausuwake koma soti akwake kululu. Molingana na izi, ciyembekezo casu cakuyonkhala na moyo wosasila m‘Paladaiso cutisonkhezela kupilila mavuto yaliyonse yatingakumane nayo m’calo cino ca Satana.

16. Kansi ciyembekezo ceyavya tyani kalongosi muyakine kuti apilile, ndipo tuphunzilapo cinji pa mau ŵake?

¹⁶ Onani mwamene ciyembekezo conkhala na moyo wosasila m’calo calomba ceyavyila kalongosi Alla wa ku Russia. Alume ŵake enze eikiwa m’jele peenzoyembekezela kuti aŵaimbe mlandu. Izi pezecitika, kalongosi Alla elaŵila kuti: “Kupemphela na kusinkhasinkha pa ciyembekezo ca msogolo kuniyavya kuti osati nikonkhala okhumudwa panukumana na mavuto. Nuziŵa kuti mavuto aŵa akasile. Yehova akagonjese adani ŵake ndipo akatidalise.”

17. Kansi tingaoneshe tyani kuti tuyamikila ciyembekezo cawatipasa Yehova? (Onani soti cithunzithunzi.)

¹⁷ Zamungacite. Mukopatula nthawi yoganizila za umoyo wabwino wamene Yehova watisungila msogolo. Mukoganizila soti kuti muli m’calo calomba noona madaliso yati mukankhale nayo. Ndipo mavuto yaliyonse yamungakumane nayo pali lomba yangooneka kuti “ni yakanthawi koma soti yatontho.” (2 Akor. 4:17) Kuyangizhyila apo, mukocita zilizonse zamungakwanishe kuti muuzhyeko ayakine za cikhulupililo canu. Ganizilani tyala mwaulili wovuta umoyo wa ŵanthu amene otumikila lini Yehova. Ove okumana na mavuto anyinji ndipo oziŵa lini zinthu zabwino zawatilonjeza Yehova. Tetyo zinthu tyala zitontho zamungaŵauzhyeko, zingaŵasonkhezele kufuna kuziŵa zinyinji zokhuza Ufumu wa Yehova koma soti malonjezo ŵake.

18. Ndaŵa yanji tingadalile malonjezo a Yehova?

¹⁸ Pavuli pakuti Yobu wakwanisha kupilila mavuto anyinji, euzhya Yehova kuti: “Lomba naziŵa kuti mweo mukwanisha kucita zinthu zonse na kuti paliye ciliconse camufuna kucita camungaleke kukwanisha.” (Yobu 42:2) Monga ni mwecilaŵilila Yobu, paliye ciliconse cingakangishe Yehova kukwanilisha cifunilo cake. Mfundo iyi yacendi ingatilimbikishe patupilila mavuto. Mwacisanzo, ganizilani kuti munakazi muyakine wankhala olwala kwa nthawi itali. Yove ni wokhumudwa cifukwa cakuti wankhala oluta ku vipatala vosiyanasiyana koma paliye dokota wamene wakwanisha kumuyavya. Pavuli pake, opeza dokota wabwino wamene omufotokozela zinthu zamene zumupangisha kuti akolwala na mwati amuyavyile kuti apole. Nthawi yamene iyo, munakazi uyu omvwako bwino olo kuti papite nthawi kuti apole. Lomba, n’cosavuta kupilila matenda ŵake cifukwa oziŵa kuti lombapano apole. Molingana na izi, cidalilo casu ca msogolo cakuti kukankhale Paladaiso cingatiyavye kupilila mavuto.

19. Kansi n’cinji cingatiyavye kupilila mavuto?

¹⁹ Monga ni mwataphunzilila, Yehova otiyavya kupilila mavuto yaliyonse yatingakumane nayo kupitila m’pemphelo, Mau ŵake, Akhristu ayasu na ciyembekezo casu ca msogolo. Ngati tuseŵenzesha zinthu izi mokwanila, Yehova apitilizhye kutiyavya patukumana na mavuto mpaka pa nthawi yamene calo ici ca Satana cikaonongewe.—Afil. 4:13.